SAN LUCAS 23 - Lengua Sur (Enxet) Nuevo Testamento

Jesús kélyentama nápakto' Pilato

¹ Apsawhekpók axta apchaknákxo néten énxet'ák, keñe axta kélyentamákxo Jesús aphakxa Pilato.

² Nápakto' Pilato axta kéltamhok kólsexnenak Jesús, entahak axta amya'a apxénákpo s'e: —Negwet'ak axta negko'o apkelyáteyágkoho énxet etekkesek ekmaso s'e énxet nak. Apxénchek axta megkapayhawok agmések selyakye wese' apwányam Roma, apxeyenmék nahan aptaha Mesías, tén han aptaha Wese' apwányam.

³ Aptahak axta apkelmaxneyeyncha'a Pilato Jesús se'e: —¿Xépya judíos Wese' apwányam apagkok? —Cháxa aptahakxa nak appeywa exchep —axta aptahak apchátegmowágko Jesús.

⁴ Keñe axta aptaha Pilato apkeláneya énxet'ák apkelámha amonye'e appasmo apkelmaxnéseso Dios énxet'ák apagkok se'e, tén han ma'a énxet'ák: —Mateyk ko'o xama aksok ekmaso apkelané s'e énxet nak.

⁵ Apyánchesakmók axta eyke apkelyennaktésamo apkelpeywa. Aptahak axta s'e: —Apkelyáteyagkok etekkesek ekmaso apyókxoho énxet negheykegkaxa eñama m'a ektémakxa nak apkelxekmóso. Axta apchénawók aptekkeso ekmaso m'a Galilea, temék nahan kaxwo' se'e Judea.

Jesús kélya'aso aphakxa Herodes

⁶ Xama axta apleg'a Pilato xa, aptegyáha axta amya'a apkeltamho ey'asagkoho nakso' kexaha apkeñama Galilea xa énxet nak.

⁷ Xama axta kéltennasa aptaha apkeñama Galilea, apcháphásek axta aphakxa Herodes, aptaha axta wese' apchásenneykha apkeláneykha yókxexma Galilea, chakhawók axta anhan apmahágkaxa Herodes ma'a tegma apwányam Jerusalén.

⁸ Xama axta apwet'a Herodes Jesús, payhekxeyk axta apwáxok, hakte nano' axta apmáheyo éta', eñohok axta cha'a amya'a exénakpok, apmenyék axta anhan éta' elának aksok sempelakkaso nak agweta'.

⁹ Xámok axta apkelmaxneyeykha, axta eyke yátegmowágkok Jesús.

¹⁰ Apháha axta anhan énxet apkelámha apmonye'e appasmo apkelmaxnéseso Dios énxet'ák apagkok ma'a, tén han ma'a énxet'ák apkelxekmóso nak apnámokkok ektémakxa segánamakxa, apyánchesakmok axta apxeyenma ekmaso Jesús xa énxet nak apkeltamho esexnena'.

¹¹ Keñe axta aplágwokmo Herodes tén han ma'a sẽlpextétamo apagkok, apáwa aptakmela axta kéltaxneyásekxak Jesús ektémol'a wese' apkelnakta peya yesmésakpok. Keñe axta Herodes apcháphásekxo makham Jesús aphakxa Pilato.

¹² Axta chénhok apkelásekhamakpekxoho Pilato Herodes ma'a, apkenmexma axta eykhe nano' axta.

Jesús apxénamap yakwayam emátog

¹³ Apchánchesákxeyk axta Pilato apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelmeykha nak apnámokkok, tén han ma'a apyókxoho énxet'ák.

¹⁴ Aptahak axta Pilato apkeláneya énxet'ák se'e: —Kéxegke axta selyentegkáseyam se'e énxet nak, kélxénchek axta anhan apkelyáteyágkoho etekkesek ekmaso énxet'ák; elmaxneyágkok axta ko'o seltamho ay'asagkohok ektakmela kélnápakta'awo' kéxegke, akke ko'o ót'ak aksok ekmaso apkelané eksexnenagko xama enxoho, cháxa kéltahakxa nak kélpeywa kéxegke.

¹⁵ Mét'ak nahan Herodes, ékeso eñamakxa segáphasáseykxo nak makham. Kélwet'ak kéxegke méko xama aksok ekmaso apkelané ekpayhawo emátog se'e énxet nak.

¹⁶ Añásesagkohok sat aksa, keñe sat eynyekxa'.

¹⁷ Enyekxohok axta cha'a Pilato xama énxet apmomap yakwayam kalkohok apwáxok énxet, neyseksa elánamáxche ekhem melwagkayam kéltéma nak Pascua.

¹⁸ Wánxa agkok, apyókxoho énxet axta eyke aptahak apkelyennaktésawo apkelpeywa s'e: —¡Yána emátog xa! ¡Enyekxa' m'a Barrabás!

