SAN LUCAS 9 - Lengua Sur (Enxet) Nuevo Testamento

Jesús apkeláphaso apkeltámeséyak yakwayam eltennaha m'a aptémakxa nak Wese' apwányam Dios

¹ Apchánchesákxeyk axta Jesús doce apkeltámeséyak, apkelmeyásegkek axta apkelmopwancha'a yakwayam elántekkesek ekyókxoho ektémakxa kelyekhama', tén han yakwayam eltakmelchesók ma'a elháxamáxche.

² Apkeláphásek axta yakwayam enxoho eltennaha m'a aptémakxa nak Wese' apwányam Dios, tén han eltakmelchesók ma'a elháxamáxche.

³ Aptahak axta apkeláneya s'e: —Nágkólsaw aksa xama aksok neyseksa kélxega ámay, cham'a kéltaskapeykha nak, tén han ma'a nahápa, tén han ma'a kélto, tén han ma'a selyakye, nágkólsaw nahan kéltaxno yakwayam kólyakmagkasek pók.

⁴ Tegma kélwánxa enxoho, kólhamho sat ma'a ekwokmoho kélxegákxo enxoho makham mók nekha.

⁵ Agkok kólmáxchek takha' nátegma kélwánxa enxoho, kólántep sat ma'a, kólpalches sat kélmagkok xóp ánek, yakwayam enxoho metnatchesek peya ellegásesagkohok Dios xa énxet'ák nak.

⁶ Apkelxegkek axta xa énxet'ák nak, apsawheyha axta nátegma, apkeltennáha axta cha'a m'a amya'a segwagkasamo nak teyp, apkeltakmelchesakmek axta anhan elháxamáxche.

Ektamheykha apwáxok Herodes

⁷ Apleg'ak axta amya'a Herodes apxénákpo Jesús tén han ma'a ekyókxoho aksok apkelané axta Jesús; axta ey'ásegkok ektahakxa elchetamso apwáxok, hakte nápakha énxet axta apxénak apxátekhágwokmo Juan,

⁸ keñe axta nápakha énxet apxénak apwa'akto makham Elías aptaha axta Dios appeywa aplegaso, keñe axta anhan nápakha énxet apxéna apxátekhágwokmo xama m'a énxet'ák nano' Dios appeywa apkellegaso axta.

⁹ Keñe axta Herodes aptaha appeywa s'e: —Ko'o axta seltémo kólyakténchesek apyespok Juan. ¿Yaksak eyke kex'a m'a énxet nak, cham'a seklegayol'a cha'a exénakpok elának aksok ekxámokma. Axta keñamak apkelenxáneykmo Herodes étak Jesús

Jesús apkeléyak aptéyak cinco mil énxet'ák

¹⁰ Xama axta apkelwákxo aphakxa Jesús ma'a apkeltámeséyak, apkeltennáseyha axta Jesús ma'a ektahakxa axta aksok apkeláneyak. Mók nekha axta apkelya'ásak Jesús apxakcha'awók xa, axta apkelya'áseykxak ma'a nátegma eltamhomaxchexa axta Betsaida.

¹¹ Xama axta apkelleg'a amya'a énxet'ák, apkemhágkek axta; apkelápeyha axta Jesús xa énxet'ák nak, apkeltennáseyha axta m'a aptémakxa nak Wese' apwányam Dios, apkeltakmelchesakmek axta anhan énxet apkelháxamap.

¹² Xama axta ektaxnakmo, apya'awékxeyk axta doce apkeltámeséyak aphakxa Jesús. Aptahak axta apcháneya s'e: —Eláphés énxet yakwayam enxoho ellókasekxak apkelyampé, tén han etegyagkok aptéyak ma'a nátegma, cham'a apheykegkaxa nak énxet eyágketexa, hakte méko aksok se'e yókxexma nak.

¹³ Aptahak axta apkeláneya Jesús se'e: —Kólmés kéxegke aptéyak. Aptahak axta apkeltámeséyak apkelátegmowágko s'e: Cinco pan akke aksa apyetna negko'o keñe ánet kelasma, apkeltamhok enxeykel'a antegyásekxak negko'o aptéyak apyókxoho xa énxet'ák nak.

¹⁴ Cinco mil axta apyókxoho m'a énxet'ák nak. Wánxa agkok, aptahak axta apkeláneya Jesús apkeltámeséyak se'e: —Kólána elyakyesagkok apheykha énxet. Cincuenta sat cha'a etnehek apyókxoho.

