HEBREOS 9 - Lengua Sur (Enxet) Nuevo Testamento

Tegma appagkanamap apyetna nak náxop tén han tegma appagkanamap apyetna nak néten

¹ Yetneyk axta ektémakxa sempékesáseyak, ektémakxa nelpeykesamo Dios ma'a émha amonye ekhémo mók nelpakhetchásamáxkoho Dios axta, cháxa elánamáxko axta cha'a kañe' tegma appagkanamap apyetnama nak náxop xa.

² Axta entemék cha'a apkelánamap tegma appagkanamap se'e: émha amonye apwáxok axta kélteme ekpagkanamaxchexa, kólpekkenhok axta cha'a chálewaso, tén han ma'a mésa kélnegkenmo axta cha'a kelpasmaga kélpagkancheso Dios.

³ Keñe axta pók apwáxok teyp axta kélhaxta apáwa, kéltéma kélpagkanchesamakxa agko' Dios;

⁴ cháxa ekyetnamakxa axta sawo ekyátekto elyenma ekmomnáwa xa, ekwatnamáxchexa axta aksok ekmátsa ekpakneyam éten agkok, tén han ma'a yántéseksek ekyetchesamaxkoho axta m'a ektémakxa nak ekhémo mók nelpakhetchásamáxkoho Dios, sawheykekxók axta empehek sawo ekyátekto elyenma ekmomnáwa xa yántéseksek nak. yetnegkek axta nahan egheykok yetlo kélxata maná kañe' xa yántéseksek nak, Aarón aptaskapeykha axta anhan yetnók kañe', cham'a eltektépeykekxoho axta, tén han ma'a meteymog eknaktáxésamaxche axta ekhémo nak mók nelpakhetchásamáxkoho Dios.

⁵ Keñe axta m'a átog ekpehewayam nak néten ekyetnama kéleykmáseso kélheyáseykegkoho m'a Dios apkelásenneykha ekha apxempenák la'a, ektaha axta ekyetchesamaxkoho apha nahan Dios ma'a, apchaklasegkek axta apxempenák átog xa yántéseksek nak, akke kapayhawok kaxwo' anxének ekyókxoho ektémakxa ekxénamaxche xa amya'a nak.

⁶ Cháxa ektémakxa axta apkelánamap tegma appagkanamap xa, ekyókxoho ekhem axta cha'a katnehek apkelántaxnegweykekxa énxet'ák appasmo nak apkelmaxnéseso Dios énxet'ák apagkok, cham'a sekxo' nentaxnakxa nak apwáxok xa tegma nak, yakwayam enxoho elának ma'a ektémakxa nak apkeltamheykha ektaha nak appasmo apkelmaxnéseso Dios énxet'ák apagkok.

⁷ keñe m'a pók apwáxok nak tegma appagkanamap, wánxa axta aksa etxek ma'a apkemha apmonye nak appasmo apkelmaxnéseso Dios énxet'ák apagkok, xama aptaxnegweykekxa axta cha'a etnehek xama apyeyam; esakxohok axta anhan cha'a aksok kélnaktóso ektekyawa ém'agkok, yakwayam enxoho egkések Dios ekyakmageykekxa m'a aptémakxa nak mey'asáxma, tén han ma'a ektémakxa nak melya'asáxma énxet'ák, cham'a apkeláneyak nak melya'asáxma neyseksa melya'áseyak, cham'a aptaxnegwákxo enxoho cha'a kañe' tegma appagkanamap.

⁸ Cháxa segya'asáseykegkoho axta Espíritu Santo megkamayhamakxa axta makham ma'a nentaxnamakxa nak kañe' tegma appagkanamap ektahakxa nak ekpagkanamaxchexa agko', cham'a ekyetnamakxa axta makham émha amonye apwáxok xa tegma appagkanamap nak.

⁹ Cháxa ektaha nak ekyetchesamaxkoho s'e negwánxa nak; hakte yawanchek katnésesek ektakmela elchetamso apwáxok énxet ektaha nak apkelpeykesamo Dios, eñama xa aksok kélméso nak Dios, tén han eñama m'a aksok kélnaktóso ektekyawa kélméso nak Dios;

¹⁰ hakte aksok nentamakxa eyke aksa xa, tén han ma'a negyamol'a, tén han ma'a segmasésesamol'a ektémakxa nak aksok sempeysegkeso, cháxa ektaha nak ekyetno yókxexmók xa aksok nak, kélmeykencha'awol'a ekwokmoho apyakmagkasesa ektémakxa Dios.

