SAN MARCOS 4 - Lengua Sur (Enxet) Nuevo Testamento

Jesús apyetcháseykekxoho énxet apkeneykekxa aktek

¹ Apkelxekmósek axta makham Jesús énxet'ák neyáwa wátsam ekpayhegwayam. Apkenátwokmek axta yántakpayhe ekyetna axta m'a kañe' wátsam ekpayhegwayam, aphakmek axta kañe', hakte apxámok axta apchaknákxo énxet ma'a. Neyáwa axta apháha xa énxet'ák nak.

² Apkeltennáseyha axta Jesús ekxámokma amya'a apyetcháseykekxoho. Aptahak axta apkeltenneykha s'e:

³ “Kóleyxho hana s'e: Apxegkek axta énxet yakwayam epalchesagkok eknekxak aktek.

⁴ Appalcheságkek axta aktek apkenákxo, nekha aktek axta pálwokmok ámay awáxok, keñe axta ekpálwa'a náta ektókagko.

⁵ Keñe axta nekha aktek ekpálwokmo neyseksa meteymog, eyesextexa xóp; ñohok axta anhan ektepa m'a aktek nak, hakte takhók axta m'a;

⁶ wánxa agkok, xama axta ektepa ekhem, kelmetchek axta, kelyameygkek axta anhan, hakte méko axta kepmenák.

⁷ Neyseksa yányemmék axta pálwokmok nahan nekha aktek, kektegkek axta m'a yányemmék nak, keñe axta ennapa m'a aksok aktek ekteyapma, ékeso eñamakxa megkeyxna axta m'a aksok kélcheneykekxa.

⁸ Wánxa agkok, nekha aktek axta pálwokmok ektakmelakxa xóp, kektegkek axta anhan, tekkesek axta anhan ektakmela eknakxamáxche ekyexna m'a; treinta aktek axta wokmok xama ekyexna, keñe axta mók ekyexna ekwokmo sesenta aktek, keñe mók ekyexna ekwokmo cien aktek.”

⁹ Aptahak axta anhan appeywa Jesús se'e: “Kéxegke ekha nak kélheyk'ák, kóleyxho.”

Jesús apkeltennáseykekxoho ektémakxa aksok apyetcháseykekxoho

¹⁰ Xama axta aphákxo apxakko' Jesús, apkelmaxneyáha axta m'a énxet'ák apheyncha'a axta keto' aphakxa, tén han ma'a doce apkeltámeséyak nak, apkeltamhok axta elya'asagkohok ektémakxa xa aksok apyetcháseykekxoho nak.

¹¹ Aptahak axta apchátegmowágko Jesús se'e: “Apkelya'asásegwokmek kéxegke Dios aksok elyexamaxche eleñama nak ma'a aptémakxa nak Wese' apwányam Dios; wánxa agkok, aksok kélyetcháseykekxoho eyke kóltennasha m'a énxet'ák mepáxakweykmo nak ma'a aptémakxa nak Wese' apwányam Dios,

¹² yakwayam enxoho elano', melwetyehek eyke, yakwayam enxoho anhan ellega', melyekpelchehek eyke, yakwayam enxoho nahan metnekxék melya'áseyam Dios, keñe eyakmagkásekxak Dios ma'a apkeltémakxa nak.”

Jesús apkeltennáseykekxoho énxet'ák ektémakxa apyetcháseykekxoho m'a énxet apkeneykekxa nak aktek

¹³ Ektahak ko'o seláneya kéxegke s'e: “¿Yagkólyekpelchak kéxegke s'e aksok sekyetcháseykekxoho nak? ¿Háxko nahan katnehek kólya'ásegwomhok ekyókxoho m'a aksok sekyetcháseykekxoho nak?

¹⁴ Enxet apkeneykekxa nak aktek ekyetchesamaxkoho m'a énxet apkeltenneykha nak tásek amya'a.

