SAN LUCAS 10 - Lengua Sur (Enxet) Nuevo Testamento

Jesús apkeláphaso setenta y dos énxet

¹ Apkelyésáha axta anhan Wese' egegkok setenta y dos énxet natámen xa, apkánet axta cha'a apkeláphásak Jesús amonye apxega, apkeláphásek axta elmahagkok yókxoho nátegma, cham'a apmokókxa axta emhagkok Jesús.

² Aptahak axta apkeláneya s'e: “Xámok neyke agkok aksok yakwayam nak kanakxaxchek, keñe apkantawók ma'a énxet ektaha nak apkeltamheykha. Kólmaxna kéxegke m'a ektaha nak apagkok namyep yakwayam enxoho eláphaksek énxet ektaha nak apkeltamheykha, yakwayam enxoho yanchásekxak xa ekyexna nak.

³ Kólxeg kéxegke; kóllano, máxa nekkések apketkók ektemesásak kéxegke seláphasa kólpaxakwók aksok nawha'ák ello nak.

⁴ Nágkólsawho aksa nahápa, tén han ma'a selyakye axagkok nak, tén han ma'a kéltéto kélmagkok; nágkólchánwom nahan ámay neyseksa kélxega yakwayam kólpeykesek xama énxet enxoho.

⁵ Kéltaxnegwokmek sat agkok kañe' tegma, kólteme sat sekxo' kólpeykesek se'e: ‘Tásek sat kélha kéxegke.’

⁶ Yetneyk agkok meyke ektahakxa apwáxók énxet'ák ma'a, keytek sat meyke ektahakxa apwáxók xa énxet'ák nak; méko agkok nahan énxet meyke ektahakxa apwáxók ma'a, megkeytek sat ma'a meyke ektahakxa kélwáxok ekyetna nak kéxegke.

⁷ Kólhamho sat ma'a tegma kélwánxa enxoho, kóltawák sat nahan aksok apmésakxa enxoho, kólyenák sat nahan ma'a apmésakxa enxoho, payhawók exkak ekyanmaga m'a énxet ektaha nak aptamheykha. Nágkólyakmagkasak aksa pók tegma kélhayam.

⁸ Nátegma kélwánxa enxoho, cham'a kélmáxchexa enxoho takha' kéxegke, kóltawák sat aksok kélmésakxa enxoho;

⁹ kóltakmelchesem nahan elháxamáxche ekheykha m'a, kólteme sat kólának se'e: ‘Chágketwa'ak kéxegke m'a aptémakxa nak Wese' apwányam Dios.’

¹⁰ Kélwokmek agkok nahan pók tegma megkólmáxchexa enxoho takha' kéxegke, kólántep sat ma'a nepyeseksa tegma nak, kólteme sat kélpeywa s'e:

¹¹ ‘¡Wokmók nahan nempalcheso negko'o xóp ánek elyepetche egmagkok eñama kélheykegkaxa kéxegke yakwayam kólya'asagkohok eyesagko kéltahakxa! Kólya'asagkoho eyágketwa'a kéxegke m'a aptémakxa nak Wese' apwányam Dios.’

¹² Eltennásek ko'o kéxegke peya kasagkohok agko' kéllegasáseykegkoho xa énxet'ák nak, cham'a ekhem nelyekpelchamáxchexa sat, megkaxók sat ma'a ekwánxa axta kéllegasáseykegkoho énxet'ák apheykha axta Sodoma.

Enxet meyke apkelyaheykekxoho apkeleñama cha'a pók tegma

¹³ “¡Kéxegke sat laye kélheykha nak tegma apwányam Corazín, tén han ma'a tegma apwányam Betsaida! Hakte kaxtemek axta elánamáxche aksok sempelakkaso agweta' ma'a tegma apwányam Tiro tén han ma'a Sidón, cham'a elánéxko axta kélnepyeseksa kéxegke, nano' axta elyakmagkasek apwáxók, exekmóshok axta anhan aptamhágkaxa apkelyakmagkasa apwáxók, elántaxnekxak axta m'a apáwa sẽlwaxkamo nak, neyseksa tahap axta anhan exmakha.

¹⁴ Wánxa agkok, sagko' agko' sat eyke katnehek kéllegasáseykegkoho kéxegke m'a ekhem nelyekpelchamáxchexa sat, megkaxók sat ma'a ekwánxa axta kéllegasáseykegkoho énxet'ák apheykencha'a axta tegma apwányam Tiro, tén han ma'a tegma apwányam Sidón.

