SAN LUCAS 5 - Lengua Sur (Enxet) Nuevo Testamento

Magwetaya katnehek tegye kelasma

¹ Apkenmáha axta Jesús neyáwa wátsam ekpayhegwayam ekwesey nak Genesaret, apchahapwokmek axta énxet apxámokma apmáheyo axta yeyxho' Dios appeywa.

² Apwet'ak axta Jesús ekhágko ánet yántakpayhe neyáwa ekpayhegwayam. Méko axta xama énxet ma'a kañe', hakte apkelántekkek axta m'a ektaha axta aptegyéyak kelasma, yakwayam elyenyesagkok yam'én apagkok.

³ Xama yántakpayhe axta apchántak Jesús. Simón axta apagkok ma'a, apkeltamhok axta Jesús yakxegkesagkohok Simón yántakpayhe. Keñe axta apha m'a kañe' yántakpayhe awáxok, apkeltennáseyha axta énxet'ák.

⁴ Xama axta appenchesa apkeltenneykha, aptahak axta apcháneya Jesús Simón se'e: —Ey'és hana yántakpayhe etawanyexa nak, kólyenyenta' sat yam'én kélagkok ma'a, yakwayam kólmok kelasma.

⁵ Aptahak axta apchátegmowágko Simón se'e: —Sẽlxekmóso, yókxoho axta'a exchek negko'o nentegye kelasma, exchek eyke agmak kelasma xama enxoho; eynyentak sat ko'o yam'én neygmen, hakte apkeltamhok xép eynyentak.

⁶ Xama axta apyenyento yam'én, xámok axta apkelma kelasma, peyk axta kalyetyapok yam'én.

⁷ Keñe axta aptemesásencha'a apkelxegexma'a apkelchánte axta mók yántakpayhe, yakwayam enxoho ewhánegwomho'. Apyo'ókmek axta anhan ma'a. Apkellánesagkók axta kelasma m'a ánet yántakpayhe nak, ketsék axta kéméxchek yakwayam kalweywagkok.

⁸ Xama axta apwet'a Simón Pedro xa, apkeltekxekwokmek axta aptapnák apkenmágkaxa Jesús. Aptahak axta apcháneya s'e: —¡Wese', neyhepetchegwoho aksa, may'asáxma ko'o!

⁹ Hakte pelakkásók agko' axta apwet'a Simón yetlo apkelxegexma'a xa apkelma axta kelasma ekxámokma.

¹⁰ Hawók axta anhan ektahakxa m'a Santiago, tén han ma'a Juan, aptaha axta Zebedeo apketchek, cháxa aptaha axta apkelxegexma'a Simón xa. Aptahak axta Jesús apcháneya Simón se'e: —Nágyé' aksa; sakhem eyeynawo exchep yakwayam etnehek aptegye énxet.

¹¹ Keñe axta apkelya'áseykxo yántakpayhe m'a néten xóp. Apnegkenakxeyk axta ekyókxoho xa, keñe axta apkelyetlákxo Jesús.

Jesús aptakmelcheseyam xama énxet negmasé ektepelchamáxche egyempehek ekteme

¹² Xama ekhem axta aphak Jesús nepyeseksa tegma apwányam, apwokmek axta aphakxa xama énxet negmasé ektepelchamáxche egyempehek ekteme. Xama axta apwet'a Jesús ma'a énxet nak, apháxahanteyk axta ekwokmoho aptekxeya nápát xóp. Aptahak axta apcháneya Jesús apkeltamho epasmok se'e: —Wese', apmokók agkok xép, apwanchek heyaxñásekxak ektémakxa nak sekháxamáxche.

¹³ Appaknegwokmók axta Jesús xa, keñe axta aptaha apcháneya s'e: —Emenyék. ¡Yáxñekxoho! Yetlókók axta ekmasé m'a ektémakxa axta apháxamap ektepelchamáxche apyempehek.

¹⁴ Aptahak axta apcháneya Jesús se'e: —Ná eltennaha aksa; exeg, ey'ókxa aphakxa m'a énxet appasmo nak apkelmaxnéseso Dios énxet'ák apagkok yakwayam exekmósakpekxoho, esakxoho sat nahan aksok negmésamol'a Dios ekhawo m'a apkeltémókxa axta antehek Moisés eñama apcháxñeykekxoho exchep, yakwayam enxoho elya'asagkohok apyókxoho énxet aptakmelwokmo exchep ma'a ektémakxa axta apháxamap.

