APOCALIPSIS 8 - Lengua Sur (Enxet) Nuevo Testamento

Ektemegwánxa siete yampápa weykcha'áhak kélapma tén han ma'a sawo ekyátekto ekmomnáwa ekwatnamáxchexa aksok ekmátsa ekpakneyam éten agkok

¹ Xama axta ekwokmo apleklo siete Nekkések Apketkok ma'a yampápa weykcha'áhak kélapma axta, wanmeyakxók axtaxma m'a néten. Yáma wegkawok axta anhan.

² Keñe axta sekwet'a ko'o siete Dios apkelásenneykha apkeleñama néten apchakneyncha'a nápakto' Dios. Apkelxawágkek axta siete kélakkahaso.

³ Keñe axta nahan apxegakmo pók Dios apchásenneykha apkeñama néten, egheykok ektakmela elyenma axta apmeykha ekwatnamáxkoho axta cha'a kañe' aksok ekmátsa nak ekpakneyam éten agkok, apkenegwokmek axta amonye ekwatnamáxchexa aksok; apxakak axta nahan ekxámokma m'a aksok ekmátsa nak ekpakneyam éten agkok, yakwayam ewatnek néten sawo ekyátekto elyenma ekwatnamáxchexa axta cha'a aksok ekyetnama axta keto' ekyetnamakxa m'a taháno ektakmalma nak. Axta anhan apyepetchásak ma'a nempeywa nelmaxnagko apagkok nak ma'a apyókxoho Dios énxet'ák apagkok apkelpagkanamap nak.

⁴ Mahágkek axta néten éten agkok xa aksok ekmátsa nak ekpakneyam éten agkok, cham'a apwatno axta Dios apchásenneykha nápakto' ma'a Dios. Axta anhan apyepetchásak ma'a Dios énxet'ák apagkok aptamheyak nak nempeywa nelmaxnagko.

⁵ Keñe axta apma egheykok ekwatnamáxkoho axta cha'a aksok kañe' m'a Dios apchásenneykha nak. Apxatmeyk axta átex eñama m'a ekwatnamáxchexa axta cha'a aksok, apkexeyntek axta nahan ekyókxoho átex keso náxop; keñe axta ektepa extegyawa, kélpeywa ekyennakte axta anhan tépak, kelyenmeyk axta anhan cha'a, yawheyha axta anhan xóp.

Kélakkahaso

⁶ Apkeláneykxek axta aptamhágkaxa siete Dios apkelásenneykha yakwayam elpawaksek apkelakkahaso.

⁷ Appawásek axta apchakkahaso apkemha apmonye Dios apchásenneykha, keñe axta kélchexeynto yegmen elyennakte náxop, táxa axta anhan, éma axta anhan ekyepetche. Metchek axta xama nekha xóp, tén han élmeta yenta'a, tén han ma'a ekyókxoho pa'at elyapakmaté nak áwa'.

⁸ Appawásek axta anhan apchakkahaso pók Dios apchásenneykha, keñe axta kélyenyénto eyálewe ekyawe ekhó egkexe elekhaheyakla'a kañe' wátsam ekwányam; nekha wátsam ekwányam axta anhan tamhákxak éma yegmen.

⁹ Nekha axta anhan keletsapak aksok elleykha nak kañe' wátsam ekwányam, nekha axta anhan keletsagkáséxchek yántakpayhe.

¹⁰ Apkántanxo axta aptahak appawaso apchakkahaso Dios apchásenneykha, keñe axta apteyekmo yaw'a apwányam apkeñama néten, apchalewánteyk axta eyke, máxa axta aptahak ma'a táxa kélmeykhal'a, mók xam'a wátsam axta aptégwokmok, tén han ma'a ekteyapmakxal'a yegmen.

¹¹ Apmopaske axta apwesey xa yaw'a nak, ekmáske axta anhan tamhákxak nekha yegmen, apxámok axta nahan apkeletsapma énxet'ák eñama xa yegmen ekmáske nak.

¹² Hawók nápakha axta aptahak appawaso apchakkahaso Dios apchásenneykha, keñe axta étsagkásexko xama nekha ekhem, tén han apketsagkáseykpo xama nápakha pelten, tén han apkeletsagkáseykpo nápakha yaw'a. Ekpeysyam axta cha'a tamhákxak xama nekha xa ekyókxoho nak, yáma wegkawok axta megkalsasóxma ekhem, yáma wegkawok axta nahan ekyaktesóxma axta'a.

¹³ Enmexawok axta ko'o néten, ekleg'ak axta elpáwokmo axempenák náta ekyawel'a. Entahak axta ekyennaktésawo ekpeywa s'e: “¡Enxet'ák laye apheykha nak náxop, cham'a apkelpáwasa sat apkelakkahaso m'a apkántanxo Dios apkelásenneykha apkeleñama nak néten!”