¹⁵ Kéxegke kélheykha nak tegma apwányam Capernaum, ¿kélaneykeya kóltemésesek kéxegke meyke ekhémo? ¡Kólchexak sat kéxegke ekweykmoho kañók agko' máxek sẽlmaseseykenxa!

¹⁶ “Enxet'ák ektahakxa enxoho apháxenmo kéltenneykha kéxegke, yeyxhok nahan ko'o xa sekpeywa; énxet'ák aptaknawe enxoho kéxegke, hetaknók nahan ko'o xa; énxet ektahakxa enxoho setaknagko ko'o, aptaknókek nahan ma'a aptaha axta seyáphaso.”

Setenta y dos énxet'ák apkelweykekxa makham aphakxa Jesús

¹⁷ Apkelwákxeyk axta makham aphakxa Jesús ma'a setenta y dos énxet'ák, yetlo elpayheykekxa apwáxók axta apkelwákxak ma'a. Aptahak axta apcháneya s'e: —¡Wese', wokmók sẽlyaheykekxoho kelyekhama' eñama nenxeyenma apwesey exchep!

¹⁸ Aptahak axta apkeláneya Jesús se'e: —Nakso', ekwet'ak axta ko'o Satanás ekteyekmo eñama néten, máxa axta entahak takha' apkelyenmal'a.

¹⁹ Ekmések axta ko'o kéxegke kélmowána yakwayam kólteyammok yéwa, tén han yettaha', tén han kólmalánek nepyeseksa m'a kélenmexma nak yetlo meyke kéllegeykegkoho ekmáske xama enxoho.

²⁰ Nágkalpayhekxa aksa kélwáxok kélwet'a elyahákxoho kélpeywa m'a kelyekhama', akke tásek kalpayhekxak kélwáxok ektáxesáxko kélwesey m'a néten.

Jesús ekpayheykekxa apwáxok

²¹ Yetlókók axta ekpayheykekxa agko' apwáxok Jesús eñama apméso m'a Espíritu Santo. Aptahak axta s'e: “Ektemésesek ko'o exchep apcheymákpoho Táta aptaha nak Wese' néten tén han Wese' keso náxop, hakte apxekmósek xép aksok ma'a énxet'ák ekmasextoho nak makham apkelya'áseyak, cham'a aksok mexekmósama axta exchep ma'a énxet'ák ekha nak apkelmopwána, tén han ma'a ekha nak apkelya'áseyak. Nakso' Táta, cháxa apkepmenyého axta katnehek xép xa.

²² “Egkések axta ko'o Táta ekyókxoho aksok. Méko kay'asagkohok aptémakxa m'a Dios Apketche, Apyap aksa ey'asagkohok; méko nahan kay'asagkohok aptémakxa m'a Dios, Apketche aksa ey'asagkohok, tén han ma'a énxet'ák apkepmenyéxa enxoho elya'asásegwomhok Dios Apketche aptémakxa Apyap.”

²³ Appeynchakpók axta Jesús apkelano apkeltámeséyak. Aptahak axta apkeláneya apxakcha'awók se'e: “Apkeleñémo énxet'ák apkelweté nak xa kélwet'a nak kéxegke;

²⁴ hakte eltennásek ko'o kéxegke apxámokma axta eykhe énxet'ák Dios appeywa apkellegaso apkeltémo étak xa kélwet'a nak kéxegke tén han ma'a kelwese'e apkelwányam nak, axta eyke elweteyk; apmenyék axta eykhe eñak xa kélleg'a nak kéxegke, axta eyke ellegeyk.”

Jesús apyetcháseykekxoho énxet ektakmela aptémakxa apkeñama Samaria

²⁵ Xama énxet apkelxekmóso ektémakxa segánamakxa axta appakhetchesekmok Jesús yakwayam enxoho ékkónek. Aptahak axta apkelmaxneyeyncha'a s'e: —Selxekmóso, ¿Yaksak eyéméxko alának ko'o yakwayam ótak ekyennakte egkenyek megkatnegwayam enéxa?

²⁶ Aptahak axta apchátegmowágko Jesús se'e: —¿Háxko ektémakxa eknaktáxésamaxche segánamakxa antehek? ¿Yaksak apwetaya exchep apkelyetsetma?

