SAN JUAN 12 - Lengua Sur (Enxet) Nuevo Testamento

Kelán'a expakhé sokmátsa Jesús

¹ Seis ekhem axta kéméxchek yakwayam kammok ekhem melwagkayam axta judíos, cham'a kéltéma axta Pascua. Apmeyákxeyk axta Jesús Betania, aphamakxa axta Lázaro, cham'a apxátekhásekmo axta Jesús.

² Keláneyxchek axta ektámáxche m'a yakwayam etáswók Jesús; Marta axta ekmelásekté nento, Lázaro axta anhan aphak ma'a nekha mésa, aptókok axta xamo' apto Jesús.

³ Sánteyk axta María sokmátsa ekmomnáwa agko' ekwesey axta nardo, xegkások axta kammok teyp un cuarto, kexpakhásesek axta apmagkok Jesús; keñe axta ektaha áwa' elyamasáseykxo apmagkok Jesús. Sawhekxók axta kañe' tegma empa'a ekpakneyam xa sokmátsa nak.

⁴ Keñe axta appakmeta Judas Iscariote, cham'a aptaha axta xama apkeltámeséyak Jesús apmáheyo etlakkasesek yának emakpok Jesús. Aptahak axta s'e:

⁵ —¿Yaksak ektaha megkólyenyekxo nak ekha ekyanmaga xa sokmátsa nak, hawók treinta ekhem nak ekyanmaga nentamheykha, yakwayam enxoho kapasmok ma'a énxet'ák meyke nak aksok apagkok?

⁶ Háwe axta eyke ekxéneykha apwáxok Judas ma'a énxet'ák meyke nak aksok apagkok aptaha appeywa xa, hakte apmenyexma axta m'a, selyakye axagkok axta anhan aptakmelcheso, emenyexhok axta anhan cha'a m'a selyakye kélxata nak kañe'.

⁷ Aptahak axta Jesús se'e: —Yoho aksa, cha'a takmelchesásak ma'a ekhem selatawanya sat ko'o.

⁸ Exek sat cha'a kélnepyeseksa kéxegke m'a énxet'ák meyke nak aksok apagkok, wánxa agkok, maxek sat eyke cha'a ko'o kélnepyeseksa kéxegke.

Enxet'ák judíos apkelpakhetchásamákpoho yakwayam yakhek Lázaro

⁹ Apxámok axta judíos apkelleg'a amya'a apha Jesús ma'a Betania, apkelmahágkek axta m'a, háwe axta apwánxa apagkok Jesús apkeltamho éta', Lázaro axta anhan apmokók éta', cham'a apxátekhásekmo axta Jesús.

¹⁰ Axta anhan apmoko yakhek Lázaro m'a énxet'ák apkelámha apmonye'e nak appasmo apkelmaxnéseso Dios énxet'ák apagkok,

¹¹ hakte Lázaro axta keñamak ekmassa apteme apcháyo énxet'ák ma'a ektaha nak apkelámha apmonye'e appasmo apkelmaxnéseso Dios énxet'ák apagkok, Jesús axta aptamhágkok melya'áseyam.

Jesús aptaxnegweykekxa tegma apwányam Jerusalén

¹² Apxámok axta énxet apkelmahágko tegma apwányam Jerusalén yakwayam epasmok ma'a ekhem melwagkayam axta judíos kéltéma axta Pascua. Mók ekhem axta entahak apkelleg'a amya'a énxet'ák peya nahan ewók Jesús ma'a tegma apwányam nak.

¹³ Apkelyaktenágkek axta yam'áx'áwa apkelanyexágko Jesús xa énxet'ák nak. Aptahak axta apkelyennaktésawo apkelpeywa s'e: —¡Apcheymákpoho Dios! ¡Dios sat epasmok xa apxegakmo nak, aptaha nak Wese' egegkok Dios apcháphaso! ¡Dios sat epasmok Israel Wese' apwányam apagkok!

¹⁴ Apwetágwokmek axta Jesús xama yamelyeheykok étkok, apchánteyk axta anhan, ekhawo ektémakxa nak eknaktáxésamaxche s'e:

¹⁵ “Xép tegma apwányam Sión, nágye'; elano, apxegakmek xép Wese' apwányam apagkok yetlo yamelyeheykok étkok apchánte.”

¹⁶ Axta elya'ásegkok sekxo' Jesús apkeltámeséyak xa ektahakxa axta, wánxa agkok xénwokmek axta apwáxók ekyetnama eknaktáxésamaxche ekxeyenma m'a Jesús, cham'a kélmésa axta apcheymákpoho natámen kélxátekháseyam.

¹⁷ Apkeltennáha axta ektahakxa aksok apkelweté m'a énxet'ák ektaha axta apkelxegexma'a Jesús, cham'a apwónencha'a axta Lázaro kañe' takhaxpop tén han ma'a ektahakxa axta apxátakhásekmo.

