SAN JUAN 7 - Lengua Sur (Enxet) Nuevo Testamento

Apkelyáxeg apagko' apkelya'áseyam Jesús

¹ Apweynchámeyha axta Jesús yókxexma Galilea natámen xa. Axta emokók exek ma'a Judea, hakte énxet'ák judíos axta apketámak apmoko yakhek ma'a.

² Chágketwokmek axta ekhem apkelpakxeneykegkaxa axta cha'a judíos aksok áwa' melwagkayam apkeltémakxa axta cha'a apyepmeyk nano'.

³ Aptahak axta apcháneya apkelyáxeg Jesús se'e: —Ney exnekxa aksa s'e. Emyekxa' sat makham ma'a Judea, yakwayam enxoho étak aksok apkelané exchep ma'a apkeltámeséyak apheykha nak ma'a.

⁴ Apmenyék agkok etnehek énxet kélyekpelchémo, méxakpók elának aksok. Elának nahan nápakta'awo' énxet'ák xa aksok apkelana nak, hakte apkelanak xép xa ektéma nak.

⁵ Wokmók axta anhan apkelyáxeg apya'áseyam Jesús.

⁶ Aptahak axta apkeláneya Jesús se'e: —Megkawokmok makham ekhem yakwánxa amyekxak ko'o m'a kaxnók kéxegke, kélwanchek kólmeyekxak ekhem kélmokókxa enxoho kólmeyekxak.

⁷ Mopwanchek etaknók kéxegke énxet'ák apkeleñamakxa apagko' nak keso náxop; hetaknawhok eyke ko'o, hakte tásek ko'o sekxekmóso eyesagko m'a aksok apkeláneyak nak.

⁸ Kólmohok kéxegke m'a apchaknákxexa nak énxet, maxñehek sat ko'o, hakte megkawokmok makham ekhem yakwánxa amyekxa'.

⁹ Aphákxeyk axta Jesús Galilea natámen apteme appeywa xa.

Jesús apmaheyak ekhem melwagkayam axta judíos apkeltémakxa apyepmeyk nano'

¹⁰ Xama axta apkelwegkepa apkelyáxeg, keñe axta anhan apmahágko Jesús ma'a apchaknákxexa axta énxet'ák, apyexákpók axta eyke, axta exekmowáseykpohok énxet'ák.

¹¹ Apketamchek axta eyke énxet'ák judíos Jesús ma'a apchaknákxexa axta énxet. Aptahak axta cha'a apkelpakmeta s'e: —¿Háxko kexaha apmahágkaxa m'a énxet nak?

¹² Apxénákpek axta cha'a Jesús nepyeseksa énxet'ák. Nápakha énxet axta cha'a aptahak apxéna Jesús se'e: “Méko aptémakxa m'a énxet nak”; keñe axta nápakha énxet'ák aptaha cha'a apxéna Jesús se'e: “Sagkek aptémakxa m'a énxet nak. Apkelyexancháseykha cha'a énxet'ák.”

¹³ Apkelyexákpók axta eyke cha'a énxet'ák apxéna Jesús, hakte judíos axta apcheykpok.

¹⁴ Aptaxnegwokmek axta Jesús tegma appagkanamap neyseksa apchakneykekxa énxet. Apkelxekmósek axta énxet'ák ma'a.

¹⁵ Aptahak axta apkelpakmeta judíos ekpelakkasa apkelleg'a ektahakxa apkelxekmóso Jesús se'e: —¿Háxko ektahakxa apya'ásegkoho nak ekyókxoho aksok meykexho kélxekmóso xa?

¹⁶ Aptahak axta apchátegmowágko Jesús se'e: —Háwe selxekmóso ahagko' ko'o s'e ektémakxa nak selxekmóso, cha'a keñamak ma'a aptaha axta seyáphaso ko'o.

¹⁷ Apmokók agkok elának xama énxet Dios apmopmenyého, apwanchek ékpelkohok ektaha eñama Dios se'e ektémakxa nak selxekmóso, tén han ékpelkohok ma'a sektaha enxoho selxekmóso ahagko'.

¹⁸ Enxet ektahakxa enxoho apkeltenneykha m'a ektahakxa enxoho elchetamso apwáxok, eltennaha cha'a yakwayam enxoho katakmelek apxeyenma énxet; keñe m'a énxet apkeltémo nak katakmelek apxénamap ma'a ektaha axta apcháphaso, ekmámnaksoho cha'a katnehek apkeltenneykha xa, méko nahan katnehek xama aksok kélxéncháseykekxoho aptémakxa.