¹⁵ Wánxa agkok, yágwokmók axta eyke ekpayheykekxa apxénamap Jesús. Apxámagwokmek axta anhan énxet yakwayam yeyxhok apkeltenneykha, yakwayam enxoho eltakmelchesók ma'a ektémakxa axta apkelháxamap.

¹⁶ Mók nekha axta eyke cha'a emhagkohok Jesús yakwayam etnehek nempeywa nelmaxnagko, cham'a meykexa enxoho énxet.

Jesús aptakmelcheseyam xama énxet apkelyakseykekxa megkamopwána eltakheykha

¹⁷ Xama ekhem axta apkelxekmowásak Jesús énxet'ák, apháha axta anhan nápakha fariseos ma'a, tén han ma'a énxet'ák apkelxekmóso nak apnámokkok ektémakxa segánamakxa. Ekyókxoho apheykegkaxa énxet yókxexma Galilea axta apkeleñamak xa, tén han ma'a yókxexma Judea, tén han apkeleñama m'a tegma apwányam Jerusalén. Wetáxchek axta ekyetna Dios apmopwána m'a Jesús, cham'a apkeltakmelchesakmo axta apkelháxamap.

¹⁸ Apkelwokmek axta nápakha énxet, apsokmók axta énxet apháxamap megkamopwána eltakheykha, apyetnama axta néten aptaháno. Apmokók axta eykhe etaxnésók kañe' tegma yakwayam epekkenwók apkenmágkaxa Jesús,

¹⁹ axta eyke ey'ásegkok yakwánxa etaxnésók, hakte apxámok axta énxet; keñe axta apkelchánta aksa néten tegma, apyagkaxkatchek axta nahan néten tegma, apweykásenteyk axta nepyeseksa énxet'ák yetlo aptaháno m'a énxet apháxamap, cham'a apkenmágkaxa axta Jesús.

²⁰ Xama axta apwet'a Jesús ekyetna melya'áseyam xa, aptahak axta apcháneya énxet apháxamap se'e: —Emók, megkólyakmagkáseykxak xép aptémakxa mey'asáxma.

²¹ Entahak axta elchetamso apwáxók énxet'ák ektaha axta apkelxekmóso apnámokkok ektémakxa segánamakxa s'e, tén han ma'a fariseos: “¿Yaksak énxet xa aptéma nak, megyeye nak exének aksok elmexma Dios? Dios apwánxa apagko' apmopwána meyakmagkásekxék nentémakxa mólya'asáxma.”

²² Apyekpelchawók axta eyke Jesús ektahakxa elchetamso apwáxók xa énxet'ák nak. Aptahak axta apkelmaxneyeyncha'a s'e: —¿Yaksak ektaha, ektaha nak elchetamso kélwáxok kéxegke xa?

²³ ¿Yaksak enyahamo antehek agának énxet?: ‘Megkólyakmagkáseykxak ektémakxa mey'asáxma exchep’ enxeykel'a antehek agának se'e: ‘Exnekxa' néten, emekxa aptaháno, exeg.’

²⁴ Axekmósek sat ko'o ekyetna apmopwána ektaha nak Apketche énxet yakwayam meyakmagkásekxék apkeltémakxa melya'asáxma énxet keso náxop. Keñe axta aptaha apcháneya énxet apkelyakseykekxa megkamopwána axta eltakheykha s'e: —Ektahak seyáneya exchep se'e, etnamha, emekxa aptaháno, emyekxa' apxagkok.

²⁵ Yetlókók axta apheykekxa néten ma'a énxet apkelyakseykekxa megkamopwána axta eltakheykha nepyeseksa énxet'ák, apmákxeyk axta anhan ma'a aptaháno apyetnama axta néten, apmeyákxeyk axta apxagkok yetlo apkelpeykesamo Dios.

²⁶ Apyókxoho énxet'ák axta pelakkásak apkelwet'a xa, apkelpeykásók axta anhan Dios, apchekakxoho axta anhan aptahak apkelpeywa s'e: —Sakhem negwet'a negko'o aksok eltakmela agko' magwetaya nak katnehek.

