SAN LUCAS 12 - Lengua Sur (Enxet) Nuevo Testamento

Jesús apxeyenma eyesagko antehek nelmeyókásamáxkoho egagko' nentémakxa

¹ Apchaknákxeyk axta énxet apxámokma apagko', apkelyegeykpok axta cha'a. Apchénawók axta apkeltenneykha Jesús. Apkeltámeséyak axta sekxo' aptahak apkeláneya s'e: “Kólawho kéxegke fariseos kempáseyak apagkok, cham'a apkelmeyókasamákpoho nak apkeltémakxa.

² Hakte yáxñakxoho sat keytnekxak ma'a ekyókxoho aksok ekyexamaxche nak, kólya'ásegwók sat nahan ma'a ekyókxoho aksok ekpowásamáxkoho nak.

³ Kañexchek sat elsakakxaxma m'a ekyókxoho kéltémakxa nak cha'a kélpeywa ekyaktesakxaxma; kañexchek sat nahan kélpáxameykha néten tegma kaxénaxchek ma'a kélyexamaxkoho axta kéltémakxa kélpeywa kañe' tegma.

Kéméxchek negko'o antehek negaye Dios

⁴ “Kéxegke eltennásak se'e enámokkok selásekhayo: nágkólé' aksa énxet apmopwána nak hegakhek, hakte mopwanchek hegakhekxak cha'a natámen segakhe.

⁵ Altennaksek sat ko'o kéxegke m'a eyéméxko nak kólé': kólteme cha'a kélaye m'a Dios aptaha nak apmopwána hegya'aksek sẽlmaseseykenxa natámen segakhe. Nakso', kólteme cha'a kélaye Dios.

⁶ “Megkólchexayhek cha'a cinco nátétkók yakwayam kólyanmagkasek ánet sawo selyakye. Wánxa agkok, megkalwagkámhe eyke Dios xama xa ekyókxoho nak.

⁷ Weykmók eyke kéxegke apkelyetsetcheso Dios ekyókxoho kélwa'. Nágkólé' aksa: ennóke kéxegke, megkólhawok ma'a nátétkók.

Enxet ektaha nak apkelxeyenma Jesús apwesey nápakta'awo' énxet'ák

⁸ “Apxénchek agkok xama énxet aptaha sétleykha ko'o nápakta'awo' énxet'ák, exének sat nahan aptaha nak Apketche énxet nápakta'awo' Dios apkelásenneykha aptaha apchásenneykha xa énxet nak.

⁹ Enxet mexeyenma nak ko'o sekwesey nápakta'awo' énxet'ák, megkólxének sat nahan apwesey nápakta'awo' Dios apkelásenneykha.

¹⁰ “Kawomhok sat nahan meyakmagkáseykekxa Dios aptémakxa m'a énxet apxeyenma ekmaso nak ma'a aptaha nak Apketche énxet; wánxa agkok, eyakmagkásekxak sat eyke Dios aptémakxa m'a énxet apxeyenma nak ekmaso Espíritu Santo.

¹¹ “Kélnaklókek sat agkok kéxegke kañe' apchakneykekxexa énxet'ák judíos, esenhan ma'a apheykegkaxa nak énxet'ák segyekpelchémo nak, cham'a apheykegkaxa nak han énxet'ák ekyawe nak kéláyo, nágkatneykha aksa kélwáxok yakwánxa enxoho kóltehek kélpeywa yakwayam kólátegmowagkok amya'a, cham'a yakwánxa enxoho kóltehek kélpeywa,

¹² hakte wokmek sat agkok yakwánxa kólpakmétek, Espíritu Santo sat egkések yakwánxa kóltehek kélpeywa.”

Sẽléso anxamaksek aksok egagkok

¹³ Xama énxet axta aptahak apcháneya Jesús nepyeseksa énxet se'e: —Sẽlxekmóso, yána' hana hegkeyásekxak ko'o eyepma m'a aksok sephewayam nak, cham'a sempekkencháseykekxa axta táta.

¹⁴ Aptahak axta apchátegmowágko Jesús se'e: —Emók, ¿Yaksak setnéseso kélnepyeseksa kéxegke sekyekpelchémo émók, tén han sexpáncheseso aksok kélagkok?

¹⁵ Kólawho kéxegke neltémo nak agyeykhasaxkohok ekha aksok egagkok; hakte megkañamak negyennakte ekmámnaksoho m'a nenxamáseyak nak aksok egagkok.