¹⁸ Ekeso eñamakxa apkelanyexágko axta Jesús xa énxet'ák nak, hakte apkelleg'ak axta amya'a ektahakxa apkelané Jesús aksok sempelakkasamo nak agweta'.

¹⁹ Wánxa agkok, aptahak axta apkelpakhetcháseykpoho énxet'ák fariseos se'e: —Kélwet'ak kéxegke méko nenlana negko'o. ¡Kóllano hana, apxámok énxet'ák apkelyetlo Jesús!

Nápakha griegos apketamso Jesús

²⁰ Nápakha énxet'ák griegos axta anhan apkelpaxkamap ma'a énxet'ák apkelmahágko axta Jerusalén yakwayam elpeykeshok Dios ekhem melwagkayam axta judíos.

²¹ Apyo'ókmek axta Felipe xa énxet'ák nak, cham'a Felipe aptaha axta apkeñama tegma apwányam Betsaida, yókxexma Galilea. Entahak axta amya'a apcháneyákpo Felipe s'e: —Wese', neltamhok negko'o agwetak Jesús.

²² Apxegkek axta Felipe apkeltennásekxo Andrés, keñe axta apkelxega xa apkánet nak apkeltennásekxo Jesús.

²³ Aptahak axta Jesús apkeláneya xa énxet'ák nak. —Wokmek kaxwo' ekhem yakwánxa nak kóltemésesek apcheymákpoho m'a ektaha nak Apketche énxet.

²⁴ Agkok etyekmok hótahap apaktek náxop, tén han megyetsapa enxoho, megkaxyánegwomek ekteme hótahap apaktek; wánxa agkok, ketsekkek agkok hótahap apaktek, xámok katnehek kélnakxo apyexna. Nakso' xa sektahakxa nak seláneya kéxegke.

²⁵ Kéxegke ektahakxa enxoho kélásekhayo ektémakxa nak kélyennakte, kamassegwók sat; keñe m'a énxet ektahakxa enxoho megyásekhayo ektémakxa nak apyennakte eñama keso náxop, keytek sat ekyennakte apnenyek megkatnegwayam enéxa.

²⁶ Enxet ektahakxa enxoho apmáheyo etnehek seláneykha ko'o, hetlawha sat; exnók sat nahan ma'a sekhámxa enxoho. Táta sat egkések yakwayam kóltehek kéláyo m'a énxet apteme nak seláneykha ko'o.

Jesús apxeyenma yakwayam yetsapok

²⁷ “¡Eklegágkok kaxwo' ko'o ekyentaxnamo agko' elapwayam ewáxok! ¿Háxko sat ko'o atnehek sekpeywa? ¿Keya sat atnehek sekpeywa s'e?: ‘Táta, hemaséses ko'o s'e selapwayam nak’. Ekwa'ak axta ko'o yakwayam ótak xa ektéma nak.

²⁸ Táta, yána kóltemésesek eyeymáxkoho apwesey exchep. Keñe axta eklegáxko kélpeywa eñama néten, entahak axta s'e: “Ektemésesek axta ko'o eyémáxkoho exchep apwesey, atnésesek sat makham eyémáxkoho apwesey exchep.”

²⁹ Takha' appáwá axta apkeneyk énxet'ák ektaha axta apkellegé kélpeywa; Nápakha énxet axta aptahak apkelpakmeta s'e: —Xama Dios apchásenneykha appakhetchásak.

³⁰ Aptahak axta Jesús apkeláneya énxet'ák se'e: —Háwe ko'o sellegaso xa amya'a eklegáxko nak, kéxegke eyke kéllegasamo xa.

³¹ Peyk kaxwo' kóltehek kélyekpelchémo apyókxoho énxet apheykha nak keso náxop, peyk nahan kaxwo' kóltekkesek ektéma nak wese' keso náxop.

³² Elya'ásekxeyk sat agkok ko'o néten neyseksa sekha keso náxop, anaklantak sat nahan apyókxoho énxet'ák.

³³ Axta apxénak Jesús ma'a yakwánxa axta katnehek apketsapma.

³⁴ Aptahak axta apkelátegmowágko énxet'ák se'e: —Segánamakxa keñamak negya'ásegkoho negko'o peya exek cha'a Mesías megkatnegwayam enéxa. ¿Yaksak ektaha apxéna nak xép peya kólya'ásekxak néten ma'a ektaha nak Apketche énxet? ¿Yaksa m'a ektaha nak Apketche énxet?

³⁵ Aptahak axta apkeláneya Jesús se'e: —Keytek sat makham kélnepyeseksa kéxegke elseyexma, yakwatakxoho sat eyke keytek. Kólyentamaxkoho kólweynchamha ekhakxa nak makham elseyexma, yakwayam enxoho megkatlakkasek kahapwak kéxegke ekyaktesóxma; hakte énxet ektahakxa enxoho apwenchámeykha neyseksa ekyaktesóxma mey'asagkehek ma'a apmahágkaxa enxoho.

