SAN LUCAS 6 - Lengua Sur (Enxet) Nuevo Testamento

Jesús apkeltámeséyak apnakxéyak hótahap apyexna ekhem nellókasamakxa nelyampé

¹ Xama ekhem apkellókasamakxa apkelyampé énxet'ák judíos axta apweynchámeyha Jesús neyseksa aksok kélcheneykekxexa. Apnakxégkek axta Jesús apkeltámeséyak hótahap apyexna, apkelhexyawásesek axta anhan apaktek keñe axta aptókagko.

² Nápakha énxet'ák fariseos axta aptahak apkelmaxneyeyncha'a s'e: —¿Yaksak ektaha kéllana nak kéxegke aksok megkólhayo nak anlának ekhem nellókasamakxa nelyampé?

³ Aptahak axta apchátegmowágko Jesús se'e: —¿Yagkólyetseteyk kéxegke weykcha'áhak aptémakxa axta David, cham'a eyakhama axta meyk yetlo apkelxegexma'a?

⁴ Aptaxnegwokmek axta David Dios tegma appagkanamap apagkok, apkelmeyk axta m'a pan kélpagkancheso axta Dios, aptókek axta nahan, apkelmeyásegkek axta anhan ma'a apkelxegexma'a, wánxa axta eykhe kólhok cha'a etawagkok ma'a énxet'ák appasmo nak apkelmaxnéseso Dios énxet'ák apagkok xa pan nak

⁵ Aptahak axta nahan Jesús se'e: —Apwanchek elának aksok ekhem nellókasamakxa nelyampé ektaha nak Apketche énxet.

Enxet ekyamé xama apmek

⁶ Mók ekhem sábado apkellókasamakxa apkelyampé énxet'ák judíos axta aptaxnegwokmok Jesús apchakneykekxexa énxet'ák judíos, apkelxekmósek axta anhan énxet'ák. Apheyk axta xama énxet kañe' apchakneykekxexa énxet'ák judíos, ekyamé apmek ekpayhókxa apkelya'asamakxa axta m'a;

⁷ apkeláneyha axta énxet'ák apkelxekmóso axta apnámokkok ektémakxa segánamakxa, apkeltamho etagkohok etakmelchesók Jesús énxet ekhem apkellókasamakxa apkelyampé, fariseos axta nahan ma'a, yakwayam enxoho keytek yakwánxa etnehek esexnenak Jesús xa énxet'ák nak.

⁸ Wánxa agkok, apya'ásegkók axta eyke Jesús ektahakxa elchetamso apwáxók xa énxet'ák nak. Aptahak axta apcháneya énxet ekyamé apmek se'e: —Yempekxa' néten, etnegwom neyseksa. Apkempákxeyk axta néten ma'a énxet ekyamé apmek axta, apkenmáha axta anhan.

⁹ Aptahak axta apkeláneya Jesús énxet'ák se'e: —Ekmokók ko'o atnehek selmaxneyeykha kéxegke s'e: ¿Yaksak aksok kélhayo anlának ekhem nellókasamakxa nelyampé? ¿Aksok ektakmela, aksok ekmaso enxeykel'a? ¿Agwagkasek teyp énxet, agakhek enxeykel'a?

¹⁰ Apkelanawók axta Jesús énxet'ák apchánwokmo axta m'a, keñe axta aptaha apcháneya énxet ekyamé apmek se'e: —Epékes apaktog. Aptemék axta anhan énxet ekyamé apmek ma'a, takmelakxók agko' axta anhan xama apmek.

¹¹ Wánxa agkok, apkellókok apagko' axta eyke énxet'ák, yetlókók axta anhan apkelpakhetchásamákpoho yakwánxa etnésesek Jesús.

Jesús apkelyéseykha doce seykha amya'a

¹² Apmeyákxeyk axta Jesús néten egkexe yakwayam etnehek nempeywa nelmaxnagko natámen xa. Yókxoho axta'a axta aptahak nempeywa nelmaxnagko appakhetchesa Dios ma'a.

