SAN LUCAS 18 - Lengua Sur (Enxet) Nuevo Testamento

Jesús apyetcháseykekxoho tampe' tén han énxet segyekpelchémo

¹ Apkeltennáseyha axta Jesús apkeltámeséyak se'e apyetcháseykekxoho nak, yakwayam enxoho elxekmósek eyéméxko etnahagkok cha'a nempeywa nelmaxnagko meyke elleklágwayam.

² Aptahak axta apkeláneya s'e: “Aphegkek axta xama énxet segyekpelchémo xama tegma apwányam. Megyekyek axta Dios ma'a, axta anhan yenmexmók apkeltémakxa énxet.

³ Heyk axta anhan xama tampe' m'a tegma apwányam nak. Yetneyk axta anhan enmexma m'a, kay'ókxohok axta cha'a énxet segyekpelchémo nak, yakwayam kának epasmok elánekxések ma'a ekpayhawo axta etnehek ma'a enmexma.

⁴ Wenaktémok axta memáheyo epasmok énxet segyekpelchémo xa tampe' nak, keñe axta ektemegwokmo elchetamso apwáxok se'e: ‘Magwayék eykhe ko'o Dios, magwanmexmók eykhe anhan apkeltémakxa énxet'ák,

⁵ wánxa agkok, apasmok sat eyke s'e tampe' nak, hakte megkalwáteseykmok sey'eykekta cha'a, yakwayam enxoho megkawaték cha'a, kamaskok katnehek selenmaxexkoho setnésesamakxa.’ ”

⁶ Aptahak axta anhan Wese' egegkok se'e: “Cháxa aptahakxa axta appeywa énxet segyekpelchémo ekmaso aptémakxa xa.

⁷ ¿Mepasméya Dios énxet'ák ektaha nak apkelyéseykha, apwóneykha nak apwesey ekyókxoho ekhem tén han ekyókxoho axta'a? ¿Yánaya aksa sekxo' kólleyxek?

⁸ Eltennásek ko'o peya epasmok ekmanyehe agko'. Apkexyekmek sat agkok ma'a aptaha nak Apketche énxet, ¿éteyágwataya sat makham ekyetna magya'áseyam keso náxop?”

Jesús apyetcháseykekxoho énxet fariseo tén han ma'a énxet apkelma nak selyakye yakwayam kólmések wese' Roma

⁹ Apkeltennáha axta anhan Jesús se'e apyetcháseykekxoho nak, yakwayam enxoho ellegak ma'a nápakha énxet'ák apkenagkama nak katakmelak apkeltémakxa, cham'a apkelyamatcháseykencha'awol'a apnámokkok:

¹⁰ “Apkánet énxet axta apkelmeyákxak kañe' tegma appagkanamap yakwayam etnahagkok nempeywa nelmaxnagko: fariseo axta xama m'a, keñe axta pók ma'a apkelmomo axta cha'a selyakye yakwayam kólmések wese' Roma.

¹¹ Aptahak axta apkelmaxnagko énxet fariseo apkenmágkaxa s'e: ‘Oh Dios, ekmések ko'o ekxeyenma ewáxok Xép, hakte maxnawok ko'o m'a pók énxet'ák nak, ektaha nak apkelmenyexma, tén han ekmaso apkeltémakxa, tén han apnaktawáseykha elyamhápeyak, maxnawok nahan se'e énxet apkelmomo nak selyakye yakwayam kólmések wese' Roma.

¹² Anet cha'a ko'o atnehek mato sekto xama semana selpeykáso enxoho exchep, agkéshok nahan cha'a xama aksok ekwokmo enxoho diez ekyókxoho m'a ekyanmaga nak sektamheykha.’

¹³ Wánxa agkok, teyépek axta eyke apkenmágkaxa énxet apkelmomo axta cha'a selyakye yakwayam kólmések wese' Roma, axta emokók yenmexhok néten, aptekpagáha axta aksa apnenyek. Aptahak axta appeywa se'e: ‘¡Oh Dios, yepyósho helanok ko'o sekteme nak may'asáxma!’

