SAN MARCOS 5 - Lengua Sur (Enxet) Nuevo Testamento

Enxet kelyekhama' ektawáseykha apkeñama yókxexma Gerasa

¹ Apkelwokmek axta neyp wátsam ekpayhegwayam yókxexma Gerasa.

² Xama axta aptepa Jesús kañe' yántakpayhe awáxok, apya'awak axta xama énxet ekha axta apwáxok espíritu ekmaso. Neyseksa takhaxpopeyk axta aptépak xa énxet nak,

³ hakte axta aphak ma'a neyseksa takhaxpopeyk. Méko axta kawának kamagkok xa, megkólwanchek axta anhan kóltétek cadenas.

⁴ Kólnaktetcheshok axta eykhe cha'a apmagkok cadenas, tén han ma'a apmék, elyétekkesek axta eyke cha'a, méko axta kawának kamagkok.

⁵ Yókxoho ekhem, yókxoho axta'a axta cha'a apweynchámeykha neyseksa xóp elekháhéyak elyawe, tén han neyseksa takhaxpopeyk. Elpáxamha axta cha'a, etekpagakpekxohok axta cha'a apagko' meteymog.

⁶ Xama axta apwet'a apxegakmo makhawo' Jesús xa énxet nak, apketámegkek axta, apkeltekxekwokmek axta aptapnák xóp apkenmágkaxa Jesús.

⁷ Aptahak axta apyennaktésawo appeywa s'e: —¡Náhey'áwa ko'o Jesús, Dios meyke ekhémo Apketche! ¡Eltamhok ko'o meheñásesagkók xép yetlo sekxeyenma Dios apwesey!

⁸ Aptemék axta appeywa énxet xa, hakte aptemék axta apcháneya Jesús se'e: —¡Espíritu ekmaso, katyep xa énxet apwáxok nak!

⁹ Aptahak axta apkelmaxneyeyncha'a Jesús se'e: —¿Háxko apwesey exchep? Aptahak axta apchátegmowágko s'e: —Legión ko'o sekwesey, hakte nenxámok negko'o.

¹⁰ Awanhek axta anhan eltémo meláphaksek Jesús kelyekhama' mók yókxexma eyátépexa nak.

¹¹ Keto' axta anhan aptókagkaxa aptéyak yátapomap apxámokma m'a nekha egkexe.

¹² Entahak axta espíritu elmasagcha'a eyáneya Jesús se'e: —Hẽláphés negko'o m'a apkelyagkakxa nak yátapomap, yoho nahan ólántexek negko'o apwáxók.

¹³ Apcha'awók axta anhan Jesús, kelántekkek axta espíritu elmasagcha'a apwáxok xa énxet nak, kelántaxnegwokmek axta yátapomap apwáxók. Dos mil yátapomap axta m'a, apkenyahágkek axta apkelmahágko m'a elweywekentamxa axta néten egkexe ekwokmoho apkelwokmo m'a wátsam ekpayhegwayam axta. Axta apkelweywegkok ma'a.

¹⁴ Apkenyahágkek axta m'a énxet'ák ektaha axta apkeltakmelcheso yátapomap, apkeltennágweykxeyk axta nátegma ektahakxa axta apkelweté, tén han ma'a nepyáwa tegma apwányam. Apkelxegakmek axta énxet'ák apteyánegwokmoho m'a ektahakxa axta.

¹⁵ Xama axta apkelwokmo énxet'ák aphakxa Jesús, apwetágwokmek axta apha énxet elántaxnama axta apwáxok kelyekhama' ekxámokma yetlo apkelántaxno, tén han ekha apya'áseykegkoho. Apkelakak axta anhan.

¹⁶ Apkeltennáseyha axta apnámokkok ma'a énxet'ák ektaha axta apweteykegkoho ektahakxa m'a kelyekhama' ektawáseykha axta, tén han ma'a ektahakxa axta yátapomap.

¹⁷ Keñe axta kéltamho Jesús emhagkok mók nekha.

¹⁸ Xama axta apkenátweykxo Jesús yántakpayhe, apmokók axta eykhe étlók ma'a énxet kelyekhama' axta ektawáseykha.

¹⁹ Axta eyke ya'awok Jesús. Aptahak axta aksa apcháneya s'e: —Emyekxa apxagkok, ekhágkaxa nak apnámokkok, eltennasha sat nahan ekyókxoho aptemésesakxa nak Wese' egegkok, tén han ektahakxa nak apkepyósawo apkelano exchep.

²⁰ Apxegkek axta xa énxet nak, apkeltennágwokmek axta m'a nepyeseksa tegma apwányam Decápolis cham'a aptemésesakxa axta Jesús. Pelakkasek axta anhan apkelleg'a énxet'ák ektahakxa apkeltenneykha.

Jairo apketche kelwána, kelán'a ekpaknegkeseyam Jesús apchaklamap

²¹ Xama axta apwákxo Jesús neyp wátsam ekpayhegwayam yetlo apchánte yántakpayhe, apchaknákxeyk axta énxet apxámokma apkenmágkaxa, keñe axta Jesús apha m'a neyáwa.