¹³ Xama axta elsaka, apkelwóneyha axta Jesús apkeltámeséyak, doce axta apkelyesáha nepyeseksa xa énxet'ák nak, cháxa aptaha axta anhan seykha amya'a xa.

¹⁴ Keso énxet'ák ektaha axta apkelyéseykha s'e: Simón, cham'a aptemésesama axta anhan apwesey Pedro; Andrés, Simón apyáxeg axta anhan ma'a; Santiago axta anhan, tén han Juan, Felipe, Bartolomé axta anhan ma'a,

¹⁵ Mateo axta anhan, tén han Tomás, Santiago Alfeo apketche axta anhan; axta anhan ma'a Simón kéltéma axta celote,

¹⁶ Judas Santiago apketche axta anhan ma'a, tén han ma'a Judas Iscariote, cham'a appelakkasesama axta apkeltémo emakpok Jesús.

Jesús apkelxekmóso énxet apxámokma

¹⁷ Aptekkek axta Jesús néten egkexe yetlo xa énxet'ák nak. Apkenegwakteyk axta ekpayhakxa axta xóp. Axta nahan apchaknákxak apxámokma ektaha apyetleykha m'a, apxámok axta anhan énxet'ák apkeleñama m'a ekyókxoho yókxexma Judea, tén han apkeleñama m'a tegma apwányam Jerusalén, tén han apkeleñama m'a nepyáwa tegma apwányam Tiro tén han ma'a tegma apwányam Sidón, apheykegko axta neyáwa wátsam ekwányam. Apkelwokmek axta yakwayam enxoho yeyxwomhok Jesús apkeltenneykha, tén han yának kóltakmelchesesók ma'a ektémakxa axta apkelháxamap.

¹⁸ Kéltakmelchesakmek axta nahan ma'a énxet'ák apkellegeykegkoho axta eñama elántaxno apwáxok espíritu elmasagcha'a.

¹⁹ Apyókxoho énxet axta apmokók cha'a epaknegwomhok Jesús, hakte apkeltakmelchesakmek axta apyókxoho énxet eñama apmopwána ektepa axta cha'a m'a Jesús.

Ekpayheykekxa egwáxok tén han megkapayheykekxa egwáxok

²⁰ Apkelanawók axta Jesús apkeltámeséyak, keñe axta aptaha apkeláneya s'e: “Kéleñémo agko' kéxegke kéltaha nak meyke aksok kélagkok, hakte kélpáxakwokmek ma'a aptémakxa nak Wese' apwányam Dios.

²¹ “Kéleñémo agko' kéxegke elnapma nak meyk keso kaxwo' nak, hakte kólyakkanmohok sat. “Kéleñémo agko' kéxegke kéllekxagweyncha'a nak keso kaxwo' nak, hakte kóllektegmaha sat natámen xa.

²² “Kéleñémo agko' kéxegke kéltaknaweyxko enxoho nepyeseksa énxet'ák, tén han ma'a kéltekkesa enxoho nepyeseksa énxet'ák, tén han ma'a kélxénáxko enxoho kéltaha ekmaso kéltémakxa kéxegke eñama m'a aptaha nak Apketche énxet.

²³ Kalpayhekxoho agko' sat kélwáxok ektaha sat kéxegke xa, hakte kólxawak sat kéxegke aksok kélxawé naksa ektakmela agko' ma'a néten; hakte axta aptamheykegkok nahan apnaktawáseykegkoho énxet'ák Dios appeywa apkellegaso apyepmeyk nano' xa énxet'ák nak.

²⁴ “¡Kéxegke sat laye ektaha nak ekxákma aksok kélagkok, hakte yetneyk kéxegke aksok ekpeykesáseykekxa kélwáxok!

²⁵ “¡Kéxegke sat laye kélyakkanakmoho nak keso kaxwo' nak, hakte meyk sat kalnápok! “¡Kéxegke sat laye kéllektegmeyncha'a nak keso kaxwo' nak, hakte kóllekxagwaha sat eñama ellapwámeyak!