¹⁹ Kañe' sẽlpextétamakxa axta kélhésók xa Barrabás eñama m'a aptekkeso axta ellámáxche nepyeseksa tegma apwányam, tén han eñama m'a ekyetno axta apyógkexma.

²⁰ Apmenyék axta eykhe ényekxak Pilato m'a Jesús, ékeso eñamakxa appakméteykxo axta makham;

²¹ yágwokmók axta eyke apkelyennaktésamo apkelpeywa énxet'ák. Aptahak axta s'e: —¡Epetches aksok ektegyéso! ¡Epetches aksok ektegyéso!

²² Antanxo axta entahak apteme apkelpakhetcheso Pilato énxet se'e: —¿Yaksak aksok ekmaso apkelané? Mót'ak ko'o xama aksok ekmaso apkelané ekpayhawo nak emátog. Añásesagkohok sat, keñe sat eynyekxa'.

²³ Apkelenxanakmok axta eyke apkelyennaktésamo apkelpeywa énxet apkeltamho kólyepetchesek aksok ektegyéso Jesús; apxakak axta anhan aksok apmopmenyého, hakte axta elwátesakmok apkelyennaktésamo apkelpeywa.

²⁴ Apmokók axta elának Pilato m'a apcháneyákpexa axta etnehek;

²⁵ apyenyekxeyk axta m'a énxet ektaha axta kélyeseykha, cham'a apha axta sẽlpextétamakxa eñama aptekkeso ellámáxche nepyeseksa tegma apwányam, tén han eñama m'a ekyetno apyógkexma. Keñe axta Pilato apmésa Jesús xa énxet'ák nak, yakwayam enxoho etnésesek ma'a apmokókxa enxoho etnésesek.

Jesús kélyepetcheso aksok ektegyéso

²⁶ Xama axta kélyentama Jesús yakwayam kólyepetchesek aksok ektegyéso, apmákpek axta xama énxet apkeñama axta Cirene, yókxexma axta apkenyektak ma'a, kéltamhok axta epatmok aksok ektegyéso yakwayam eswok neptámen Jesús.

²⁷ Apxámok axta énxet apyetlo Jesús, tén han kelán'ák. Kellekxagweyha axta elano Jesús, kelpayheyha axta anhan atña'ák eñama ellapwámeyak.

²⁸ Apkelanawók axta Jesús. Aptahak axta apkeláneya s'e: —Kelán'ák kéleñama nak Jerusalén, nágkóllekxagwaha hellanok ko'o, kóllekxagwaha kaxének kélwáxok kéxegke kélagko', tén han ma'a kélketchek.

²⁹ Hakte kammok sat ekhem yakwánxa etnehek apkelpeywa énxet se'e: ‘Eleñémo agko' kelán'a megkamowána nak kótak étche, tén han kelán'ák megkatnama nak makham nakláwa xama enxoho, tén han ma'a megkéyegko nak makham nam'agkok sakcha'a.’

³⁰ Keñe sat etnehek yának énxet'ák egkexe s'e: ‘¡Hegahapwata' negko'o!’, keñe sat etnehek nahan yának egkexe étkók se'e: ‘¡Hẽlpós negko'o!’

³¹ Kéltemésesek agkok yámet elyapakmaté nak áwa' xa ektaha nak, sat eyke ekyagwánxa agkok ma'a yámet ektaha nak apák.

³² Kélnaklókek axta anhan apkánet énxet elmasagcha'a apkeltémakxa, yakwayam kólyepetcheshok aksok ektegyéso xamo' Jesús.

³³ Xama axta kélwagkasa m'a yókxexma kéltémakxa axta ekyetnamakxa kélpátexchapok, kélyepetchesek axta aksok ektegyéso Jesús, tén han ma'a apkánet énxet elmasagcha'a axta apkeltémakxa, xama axta kélchexnak ekpayhókxa nak apkelya'asamakxa, keñe axta pók kélchexna ekpayhókxa nak nepsagkalwa.

³⁴ Aptahak axta Jesús se'e: —Táta, ná eyakmagkásekxa apkeltémakxa xa énxet'ák nak, hakte melya'ásegkok xa aksok apkelánégko nak. Xama aksok axta aptawásegkok sẽlpextétamo yakwayam enxoho katakmelhok apmelassamap Jesús aptaxno.

³⁵ Apháha axta énxet apkeláneyncha'a m'a, wokmók axta apkesméso Jesús ma'a énxet'ák apkelámha apmonye'e axta nepyeseksa judíos. Aptahak axta apcháneya s'e: —Apkelwagkasegkek axta teyp énxet, ewagkasakpoho apagko' teyp kaxwo' nak, eyámnaksoho enxoho aptaha Mesías apkeñama Dios, tén han ektaha enxoho Dios apkelyéseykha.

³⁶ Sẽlpextétamo axta anhan apkesmeyásak Jesús. Apyepetchegwokmók axta, keñe axta apmésa apkeltamho ének vino ekmáske agko'.

