SAN LUCAS 8 - Lengua Sur (Enxet) Nuevo Testamento

Kelán'ák ekpasmoma axta cha'a Jesús

¹ Apxámok axta apyawakxa tegma apmaheyak cha'a Jesús tén han ma'a nátegma apheykegkaxa axta cha'a énxet, natámen xa. Apkeltenneykha axta cha'a apxeyenma m'a aptémakxa nak Wese' apwányam Dios. Axta apkelxegexma'a m'a doce apkeltámeséyak axta,

² nekha kelán'ák axta anhan apkelxegexma'a, cham'a apkelántekkesesama axta awáxók espíritu elmasagcha'a, tén han ma'a apkeltakmelcheseykmo axta ektémakxa elháxamáxche. María axta elxegexma'a m'a kelán'ák nak, cham'a eltamhomaxko axta Magdalena, kélántekkesesama axta awáxok siete kelyekhama'.

³ Juana, Cuza aptáwa axta anhan ma'a, aptaha axta wese' Herodes apkeláneseykha aksok apagkok; Susana axta anhan ma'a, tén han ma'a ekyókxoho kelán'ák ekpasmoma axta cha'a Jesús eñama ekméso aksok agkok ekyetnakxa enxoho.

Jesús apyetcháseykekxoho énxet apkeneykekxa aktek

⁴ Apxámok axta énxet apkelántepa nátegma apteyánegwokmoho Jesús, apxámágwokmek axta énxet ma'a, keñe axta apkeltennáseyncha'a apyetcháseykekxoho ektéma nak se'e:

⁵ “Apxegkek axta énxet yakwayam epalchesagkok eknekxak aktek. Appalchásegkek axta aktek, nekha aktek axta pálwokmok ámay awáxok, kelteyammexchek axta anhan, náta axta anhan tókagkok.

⁶ keñe axta nekha aktek ekpálwokmo neyseksa meteymog; xama axta ektepa kélcheneykekxa m'a aktek nak, kelyameygkek axta hakte axta kayésawoxma m'a.

⁷ Neyseksa yanyemmék axta pálwokmok nahan nekha aktek, xama axta ektépawo xamo' yanyemmék ma'a aksok aktek kélcheneykekxa, kennapchek axta anhan yanyemmék xa aksok aktek ekteyapma nak.

⁸ Wánxa agkok, pálwokmek axta nekha aktek ektakmelakxa xóp; kektegkek axta anhan, tekkesek axta anhan ektakmela eknakxamáxche ekyexna m'a, cien aktek axta cha'a wokmok xama ekyexna.” Cháxa apxéna axta Jesús xa, keñe axta anhan aptaha apyennaktésawo appeywa s'e: “¡Kéxegke ekha nak kélheyk'ák, kóleyxho!”

Jesús apkeltennáseykekxoho ektémakxa aksok apyetcháseykekxoho

⁹ Apkelmaxneyáha axta apkeltámeséyak Jesús apkeltamho elya'asagkohok ektémakxa xa aksok apyetcháseykekxoho nak.

¹⁰ Aptahak axta apchátegmowágko Jesús se'e: “Apkelya'asásegwokmek kéxegke Dios aksok elyexamaxche eleñama nak ma'a aptémakxa nak Wese' apwányam Dios, wánxa agkok, aksok sekyetcháseykekxoho eyke eltennáseyha m'a pók énxet'ák nak, yakwayam enxoho elano', melwetyehek eyke, yakwayam enxoho nahan ellegak, melyekpelchehek eyke.

Jesús apkeltennáseykekxoho énxet'ák ektémakxa apyetcháseykekxoho m'a énxet apkeneykekxa nak aktek

¹¹ “Keso ektémakxa sekyetcháseykekxoho ko'o s'e: aktek ekyetchesamaxkoho m'a Dios appeywa nak;

¹² keñe m'a aktek ekpálwayam axta ámay awáxok ekyetchesamaxkoho énxet'ák apkellegé nak Dios appeywa, keñe kawak kelyekhama', kalekkesek ma'a amya'a kélpekkencheso nak apwáxók, yakwayam enxoho elya'asók, keñe anhan melwagkasakpek teyp.