¹⁵ Yetneyk nahan nápakha énxet aphawo m'a aktek ekpálwayam nak ámay awáxok; yeyxhok ma'a kéltenneykha, keñe natámen aplegé, kawak Satanás, kalekkesek ma'a amya'a kélpekkencheso nak apwáxok.

¹⁶ Nápakha énxet nahan aphawók ma'a aktek ekpálwayam nak neyseksa meteymog; eñak ma'a amya'a kéltenneykha, ñohok nahan emok heykxa, yetlo ekpayheykekxa apwáxok.

¹⁷ Wánxa agkok, melenxanmók eyke apkelyennaktésamo apteme melya'áseyam, hakte megkeytek kañó' agko' apwáxók ma'a amya'a kéllegaso; wa'ak agkok apkellegeykegkoho ekyekkónma esenhan ma'a kélmenxeneykha nak, eñama apma takha' xa amya'a nak, elwátesagkok nahan aptamhéyak melya'áseyam.

¹⁸ Nápakha énxet nahan aphawók ma'a aktek ekpálwayam nak neyseksa yányemmék; ellegak ma'a amya'a kéllegaso;

¹⁹ akke xéneykha apwáxók ma'a aksok nenxamáseyak nak keso náxop, tén han eknaktawáseykencha'a m'a apkelmopmenyého nak etnahagkok ekxákma aksok apagkok, apmenyék étak ekyókxoho aksok apagkok. Láneyók ekxéneykha apwáxók ekyókxoho xa aksok nak, kamaséseshok cha'a ekyetno apwáxók amya'a kéllegaso ekyókxoho xa aksok nak, megkahayók nahan kótaksek apyakmagkaso apkeltémakxa.

²⁰ Yetneyk nahan nápakha énxet apkellegé nak amya'a kéllegaso, elyahakxohok nahan, tásek nahan katnehek ekteyapma apkelyakmagkaso apkeltémakxa ekhawo m'a aksok aktek kélcheneykekxa nak ektakmelakxa xóp. Nápakha nahan aphawók ma'a hótahap apyexna ekteyapmol'a treinta apaktek, keñe nápakha aphawo m'a hótahap apyexna ekteyapmol'a sesenta apaktek, keñe nápakha aphawo m'a hótahap apyexna ekteyapmol'a cien apaktek.”

Jesús apyetcháseykekxoho chálewaso

²¹ Aptahak axta anhan apkeláneya Jesús se'e: “¿Kólsogma enxeykel'a chálewaso yakwayam kólpekkenek kóneg yántéseksek, kóneg nentaháno negyetnamakxa néten enxeykel'a kólpekkenwók? Mantehek cha'a xa. Néten negkexanmak chálewaso yakwayam enxoho kalsásamhoxma xa chálewaso nak.

²² Keyphegwatámhok ma'a ekyókxoho aksok ekpowásamáxkoho nak, yáxñakxoho nahan keytnekxak ma'a aksok ekyexamaxche nak.

²³ Kéxegke ekha nak kélheyk'ák kóleyxho xa.”

²⁴ Aptahak axta anhan apkeláneya Jesús se'e: “Kóltakmelchesho kélháxenmo xa ektahakxa nak kéllegé. Ekwánxa enxoho kélyetsáteyak aptémakxa kélmók kéxegke, sat nahan exnéshok Dios apkelyetsáteyak kéltémakxa kéxegke xa; Eyeykhásamhok sat nahan aptemésesakxa kéxegke Dios.

²⁵ Kéxegke ekyetnakxa enxoho aksok, kólmeyásekxohok sat makham mók; keñe kéxegke meyke nak aksok, kóltápexcháseshok sat kólyementemekxak ekyetnakxa enxoho, antawók eykhe katnehek.”

Jesús apyetcháseykekxoho aksok aktek ekteyapma

²⁶ Aptahak axta nahan apkeltenneykha Jesús se'e: “Máxa énxet apkeneykekxa aktek ma'a aptémakxa nak Wese' apwányam Dios;

²⁷ aptenchek agkok axta'a, keñe exatakhak ekhem, katyapok eyke m'a aksok aktek kélcheneykekxa, kawanák nahan, mey'asagkek eyke ektémakxa m'a ektaha apkeneykekxa.