²⁶ “¡Kéxegke sat laye ektaha nak kélxénamaxche ektakmela; hakte cháxa aptemésesamakxa axta énxet'ák apkeltemesásamakpo axta Dios appeywa apkellegaso apyepmeyk nano' xa énxet'ák nak!

Negásekhayo énxet ektaha nak senmexeykha

²⁷ “Wánxa agkok, ektahak ko'o seláneya kéxegke kélhaxno nak seltenneykha s'e: Kólásekhoho énxet apkenmexeykha nak kéxegke, kólxekmósho kélásekhayo m'a énxet ektaha nak aptaknagko.

²⁸ Kólána' epasmok Dios ma'a énxet'ák apkeltémo nak katnegwomhoxma kéxegke, kólmaxnéses nahan ma'a énxet'ák apxéneykha ekmaso nak kéxegke.

²⁹ Kéltekpagkasek agkok kélmáxempenek kéxegke, kólmés nahan ma'a mók kélmáxempenek; kélyementegkek agkok kélaklamaxche, kólho nahan kólyementók ma'a kéltaxno.

³⁰ Kélmaxneyaxchek agkok aksok kéxegke, kólmés, nágkólmaxnegwakxa' aksa kélmók apyementama enxoho aksok kélagkok.

³¹ Kólhésho mók ma'a kélámenyexa enxoho kéxegke etnésesek kélnámokkok.

³² “Kélásekha'awók agkok aksa kéxegke m'a énxet apchásekhayókxa nak kéxegke, ¿Táseya katnehek kéltahakxa kéltaha enxoho xa? Weykmók nahan aptamhéyak énxet'ák melya'asáxma xa ektaha nak.

³³ Tásek agkok kéltemésesakxa m'a énxet'ák ektakmalma nak aptemésesakxa kéxegke, ¿Táseya katnehek kéltahakxa kéltaha enxoho xa? Weykmók nahan aptamhéyak énxet'ák melya'asáxma xa ektaha nak.

³⁴ Kélmasáseyha agkok kéxegke selyakye m'a énxet ekxeyenma nak kélwáxok eyakmagkásekxak selyakye kélmasáseykha, ¿Táseya katnehek kéltahakxa kéltaha enxoho xa? Weykmók nahan aptamhéyak énxet'ák melya'asáxma xa, emásesha cha'a selyakye pók, eleyxek nahan cha'a eyakmagkásekxak pók ma'a selyakye apmasáseykha.

³⁵ Kéméxchek kéxegke kólásekhohok ma'a énxet'ák apkenmexeykha nak, kólxekmósho nahan kélásekhayo, kólmásesha nahan aksok kélagkok yetlo megkólhaxanma eyakmagkásekxak mók. Awanhek sat katnehek ekyakmageykekxa kéltaha enxoho xa, kóltehek sat kéxegke Dios meyke ekhémo apketchek, aptaha nak han apkelásekhayo m'a énxet'ák megkéso nak ekxeyenma apwáxók Dios, tén han ma'a elmasagcha'a nak apkeltémakxa.

³⁶ Kólteme kéxegke apmopyósa kóllanok kélmók, ekhawo aptémakxa nak Kélyap Dios apmopyósa elanok énxet.

Nágkólteme aksa kélyekpelchémo aptémakxa kélmók

³⁷ “Nágkólteme aksa kélyekpelchémo aptémakxa kélmók, keñe sat metnehek apyekpelchémo Dios kéltémakxa kéxegke, Nágkolána aksa kólegásesagkohok kélmók keñe sat mellegásesagkok kéxegke Dios. Nágkólyakmagkásekxa aksa aptemésesakxa kélmók, keñe sat meyakmagkásekxék kéltémakxa kéxegke Dios.

³⁸ Kólmés aksok kélmók, keñe sat egkések kéxegkáxa aksok Dios. Exámáseshok sat kéxegke aksok apméso Dios ektémol'a yágkentamáhak ektakmela kélxata aksok, cham'a kélyakhápeykegkohol'a yakwayam kalánho. Ekwánxa enxoho kélyetsáteyak aptémakxa kélmók kéxegke, sat nahan exnéshok Dios apkelyetsáteyak kéltémakxa kéxegke xa.”