¹³ Aktek ekpálwayam axta neyseksa meteymog ekyetchesamaxkoho m'a énxet'ák apkellegé nak tásek amya'a, ñohok nahan emok heykxa yetlo ekpayheykekxa apwáxók, wánxa agkok megkeytek eyke kañók agko' apwáxók amya'a kéllegaso. Yakwatakxoho etnehek mey'áseyam, wa'ak agkok ekyekkónma, elwátesagkok apteme melya'áseyam.

¹⁴ Aktek ekpálwayam neyseksa yanyemmék ekyetchesamaxkoho m'a énxet'ák apkellegé nak amya'a kéllegaso, katakmelchesagkohok eyke kamasésesek apteme melya'áseyam ma'a aksok ekyetnakhasamo nak apwáxók, cham'a apxámáseyak nak aksok, tén han ma'a aksok apyespagkamakxa nak, megkatakmelwomek nahan aptamhéyak melya'áseyam.

¹⁵ Aktek ekpálwayam axta ektakmelakxa xóp ekyetchesamaxkoho m'a énxet'ák ektakmela nak apwáxók, emawhok nahan yeyxhok amya'a kéltenneykha, elyahakxohok nahan, meyensemek nahan apteme mey'áseyam, tásek nahan katnehek ekteyapma apkelyakmagkaso apkeltémakxa, ekhawo m'a aksok ekyexna eknakxamáxche nak.

Jesús apyetcháseykekxoho chálewaso

¹⁶ “Megkólalewaksek nahan chálewaso keñe kólápok xama aksok, kóneg nentaháno negyetnamakxa néten esenhan kólpekkenwók. Néten aksa kólchexnek cha'a, yakwayam kalsásesexma m'a énxet ektaha aptaxnegwayam kañe'.

¹⁷ Keyphegwatámhok ma'a ekyókxoho aksok ekpowásamáxkoho nak, yáxñakxoho nahan keytnekxak ma'a aksok ekyexamaxche nak.

¹⁸ “Kóltakmelchesho nahan kélháxenmo s'e, hakte kéxegke ekyetnakxa enxoho aksok, kólmeyásekxohok sat makham mók, keñe kéxegke meyke nak aksok, kóltápexcháseshok sat kólyementemekxak ma'a aksok kélanagkama nak keytnak kéxegke.”

Jesús egken tén han apkelyáxeg

¹⁹ Wokmek axta Jesús egken ma'a aphakxa axta Jesús, yetlo apkelyáxeg axta anhan. Yawanchek axta eyke ekmoko keypetchegwomho', hakte apxámok axta énxet.

²⁰ Kéltennásekxeyk axta Jesús: —Yókxexma kenmáha egken yetlo apkelyáxeg, keltamhok kótak xép.

²¹ Aptahak axta apchátegmowágko Jesús se'e: —Kéxegke ektahakxa enxoho kélmáheyo kóleyxhok Dios appeywa, tén han kóllának ma'a eltémókxa nak antehek, cha'a méme ahagkok ko'o m'a, tén han elyáxeg.

Jesús apmaseso exchahayam ekyennakte, tén han yegmen elyakyahayam elyawe

²² Xama ekhem axta apchánta Jesús yántakpayhe yetlo apkeltámeséyak. Aptahak axta apkeláneya s'e: Olmeyekxak neyp wátsam ekpayhegwayam nak. Apkelxegkek axta anhan.

²³ Aptenchek axta Jesús neyseksa apkelyeykheykekxa wátsam. Pelakkasek axta ektepa exchahayam ekyennakte neyseksa wátsam ekpayhegwayam. Peyk axta kalának yegmen yántakpayhe awáxok, keto' axta anhan ekweywekegkaxa.

²⁴ Keñe axta apya'aweykxo apkeltámeséyak apxátekháseykxo Jesús. Aptahak axta apcháneya s'e: —¡Sẽlxekmóso, peyk ólweywagkok! Apkempákxeyk axta néten Jesús, appakhetchesek axta exchahayam, tén han ma'a yegmen elyakyahayam. Massawók agko' axta anhan, kelwaneykxók axta exma.

²⁵ Keñe axta aptaha apcháneya apkeltámeséyak se'e: ¿Háxko ekmahágkaxa megkólya'áseyam nak kéxegke? Wánxa agkok, apkelyegwakkek axta eyke xa énxet'ák nak, pelakkasek axta anhan apkelwet'a ektahakxa. Aptahak axta apkelmaxneyeyncha'a cha'a pók se'e: —¿Yaksak énxet xa aptéma nak appakhetchesamo nak exchahayam tén han yegmen, kelyahákxók nahan.