¹⁹ “¿Háweya axta Moisés ma'a apmésama axta kéxegke segánamakxa? Akke kólyaheykekxohok kéxegke kélxama enxoho xa segánamakxa nak. ¿Yaksak ektaha kélmoko nak hélakhek ko'o?

²⁰ Aptahak axta apkelátegmowágko énxet'ák se'e: —¿Yaksak ekmoko kakhek xép? ¡Kelyekhama' taxnak apwáxok xép!

²¹ Aptahak axta apkeláneya Jesús se'e: —Kélyókxoho axta pelakkásak kélwet'a kéxegke m'a xama aksok selana axta ekhem nellókasamakxa nelyampé.

²² Apkeltémok axta cha'a Moisés kóllának kéxegke kélkahaso kélyenyekhamol'a egyempehek, háwe eykhe Moisés aptekkeso xa sẽlkahaso kélyenyekhamol'a egyempehek, kélyepmeyk nano' axta eyke ektaha aptekkeso xa. Kólyenyekháseshok cha'a kéxegke apyempehek xama sakcha'a kólkahaksek, megkóleyxek ma'a ekhem nellókasamakxal'a nelyampé.

²³ Megkóleyxek cha'a kéxegke ekhem nellókasamakxa nelyampé kólyenyekhásesek apyempehek sakcha'a kélkahasa enxoho, yakwayam enxoho kólsawhohok kóllának ma'a eltémókxa nak antehek Moisés segánamakxa apagkok. ¿Yaksak ektaha séltaknawe nak kélwet'a sektakmelchesakmo énxet apháxamap ekhem nellókasamakxa nelyampé?

²⁴ Nágkólteme aksa kélyekpelchémo kéxegke m'a aksok kéláneyakxa enxoho katnék. Kéltemék agkok cha'a kélyekpelchémo, kóltakmelcheshok cha'a kélteme kélyekpelchémo.

Jesús apxeyenma apkeñamakxa

²⁵ Nápakha énxet'ák apkeleñama Jerusalén axta aptahak aptegyeyncha'a amya'a s'e: —¿Háweya énxet apketagkakpo nak yakwayam kólakhek xa?

²⁶ Cháxa, méxakpoho apkeltennasa énxet'ák. Méko nahan eyátegmowágko. ¿Enxeykel'a ey'ásekmok kelwese'e egagkok aptaha nakso' Mesías xa énxet nak?

²⁷ Negya'ásegkok eyke negko'o apkeñamakxa xa énxet nak. Apxegakmek sat agkok Mesías méko sat kay'asagkohok apkeñamakxa.

²⁸ Xama axta apleg'a Jesús xa, aptahak axta apyennaktésawo appeywa neyseksa apkelxekmóso énxet'ák kañe' tegma appagkanamap se'e: —Elyekpelchawók neyke kéxegke, kélya'ásegkok neyke anhan señamakxa. Háwe axta ko'o sekxegayam ahagko', ekxegakmek axta ko'o aptaha seyáphaso m'a ekpayhawo nak kóltehek kéláyo, cham'a megkólya'ásegko nak kéxegke.

²⁹ Ko'o eyke ekya'ásegkok, hakte eñamak ko'o m'a, axta anhan seyáphaso m'a.

³⁰ Keñe axta peya eykhe emakpok Jesús, méko axta eyke ekpaknegwokmoho, hakte axta kawokmok makham ekhem apagkok.

³¹ Apxámok axta énxet apteme mey'áseyam Jesús. Aptahak axta nahan cha'a apkelpakmeta s'e: —¿Xámok enxoho sat eykel'a katnehek apkelané Mesías aksok sempelakkaso agweta' apwa'a enxoho, megkaxók sat kexaha ekwánxa nak apkelané xa énxet nak?

Enxet'ák fariseos apkelenxányam emok Jesús

³² Apkelleg'ak axta amya'a fariseos ektahakxa apkelpeywa énxet'ák apxéna Jesús, apkeláphásek axta sẽlpextétamo apkeleñama tegma appagkanamap xa énxet'ák fariseos tén han ma'a apkelámha apmonye'e apkelmaxnéseso apnámokkok, yakwayam enxoho emok Jesús.

³³ Keñe axta aptaha Jesús apkeláneya énxet'ák se'e: —Yakwatakxoho sat axek ko'o kélnepyseksa kéxegke, keñe sat amyekxak makham ma'a aphakxa nak ektaha axta seyáphaso.

³⁴ Hélchetmok sat kéxegke, mehelwetekxeyk sat eyke, hakte megkólwanchek sat kólmahagkok ma'a yakwánxa nak axek ko'o.