¹⁴ Eltennásek ko'o kéxegke aptakhákxo apxagkok yetlo meyakmagkáseykekxa Dios aptémakxa mey'asáxma xa énxet apkelmomo axta cha'a selyakye yakwayam kólmések wese' Roma, axta kaxnók ma'a énxet fariseo. Hakte kéxegke ektahakxa enxoho kéltémo kólawho nepyeseksa kélnámokkok, mékoho sat kóltemesásekxa'; keñe sat kéxegke kéltemesásamáxche nak mékoho, ekha kéláyo sat kóltemesásekxa'.”

Jesús apkelmaxnéseso aksok eltakmela sakcha'a létkók

¹⁵ Kélnaklókasakmek axta anhan Jesús sakcha'a létkók, yakwayam enxoho epaknegwomhok; xama axta apkelwet'a Jesús apkeltámeséyak xa, apnókáseyha axta m'a énxet'ák ektaha axta apnaklo apketchek.

¹⁶ Apkelwóneyha axta Jesús apkeltámeséyak. Aptahak axta apkeláneya s'e: —Kólho hey'ótak ko'o sakcha'a létkók, nágkólnókasha, hakte appáxakweykmek aptémakxa nak Wese' apwányam Dios énxet'ák aphawo nak se'e sakcha'a létkók nak.

¹⁷ Agkok exneyásékpohok sakcha'a énxet apma enxoho takha' m'a aptémakxa nak Wese' apwányam Dios, mopwanchek etaxnegwók ma'a.

Xama énxet ekxákma selyakye apagkok appakhetcheso Jesús

¹⁸ Xama énxet apkemha apmonye judíos axta aptahak apkelmaxneyeyncha'a Jesús se'e: —Sẽlxekmóso aptakmalma, ¿Yaksak eyéméxko alának ko'o yakwayam ótak ekyennakte egkenyek megkatnegwayam enéxa?

¹⁹ Aptahak axta apchátegmowágko Jesús se'e: —¿Yaksak ektaha seltaha nak sektakmalma? Wánxa xama apha m'a aptaha nak aptakmela: cham'a Dios.

²⁰ Apya'ásegkok xép kéltémókxa nak kóltehek: ‘Ná etwasha elyamhopma, nágyakha pók, ná emenyex, ná etne apmopwána amya'a exének pók, etne apcháyo apyap tén han ma'a egken.’

²¹ Aptahak axta apchátegmowágko énxet se'e: —Sẽlxekmóso, ektemegkek ko'o ekyókxoho xa eyeynamókxa m'a sektémakxa axta wokma'ák.

²² Xama axta apleg'a Jesús xa, aptahak axta apchátegmowágko s'e: —Xama aksok kéméxchek elának xép: ekxeykxa m'a ekyókxoho aksok apagkok ekyetnakxa nak xép, elmés ma'a énxet meyke aksok apagkok nak. Keñe sat keytek xép ekxákma aksok apagkok ma'a néten. Exyem sat makham, keñe sat hétlawha.

²³ Xama axta apleg'a énxet xa, awanhek axta elapwayam, hakte xámok axta selyakye apagkok ma'a.

²⁴ Xama axta apwet'a Jesús elapwokmo xa, aptahak axta apcháneya s'e: —¡Askehek yakwayam elántexek aptémakxa Wese' apwányam Dios ma'a énxet'ák ekxákma nak selyakye apagkok!

²⁵ Yeskohók eyke yakwayam etxek yányatnáxeg ma'a sóketáma aktek, keñe m'a énxet ekxákma nak selyakye apagkok askehek etxek ma'a aptémakxa nak Wese' apwányam Dios.

²⁶ Aptahak axta apkelmaxneyeyncha'a énxet'ák ektaha axta apkellegé s'e: —¿Yaksak sat kawagkasaxchek teyp?

²⁷ Aptahak axta Jesús apchátegmowágko s'e: —Aksok megkapwagkexa nak elának énxet, apwanchek elának Dios ma'a.