Enxet kelyekhama' ektawáseykha apkeñama yókxexma Gerasa

²⁶ Apkelwokmek axta yókxexma Gerasa ekyetnama nak neyp wátsam ekpayhegwayam, ekpayho nak Galilea.

²⁷ Xama axta apteyapwokmo Jesús ma'a, nátegma axta apkeñamak aptepa xama énxet kelyekhama' ektawáseykha apyo'ókmo Jesús. Wenaktémok axta apweynchámeykha meyke apáwa, axta anhan exmak kañe' tegma, neyseksa takhaxpopeyk axta aksa aphak.

²⁸ Xama axta apwet'a Jesús, apkeltekxekkek axta aptapnák apkenmágkaxa. Aptahak axta apyennaktésawo appeywa s'e: —¡Náhey'áwa ko'o, Jesús, Dios meyke ekhémo Apketche! ¡Eltamhok ko'o meheñásesagkók xép!

²⁹ Aptemék axta appeywa xa, hakte appakhetchesek axta Jesús espíritu ekmaso apkeltamho katyapok énxet apwáxok. Kaleklemek axta cha'a katnekxak ekmákxo enxoho kelyekhama'; kólnaktetcheshok axta eykhe cha'a apmék cadenas, tén han apmagkok, yakwayam enxoho kólmagkok, elyétekkesek axta eyke cha'a, meykexa énxet axta anhan cha'a kay'ásekxak kelyekhama' katnetcheksek.

³⁰ Aptahak axta apkelmaxneyeyncha'a Jesús se'e: —¿Háxko apwesey exchep? —Legión ko'o sekwesey, axta aptahak apchátegmowágko m'a énxet nak. Aptemék axta appeywa xa, hakte xámok axta kelyekhama' elántaxno apwáxok.

³¹ Axta kaltamhok eláphaksek Jesús máxek ekmatawóneg xa kelyekhama' nak.

³² Keltamhok axta espíritu elmasagcha'a yohok Jesús kalántaxnegwók apwáxók yátapomap, hakte apxámok axta yátapomap aptókagko aptéyak néten egkexe. Apcha'awók axta anhan Jesús.

³³ Kelántekkek axta énxet apwáxok xa kelyekhama' nak, kelántaxnegwokmek axta yátapomap apwáxók. Apkenyahágkek axta xa yátapomap nak, apkelmahágko m'a elweywekentamxa axta néten egkexe, ekwokmoho apkelwokmo m'a wátsam ekpayhegwayam axta. Axta apkelweywegkok ma'a.

³⁴ Xama axta apkelwet'a énxet'ák ektaha axta apkeltakmelcheso yátapomap, apkenyahágkek axta apkelmeyákxo apkeltennágweykxo m'a nátegma, tén han ma'a nepyáwa tegma apwányam.

³⁵ Apkelxegkek axta énxet apteyánegwokmoho m'a ektahakxa axta. Xama axta apkelwokmo aphakxa Jesús, apwetágwokmek axta apha ekpayhókxa Jesús apmagkok ma'a énxet elántepa axta kelyekhama' apwáxok. Yetlo apkelnakta axta aphak ma'a, yetlo apya'áseykegkoho exma axta anhan. Apkelakak axta xa énxet'ák nak.

³⁶ Keñe m'a énxet'ák ektaha axta apweteykegkoho ektahakxa apkeltennáseyncha'a apnámokkok ektahakxa aptakmelwayam ma'a énxet kelyekhama' ektawáseykha axta.

³⁷ Apyókxoho énxet'ák apheykha yókxexma Gerasa axta apkeltamhok emhagkok mók nekha Jesús, hakte apkelakak axta. Apchántakxeyk axta makham Jesús yántakpayhe, apxegkek axta.

³⁸ Apkeltamhok axta eykhe yohok étlók Jesús ma'a énxet elántepa axta apwáxok kelyekhama', wánxa agkok, apkeltamhok axta eyke exnekxak Jesús. Aptahak axta apcháneya s'e:

³⁹ —Emyekxa' apxagkok, eltennaha sat ekyókxoho aptemésesakxa nak xép Dios. Aptakhákxeyk axta xa énxet nak, apkeltennáha axta anhan nepyeseksa tegma ekyókxoho aptemésesakxa axta Jesús.