³⁶ Nágkólya'ásem xa elseyexma ekyetna nak makham kélnepyeseksa kéxegke, yakwayam enxoho kóltehek kéleñamakxa neyseksa elseyexma. Apxegkek axta Jesús natámen apteme appeywa xa, axta apxegánegkásak xa énxet'ák nak.

Enxet'ák judíos apya'áseyam Jesús

³⁷ Apkelanak axta eykhe cha'a Jesús aksok sempelakkaso agko' agweta' nápakta'awo' xa énxet'ák nak, apkelya'ásekmek axta eyke xa énxet'ák nak;

³⁸ hakte máheyok axta kasawhaxkohok katnehek ma'a ektémakxa axta apnaktáxeséyak Isaías, aptaha axta Dios appeywa aplegaso ektéma axta ekpeywa s'e: “Wese', ¿yaksak axta megkay'ásekmo amya'a nenlegaso axta negko'o? ¿Yaksak axta énxet'ák apxekmósa Wese' egegkok ma'a ektémakxa nak apmopwána?”

³⁹ Apkelya'ásekmek axta xa énxet'ák nak, hakte axta anhan entemék aptáxéso Isaías weykcha'áhak se'e:

⁴⁰ “Apkelahakkasesegkek axta apakta'ák Dios xa énxet'ák nak, melya'áseyak aksok axta anhan aptemesásak, yakwayam enxoho melwetyehek aksok yakwayam enxoho nahan melyekpelchágwome'; yakwayam enxoho mehey'óte' ko'o, yakwayam enxoho anhan mamasésesek ko'o m'a ektamheykegkaxa nak.”

⁴¹ Apxeyenmék axta Isaías xa, hakte apwetayak axta ektémakxa Jesús apcheymákpoho, apxeyenmék axta anhan Jesús apwesey.

⁴² Wánxa agkok, apxámok axta énxet'ák judíos apteme melya'áseyam Jesús; weykmók axta anhan ma'a énxet'ák ekha nak kéláyo. Axta eyke exeyenmak nápakta'awo' énxet'ák, hakte énxet'ák fariseos axta apkelayék, yakwayam enxoho megkólántekkesek ma'a kañe' apchakneykekxexa nak énxet'ák judíos.

⁴³ Axta apmenyék énxet'ák ma'a nentémakxa eklekkesamo nak apwáxok antehek énxet keso náxop, keñe axta eyesextoho apmopmenyého m'a nentémakxa eklekkesamókxa nak apwáxok antehek Dios.

Jesús appeywa yakwayam kalyekpelkohok énxet'ák

⁴⁴ Aptahak axta apyennaktésawo appeywa Jesús se'e: “Enxet ektahakxa enxoho mehey'áseyam ko'o, háwe exakko' mehey'ásekmo ko'o, mey'ásekmok nahan ma'a Táta, aptaha axta seyáphaso ko'o.

⁴⁵ Enxet ektahakxa enxoho seté ko'o, apwet'ak nahan ma'a aptaha axta seyáphaso ko'o.

⁴⁶ Ekwa'ak axta ko'o keso náxop, yakwayam enxoho mexmakha neyseksa ekyaktesóxma énxet'ák apteme nak mehey'áseyam, ko'o sektaha nak elseyexma.

⁴⁷ Enxet ektahakxa enxoho apháxenmo sekpeywa, keñe melyahakxo', háwe ko'o yakwayam kañék apsexnánémap, háwe axta ko'o yakwayam alsexnenak énxet sekwa'a keso náxop, wánxa agkok ekwayak axta ko'o yakwayam alwagkasek teyp énxet'ák apheykha nak keso náxop.

⁴⁸ Enxet ektahakxa enxoho setaknagko ko'o, tén han ma'a melyaheykekxoho nak sekpeywa, cháxa ekyetna yakwayam kasexnenak xa: ko'o sekpeywa sat kalsexnenak énxet'ák ektemegwokmo sat néxa ekhem.

⁴⁹ Hakte matnék ko'o sekxénamaxchekxoho ahagko'; egkések axta ko'o Táta apkeltamhókxa atnehek sekpeywa, cham'a aptaha axta seyáphaso, axta anhan eltennásak ma'a apkeltamhókxa axta atnehek selxekmóso.

⁵⁰ Ekya'ásegkok ko'o ektaha segmésamo ekyennakte egnenyek ma'a apkeltémókxa nak antehek Táta. Ektemegkek cha'a ko'o sekpeywa m'a apkeltémókxa nak atnehek sekpeywa Táta, cham'a sektémakxa nak cha'a sekpeywa.”