¹⁵ Aptamhágkek axta anhan xa, apháha axta apyókxoho.

¹⁶ Keñe axta apkelma Jesús ma'a cinco pan nak, tén han ma'a ánet kelasma, apsekhákxok axta néten, apmések axta ekxeyenma apwáxok Dios eñama m'a nento nak, apkelyepteyk axta pan, keñe axta apkelmeyásegko apkeltámeséyak yakwayam enxoho emlaskok énxet'ák.

¹⁷ Aptókagkek axta énxet'ák xa ekwokmoho apkelyakkanakmo, doce axta anhan wokmok apxata eleymomáxche aptéyak.

Pedro apxeyenma Jesús aptaha Mesías

¹⁸ Xama ekhem axta aptahak nempeywa nelmaxnagko apxakko' Jesús, apkeltámeséyak axta anhan apkelxegexma'a, aptahak axta apkelmaxneyeyncha'a s'e: —¿Háxko aptémakxa énxet sexeyenma ko'o?

¹⁹ Aptahak axta apkelátegmowágko apkeltámeséyak se'e: —Nápakha énxet'ák cha'a aptahak apxéna exchep Juan el Bautista, keñe nápakha énxet apxéna exchep aptaha Elías, keñe nahan nápakha énxet apxéna apxátekhágwokmo xama m'a énxet'ák apkellegaso axta Dios appeywa nano' axta.

²⁰ —Háxko eyke kéltémakxa sexeyenma ko'o kéxegke? —axta aptahak apkelmaxneyeyncha'a. Aptahak axta apchátegmowágko Pedro s'e: —Xép aptaha Mesías apkeñama Dios.

Jesús apxeyenma yakwayam yetsapok

²¹ Wánxa agkok, apkeltamhok axta eyke Jesús mexének apkeltámeséyak aptaha Mesías.

²² Aptahak axta apkeláneya s'e: —Awanhek sat katnehek aplegeykegkoho ektaha nak Apketche énxet, etaknók sat ma'a apkelámha apmonye'e nak apchakneykekxexa énxet'ák judíos, tén han ma'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso nak apnámokkok ektémakxa segánamakxa. Yakhek sat nahan, wánxa agkok, antanxo ekhem sat eyke exátekhágwók.

²³ Aptahak axta apkeláneya apyókxoho énxet'ák se'e: —Kélmokók agkok kóltehek kélxama kéxegke selxekmóso, kólwatés xa kélmáheyókxa nak kóltehek kéxegke kélagko', kólpátem kélagko' aksok ektegyéso kélagkok yókxoho ekhem, hélyetlogma ko'o.

²⁴ Kéxegke ektahakxa enxoho kélmasma ektémakxa nak kélyennakte, kamassegwók sat, wánxa agkok, kéxegke ektahakxa enxoho ekmassegwayam ektémakxa kélyennakte eñama ko'o, kólwetágwók sat kélyennakte.

²⁵ ¿Kapasmoya énxet ekmassegwokmo enxoho ektémakxa apyennakte m'a apweté nak ekyókxoho aksok keso náxop, cham'a aptawáseykpoho apagko' enxoho?

²⁶ Agkok exénak énxet aptaha sétleykha ko'o, tén han meltenneyncha'a enxoho m'a amya'a ahagkok, mexének sat nahan apwesey m'a aptaha nak Apketche énxet, cham'a apwakto sat yetlo apcheymákpoho, tén han apcheymákpoho m'a Apyap, tén han yetlo m'a apkelásenneykha apkelpagkanamap nak.

²⁷ Nápakha énxet'ák sat meletsepek apheyncha'a nak se'e met'a enxoho makham kawak ma'a aptémakxa nak Wese' apwányam Dios.

Jesús elyenmeykekxa apyókxa

²⁸ Natámen ekyeykhe axta ocho ekhem xa apkelpakhetcháseykpoho axta, apkenátweykxeyk axta néten egkexe Jesús yakwayam etnehek nempeywa nelmaxnagko. Pedro axta apxegexma, Santiago, tén han ma'a Juan.