¹⁶ Keñe axta aptaha apkeltennáseyncha'a apyetcháseykekxoho s'e: “Aphegkek axta xama énxet ekxákma axta aksok apagkok, cham'a eknakxamáxko axta ekxámokma aksok ekyexna apkelchekha.

¹⁷ Entahak axta elchetamso apwáxok énxet ekxákma aksok apagkok se'e: ‘¿Háxko sat kexaha atnésesek? Méko seknegkenwánxa aksok ekyexna eknakxamáxche nak.’

¹⁸ Entahak axta elchetamso apwáxok se'e: ‘Ekya'ásegkok kaxwo' yakwánxa atnésesek. Apalchesegmak sat tegma sekxátamakxal'a aksok ekyexna eknakxamáxche, keñe sat alánekxak apkelyawe tegma sekxátamakxa aksok ekyexna eknakxamáxche nak, yakwayam enxoho axatmok ekyókxoho m'a aksok eknakxamáxche nak, tén han ma'a ekyókxoho aksok ahagkok nak.

¹⁹ Keñe sat katnehek kapakmésmakha ewáxok se'e: ‘Xámo' nak la'a aksok seltakmelcheso yakwayam amha ekyókxoho apyeyam; allókasek sat sekyampé, atwok sat aksa sekto, eynek sat nahan ma'a sekya nak, katakmelhok sat nahan sekha.’

²⁰ Aptahak axta Dios apcháneya s'e: ‘Enxet ekyéháxma. Yetsapok sat xép keso axta'a nak. ¿Yaksak sat kaxkekxak ma'a aksok apagkok apkeltakmelchesama nak?’

²¹ Cháxa ektémakxa nak han énxet apxámáseyak nak aksok apagkok xa, méko eyke aksok apagkok nápakto' Dios.”

Dios apkeltakmelcheso apketchek

²² Keñe axta aptaha apkeláneya Jesús apkeltámeséyak se'e: “Ektahak ko'o seláneya kéxegke s'e: ‘Nágkatne aksa ekxeyenma kélwáxok, yaksak sat kexaha antók neyseksók negha, nágkaxénmakha nahan kélwáxok ma'a yakwayam nak kólántaxnekxak neyseksók kélha.

²³ Hakte ennókek ma'a negyennakte nak megkaxnawok nento, keñe m'a negyókxa nak megkaxnawo apáwa.

²⁴ Kóllano hana máma: meknekxék cha'a aksok aktek, menakxehek nahan cha'a aksok ekyexna, méko nahan apxátamakxa aksok ekyexna apnakxo; wánxa agkok, Dios akke apkeleykegkok cha'a aptéyak. ¡Ennókók agko' eyke kéxegke, megkólhawok ma'a náta!

²⁵ Megkólwanchek kéxegke kólwennaktéshok kélha keso náxop, xámok eykhe katnehek ekxéneykha kélwáxok kólwennaktéshok kélha.

²⁶ Megkólwanchek agkok kéllana xa kélmáheyo nak kólwennaktéshok kélha, chakhók nahan kaxénmakha kélwáxok ma'a ekyókxoho aksok nak.

²⁷ “Kóllano hana ektémakxa nak éktega pánakte exnók: megkaltamheykha, megkalnexpagák nahan. Wánxa agkok, ektahak ko'o seláneya kéxegke s'e: axta exnágweykekxohok wese' Salomón ektémakxa axta eltakmela aksok apagkok xama enxoho xa pánakte exnók nak.

²⁸ Aptemésesek agkok nahan aptaxneyáseykekxa ektaxno Dios pánakte exnók xa ektaha nak, cham'a elakna nak yókxexma xama ekhem agko', keñe mók ekhem kólchexak nátex, eyeykhásamhok sat eyke ekxéneykha apwáxok Dios kéxegke kéltaha nak ekmasextoho kélteme megkólya'áseyam.

²⁹ Nágkalyakhapmakha aksa kélwáxok kéltegyeyncha'a enxoho kélto tén han ma'a kélyenéyak nak.

³⁰ Cháxa ekyetnakhasamol'a apwáxók énxet'ák apheykha nak náxop ekyókxoho xa aksok nak, yetneyk eyke kéxegke Kélyap apha nak ma'a néten, apya'áseykegkoho nak eyéméxko kéxegke xa.