²⁸ Ektekkeso agko' katnehek aksok ma'a xóp; áwa' sekxo' katyapok, keñe axayo' katyapok ma'a ekyexna, keñe axayo' agko' katyapok ma'a aktek eñama ektekkeso m'a ekyexna.

²⁹ Kelyennakkak agkok aktek, kanakxaxche, hakte kawók ekhem eknakxamáxchexa ekyexna.”

Jesús apyetcháseykekxoho yámet ekweseyl'a mostaza aktek

³⁰ Aptahak axta anhan Jesús apkeltenneykha s'e: “¿Yaksak aksok egwanchek agyetchásekxohok ma'a aptémakxa nak Wese' apwányam Dios? ¿Yaksak nahan egwanchek aghésho'?

³¹ Hawók ma'a yámet ekweseyl'a mostaza aktek kélcheneykekxohol'a. Ketsék agko' ma'a, megkaxnawok ma'a ekyókxoho aksok aktek nak keso náxop.

³² Wánxa agkok, kélchenakxeyk agkok, kawaná', kalyeykhagkok ma'a kélcheneykekxal'a namyep, elyawa nahan katnehek aktegák, kawomhok nahan nátétkók elánegwayam axanák ma'a kóneg áwa' pesese agkok.”

Ektémakxa appeywa apyetcháseykekxoho Jesús

³³ Cháxa ektahakxa axta apkeltennáseykha énxet'ák Jesús apkelxekmósa m'a amya'a apagkok nak, aptahak axta cha'a apyetcháseykekxoho xa ektaha nak, cham'a apkelya'ásegkaxa axta cha'a xa énxet'ák nak.

³⁴ Aksok apyetcháseykekxoho axta aksa cha'a apkeltennáseykha énxet'ák, keñe axta apkeltámeséyak eltennásekxók cha'a ektémakxa aptamhákxo enxoho apxakcha'awo'.

Jesús apmaseso exchahayam ekyennakte tén han yegmen elyakyahayam elyawe

³⁵ Xama axta ekyaktesa, aptahak axta Jesús apkeláneya apkeltámeséyak se'e: —Olmeyekxak neyp wátsam ekpayhegwayam nak.

³⁶ Apkexakkek axta aksa énxet ma'a, kélyentegkek axta Jesús, axta apkelchántak ma'a yántakpayhe, apha axta kañe' Jesús; kelyetlókek axta anhan nekha yántakpayhe.

³⁷ Pelakkasek axta ektepa exchahayam ekyennakte agko', kayhok agko' axta m'a exchahayam nak, chapchek axta yegmen elyakyahayam yántakpayhe, lanak axta anhan yegmen awáxok.

³⁸ Wánxa agkok, aptenchek axta eyke Jesús atakla yántakpayhe, yetlo apteyáyam axta apténak. Kélxátekhásekxeyk axta. Entahak axta amya'a apcháneyákpo Jesús se'e: —¡Sẽlxekmóso! ¿Yagkatnaháha apwáxok peya ólweywagkok?

³⁹ Apkempákxeyk axta néten Jesús, appakhetchesek axta exchahayam, aptahak axta anhan apcháneya wátsam ekwányam se'e: —¡Kawanma! ¡Katakmelchásekxa ekyetno! Massék axta anhan exchahayam ekyennakte, kelwáneykxók axta nahan exma.

⁴⁰ Keñe axta aptaha apkeláneya Jesús apkeltámeséyak se'e: —¿Yaksak ektaha kélaka nak? ¿Mékoya makham megkólya'áseyam kéxegke?

⁴¹ Apkelakawók apagko' axta xa énxet'ák nak, aptahak axta apkelmaxneyeyncha'a pók se'e: —¿Yaksak kexaha énxet xa aptéma nak, wokmók exchahayam elyaheykekxoho appeywa, tén han wátsam ekwányam?