³⁵ Keñe axta aptaha apkelpakhetcháseykpoho énxet'ák judíos se'e: —¿Háxko apmokókxa emhagkok apxéna nak magwanchek agwetekxa'? ¿Enxeykel'a peyk emhagkok ma'a apheykegkaxa nak judíos apkekhegwayam nak mók nekha, yakwayam enxoho elxekmósek énxet'ák melya'áseyak nak Dios?

³⁶ ¿Yaksak kexaha apxéna aptaha exchek segáneya s'e: ‘Hélchetmok sat kéxegke, mehelwetekxeyk sat eyke, hakte megkólwanchek sat kólmahagkok ma'a yakwánxa nak axek ko'o’?

Yegmen segmésamo nak ekyennakte egnenyek

³⁷ Wokmek axta ekhem apchayókxa apagko' axta énxet'ák judíos, ektemegwánxa néxa apchakneykekxexa axta m'a. Apkempákxeyk axta néten Jesús ekwokmo xa ekhem nak. Aptahak axta apyennaktésawo appeywa s'e: —Hem sat agkok enchakhak énxet, hey'óta ko'o, agkések sat ko'o yegmen yakwayam ének.

³⁸ Ekhawo ektémakxa nak eknaktáxésamaxche s'e, katyapok sat yegmen ekyennaktésamo egnenyek apwáxok énxet apteme enxoho mehey'áseyam ko'o.

³⁹ Axta apxénak Jesús ma'a énxet ektahakxa enxoho apteme mey'áseyam peya exkak Espíritu, hakte axta eweyk makham Espíritu. Axta anhan kóltemésesók apcheymákpoho Jesús ma'a.

Apkexpanchásamap énxet'ák

⁴⁰ Xama axta apkelleg'a aptahakxa appeywa Jesús nápakha énxet'ák, aptahak axta apkelpakmeta s'e: —Nakso' nak aptaha Dios appeywa aplegaso xa énxet nak.

⁴¹ Keñe axta nápakha énxet aptaha apkelpeywa s'e: —Cháxa Mesías xa. Keñe axta nápakha énxet aptaha apkelpakmeta s'e: —Háwe, mopwanchek eyke yenyék Galilea Mesías.

⁴² Xeyenmék eknaktáxésamaxche peya etnehek Mesías David aptáwen neptámen, tén han peya yenyék ma'a nátegma Belén, cham'a apkeñamakxa axta anhan David.

⁴³ Keñe axta apkexpáncháseykpo énxet, Jesús axta ñokxa apxénákpo.

⁴⁴ Nápakha énxet axta apmoko exnésók Jesús ma'a sẽlpextétamakxa, méko axta eyke ekhésakmo.

Kelwese'e apya'áseyam Jesús

⁴⁵ Apkeltakháwók axta makham sẽlpextétamo aptakmelcheso tegma appagkanamap apkelmeyákxo m'a aphágkaxa axta fariseos, tén han ma'a aphágkaxa axta apkelámha apmonye'e nak apkelmaxnéseso Dios énxet'ák apagkok. Entahak axta amya'a kélmaxneyeyncha'a sẽlpextétamo s'e: —¿Yaksak ektaha mekólyentamanto nak?

⁴⁶ Aptahak axta apkelátegmowágko sẽlpextétamo s'e: —Méko xama énxet ekhawo apkeltenneykha ektahakxa nak apkeltenneykha m'a énxet nak.

⁴⁷ Aptahak axta fariseos apkeláneya sẽlpextétamo s'e: —¿Kél'awoya apkelyexanchásencha'a kéxegkáxa m'a énxet nak?

⁴⁸ ¿Enxeykel'a anhan elya'ásekmok Jesús ma'a apkelámha apmonye'e egagkok nak, tén han ma'a fariseos?

⁴⁹ Dios sat emasesók xa énxet'ák nak, hakte melya'ásegkok ektémakxa nak segánamakxa.

⁵⁰ Appakmetchek axta xama fariseo apwesey axta Nicodemo, cham'a apya'áyekmo nak Jesús. Aptahak axta apkeláneya énxet'ák se'e:

⁵¹ —Magwanchek negko'o agának emakpok énxet manleg'a enxoho sekxo' aptahakxa appeywa ekhawo m'a eltémókxa nak antehek segánamakxa egagkok, yakwayam enxoho kólya'asagkohok ektémakxa aksok apkelané.

⁵² Aptahak axta apkelátegmowágko énxet'ák se'e: —¿Xépya nahan apkeñama Galilea? Eltámesap ektémakxa nak eknaktáxésamaxche, ékpelchágwók sat xép metyapma Dios appeywa aplegaso apkeñama m'a Galilea.

⁵³ Keñe axta apkelmeyákxo apxanák xa énxet'ák nak.