¹¹ Wánxa agkok, apwayak eyke kaxwo' Cristo, aptemék nahan kaxwo' apkemha apmonye appasmo apkelmaxnéseso Dios énxet'ák apagkok aptaha nak aptekkeso m'a aksok eltakmela nak. Aptásók apagko' ma'a tegma appagkanamap aptamhágkaxa nak Cristo appasmo apkelmaxnéseso Dios énxet'ák apagkok, cham'a aptémakxal'a tegma appagkanamap, megkatnaha nak énxet apkelané, megkaxnawok ma'a ektémakxa nak elánamáxche ekyókxoho aksok keso náxop.

¹² Aptaxnegwákxeyk axta Cristo m'a ekpagkanamaxchexa agko' nak, háwe eyke yakwayam egkések kaxwo' Dios yát'ay apketkok éma apagkok, tén han ma'a weyke étkok éma agkok nak, éma apagkok apagko' axta apmeyásak Dios; xama axta aptaxnegwayam Cristo m'a ekpagkanamaxchexa agko' nak, wánxa m'a, egwetásek axta nahan negko'o xa nelwagkásamáxche teyp megkatnegwayam enéxa.

¹³ Nakso' eykhe eyewagko katnésesek apkelpagkanamap énxet'ák ma'a weyke kennawók éma agkok nak, tén han ma'a yát'ay apketkok éma apagkok nak, tén han ma'a weyke étkok tahap agkok ekwatnamáxchel'a néten meteymog ekwatnamáxchexal'a aksok kélnaktóso ektekyawa, cháxa kélexpakheykegkohol'a énxet'ák ekmanyása nak apkeltémakxa xa, wánxa eyke aksa katnésesek eyáxñeyo so egyempoho nak.

¹⁴ Nakso' agkok ektéma xa ektaha nak, keñe ekyagwánxa agko' katnehek ekha ekmowána m'a Cristo éma apagkok nak. Espíritu memassegwayam axta keñamak apmeyásamákpoho apagko' Cristo m'a Dios ektémol'a aksok kélméso Dios meyke ekyepetche xama aksok ekmaso, káxñeksohok nahan Cristo éma apagkok ma'a ekteyapmakxa nak ekpakmeteykha egwáxok eñama nenlané aksok segya'asamo nak nétsapmakxa, yakwayam enxoho agkegwának anlának ma'a apkeltémókxa nak anlának Dios memassegwayam nak.

¹⁵ Ekeso eñamakxa apketsapa axta Cristo yakwayam etnehek apyepetcháseykekxa énxet'ák ma'a Dios, eñama m'a axnagkok ekhémo mók nelpakhetchásamáxkoho nak Dios, yakwayam enxoho nahan megkólyakmagkásekxék ektémakxa apkeláneyak melya'asáxma énxet'ák ma'a kélmeykegkaxa axta makham émha amonye ekhémo mók nelpakhetchásamáxkoho nak Dios, yakwayam enxoho nahan elxawagkok aksok kélpagkancheso megkatnegwayam enéxa m'a énxet'ák ektaha axta apkelwóneykha Dios, cham'a apxeyenma axta elmésagkok Dios.

¹⁶ Wokmek agkok yakwánxa kólmaha m'a weykcha'áhak ekxeyenma nak nenxaweykekxa aksok eltakmópeyak, cham'a sempekkencháseykekxa nak énxet ektaha apketsapma, kéméxchek sekxo' kólya'asagkohok ektakmela m'a apketsapa enxoho, cham'a énxet ektaha axta apkelané weykcha'áhak.

¹⁷ Hakte megkólmaha sekxo' makham weykcha'áhak ekxeyenma nak nenxaweykekxa aksok eltakmópeyak ma'a megyetsapa enxoho makham énxet ektaha nak apkelané, akke kólmaha m'a apketsapa enxoho.

¹⁸ Ekeso eñamakxa kélyepetchesa axta ekyegkenamaxche éma elánexko m'a émha amonye nak ekhémo mók nelpakhetchásamáxkoho Dios.