³⁷ Aptahak axta apcháneya s'e: —¡Nakso' agkok aptaha exchep judíos wese' apwányam apagkok, ewagkasakpoho apagko' teyp!

³⁸ Yetneyk axta anhan kéltáxeso néten aksok ektegyéso ektéma axta kéltáxeso s'e: “Enxet'ák judíos wese' apwányam apagkok se'e.”

³⁹ Xama énxet ekmaso aptémakxa apyexnamo xamo' Jesús axta apyamatcháseyha. Aptahak axta apcháneya s'e: —¡Nakso' agkok xép aptaha Mesías, ewagkasakpoho apagko' teyp, hẽlwagkas nahan negko'o xa teyp!

⁴⁰ Wánxa agkok, appakhetchesek axta eyke apxegexma m'a pók. Aptahak axta apcháneya s'e: —¿Yagyekak xép Dios? Hawók xép xa ektahakxa kéllegasáseykegkoho xa énxet nak.

⁴¹ Payhawók negko'o anlegagkohok ektahakxa nak sẽlegasáseykegkoho, hakte payhawók kaxhok mók ma'a ekweykenxal'a nenlané aksok ekmaso; akke elaneyk xama aksok ekmaso xa énxet nak.

⁴² Keñe axta anhan aptaha appeywa s'e: —Jesús, kaxén sat apwáxok ko'o aptaha sat Wese' apwányam xép.

⁴³ Aptahak axta apchátegmowágko Jesús se'e: —Sakhem sat hexhok xamo' xép ma'a yókxexma apkelmaheykegkaxa nak Dios énxet'ák apagkok apkeletsapma. Nakso' xa sektahakxa nak seyáneya exchep.

Jesús apketsapma

⁴⁴ Yetseksókhem axta chénawók ekyaktesóxma ekyókxoho m'a yókxexma nak, ekweykmoho las tres taxnam.

⁴⁵ Massék axta elsasáxma ekhem, keñe axta apyepteykpo nepyeseksa m'a apáwa apyexnama axta kañe' tegma appagkanamap.

⁴⁶ Aptahak axta Jesús apyennaktésawo appeywa s'e: —¡Táta, eltamhok ko'o emok xép ehagak! Xama axta aptaha appeywa xa, keñe axta apketsapa.

⁴⁷ Xama axta apwet'a sẽlpextétamo apkemha apmonye ektahakxa, apkeltemésesek axta apcheymákpoho Dios. Aptahak axta s'e: —Nakso' nak axta eyke agkok aptaha meyke aptémakxa s'e énxet nak.

⁴⁸ Apkeltakhákxeyk axta yetlo apkeltekpageykha cha'a apnenya'ák apyókxoho énxet'ák ektaha axta apkelwayam ma'a, ektaha axta anhan apkelweteykegkoho m'a ektahakxa axta.

⁴⁹ Aphákxeyk axta eyke apkeláneyncha'a makhawo' ektahakxa m'a apyókxoho apkelweteykxa axta Jesús, axta anhan ma'a kelán'ák ektaha axta ekyetlo eleñama m'a Galilea.

Jesús kélatawanya

^50-51 Apheyk axta xama énxet ektakmela aptémakxa, aptaha axta anhan appéwomo, apwesey axta José, Arimatea axta apchókxa xa, xama tegma apwányam apyetnama nak ma'a Judea. Nepyeseksa énxet'ák judíos ekyawe kéláyo axta apkeñamak xa. Apkelháxanmeyk axta kawak aptémakxa Wese' apwányam Dios xa José, axta kaleklók apwáxok aptamheykegkaxa axta énxet'ák judíos ekyawe kéláyo nak.

⁵² Apmeyákxeyk axta aphakxa Pilato xa José, keñe axta apkelmaxneya Jesús aphápak.

⁵³ Apáwa apcháxñeyo apagko' axta appextétak natámen apleklo néten aksok ektegyéso, keñe axta appekkenwokmo kañe' takhaxpop meteymog kaxwé ekmetmomáxche, axta kólpekkenweykmok makham xama énxet ma'a takhaxpop nak.

⁵⁴ Wokmek axta ekhem apkeláneykekxexa aptamhágkaxa énxet'ák yakwayam eleyxek kammok ekhem apkellókasamakxa apkelyampé, chágketwokmek axta yakwánxa kammok.

⁵⁵ Teyánegwákxók axta takhaxpop kelán'ák ekyetlama axta Jesús eleñama m'a Galilea, kelanawók axta takhaxpop, kelanawók axta anhan ma'a ektahakxa axta kélpekkenma Jesús aphápak.

⁵⁶ Xama axta elwákxo axanák, kelaneykxék axta sokmátsa tén han ma'a kéltexneykegkohol'a egyempehek. Kellókasek axta elyampé kelán'ák ekhem apkellókasamakxa axta cha'a apkelyampé énxet'ák judíos, ekhawo m'a elánemaxchexa axta katnahagkok.