²⁹ Neyseksa apteme nempeywa nelmaxnagko axta yakmagkásak ektémakxa nápát Jesús, apmopé apagko' axta aptamhákxak aptaxno, apkelyenmákxeyk axta anhan;

³⁰ Apkelánteyapwa'ak axta anhan apkánet énxet apkelpakhetcháseykpoho Jesús. Moisés axta m'a, Elías axta anhan.

³¹ Wakha'ak axta elseyexma eyeymáxkoho; axta apxénak yakwánxa katnehek apketsapma Jesús ma'a tegma apwányam Jerusalén.

³² Apténawók axta Pedro tén han ma'a apkelxegexma'a. Xama axta apnakxétekhágko, apwet'ak axta Jesús apcheymákpoho, tén han apkelwet'a m'a apkánet énxet aptaha axta apkelxegexma'a.

³³ Xama axta peya ényekxak Jesús ma'a apkánet énxet nak, aptahak axta Pedro s'e: —Sẽlxekmóso. ¡Ektakmelakxoho agko' nelwa'a negko'oxa s'e! Anlának sat negko'o apkántanxo tegma apketkók: xama sat xép, xama sat nahan Moisés, xama sat nahan ma'a Elías. Axta ey'ásegkok Pedro m'a aptahakxa axta appeywa.

³⁴ Neyseksa appakmeyesma axta eyahapwa'a yaphopé xa apyókxoho nak. Xama axta apyekpelcha apchakneyncha'a kañe' yaphopé, apkelakak axta.

³⁵ Keñe axta ektepa kélpeywa neyseksa yaphopé. Entahak axta s'e: “Keso hatte ko'o s'e, aptaha axta selyéseykha, kóleyxho appeywa.”

³⁶ Yetlókók axta aptamheykekxa apxakko' Jesús natámen eklegamaxche xa kélpeywa nak. Axta eyke eltenneykha xa énxet'ák nak, axta eltennáseykha xama énxet ma'a ektémakxa axta aksok apweté, cháxa ektéma axta xa.

Jesús aptakmelcheseyam wokma'ák ekha axta apwáxok espíritu ekmaso

³⁷ Mók ekhem axta entahak, apkelántepa apkeleñama m'a néten egkexe, énxet apxámokma axta apkelanyexágkok Jesús.

³⁸ Nepyeseksa énxet axta aptahak apyennaktésawo appeywa énxet se'e: —Sẽlxekmóso, elano hana hatte. Wánxa ko'o xama hatte s'e;

³⁹ Kamok cha'a espíritu ekmaso xa, kapeykesesha nahan cha'a apátog, yetsepekxohok nahan cha'a, katekkesesek nahan cha'a ekyakmopé apwáxok. Katwasagkohok cha'a, yámenyék nahan keynyekxa'.

⁴⁰ Eltamhok xeykhe etekkesek apkeltámeséyak xa espíritu ekmaso nak, mopwancha'ak xeyke.

⁴¹ Aptahak axta apchátegmowágko Jesús se'e: —¡Enxet apkelya'áseyam kéxegke tén han kélxegányam! ¿Háxko sat ekwánxa ekhem kammok sekha ko'o kélnepyeseksa kéxegke? ¿Háxko sat ekwánxa ekhem kammok selenmáxamáxkoho kéxegke? Entemegma apketche s'e.

⁴² Xama axta apyepetchegwokmoho Jesús ma'a wokma'ák nak, yaknegkesek axta kelyekhama' náxop xa wokma'ák nak, apketsapákxeyk axta makham, wánxa agkok apakhetchesek axta eyke Jesús ma'a espíritu ekmaso nak, aptakmelchesekmek axta m'a wokma'ák nak, keñe axta apmeyáseykxo m'a apyap.

⁴³ Pelakkasek axta apkelwet'a apyókxoho énxet'ák ektémakxa ekyawe apmopwána Dios. Neyseksa ekpelakkaso apkelweté apyókxoho énxet'ák ektahakxa aksok apkelané Jesús axta aptahak apkeláneya apkeltámeséyak se'e:

Jesús apxéneykekxoho makham yakwayam yetsapok

⁴⁴ —Kóltakmelchesho kélháxenmo s'e. Nágkalwagkamak nahan: Kólának sat emok énxet'ák ma'a aptaha nak Apketche énxet.

⁴⁵ Axta eyke elya'ásegkok apkeltámeséyak aptahakxa axta apkeláneya Jesús, hakte axta egkeyásak Dios yakwayam elya'asagkoho'; apkelakak axta anhan yának eltennásekxohok Jesús ma'a ektahakxa axta aksok apxeyenma.

