APOCALIPSIS 7 - Lengua Sur (Enxet) Nuevo Testamento

Apkelkahásamap énxet'ák Israel

¹ Keñe axta sekwet'a ko'o hawók nápakha Dios apkelásenneykha natámen xa. Xama axta apkenmáha nexcheyha, keñe axta pók apkenmeyncha'a nepyeyam, ekteyapmakxa ekhem axta anhan apkenmáha pók, keñe axta pók apkenmeyncha'a m'a taxnegwánxa ekhem. Apchaknáha axta m'a, yakwayam enxoho emagkok exchahayam, yakwayam enxoho megkaxchahámhek keso náxop, tén han ma'a neyseksa nak wátsam ekwányam, yakwayam enxoho anhan megkawátekhápek xama yámet enxoho.

² Ekwet'ak axta anhan pók Dios apchásenneykha apkeñama m'a ekteyapmakxa ekhem, apmeykha axta kélkahaso eñama nak Dios memassegwayam. Apyennaktések axta appeywa xa Dios apchásenneykha nak, apkelpakhetchesa m'a hawók nápakha Dios apkelásenneykha apkelxaka axta apmopwancha'a yakwayam etwasha keso náxop, tén han ma'a wátsam ekwányam nak. Aptahak axta apkeláneya s'e:

³ “¡Nágkóltawasha sekxo' náxop, nágkóltawasha nahan wátsam ekwányam, nágkóltawasha nahan yenta'a mampekkena nak makham sekxo' kélkahaso ekpayhakxa nápát ma'a Dios egagkok apkelásenneykha nak!”

⁴ Ekleg'ak axta nahan ko'o ekwánxa apxámokma ektaha axta ekha kélkahaso, ciento cuarenta y cuatro mil axta apyókxoho énxet'ák Israel.

⁵ Doce mil axta apyókxoho énxet kélkahasa apkeleñama nak nepyeseksa Judá enxet'ák apagkok, doce mil axta nahan apyókxoho kélkahasa m'a apkeleñama nak nepyeseksa Rubén énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Gad énxet'ák apagkok,

⁶ doce mil axta anhan apyókxoho kélkahasa m'a apkeleñama nak nepyeseksa Aser énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Neftalí énxet'ák apagkok, doce mil axta anhan apyókxoho kélkahasa m'a énxet'ák apkeleñama nak nepyeseksa Manasés énxet'ák apagkok,

⁷ doce mil axta anhan apyókxoho kélkahasa m'a apkeleñama nak nepyeseksa Simeón énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Leví énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Isacar énxet'ák apagkok,

⁸ doce mil axta anhan apyókxoho kélkahasa m'a apkeleñama nak nepyeseksa Zabulón énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa José énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Benjamín énxet'ák apagkok.

Apxámokma énxet apkelmopé apkelántaxno

⁹ Enmexawok axta ko'o natámen xa, ekwet'ak axta ko'o énxet apxámokma apyókxoho pók aptémakxa énxet nak, tén han ma'a móktémakxa nak apkelpakmeyesma. Amonye taháno ektakmalma axta apchakneykha m'a, nápakto' ma'a Nekkések Apketkok. Apxámok apagko' axta m'a, megkólwanchek axta kólyetsetek. Apkelmopé axta nahan apkelántaxno, áxa áwa' axta anhan apkelmeykha.

¹⁰ Axta etnehek cha'a elyennaktéshok apkelpeywa s'e: “¡Dios apha nak néten aptaháno ektakmalma apteme sẽlwagkaso teyp tén han ma'a Nekkések Apketkok!”

¹¹ Apyókxoho Dios apkelásenneykha axta nahan apchakneykha neyáwa xa taháno ektakmalma nak, tén han ma'a énxet'ák apkelámha apmonye'e nak, axta anhan apchakneykha neyáwa taháno ektakmalma m'a hawók nápakha énxet apkeleñama nak néten; apkelháxahánteyk axta ekwokmoho apkeltekxeyágko nápakta'a xóp ekyetnakxa m'a taháno ektakmalma nak, apkelpeykásawók axta Dios.

¹² Aptahak axta apkelpakmeta s'e: “¡Katnahagkok sat! Kólpeykeshok sat cha'a Dios egagkok, kóltemésesek sat nahan cha'a apcheymákpoho, exénakpok sat nahan ekha apya'áseyak, kólmések sat nahan cha'a ekxeyenma kélwáxok, kóltehek sat nahan cha'a kéláyo, exénakpok sat nahan cha'a ekha apmopwána, tén han ekha apyennakte megkatnegwayam enéxa. ¡Katnahagkok sat!”

¹³ Elmaxneyáha axta ko'o xama xa énxet'ák apkelámha apmonye'e nak. Aptahak axta seyáneya s'e: “¿Yaksak xa énxet'ák apkelmopé nak apkelántaxno, háxko nahan apkeleñamakxa?”

¹⁴ “Wese', xép apya'ásegko'”, axta ektahak seyátegmowágko ko'o. Keñe axta aptaha seyáneya s'e: “Cháxa énxet'ák ektaha axta apkelyeykhé ekyawe apkellegeykegkoho xa, apkelyenyések axta apkelántaxno Nekkések Apketkok éma apagkok xa, kelmopeyásekxók axta anhan.

¹⁵ “Ekeso eñamakxa apheyncha'a nak ma'a aphamakxa nak Dios, apkeltamheykha nahan cha'a ekyókxoho ekhem tén han ekyókxoho axta'a m'a Dios tegma appagkanamap apagkok nak. Elmeyok sat nahan cha'a m'a apha nak néten aptaháno ektakmalma, cham'a appaxkeyncha'a sat.

¹⁶ Kamaskok sat apkellegágkoho meyk elnapma kamaskok sat nahan elnapa ekhem, kamaskok sat nahan ekwatna apyempe'ék ekmexanma nak ekhem, kamaskok sat nahan elpekhésa ekmexanmaxma;

¹⁷ hakte eltakmelchesek sat ma'a Nekkések Apketkok apha nak ma'a néten aptaháno ektakmalma nak, ekhawo aptemésesamakxa nak apkeltakmelchesama m'a nekkések. Enaklók sat nahan ma'a ekteyapmakxa nak yegmen ekyennaktésamo nak egnenyek. Dios sat nahan emasésesek apaktek égmenek xa énxet'ák nak.”