SAN LUCAS 1 - Lengua Sur (Enxet) Nuevo Testamento

Amya'a eyeynókxa

¹ Apxámok axta eykhe énxet apmáheyo enaktáxesagkok weykcha'áhak ektémakxa axta negyeseksa negko'o,

² ekhawo m'a ektémakxa axta senlegaso negko'o énxet'ák, ektaha axta apkelweteykegkoho sekxo' eyeynamókxa, cham'a ektaha axta kélásennagko eñeksek Dios appeywa.

³ Xép, Teófilo, aptaha nak seyásekhayo, ektakmelchesamók axta ko'o sektegyeykencha'a amya'a ekyókxoho eyeynamókxa ektéma xa. Xénchek axta ko'o ewáxok ektakmela agko' atakmelcheseshok sektáxéseso exchep xa, cham'a ektémakxa axta cha'a nentámen axta,

⁴ yakwayam enxoho ey'ásegwomhok ektakmela m'a amya'a ektémakxa axta kélxekmóso exchep.

Xama Dios apchásenneykha apxeyenma Juan el Bautista aptéyam

⁵ Aphegkek axta xama énxet aptaha axta appasmo apkelmaxnéseso Dios énxet'ák apagkok apwesey axta Zacarías, aptaha axta apkeñama nepyeseksa Abías apkelxegexma'a, Isabel axta ekwesey aptáwa, Aaron aptáwen neptámen axta m'a, cham'a aptémakxa axta makham Herodes wese' m'a yókxexma Judea.

⁶ Elpéwomo axta nápakto' Dios xa ánet nak, kelyaheykekxók axta ekyókxoho m'a apkeltémókxa nak antehek Dios, tén han ma'a Wese' egegkok segánamakxa apagkok nak, méko axta kawának kasexnenak xama enxoho.

⁷ Méko axta apketchek Zacarías, hakte katétche axta Isabel, hawók axta anhan mók ekteme elwanyamo' xa ánet nak.

⁸ Xama ekhem axta entahak ekpehewákxo apkeltamheykha nápakto' Dios apkelánamákpoho énxet'ák appasmo axta apkelmaxnéseso Dios énxet'ák apagkok, ektaha axta Zacarías apkelxegexma'a,

⁹ ekhawo m'a aptamheykegkaxa axta cha'a énxet'ák ektaha axta appasmo apkelmaxnéseso Dios énxet'ák apagkok. Xama aksok axta aptawásegkok yakwayam ey'asagkohok ekpehewayam yakwayam etxek ma'a kañe' Wese' egegkok tegma appagkanamap apagkok ektahakxa axta ekpagkanamaxchexa agko', yakwayam ewatnek aksok ánek ekmátsa ekpakneyam, Zacarías axta pehewokmok yakwayam etxek ma'a.

¹⁰ Apyókxoho énxet axta aptamhágkok nempeywa nelmaxnagko yókxexma, neyseksa apwatno Zacarías aksok ánek ekmátsa ekpakneyam.

¹¹ Xama Dios apchásenneykha axta apxekmowásekpohok Zacarías, apkenegwa'ak axta ekpayhókxa nak nelya'asamakxa nekha ekwatnamáxchexa aksok ánek ekmátsa ekpakneyam.

¹² Xama axta apwet'a Zacarías ma'a Dios apchásenneykha nak, apyegwakkek axta, apchekak axta nahan.

¹³ Wánxa agkok, aptahak axta apcháneya Dios apchásenneykha s'e: —Zacarías, náheyé' aksa. Apleg'awók Dios apkelmaxnagko exchep, kategkesek sat étche apkenna' aptáwa exchep, etnéses sat apwesey Juan.

¹⁴ Awanhok agko' sat katnehek xép ekpayheykekxa apwáxok, apxámokxoho énxet sat nahan kalpayhekxak apwáxók apteyekmo enxoho m'a,

¹⁵ hakte ekha kéláyo sat kóltehek nápakto' Dios ma'a apketche peya nak etyamok. Ménhek sat vino tén han ma'a anmen agko' nak, elánhok sat nahan apwáxok Espíritu Santo amonye aptéyam ma'a.

¹⁶ Exámásekxak sat énxet'ák Israel aptemesáseykekxa melya'áseyam Dios Wese' apagkok.

¹⁷ Wese' egegkok apmonye sat exog xa Juan, exhok sat ma'a Elías aptaha axta Dios appeywa aplegaso, cham'a ektémakxa axta apmopwána tén han ekha apyennakte, yakwayam enxoho yásekhasásekxohok apketchek ma'a énxet'ák, yakwayam enxoho kaltámeyagkok apkelyaheykekxoho m'a énxet'ák meyke apkelyaheykekxoho nak. Sat etnésesek apkeláneseykekxa apkeltémakxa énxet'ák yakwayam emok takha' Wese' egegkok xa ektaha nak.

