SANTIAGO 2 - Lengua Sur (Enxet) Nuevo Testamento

Sẽleso antemésesek apyeykhamap anlanok egmók

¹ Elyáxeg, kéxegke kéltaha nak megkólya'áseyam Wese' egegkok Jesucristo ekha nak apcheymákpoho, nágkólteméses aksa apyeykhamap kóllanok kélmók, tén han ma'a pók énxet'ák nak.

² Aptaxnegwokmek agkok kélakneykekxexa kéxegke énxet ekxákma nak aksok apagkok, yetlo apketcheso apophék ekmomnáwa, tén han apkelántaxno apkeltakmalma enxoho, cham'a kélapencha'a enxoho, kéltaha enxoho kéláneya: “Exnata s'e, cham'a ektakmelakxa enxoho”,

³ aptaxnegwokmek agkok nahan kélakneykekxexa énxet meyke aksok apagkok nak, cham'a apkelnakta aphopák enxoho, keñe kóltehek kólának se'e: “Etnegwom xép á'”, esenhan katnehek amya'a yaneyakpok se'e: “exa xa náxop nak”,

⁴ kéltemék kéxegke apyeykhamap kóllanok kélmók kéltaha enxoho xa, kéltemék nahan kélyekpelchémo kélmók yetlo ekmaso elchetamso kélwáxok.

⁵ Elyáxeg selásekhayo, kóleyxho hana s'e: Apkelyésáha Dios ma'a ektaha nak meyke aksok apagkok keso náxop, yakwayam enxoho kayáwak melya'áseyam, yakwayam enxoho nahan exkekxak ma'a aptémakxa nak Wese' apwányam Dios, cham'a apxeyenma axta egkések Dios ma'a ektaha nak apkelásekhayo;

⁶ Kélwanyawok eyke kéxegke m'a énxet'ák meyke nak aksok apagkok. ¡kélwese'e neykhe m'a apnaktawáseykegkoho nak kéxegke, cham'a apkelyegeykegkohol'a nahan enaklók kéxegke nápakto' segyekpelchémo!

⁷ ¡Kelwese'e neykhe m'a apxeyenmol'a ekmaso apwesey Cristo, cham'a kélxawáya axta kéxegke apwesey!

⁸ Tásek katnehek kéxegke kéltahakxa eyámnaksoho enxoho kéllana m'a ektémakxa nak segánamakxa ektakmela ektaha nak meyke ekhémo, ekhawo ektémakxa nak eknaktáxésamaxche s'e: “Kólteme kélásekhayo kélmók ma'a ektémakxal'a kélásekhamaxchekxoho kélagko'.”

⁹ Kéltemésesek agkok kéxegke apyeykhamap kóllanok kélmók, cháxa kéllana megkólya'asáxma xa, kélsexnánemaxche kélagko' nahan kóltehek, megkólyahakxók ma'a segánamakxa eñama nak Dios.

¹⁰ Apsawhawók agkok apkelana énxet ma'a ekyókxoho eltémókxa nak antehek segánamakxa, keñe melyahakxók ma'a xama eltémókxa nak antehek, apsexnánémap apagko' etnehek, hakte máxa etnehek mesawhawo enxoho apkelané m'a ekyókxoho eltémókxa nak antehek segánamakxa.

¹¹ Apxeyenma apagko' axta Dios se'e: “Ná etwasha aksa ektémakxa nak sẽlyamhopma”, aptemegkek nahan appeywa s'e: “Négyakha aksa pók.” Agkok etwáseyha ektémakxa sẽlyamhopma énxet, yakhek eyke m'a pók, aptawáseyha eltémókxa nak antehek segánamakxa, aptaha enxoho xa.

¹² Kéméxchek cha'a kéxegke kóltehek kélpeywa aptamheykegkaxal'a énxet'ák yakwayam nak kóltehek kélyekpelchémo eñama m'a segánamakxa segmésamol'a yakwayam hẽlyenyekxa', tén han kóltehek kéltémakxa m'a apkeltémakxa nak xa énxet'ák nak.