³¹ Kaxénmakha sekxo' kélwáxok ma'a aptémakxa nak Wese' apwányam Dios, keñe sat kólxawak kéxegke ekyókxoho xa aksok nak.

Nenxamáseyak aksok ma'a néten

³² “Nágkólé' aksa kéxegke kéltaha nak seknaktóso nekkések; kélkántawók eykhe kéxegke, wánxa agkok, apmokók eyke egkések kéxegke aptémakxa nak Wese' apwányam ma'a Dios, aptaha nak Kélyap, eñama m'a apkelásekhayo nak.

³³ Kólchexeykxa aksok kélagkok, kólmés ma'a énxet meyke nak aksok apagkok; kóllenxánem kólwetak ma'a yágkentamáhak megkatné nak ápak, tén han kólxámasagkok aksok kélagkok meyke néxa m'a néten, cham'a megkapwagkexa nak etxek énxet apmenyexma tén han megkatamakxa nak cha'a aksok askok.

³⁴ Hakte cham'a ekhágkaxa enxoho ekxámokma aksok kélagkok, cha'a kaxénmakha nahan kélwáxok ma'a.

Kóllánekxa kéltahakxa

³⁵ “Kóllánekxa kéltahakxa, kólántaxnekxa' kélnakta, yetlo kélálewaso chálewaso kélagkok.

³⁶ Kólteme kéxegkáxa m'a aptamheykegkaxal'a wese' apkeláneykha apkelhaxanmol'a ewatak wese' apagkok yenyentak elánéxchexa sẽlyamhopma, yakwayam enxoho emeykesesek átog ekmanyehe agko', cham'a aptekpagwakto enxoho átog apwa'akto m'a wese'.

³⁷ Apkeleñémo apagko' wese' apkeláneykha apwakto enxoho m'a wese' apagkok, cham'a apwetágwakto enxoho menaktena. Yának sat nahan exmakha wese' apagkok ma'a nekha mésa, keñe sat elagkok aptéyak. Nakso' xa sektahakxa nak seláneya kéxegke.

³⁸ Apkeleñémo apagko' wese' apkeláneykha apkelwetágwakto enxoho wese' apagkok menaktena axta'a eyseksok esenhan amonye elsaye nak.

³⁹ Kólya'ásegwomho kéxegke s'e: apya'ásegkok agkok ekwánxa ekhem yakwánxa ewak apmenyexma énxet ekha nak apxagkok, megyohok kólmeykesesek átog yakwayam kólmenyexchesek aksok apagkok.

⁴⁰ Kóllánekxa nahan kéltahakxa kéxegkáxa; hakte ewatak sat ektaha nak Apketche énxet neyseksa megkólhaxanma.”

Kélásenneykha meyenseyam aptamheykha tén han kélásenneykha apyenseyam náksa aptamheykha

⁴¹ Aptahak axta apkelmaxneyeyncha'a Pedro s'e: —Wese', ¿negko'oya aksa ẽltennáseyha xa aksok apyetcháseykekxoho nak, apyókxoho énxet enxeykel'a?

⁴² Aptahak axta Wese' egegkok se'e: “Enxet kélásenneykha meyenseyam nak aptamheykha, tén han ma'a apya'áseykegkoho nak aksok, cham'a apchásenneykekxohol'a wese' apagkok eltakmelchesesek ma'a apkeláneykha apheykha nak apxagkok, yakwayam enxoho elmésagkok aptéyak ekwokmo enxoho apteykegkaxa aptéyak.

⁴³ Apkeleñémo agko' énxet kélásenneykha apwetágweykxo enxoho wese' apagkok apkelana m'a apkeltamhókxa axta etnehek.

⁴⁴ Eltennásek ko'o kéxegke peya esawhohok elmések aksok apagkok wese' yakwayam eltakmelchesesek xa kélásenneykha nak. Nakso' xa sektahakxa nak seláneya kéxegke.

⁴⁵ Wánxa agkok, xénchek agkok apwáxok peya mewakxék heykxa wese' apagkok ma'a apkeláneykha nak, keñe enaktawasagkohok ma'a apkelxegexma'a aptamheykha, tén han ma'a kelán'ák eltamheykha nak, apxakko' aksa etwok apto, apxakko' aksa nahan ének anmen ekwokmoho eyakha,

⁴⁶ keñe ewatak wese' apagkok neyseksa melhaxnakxoho, mey'asagkehek nahan ekwánxa hora, eñásesagkohok nahan, exnéshok ekwánxal'a kéllegasáseykegkoho m'a énxet'ák melyaheykekxoho nak wese' apagkok.