¹⁸ Aptahak axta Zacarías apkelmaxneyeyncha'a Dios apchásenneykha s'e: —¿Háxko katnehek atnésesek ko'o ekmámnaksoho xa? hakte ekwanakmek ko'o, wanakmek nahan ma'a etáwa'.

¹⁹ Aptahak axta apchátegmowágko Dios apchásenneykha s'e: —Ko'o Gabriel. Ektamheykha cha'a ko'o nápakto' Dios, exchek seyáphaso apkeltamho apakhetchesek xép ma'a, tén han altennaksek se'e amya'a ektakmela nak.

²⁰ Meyke appeywa sat eyke etnehek kaxwo' xép, hakte apya'ásekmek xa sektahakxa nak seyáneya, mopwanchek sat epakmétek ekwokmoho ektaha xa sektahakxa nak seyáneya exchep.

²¹ Wegkak axta apkelhaxanma énxet'ák apheykha yókxexma etyapok Zacarías, yaksak kexaha ektaha ekwegkawo nak apha kañe' tegma appagkanamap, axta cha'a aptahak apkelmaxneyeyncha'a pók.

²² Xama axta aptepa Zacarías, mopwanchek axta apkelpakhetchesa énxet'ák, keñe axta apyekpelcha énxet'ák apwet'a Zacarías xama aksok kélxekmósamo m'a kañe' tegma appagkanamap ekpagkanamaxchexa nak, apkelpenteyháha axta aksa apkelpakhetchesa apnámokkok, wenaktémok axta ekteme meyke appeywa.

²³ Xama axta appenchesa aptamheykha Zacarías kañe' tegma appagkanamap, keñe axta apmeyákxo apxagkok.

²⁴ Lóso' axta entemék Isabel natámen xa, axta katyapmók axagkok ekweykmoho cinco pelten,

²⁵ “Wese' egegkok setnéseso s'e” —axta entemék cha'a elchetamso awáxok, “yakwayam enxoho kamaskok sewanyeyncha'a énxet'ák”.

Xama Dios apchásenneykha apxeyenma Jesús yakwayam etyamok.

²⁶ Seis pelten axta weykmok ekteme lóso' Isabel, keñe axta apchápháseykxo makham Dios apchásenneykha apwesey Gabriel ma'a tegma apwányam Nazaret, yókxexma Galilea,

²⁷ axta apcháphásak ma'a ekhakxa axta xama kelán'a étkok meyke kélteméseseykmohóxma, ekwesey axta María, cham'a ekpagkanma axta ekmáheyo katnehek atáwa xama énxet apwesey axta José, aptaha axta David aptáwen neptámen.

²⁸ Aptaxnegwokmek axta Dios apchásenneykha m'a ekhakxa axta María. Aptahak axta appeykesa s'e: —Ekpeykesek xeye' ektaha nak ekleklamo apwáxok Dios, Dios Wese' egegkok aptahak apxegexma exche'.

²⁹ Xegawók axta agkenyek María ekleg'a ektahakxa appeywa Dios apchásenneykha. Kelchetamchek axta awáxok eltamho kay'asagkohok ma'a ektahakxa axta kélpeykeso.

³⁰ Aptahak axta apcháneya Dios apchásenneykha s'e: —María, náheyé' aksa, leklamók apwáxok Dios ektémakxa exche'.

³¹ Lóso' sat kaxwo' katnehek xe', kategkesek sat étche apkenna', katnéses sat apwesey Jesús.

³² Etnehek sat énxet meyke ekhémo m'a, eltamhakpok sat Dios meyke ekhémo Apketche, Dios Wese' egegkok sat etnésesek Wese' apwányam ma'a, ekhawo m'a aptemésesamakxa axta David aptaha axta apyap nano',

³³ yakwayam enxoho megkatnegwomek néxa apteme Wese' apwányam nepyeseksa énxet'ák Israel. Megkamassegwomek sat apteme Wese' apwányam.

³⁴ Entahak axta María elmaxneyeyncha'a Dios apchásenneykha s'e: —¿Háxko katnehek hetnehek ko'o xa ektaha nak, mapatheteykegkok ko'o makham xama énxet enxoho?

³⁵ Aptahak axta apchátegmowágko Dios apchásenneykha s'e: Eweywenták sat Espíritu Santo takháxet xeye', káhapwatak sat Dios meyke ekhémo apmopwána, máxa yaphopé sat katnehek. Ekeso eñamakxa peya nak eltamhakpok Appagkanamap, tén han Dios Apketche m'a sakcha'a peya nak etyamok.