¿Yaksak ektaha ekyawe kéláyo?

⁴⁶ Apkelpakhetchásekpok axta Jesús apkeltámeséyak apxéna, yaksak kexaha ektahakxa ekyawe kéláyo nepyeseksa.

⁴⁷ Xama axta apyekpelcha Jesús ektahakxa axta elchetamso apwáxok apkeltámeséyak, apmeyk axta xama sakcha'a, keñe axta apkenegkesekmo apkenmágkaxa.

⁴⁸ Aptahak axta apkeláneya s'e: —Enxet ektahakxa enxoho apchápeykha s'e sakcha'a nak eñama apxeyenma ko'o sekwesey, heyahapmakha nahan ko'o xa; keñe énxet ektahakxa enxoho seyápeykha ko'o, yahapmakha nahan ma'a aptaha axta seyáphaso ko'o. Enxet meyke nak kéláyo kélnepyeseksa kéxegke, cháxa ektahakxa ekyawe kéláyo xa.

Hegweyhénekxohok cha'a m'a énxet mehenmexeykha nak

⁴⁹ Aptahak axta Juan apcháneya Jesús se'e: —Sẽlxekmóso, negwet'ak axta negko'o xama énxet aptekkesa kelyekhama' yetlo apxeyenma apwesey exchep; axta eyke óg'awok negko'o, hakte háwe nenxegexma.

⁵⁰ Aptahak axta apchátegmowágko Jesús se'e: —Nágkólnókasha aksa, hakte énxet ektahakxa enxoho mehenmexeykha negko'o, hegweyhenekxohok cha'a.

Jesús apkelpakhetcheso Santiago tén han Juan

⁵¹ Xama axta eyágketwokmo ekhem yakwánxa emyekxak néten Jesús, xénchek axta apwáxok emyekxak Jerusalén yetlo megyeye.

⁵² Apkeláphásek axta apkeltámeséyak apkeltamho elmahagkok nátegma Samaria yakwayam enxoho etegyaha yakwánxa etyenek;

⁵³ axta eyke emokók emok takha' énxet'ák apheykha Samaria, hakte apkelya'ásegkok axta apmeyákxo Jesús ma'a Jerusalén.

⁵⁴ Xama axta apkelwet'a Jesús apkeltámeséyak xa, Santiago axta m'a, tén han Juan, aptahak axta apkelpakmeta s'e: —Wese', ¿apmenyeya agának negko'o kaweywenták táxa eñama néten yakwayam kasawhohok xa énxet'ák nak?

⁵⁵ Appeynchakpók axta eyke Jesús, apkelpakhetchesek axta xa apkeltámeséyak nak.

⁵⁶ Keñe axta apkelmeyákxo mók apheykegkaxa énxet.

Enxet'ák apmáheyo axta etlawha Jesús

⁵⁷ Neyseksa apkelxega ámay axta, aptahak xama énxet apcháneya Jesús se'e: —Emenyék ko'o eytlawha apmahágkaxa enxoho exchep.

⁵⁸ Aptahak axta apchátegmowágko Jesús se'e: —Yetneyk máxek axanák yemmáleg, yetneyk nahan axanák náta, méko eyke apteyayam ma'a aptaha nak Apketche énxet.

⁵⁹ Aptahak axta apcháneya Jesús pók énxet se'e: —Hétlawha exchep Wánxa agkok, aptahak axta eyke apchátegmowágko énxet se'e: —Wese', heyho sekxo' wátawónegwakxak táta aphápak.

⁶⁰ Aptahak axta apchátegmowágko Jesús se'e: —Yoho kalatawónek apkeletsapma m'a nétsapma nak; exeg xép, eltennaha m'a aptémakxa nak Wese' apwányam Dios.

⁶¹ Pók énxet axta aptahak apcháneya Jesús se'e: —Wese', ekmokók ko'o eytlawha exchep, heyho sekxo' alpeykesekxak ko'o m'a ekheykha nak exagkok.

⁶² Aptahak axta apcháneya Jesús se'e: —Appeynchekmek agkok xóp énxet, keñe elenxanmohok apkenmexeykekxoho neptámen, mopwanchek etxek ma'a aptémakxa nak Wese' apwányam Dios.