¹³ Enxet ektaha nak megkamopyósa elanok pók, megkapyósek sat nahan kóllanok ma'a ekhem nelyekpelchamáxchexa sat, keñe m'a énxet ektaha axta apmopyósa elanok pók, etnehek sat apmallanma m'a ekhem nelyekpelchamáxchexa sat.

Elánamáxche háwe m'a amya'a naksal'a

¹⁴ Elyáxeg, ¿háxko katnehek apxéna enxoho enxama ekyetna mey'áseyam, cham'a megkóteyáxko enxoho aptamheykha ektakmela? ¿Awanchek enxeykel'a kawagkasek teyp xa mey'áseyam nak?

¹⁵ Agyetchásekxoho hana s'e, apyetneyk agkok xama egyáxeg, esenhan egyáxeg kelwána ektamhágko enxoho meyke apáwa tén han méko enxoho ektéyak, negmeykegkohol'a ekyókxoho ekhem;

¹⁶ Kéltemék agkok kélxama kéxegke kéláneya kélmók se'e: “Tásek sat katnehek kélxega; kólántaxnekxa kélántaxno apkelyentaxno, kóltawák nahan kélto ekwokmoho kélyakkanakmo”, wánxa agkok megkólmések eyke m'a ekmámenyého nak apyókxa kélmók, ¿kapasmoya kéltaha enxoho xa?

¹⁷ Cháxa ektémakxa nak han magya'áseyam xa: axakko' agkok magya'áseyam, megkóteyáxko enxoho nentamheykha, mékoho katnehek ektaha enxoho axakko' magya'áseyam.

¹⁸ Katnehek kexaha nahan amya'a agáneyxchek se'e: “Yetneyk xép mey'áseyam keñe ko'o ekwetáxko sektamheykha.” Hexekmós ko'o ektémakxa nak mey'áseyam xép meyke apkelané aptamheykha xama enxoho, keñe sat ko'o axekmósek xép ektémakxa nak may'áseyam yetlo selané sektamheykha.

¹⁹ Mey'ásekmok xép apyetna wánxa xama Dios, cháxa keñamak ektakmela nak aptahakxa exchep xa, megkay'ásemek nahan kelyekhama' m'a Dios, kalpexyennók nahan key'.

²⁰ Ná etne ekyéháxma', ékpelkoho exchep ma'a enxama ekyetna enxoho mey'áseyam meyke apkelané aptamheykha xama enxoho, mékoho katnehek ma'a ektémakxa nak mey'áseyam.

²¹ Apxénchek axta Dios aptaha appéwomo Abraham negko'o egyap nano', eñama m'a aptahakxa axta, cham'a memyagweykekxo axta apketche Isaac apchakha eykhe yakwayam egkések Dios.

²² Apwet'ak xép ektémakxa axta mey'áseyam Abraham yetlo ekwetamaxkoho aksok apkelané, apsawhegwokmek axta apteme mey'áseyam eñama m'a aksok apkelané.

²³ Cháxa ektahakxa axta ektaha m'a ektémakxa nak eknaktáxésamaxche s'e: “Aptemegkek axta mey'áseyam Dios Abraham, ékeso eñamakxa apxéna axta Dios aptaha appéwomo Abraham.” Apkeltamhomakpek axta nahan Abraham Dios apteme pók.

²⁴ Kélwet'ak kéxegke apxeyenma cha'a Dios, aptaha appéwomo énxet eñama ekwetamaxkoho m'a aksok apkelané nak, háwe ekwánxa agkok ma'a mey'áseyam nak.

²⁵ Hawók nahan ektémakxa axta Rahab, ektaha axta ekyakmagkáseyak pók énxet ekpathetéyak ektegye selyakye. Apxénchek axta Dios ektaha ekpéwomo eñama m'a ektahakxa axta, hakte mések axta yakwánxa enaktének pók énxet ektaha axta apkelwayam yakwayam elanok yókxexma m'a, pasmeyk axta anhan yakwayam elántépok, yakwayam enxoho elmeyekxak mók ámay.

²⁶ Ekhawo ektémakxa nak han negyókxa meyke espíritu, étsapma katnehek, étsapma nahan katnehek magya'áseyam megkeypetcha'a enxoho m'a nenlané nak nentamheykha.