³⁶ Kótak sat nahan étche apkenna' m'a Isabel ektaha nak mók agko' xeye', ekwanyamo' eykhe entahak; seis pelten kaxwo' entahak ekteme lóso' ma'a ekxénamaxkoho axta cha'a megkamowána kótak étche.

³⁷ Méko xama aksok megkamopwána elának Dios.

³⁸ Entahak axta María eyátegmowágko s'e: —Ko'o sekteme Wese' egegkok apkeláneykha, hetnésesek sat ma'a aptahakxa nak xép seyáneya. Aptakháwok axta makham Dios apchásenneykha natámen ekteme ekpeywa María xa.

María ekteme meyk'a Isabel

³⁹ Keñe axta ekpekheyásawo ekxega María ekmahágko m'a nátegma ekxámakxa axta egkexe elyawe, yókxexma Judea.

⁴⁰ Taxnegwokmek axta Zacarías apxagkok María, keñe axta ekpeykesa Isabel.

⁴¹ Xama axta ekleg'a Isabel ektahakxa ekpeykeso María, keñe axta apkeltakhaheyncha'a sakcha'a m'a awáxok, aplanawók axta nahan awáxok Espíritu Santo.

⁴² Entahak axta ekyennaktésawo ekpeywa Isabel se'e: —Tásók agko' aptemésesakxa exche' Dios neyseksa ekyókxoho kelán'ák nak, tásók agko' nahan aptemésesakxa Dios ma'a étche.

⁴³ ¿Yaksak kexaha ektaha ektakmela nak ko'o setnahakxa, cháxa ekxegakmo nak Wese' egegkok egken setnaha meyk'a?

⁴⁴ Xama exchek sekleg'a sepeykesa, keñe apkeltakhaheyncha'a ewáxok sakcha'a, payhekxeyk xeyk apwáxok.

⁴⁵ ¡Eleñémo agko' megkay'áseykmo exche' ekmáheyo katnehek ma'a apkeltennasama axta katnehek Wese' egegkok!

⁴⁶ Entahak axta María s'e: “Ektemésesek ko'o apcheymákpoho Dios ekweykmoho kañók agko' ewáxok

⁴⁷ Payhekxeyk ewáxok eñama m'a Dios aptaha nak Semasma.

⁴⁸ Hakte melwáteseykmok seláneykha Dios, sektaha nak apkeláneykha megkeymáxkoho. Sakhem eyeynawo selteme seleñémo apyókxoho énxet'ák, ekweykmoho néxa,

⁴⁹ hakte tásók agko' ko'o setnésesakxa Dios ekha nak apyennakte, ¡Ekpagkanamaxche agko' apwesey!

⁵⁰ Yemlekxohok cha'a Dios ma'a énxet'ák ektaha nak apcháyo.

⁵¹ Ekyókxoho apmopwána axta apmáha aptamheyncha'a apkexpánchesa m'a énxet'ák eleymáxkoho nak apwáxók yetlo m'a ektémakxa axta ekxéneykha apwáxók yakweykenxa etnahagkok.

⁵² Apkelántekkesek axta apheykegkaxa néten apkeltaháno m'a kelwese'e apkelwányam nak, keñe axta aptemesáseykxo néten ma'a énxet'ák meyke apkeleymákpoho nak

⁵³ Apyeykháseykmok axta apméso aksok eltakmela m'a énxet'ák elnapma meyk, keñe apkeláphasa yetlo meyke aksok apagkok ma'a kelwese'e nak.

⁵⁴ Appasmeyk axta énxet'ák Israel, cham'a aptaha axta apkeláneykha, axta anhan kalwagkágweykmok aptéma cha'a apkelemleykekxoho.

⁵⁵ Cháxa aptémakxa axta apkenagkama Dios ẽlyepmeyk nano' negko'o xa cham'a Abraham, tén han ma'a yakwayam nak etnahagkok aptawan'ák neptámen, megkatnegwayam enéxa.”

⁵⁶ Apkántanxo pelten axta heykmok xamo' María m'a Isabel keñe axta ektakháwo makham axagkok.

Juan Bautista aptéyam

⁵⁷ Xama axta ekwokmo ekhem yakweykenxa katnehek nakláwa Isabel, tegkesek axta étche apkenna'.

⁵⁸ Apya'aweykxek axta ekhóxo tén han ma'a námokkok ancha'awo' nak, yakwayam kalpayhekxohok apwáxók xamo', cham'a apkelya'ásegwokmo axta ektakmela aptemésesakxa Dios ma'a Isabel.