¹⁹ Aplegasegkek axta Moisés apyókxoho énxet ma'a ekyókxoho eltémókxa nak antehek segánamakxa; keñe axta apma nekkések apwa' ekyexwasé, apmeyk axta nahan ma'a yámet aktog ekwesey nak “hisopo”, apketchesek axta kañe' weyke kennawók étkok éma agkok apyásesa, cham'a kélyepetcheso axta yát'ay apketkók éma apagkok, yegmen axta nahan kélenchaheykekxa xa, keñe axta apkexpakha'a m'a weykcha'áhak eknaktáxésamaxche nak segánamakxa, keñe axta anhan apkelexpakhágko apyókxoho énxet.

²⁰ Aptahak axta Moisés apkeláneya énxet'ák se'e: “Keso éma ekteméseso nak ekmámnaksoho m'a ekhémo nak mók nelpakhetchásamáxkoho Dios, cham'a apkeltémo nak kólyahakxoho kéxegke Dios.”

²¹ Apkexpakha'ak axta nahan Moisés éma m'a tegma appagkanamap tén han ma'a ekyókxoho aksok kélmeykegkoho axta neyseksa kélpeykesamo Dios.

²² Xegkesamók axta kasawhaxkohok ekyókxoho aksok kélaxñáseykekxa cha'a eñama m'a kélexpakhé nak éma, ekhawo ektémakxa nak ekxeyenma segánamakxa; kólyakmagkásekxohok cha'a nentémakxa mólya'asáxma megkayegkenáxko enxoho éma;

Cristo apketsapma apmeyásamákpoho apagko' Dios ekteme senlekkeso mólya'asáxma

²³ Kélmenyék axta cha'a kólmések Dios xa aksok kélnaktóso ektekyawa nak, yakwayam enxoho katnésesek eláxñeyo m'a aksok ekyetchesamaxkoho nak ma'a ekhéyak nak néten; keñe m'a aksok ekhéyak nak néten kámenyeyhok cha'a kólmések ektakmela m'a aksok kélméso nak Dios, megkaxnawok xa aksok ekhéyak nak náxop.

²⁴ Hakte axta etaxnegwákxak Cristo m'a tegma appagkanamap énxetla'a apkelané, cham'a kélheyáseykegkoho nak ma'a tegma appagkanamap apmámnaksoho nak, axta eyke aptaxnegwákxak ma'a néten ekpagkanamaxchexa nak, cham'a aphákxexa nak kaxwo' nápakto' Dios yakwayam hẽlmaxnésesek negko'o yának hempasmok Dios.

²⁵ Axta eyke etaxnegweykekxak Cristo yakwayam enxoho etnehek cha'a apmeyásamákpekxoho Dios, ekhawo aptémakxa nak cha'a ekyókxoho apyeyam ma'a apkemha apmonye nak appasmo apkelmaxnéseso Dios énxet'ák apagkok, cham'a aptaxnegweykekxohol'a cha'a tegma appagkanamap yakwayam egkések Dios ma'a megkatnaha nak éma apagkok.

²⁶ Temegkek agkok Cristo xa ektaha nak, kaleklemek axta cha'a emátog Cristo eyeynamo m'a sekxo' axta elánamáxko keso náxop. Wánxa axta eyke xama apwé Cristo keso negwánxa nak eyágketwokmo nak ektemegwánxa néxa, apmeyáseykpók axta apagko' Cristo m'a Dios yakwayam enxoho hegmasésesek nentémakxa mólya'asáxma wánxa m'a, meyke teyp.

²⁷ Ekhawo sentémakxa nak han cha'a negyókxoho nak, xama nétsapma cha'a katnehek, keñe natámen kawók nahan ekhem yakwánxa hẽlyekpelkohok,

²⁸ ekhawo ektémakxa nak han Cristo ektéma wánxa xama apmeyásamákpekxoho Dios yakwayam enxoho exámhok apmaséseso melya'asáxma énxet'ák. Keñe sat henxekmósakpekxohok makham, háwe eyke kaxwo' yakwayam ey'ótak mólya'asáxma, wánxa aksa yakwayam elwagkasek teyp ma'a énxet'ák ektaha nak apkelhaxanma.