⁴⁷ “Enxet kélásenneykha apya'áseykegkoho nak aksok apmopmenyého elának wese' apagkok, wánxa agkok, melánekxék eyke aptahakxa, melyahakxók nahan aptémakxa appekkencháseykekxa appeywa, awanhok agko' sat katnehek kéllegasáseykegkoho.

⁴⁸ Wánxa agkok, asextók sat eyke katnehek kéllegasáseykegkoho wese' apkeláneykha apkelané nak aksok neyseksa mey'áseyak, cham'a ekpayhawo neykhe kóllegásesagkohok. Enxet apxawé nak ekyawe apya'áseyak, awanhek sat nahan katnehek kéltémo etneykha; énxet kélásennagko nak yakwayam etneykha, kólyateyagkohok kélagko' sat nahan kólának eyanchesagkohok ma'a aptamheykha.

Jesús keñamak apkexpánchásamap énxet

⁴⁹ “Ekwa'ak axta ko'o seksókmoho táxa yakwayam ayensak keso náxop; eltamhok eykhe ko'o kálewak heykxa xa táxa nak.

⁵⁰ Asagko' agko' sat ko'o katnehek seklegeykegkoho, eklegágkok ko'o kaxwo' nak, kawomhok sat ma'a ektemegwokmo sat néxa seklegeykegkoho.

⁵¹ ¿Kélaneykeya kéxegke asókmohok ko'o meyke ektahakxa egwáxok sekwa'a keso náxop? Eltennásek ko'o kéxegke masókmoho xa, wánxa seksókmoho m'a apkexpánchásamap nak énxet.

⁵² Sakhem eyeynawo apkexpánchásamap cinco apheykha nak xama tegma, apkántanxo sat etnehek apkelenmexma m'a apkánet nak, katnahagkok sat nahan cha'a.

⁵³ Yenmexekxak sat apketche énxet, keñe sat ma'a apketche yenmexekxak apyap; kanmexekxak sat étche m'a kelán'a, keñe sat étche kanmexekxak ma'a egken; enmexma sat katnekxak yepyámog ma'a atánegken, keñe sat atánegken katnekxak enmexma m'a yepyámog.”

Aksok magkenatcheso agweta' keso negwánxa nak

⁵⁴ Aptahak axta anhan apkeláneya Jesús énxet'ák se'e: “Kélwet'ak agkok kéxegke ektepa yaphopé ekpayho nak ektaxnegwánxa ekhem, kólxének nahan peya kamme', kamme' nahan.

⁵⁵ Kexchahakmek agkok nexcheyha, kólxének peya kamexnek. Kamexnek nahan.

⁵⁶ Kéxegke kélmeyókásamáxkoho nak kéltémakxa, kélwanchek agkok kólya'asagkohok kéxegke ektémakxa néten, tén han keso náxop, ¿Yaksak ektaha megkólewagko nak kólxének kéxegke ektahakxa aksok magkenatcheso agweta' keso negwánxa nak?

Nenlenxáneyam agásekhekxohok egmók senmexeykha

⁵⁷ “¿Yaksak ektaha megkólewagko nak kólyekpelkohok kélagko' ma'a aksok ekpayhawo nak anlának?

⁵⁸ Peyk agkok kólya'aksek kéxegke nápakta'awo' ma'a énxet'ák segyekpelchémo nak, kólyetlakxa nahan ma'a énxet ektaha nak apkeltémo esexnena', kólmohok aphakxa m'a énxet segyekpelchémo nak, kóllenxánem nahan kaxnágwakxohok mók kélpakmeyesma neyseksa kélpakhetchásamáxkoho, yakwayam enxoho megkólnaklewek kéxegke nápakta'awo' ma'a énxet'ák segyekpelchémo nak; agkok kóltahak xa, egkések katnehek énxet segyekpelchémo sẽlpextétamo, keñe sẽlpextétamo exatmok kéxegke kañe' tegma negmomaxchexa.

⁵⁹ Megkólántépekxék sat kéxegke m'a ekwokmoho kélsawhawo selyakye kélagkok kélyanmagkaso. Nakso' xa sektahakxa nak seláneya kéxegke.”