APOCALIPSIS 6 - Lengua Sur (Enxet) Nuevo Testamento

Siete yampápa kélapma

¹ Keñe axta sekwet'a apleya Nekkések Apketkok xama xa siete yampápa kélapma nak, ekleg'ak axta anhan appakmeta xama xa hawók nápakha énxet apkeleñama nak néten, máxa axta entahak takha' appáwál'a appakmeta ekyennakte agko'. Aptahak axta s'e: “¡Empoho!”

² Enmexawok axta ko'o m'a, ekwet'ak axta xama yatnáxeg apmopé, yágke axta apmeykha m'a ektaha axta apchánte. Kélmések axta apketcheso apkátek ektakmalma, apxegkek axta aptémol'a m'a ektaha nak apmalanma kempakhakma yakwayam enxoho emalánekxak makham nepyeseksa apkelenmexma.

³ Xama axta apleya makham Nekkések Apketkok ma'a mók yampápa kélapma axta, ekleg'ak axta nahan ko'o appakmeta pók xa hawók nápakha énxet apkeleñama nak néten. Aptahak axta makham appakmeta s'e: “¡Empoho!”

⁴ Aptekkek axta anhan pók yatnáxeg, apyexwasé axta eyke m'a, keñe axta m'a ektaha axta apchánte apxaka apmopwána yakwayam emasésetak meyke ektahakxa nak negheykha keso náxop, yakwayam yának elnapakpok apyókxoho énxet'ák; apxakak axta anhan sókwenakte.

⁵ Xama axta ektaha antanxo apleklo Nekkések Apketkok ma'a yampápa kélapma axta, keñe axta anhan apwokmo apkántanxo seklegé apteme appeywa énxet apkeleñama nak néten. Aptahak axta s'e: “¡Empoho!” Enmexawok axta ko'o m'a, ekwet'ak axta xama yatnáxeg appeysyam, kelyetsáteyak axta apmeykha m'a ektaha axta apchánte.

⁶ Ekleg'ak axta ko'o kélpeywa nepyeseksa xa hawók nápakha énxet apkeleñama nak néten. Entahak axta amya'a s'e: “Xama kelyetsáteyak hótahap aksa kaxwo' ekyanmaga xama ekhem nak kéltamheykha, keñe antanxo kelyetsáteyak ma'a ekhó nak hótahap wánxa xama ekhem ekyanmaga nak kéltamheykha; neytwasha aksa pexmok égmenek nak, tén han ma'a anmen yámet égmenek nak.”

⁷ Xama axta ekwokmo hawók nekha apleklo Nekkések Apketkok yampápa kélapma, hawók nápakha axta nahan entahak seklegé appeywa m'a énxet apkeñama nak néten. Aptahak axta makham se'e: “¡Empoho!”

⁸ Enmexawok axta ko'o m'a, ekwet'ak axta yatnáxeg yáma apyátekto, keñe m'a ektaha axta apchánte apwesey nétsapma. Keñe axta m'a neptámen sekwet'a nahan apxegakmo apkeñama nak ma'a ektémakxa nak wese' nétsapma. Apkelxawágkek axta apmopwancha'a yakwayam elnápok nápakha énxet nekha yókxexma keso náxop eñama m'a kempakhakma, tén han ma'a meyk segakhe nak, tén han eñama m'a negmasé nak, yetlo apchahé m'a aksok nawha'ák ello elleykencha'a nak keso náxop.

⁹ Xama axta ekwokmo cinco apleklo yampápa kélapma Nekkések Apketkok, ekwet'ak axta ko'o m'a énxet'ák aptekyawa axta eñama apkellegaso Dios appeywa kóneg ma'a ekwatnamáxchexa axta cha'a aksok nawha'ák ekyanmaga mólya'asáxma.

¹⁰ Axta aptemék cha'a apkelyennaktésamo apkelpeywa s'e: “Wese' aptakmalma, aptaha nak han mehegyenyaweykha, ¿Yaksak sat ekhem elyekpelcháseshok xép énxet'ák apheykha nak náxop, tén han heghéseshok mók ma'a nentekyawa axta negko'o?”

¹¹ Keñe axta kélmeyásegko apkelántaxno apkelmopé, kéltennásek axta peya sekxo' makham kóllókasesek apkelyampé yakwatakxoho, ekwokmoho aptahanyekxo ekwánxa apxámokma m'a apkelyáxeg'a yakwayam nak han etekyok eñama apkelané apkeltamheykha eñama nak Cristo, ekhawo aptamheykegkaxa axta xa énxet'ák nak.

¹² Xama axta ekwokmo seis apleklo Nekkések Apketkok yampápa kélapma, enmexawok axta ko'o, keñe axta ektepa ekyawheykha xóp. Peysamákxek axta anhan ekhem ektémol'a apáwa appeysyam nentaxno magkenatchesol'a apketsapma egmók, apyexwasé axta nahan aptamhákxak pelten, máxa axta aptahak ma'a ektémakxal'a éma,

¹³ keñe axta appaleynto yaw'a keso náxop, máxa axta aptahak ma'a ektémol'a kapalegmak higo ekyexnagwetek elyawhésakmoho enxoho exchahayam ekyennakte, cham'a ekxámakxa enxoho higo.

¹⁴ Pelakkasek axta nahan ekmassa m'a néten, máxa axta entahak ma'a ektémol'a agyaksásekxak weykcha'áhak, kélyawheyha axta anhan xóp elekháhéyak elyawe nak, tén han ma'a egkexe etkók neyseksa wátsam ekwányam la'a. Yakmagkasek axta ekheykegkaxa.

¹⁵ Keñe axta apkelyexánegwokmo kañe' meteymog axwa'a m'a kelwese'e apkelwányam nak keso náxop, tén han ma'a neyseksa meteymog elyawe ekheyakla'a néten xóp elekháhéyak elyawe nak, axta anhan ma'a kelwese'e nak, tén han ma'a sẽlpextétamo apkelámha amonye'e nak, axta nahan ma'a énxet'ák ekxákma nak aksok apagkok, tén han ma'a kelwese'e ekha nak kéláyo, tén han ma'a apyókxoho ektaha nak apkelmomap, tén han ma'a ektaha nak melmomap;

¹⁶ aptahak axta nahan apkeláneya xóp elekháhéyak elyawe s'e, tén han ma'a meteymog elyawe nak: “¡Hegahapwata' negko'o, henxeganegkes negko'o nápakto' ma'a apha nak kaxwo' néten taháno ektakmalma, hegeys nahan negko'o ma'a Nekkések Apketkok aplo nak!

¹⁷ Hakte wa'ak kaxwo' ekhem ekyawe sẽllegasáseykegkoho nak, ¿Yaksak sat awanchek kalenmaxaxkohok xa?”