²⁷ Aptahak axta apchátegmowágko énxet ektaha axta apkelxekmóso apnámokkok ektémakxa segánamakxa s'e: —Etne apyeykhásamákpoho apchásekhayo Dios Wese' apagkok ekweykmoho kañók agko' apwáxok, tén han ekweykmoho m'a ektémakxa nak apyennakte, tén han ekweykmoho m'a elchetámeykha nak apwáxok; etne apchásekhayo pók ma'a ektémakxal'a apchásekhamakpoho apagko' xép.

²⁸ Aptahak axta apcháneya Jesús se'e: —Tásek apchátegmowéyak. Aptemék agkok xa, étak sat ekyennakte apnenyek.

²⁹ Wánxa agkok, apmokók axta eyke epeykásekxohok ektahakxa apkelmaxneyeykha m'a ektaha axta apkelxekmóso apnámokkok ektémakxa segánamakxa. Aptahak axta makham apkelmaxneyeyncha'a Jesús se'e: —¿Yaksak ko'o émók?

³⁰ Aptahak axta apchátegmowágko Jesús se'e: —Apxegkek axta xama énxet apkeñama Jerusalén apmahágko m'a tegma apwányam Jericó, apkeltahanya'awók axta énxet'ák elmasagcha'a apkeltémakxa, apkelyementegkek axta aksok apagkok, wokmók axta apkelyementama apkelnakta; apchakháha axta anhan, yáma apketsapma axta aptemesásak, keñe axta apkelxega.

³¹ Chakhawók axta nahan apxega énxet appasmo nak apkelmaxnéseso Dios énxet'ák apagkok apmahágko m'a ámay nak; xama axta apwet'a, apyetnakhásek axta aksa apyeyk'a.

³² Apyeykhágwokmek axta anhan xama énxet apkeñama axta nepyeseksa Leví énxet'ák apagkok. Xama axta apwet'a, apyetnakhásek axta aksa nahan apyeyk'a m'a.

³³ Appéwok axta anhan apxega xama énxet apkeñama Samaria m'a ámay nak. Xama axta apwet'a, apyósek axta apkelano.

³⁴ Apyo'ókmek axta, apkeltexnasásegkek axta aceite apkelyense, tén han ma'a vino, keñe axta appextetchesa apáwa. Apchánte axta anhan apkenátcháseykxak, tegma apheykemxa énxet axta apya'ásak, aptakmelchesek axta anhan.

³⁵ Mók ekhem axta entahak, aplekwákxo ánet sawo selyakye apagkok xa énxet apkeñama nak Samaria, apmések axta m'a ektaha axta apagkok tegma. Aptahak axta apcháneya s'e: ‘Etakmelches sat se'e énxet nak, aptegyásek sat agkok nahan mók aksok, ko'o sat ayanmagkasetak sexyekmo sat.’

³⁶ ¿Yaksak ekxéna apwáxok xép aptaha apchásekhayókxa énxet aptawáseykegkoho axta énxet'ák elmasagcha'a apkeltémakxa xa apkántanxo nak?

³⁷ Aptahak axta apchátegmowágko énxet apkelxekmóso axta ektémakxa segánamakxa s'e: —Cham'a apkepyóso exchek apkelano xa énxet nak. Aptahak axta apcháneya Jesús se'e: —Exeg, etne exchepxa xa ektaha nak.

Jesús apha Marta axagkok tén han María

³⁸ Apxegkek axta makham Jesús; apwokmek axta nátegma apheykegkaxa énxet, cham'a ekhésakmo axta axagkok xama kelán'a ekwesey axta Marta.

³⁹ Yetneyk axta xama yáxeg Marta ekwesey axta María, hakmek axta ekpayhókxa Jesús apmagkok xa, yakwayam enxoho keyxhok apkeltenneykha.

⁴⁰ Wánxa agkok, xámok axta elanakxa Marta, ya'aweykxek axta aphakxa Jesús. Entahak axta eyáneya s'e: —Wese', ¿Yagkaxénak apwáxok seyhákxo aksa sektamheykha eyáxeg? Yána hepasmok sektamheykha.

⁴¹ Aptahak axta apchátegmowágko Jesús se'e: —Marta, yetnakhásawók awáxok ekxáma elanakxa exche',

⁴² Xama aksok akke aksa exche' payhawók kalána'. Akke kelyésáha María m'a ektakmelakxa nak. Méko nahan kawának keymentók.