⁵⁹ Kélyentamákxeyk axta sakcha'a yakwayam kólyenyekhásesek apyempehek kólkahaksek, cham'a ekwokmo axta ocho ekhem aptéyam. Zacarías axta eykhe kélmokók kóltemésesek apwesey, cham'a ektémakxa nak apwesey apyap,

⁶⁰ wánxa agkok, entahak axta eyátegmowágko egken se'e: —Nágkólteméses xa. Kólteméses apwesey Juan.

⁶¹ Aptahak axta apchátegmowágko énxet'ák se'e: —Méko xama ekteme námokkok apwesey xa ektéma nak.

⁶² Kélmék axta aksa kéltemesásak kélmaxneyeyncha'a apyap ma'a sakcha'a, yakwayam enxoho kólya'asagkohok yakwánxa etnésesek apwesey apketche.

⁶³ Yántéseksek étkok axta apkeltamhok kóltegyesha m'a apyap, cham'a kéltáxésamo axta cha'a. Aptahak axta aptáxéso s'e: ‘Juan apwesey xa’. Pelakkasek axta nahan apwet'a apxámokxoho énxet.

⁶⁴ Yetlókók axta anhan ektépeykekxa appeywa Zacarías, apkeltemésesek axta apcheymákpoho Dios.

⁶⁵ Apkelyegwakkek axta apyókxoho aphóxo, ekyókxoho yókxexma Judea ekxámakxa xóp elekháhéyak axta kéltennáha m'a ektahakxa axta.

⁶⁶ Kelchetagkasek axta apwáxók apxámokxoho énxet ektaha axta apkellegé. Aptahak axta apkelpakmeta s'e: “¿Yaksak sat kexaha etnehek ma'a sakcha'a nak?” Hakte nakso' axta ekwetáxko appasmo Wese' egegkok ma'a sakcha'a nak.

Zacarías apmeneykmaso

⁶⁷ Aplanawók axta apwáxok Espíritu Santo Zacarías aptaha axta sakcha'a apyap, aptahak axta apxéna amya'a eñama Dios se'e:

⁶⁸ “¡kóltemésesek sat apcheymákpoho Wese' egegkok, Israel Dios apagkok! Hakte apwayak axta yakwayam elwagkasek teyp énxet'ák apagkok!

⁶⁹ Egaphásesek axta negko'o segwagkaso teyp ekha apyennakte, David aptáwen neptámen, cham'a aptaha axta apkeláneykha.

⁷⁰ Cháxa apxeyenma axta Dios xa, eñama apkelxeyenma m'a énxet'ák apkellegaso axta appeywa, ektaha axta apkelpagkanamap,

⁷¹ apxeyenma axta peya hẽlwagkasek teyp nepyeseksa nelenmexma, tén han hẽlwagkasek teyp nepyeseksa m'a énxet'ák sẽltaknagko nak,

⁷² tén han apxeyenma elemlekxohok ma'a ẽlyepmeyk nano', tén han apxeyenma megkalwagkámhek ma'a ekhémo mók nelpakhetchásamáxkoho nak Dios, ektaha nak ekpagkanamaxche.

⁷³ Keso aptemésesama axta ekmámnaksoho agko' appeywa Dios apmésama Abraham negko'o egyap nano' se'e:

⁷⁴ cham'a apxéna axta hẽlmeyók nepyeseksa nelenmexma nak, yakwayam antehek negyetleykha yetlo meyke negaye xama enxoho,

⁷⁵ keñe nahan antehek negyepetcheyo yetlo ekpéwomo nentémakxa tén han nempagkanchásamáxche yókxoho ekhem neyseksók negha.

⁷⁶ Xép hatte, eltamhakpok sat xép aplegaso appeywa m'a Dios meyke ekhémo nak, hakte exog sat apmonye Wese' egegkok yakwayam elanekxések ámay apagkok,

⁷⁷ yakwayam elya'asásegwók énxet'ák apagkok peya meyakmagkásekxék Dios apkeltémakxa melya'asáxma, tén han peya egkések apkelwayam teyp.

⁷⁸ Hakte Dios egagkok negko'o ensantegkásak elseyexma ektémol'a kaxwé ekteyapma ekhem, eñama m'a ekyawe segemleykekxoho nak,

⁷⁹ yakwayam enxoho kalsásesexma m'a énxet'ák apheykha nak ekyaktésakxaxma, yakwayam hennaklakxak ma'a ámay ekyetnamakxa nak meyke ektahakxa egwáxok.”

⁸⁰ Apwánenyek axta m'a sakcha'a nak, yennakweykmek axta apteme mey'áseyam Dios, apheykmek axta yókxexma meykexa énxet ekwokmoho ekhem yakwánxa exekmósakpohok énxet'ák Israel.