²² Apwokmek axta nahan xama énxet apwesey axta Jairo aptaha axta apkeñama nepyeseksa apkelámha apmonye'e nak apchakneykekxexa judíos. Xama axta apwet'a Jesús, apkelpólegwokmek axta apkenmágkaxa,

²³ awanhek axta apkeltémo epasmok. Aptahak axta apcháneya s'e: —Peyk ko'o katsapok hatte; etyánegwomho hana sekxo', epaknegwomhok sat ekyetnakxa, yakwayam enxoho katakmelwók, tén han keynnakwomho'.

²⁴ Apyetlákxeyk axta Jesús xa énxet nak, apxámok axta anhan énxet apyetlo, apkelyegeykpek axta neyseksa apkelxega.

²⁵ Paxkeygkek axta anhan énxet apxámokma xama kelán'a ekweykmo axta doce apyeyam ekháxamáxche, axta kamassegweykmok ektépeykekxa cha'a éma agkok xa.

²⁶ Wenaktémok axta eklegeykegkoho ekya'áyekmo cha'a pánakte egyepmeyk, sawhomakyek axta selyakye agkok ekyánmagkaso cha'a, axta eyke katakmelweykmok, yágweykmók axta aksa ektémakxa ekháxamáxche.

²⁷ Xama axta ekleg'a amya'a apxénákpo Jesús, neptámen axta keñamak ekyo'ókmo nepyeseksa énxet'ák, paknegwokmók axta apchaklamap.

²⁸ Hakte axta temék elchetamso awáxok se'e: “Apchaklamap sat eykhe apaknegkesamho', atakmelwók sat eyke.”

²⁹ Yetlókók axta anhan ekmasé ekteyapma éma agkok, legagkok axta ektakmelwokmo m'a ektémakxa axta ekháxamáxche.

³⁰ Apyekpelchék axta ektepa apmopwána Jesús, appeynchakpok axta apkelano énxet'ák. Aptahak axta apkelmaxneyeyncha'a s'e: —¿Yaksak ekpaknegwa'awo nak seyaklamaxche?

³¹ Aptahak axta apkelátegmowágko Jesús apkeltámeséyak se'e: —¿Ya ét'ak kélyégawo nak cha'a exchep? Yaksak ektaha aptaha nak sẽlmaxneyeykha ‘¿Yaksak sepaknegwa'awo nak?’

³² Axta eyke elwáteyásak apkelyaheykha Jesús yakwayam enxoho étak ma'a ektaha ekpaknegweykmoho.

³³ Keñe axta ekxega m'a kelán'a nak, keltekxekwokmek axta atapnák xóp apkenmágkaxa, kelpexyenegkek axta eyeka, hakte ya'ásegkok axta m'a ektahakxa axta, keltennáseyha axta ekmámnaksoho agko' ma'a ektahakxa.

³⁴ Aptahak axta apcháneya Jesús se'e: —Hatte, megkay'áseyam takmelchesakmok xeye'. Katakhekxa' yetlo meyke ektamheykha awáxok, takmelwokmek ma'a ektémakxa axta ekháxamáxche.

³⁵ Neyseksa appakmeyesma axta makham Jesús, apkelwokmo nápakha énxet'ák apkeleñama axta m'a apkemha apmonye apchakneykekxexa judíos apxagkok, yakwayam etnehek yának apkeltennáseykekxa sakcha'a egyap se'e: —Ketsekkek apketche. Ná elenxanmoho aplanneyeykha sẽlxekmóso.

³⁶ Wánxa agkok, axta eyke yahaxnók Jesús aptahakxa apkelpeywa xa énxet'ák nak. Aptahak axta apcháneya apkemha apmonye apchakneykekxexa judíos se'e: —Nágkawho apnenyek, etne aksa mey'áseyam.

³⁷ Wánxa axta aksa apkeltamho étlók Jesús ma'a Pedro, Santiago, tén han Juan, aptaha axta Santiago apyáxeg.

³⁸ Xama axta apkelwokmo m'a apkemha apmonye apchakneykekxexa judíos apxagkok, apleg'ak axta Jesús ekyennamáxma, apleg'ak axta anhan kéllekxagweykha tén han kélpáxameykha m'a kañe'.

³⁹ Aptaxnegwokmek axta Jesús ma'a. Aptahak axta apkeláneya s'e: —¿Yaksak ektaha kélyennegkesa nak exma? ¿Yaksak ektaha kéllekxagweyncha'a nak? Megkatsapak se'e sakcha'a nak, tenche'.

⁴⁰ Kélya'ásekmek axta eyke aptahakxa appeywa Jesús, wánxa agkok apsawhawók axta eyke apkelántekkesa Jesús xa énxet'ák nak, keñe axta apyentama yap, tén han egken, tén han ma'a apkelxegexma'a axta Jesús, apkelántaxnegwokmek axta m'a ekyetnakxa axta sakcha'a ápak.

⁴¹ Apmeyk axta ámek. Aptahak axta apcháneya s'e: —Talita cum (nenteme nak negko'o nempeywa: “Kelán'a étkok, ektahak ko'o seyáneya exche' s'e, kaxatakha.”)

⁴² Yetlókók axta empeykekxa néten ma'a sakcha'a ekwayam axta doce apyeyam agkok, keñe axta ekweynchameyncha'a kañe' tegma. Pelakkasók agko' axta apkelwet'a énxet'ák.

⁴³ Apyennaktések axta appeywa Jesús apkeltamho megkóltennaha xa, keñe axta apkeltamho kólagkok ekto m'a sakcha'a nak.