Jesús apwóneykha Leví

²⁷ Apxegkek axta Jesús natámen xa, apwet'ak axta xama m'a énxet'ák ektaha axta apkelma cha'a selyakye yakwayam kólmések wese' Roma, apwesey axta Leví. Axta aphak ma'a apkelmomakxa axta cha'a selyakye. Aptahak axta apcháneya Jesús se'e: —Hétlogma.

²⁸ Keñe axta apkempákxo néten Leví, apkexakkek axta ekyókxoho aksok apyetlawa Jesús.

²⁹ Nano' axta entahak apkelana Leví ektámáxche ekwányam apxagkok yakwayam yesawáseshok Jesús. Apxámok axta anhan apkelwokmo m'a énxet'ák ektaha axta apkelma selyakye yakwayam kólmések wese' Roma, tén han ma'a pók énxet'ák nak. Apheyk axta xamo' Jesús nekha mésa xa énxet'ák nak.

³⁰ Apkelpakmeteyha axta eyke m'a énxet'ák fariseos, tén han ma'a énxet'ák ektaha axta apkelxekmóso ektémakxa segánamakxa, cham'a ektaha axta apkelxegexma'a apancha'awo'. Aptahak axta apkeláneya Jesús apkeltámeséyak se'e: —¿Yaksak ektaha kéltoko nak xamo' kéxegke énxet apkelmomo nak selyakye yakwayam kólmések wese' Roma tén han kélyenawo xamo' apyenéyak, tén han ma'a énxet'ák melya'asáxma nak?

³¹ Aptahak axta apchátegmowágko Jesús se'e: —Mopmenyék pánakte egyap ma'a énxet apkelyennakte nak, wánxa m'a énxet'ák apkelháxamap nak.

³² Axta ko'o aweyk yakwayam alwónmakha énxet apkelpéwomo nak, wánxa m'a énxet'ák melya'asáxma nak, yakwayam enxoho etnekxak melya'áseyam Dios.

Ektémakxa manto nento nelpeykáso enxoho Dios

³³ Entahak axta amya'a apcháneyákpo Jesús se'e: —Hágkaxwe etnahagkok Juan apkeltámeséyak ma'a manto nak nento ólpeykeshok Dios, tén han ma'a apyetleykekxa nak apkeltémakxa fariseos, meyétekkesemek nahan aptamhéyak nempeywa nelmaxnagko, keñe apkeltámeséyak nak xép etawagkok cha'a aptéyak, énagkok nahan cha'a m'a apyenéyak nak.

³⁴ Aptahak axta apchátegmowágko Jesús se'e: —¿Kélwanchek enxeykel'a kéxegke kólának metawagkek aptéyak ma'a énxet'ák kéláneyeykha nak yakwayam epásegwók elyamhopma, cham'a apha enxoho nepyeseksa m'a énxet yakwayam nak kalyamhápok?

³⁵ Wánxa agkok, kammok sat eyke ekhem yakwánxa kólyentemekxak ma'a énxet yakwayam nak kalyamhápok, wokmek sat agkok xa ekhem nak, metawagkek sat aptéyak.

³⁶ Apkeltennáseyha axta anhan se'e aksok apyetcháseykekxoho nak: —Méko cha'a kayenyekhak apáwa nápakha aphaxnagkok yakwayam kólyepetchesek ma'a apáwa aphápak nak. Kéltemék agkok xa, kóltawasha m'a apáwa aphaxnagkok nak; megkatxók nahan kólyepetchesek apáwa aphaxnagkok ma'a apáwa aphápak nak.

³⁷ Megkólyetmek nahan cha'a vino axnagkok ma'a aksok empe'ék apák kélyetmomol'a, hakte kalpaxkátek aksok empe'ék apák ma'a vino axnagkok nak, keymasaxkohok nahan keynkenaxchek ma'a vino, kasawhaxkohok nahan kalesók ma'a aksok empe'ék apák nak.

³⁸ Kólyátem cha'a vino axnagkok ma'a aksok empe'ék axnagcha'ák kélyetmomol'a.

³⁹ Megkamayhaxchek nahan vino axnagkok ekyamaxko enxoho m'a vino nano' elánamáxche nak, hakte katnehek cha'a amya'a s'e: ‘Atsók agko' ma'a vino nano' elánamáxche nak.’