³⁹ Aptahak axta anhan apkelmaxneyeyncha'a Jesús se'e: “¿Apwancheya epékesesagkok apxega pók ma'a énxet'ák meyke apakta'ák nak? ¿Mepallegmeya apkánet ma'a kañe' máxek?

⁴⁰ Metnehek apyeykhágweykmoho apkelxekmóso m'a énxet ektaha nak kélxekmóso: apsawhegwokmek agkok ektémakxa apkeltámesamap, keñe exnágwakxohok ma'a ektaha axta apkelxekmóso.

⁴¹ “¿Yaksak ektaha kéllano nak kéxegke kélyáxeg ekyéxakxo pa'at nekha, yagkaxénak kélwáxok ekyetna yámet nekha ekyawe ekyéxakxo kéxegke?

⁴² Agkok kólyekpelchak kéxegke ekyetna yámet nekha ekyawe ekyéxakxo kélaktek, ¿Yaksak ektaha megkólaka nak kéltaha kéláneya kélyáxeg se'e?: ‘Egyáxeg, hegho anlekkesek ekyéxakxo pa'at nekha ekyetna nak kélaktek’? ¡Kéxegke kélmeyókásamáxkoho nak kéltémakxa. Kóllek sekxo' yámet nekha ekyawe ekyéxakxo ekyetna nak kélaktek, keñe sat kólewának kóllekkesek pa'at nekha ekyéxakxo m'a kélyáxeg!

Ekyexna aksa keykpelchaxkohok ma'a yámet

⁴³ “Yawanchek kasók ekyexna m'a yámet ektakmela nak, yawanchek nahan katakmelek ekyexna m'a yámet ekmaso nak.

⁴⁴ Ekyexna aksa keykpelchaxkohok ma'a ekyókxoho yámet. Megkanakxamáxchek higo ekyexna eñama ektekkeso m'a yámet ekhal'a am'ák; megkanakxamáxchek nahan anmen yámet ekyexna eñama ektekkeso m'a yámet ekweseyl'a yásek.

⁴⁵ Aksok ektakmela aksa exének ma'a énxet ektakmela nak aptémakxa, hakte keytek aksok ektakmela m'a kañe' apwáxok, énxet ekmaso nak aptémakxa, aksok ekmaso aksa exének, hakte keytek aksok ekmaso m'a kañe' apwáxok. Hakte apátog cha'a katyapwakxak énxet ma'a ekhágko nak aksok ekxámokma kañe' apwáxok.

Tegma ekmaso kélpekkenma kóneg, tén han ma'a ektakmalma nak kélpekkenma kóneg

⁴⁶ “¿Yaksak ektaha kéltaha nak sexéna kéxegke s'e, ‘Wese', Wese'’, keñe megkóláneya m'a sektémakxa nak selánagkama?

⁴⁷ Altennaksek sat kéxegke aphawo m'a énxet ektaha nak sey'eykekta ko'o, yeyxhok nahan sekpeywa, keñe elának ma'a sektahakxa enxoho seyáneya:

⁴⁸ exhok ma'a énxet apkeláneya axta tegma apkexakhama axta xóp, axta appekkenak ekyennaktéso tegma apowhak ma'a meteymog ekyetnama axta kañe' xóp. Tekkek axta yegmen wátsam, tegwokmek axta cha'a elyakyahayam xa tegma nak, wánxa agkok, axta eyke kaktásak, hakte tásek axta apkelánamap tegma.

⁴⁹ Wánxa agkok énxet apháxenmo nak ko'o sekpeywa, keñe melanyek ma'a sektahakxa enxoho seyáneya, máxa etnehek ma'a énxet apkeláneya axta tegma néten xóp meyke ekyennaktéso tegma apowhak; xama axta ektepa yegmen wátsam, tegwokmek axta cha'a elyakyahayam ma'a tegma nak, apyaknenchek axta m'a tegma nak, apketsagkáseykpók apagko' axta anhan.”