Jairo apketche kelwána, tén han kelán'a ekpaknegkeseyam Jesús apchaklamap

⁴⁰ Xama axta apwákxo Jesús mók nekha wátsam ekpayhegwayam, yetlo elpayheykekxa apwáxók axta apmak takha' énxet'ák apwákxo m'a, hakte apyókxoho énxet axta apkelhaxnak ma'a.

⁴¹ Apwokmek axta anhan xama énxet apwesey axta Jairo, apkemha apmonye apchakneykekxexa énxet'ák judíos axta m'a. Apkelpólegwokmek axta apkenmágkaxa Jesús xa énxet nak, apkeltamhok axta emhagkok apxagkok.

⁴² Xama agko' axta apketche kelwána, doce yeyam agkok axta m'a, keto' axta étsapmakxa. Kélyegawók axta cha'a Jesús neyseksa apxega, hakte apxámok axta énxet ektaha axta apyetlo.

⁴³ Paxkeygkek axta anhan énxet'ák apxámokma xama kelán'a ekweykmo axta doce apyeyam ekháxamáxche, axta kamassegweykmok ektépeykekxa cha'a éma agkok xa, sawhomakyek axta selyakye agkok ekyanmagkaso pánakte egyepmeyk, axta eyke ewagkasók teyp.

⁴⁴ Neptámen axta keñamak ekyo'ókmo Jesús, paknegwokmók axta napwa'ék apchaklamap. Yetlókók axta anhan ekmasé ekteyapma éma agkok.

⁴⁵ Aptahak axta apkelmaxneyeyncha'a Jesús énxet'ák se'e: —¿Yaksak sepaknegwa'awo nak? Apyókxoho énxet axta apxénak mepaknegwokmoho Jesús, keñe axta aptaha Pedro s'e: —Sẽlxekmóso, apyegawók cha'a exchep énxet appasmeykha nak.

⁴⁶ Aptahak axta eyke makham Jesús se'e: —Elpaknegwa'awók ko'o, hakte ekyekpelchawók ektepa sekmowána.

⁴⁷ Xama axta ekyekpelcha megkawagko keyxaxkohok xa kelán'a nak, kelpexyenegkek axta eltekxekwokmo atapnák apkenmágkaxa Jesús. Xénchek axta nápakta'awo' énxet'ák ektahakxa ekpaknegwokmoho Jesús aptaxno, xénchek axta anhan ektahakxa ektakmelwayam ekmanyehe agko'.

⁴⁸ Aptahak axta apcháneya Jesús se'e: —Hatte, megkay'áseyam takmelchesakmok xeye'. Katakhekxa' yetlo meyke ektamheykha awáxok.

⁴⁹ Neyseksa appakmeyesma axta Jesús apwokmo xama énxet apkeltennágwayam, aptahak axta apkeltennáseykxo énxet apkemha apmonye apchakneykekxexa énxet'ák judíos se'e: —Ketsekkek apketche, ná elenxanmoho aplanneyeykha sẽlxekmóso.

⁵⁰ Apleg'awók axta eyke Jesús xa, aptahak axta apcháneya s'e: —Nágkawho apnenyek; etne aksa mey'áseyam, kawagkasaxchek sat teyp apketche.

⁵¹ Xama axta apkelwokmo tegma, axta ya'awok elántexek énxet, wánxa axta aksa apcha'awo etxek ma'a Pedro, Santiago, tén han Juan, yetlo enchána m'a kelán'a étkok nak.

⁵² Apyókxoho énxet axta apkellekxagweyha, chakhak axta apwáxók. Wánxa agkok, aptahak axta apkeláneya Jesús se'e: —Nágkóllekxagwaha, megkatsapak se'e kelán'a étkok nak, tenche'.

⁵³ Apyókxoho énxet axta eyke apya'ásekmok, hakte apkelya'ásegkok axta étsapa m'a.

⁵⁴ Keñe axta apma ámek Jesús xa kelán'a étkok nak. Aptahak axta apyennaktésawo appeywa appakhetchesa s'e: —¡Kelán'a étkok, katnamha!

⁵⁵ Xátekhágwokmek axta xa kelán'a étkok nak, yetlókók axta anhan empeykekxa néten. Apkeltamhok axta kólagkok ekto Jesús xa.

⁵⁶ Kelxegawók axta agkenya'ák enchána ekwet'a xa, wánxa agkok, axta eyke eltamhok Jesús kóltennaha xa ektahakxa axta.