²⁸ Aptahak axta Pedro s'e: —Wese', negkexakkek axta negko'o ekyókxoho aksok egagkok axta, keñe negyetlawa exchep.

²⁹ Aptahak axta apchátegmowágko Jesús se'e: —Kéxegke ektahakxa enxoho kélyamasma kélxagkok, kéltáwa, esenhan ma'a kélyepma, kélyepmeyk esenhan, esenhan ma'a kélketchek, eñama m'a aptémakxa nak Wese' apwányam Dios,

³⁰ kayeykhágwomhok sat kélxaweykekxa aksok kélagkok keso náxop, keñe sat kólxawak ekyennakte kélnenya'ák megkatnegwayam enéxa m'a ektaha sat axnagkok kélheykha. Nakso' xa sektahakxa nak sekpeywa seláneya kéxegke.

Jesús ekteme antanxo apxéneykekxoho yakwayam yetsapok

³¹ Mók nekha axta apkelya'ásak Jesús doce apkeltámeséyak. Aptahak axta apkeláneya s'e: “Jerusalén kaxwo' nelmeyákxak, cham'a yakwánxa sat kasawhaxkohok katnehek ma'a ektémakxa axta apnaktáxeséyak énxet'ák ektaha axta apkellegaso Dios appeywa apxeyenma m'a aptaha nak Apketche énxet.

³² Kólmések sat ma'a énxet'ák metnaha nak judíos, yesmaksek sat nahan, ewanyaha sat, yexpakhak sat nahan apyamánog.

³³ Etekpagmakha sat nahan, yakhek sat nahan; wánxa agkok, antanxo ekhem sat eyke exátekhágwók.”

³⁴ Axta eyke elya'ásegkok Jesús apkeltámeséyak xa, axta elya'ásegkok nahan ma'a apxéna axta, mopwanchek axta elya'asagkohok ma'a ektahakxa axta apkeltennaso Jesús.

Jesús aptakmelcheseyam xama énxet meyke apakta'ák ma'a tegma apwányam Jericó

³⁵ Xama axta apwokmo Jesús keto' tegma apwányam Jericó, aphegkek axta xama énxet meyke apakta'ák ma'a nekha ámay apkelháxanma cha'a kólmések aksok.

³⁶ Xama axta apyekpelcha apkelyekhágwokmo énxet apxámokma m'a, aptegyáha axta amya'a apkeltamho ey'asagkohok ektahakxa.

³⁷ Kéltennásek axta apyeykhágwokmo Jesús apkeñama Nazaret ma'a.

³⁸ Aptahak axta apyennaktésawo appeywa s'e: —¡Jesús, David apketche, yepyósho helanok ko'o!

³⁹ Apnókaseyha axta eyke m'a énxet'ák ektaha axta apkelxega apmonye'e, apkeltamhok axta ewanma', wánxa agkok apyánchesakmok axta eyke apteme apyennaktésamo appeywa s'e: —¡David apketche, yepyósho helanok ko'o!

⁴⁰ Apkenegwokmek axta Jesús, keñe axta apkeltamho kólyentemegma'. Xama axta apwokmo keto' apkenmágkaxa, aptahak axta apkelmaxneyeyncha'a Jesús se'e:

⁴¹ —¿Yaksak apkeltamho atnésesek xép? Aptahak axta apchátegmowágko énxet meyke apakta'ák se'e: —Wese', emenyék ko'o ótekxaxma.

⁴² Aptahak axta apcháneya Jesús se'e: ¡Etekxaxma! Mey'áseyam keñamak kéltakmelchesakmo exchep.

⁴³ Yetlókók axta anhan apweteykekxaxma m'a énxet meyke apakta'ák axta, apyetlókek axta anhan Jesús apkeltemésesa apcheymákpoho Dios. Apkeltemésesek axta anhan apcheymákpoho Dios apyókxoho énxet ektaha axta apweteykegkoho xa.