APOCALIPSIS 5 - Lengua Sur (Enxet) Nuevo Testamento

Weykcha'áhak eknaktáxésamaxche kélpexteteykekxoho tén han ma'a Nekkések Apketkok

¹ Ekwet'ak axta ko'o apmeyncha'a weykcha'áhak kélpexteteykekxoho ekpayhókxa apkelya'asamakxa m'a ektaha axta apha néten aptaháno ektakmalma, kañe' axta táxesamaxchek xa weykcha'áhak kélpexteteykekxoho nak, tén han ma'a empehek. Siete yampápa axta kélyepetchesók kélapma xa.

² Ekwet'ak axta nahan ko'o xama Dios apchásenneykha ekha apyennakte, aptéma axta cha'a apkelmaxneyeykencha'a yetlo ekyennakte agko' appeywa s'e: “¿Yaksak ekpayhawo kameykesek xa weykcha'áhak kélpexteteykekxoho nak, tén han kalekkesek xa yampápa kélapma nak?”

³ Méko axta kawának kameykesek xa weykcha'áhak kélpexteteykekxoho nak, méko axta anhan eyewagko kalano' keso náxop, tén han ma'a néten, tén han ma'a elmaheykegkaxa nak eghagák.

⁴ Ekwónegkek axta cha'a ko'o, hakte axta éteyamakpok ekpayhawo nak emeykesek xa weykcha'áhak kélpexteteykekxoho nak, axta anhan éteyamakpok apmopwána enxoho elano'.

⁵ Wánxa agkok, aptahak axta seyáneya xama apkeñama nak nepyeseksa apkelámha amonye'e s'e: “Elwatés apwóno, yetneyk xama ekha nak apyennakte apwesey nak méwa, apkeñama nak ma'a nepyeseksa Judá énxet'ák apagkok, aptaha nak wese' David aptáwen neptámen, apmalanchek axta, apwanchek emeykesek xa weykcha'áhak kélpexteteykekxoho nak, apwanchek nahan elkok xa siete kélapma nak yampápa.”

⁶ Keñe axta sekwet'a ko'o Nekkések Apketkok neyseksók xa taháno ektakmalma nak, ekwet'ak axta anhan hawók nápakha énxet apkeleñama néten apwakha'a xa Nekkések Apketkok nak, keñe axta anhan apwakha'a Nekkések Apketkok ma'a apkelámha apmonye'e nak. Apyagkak axta xa Nekkések Apketkok nak, máxa axta eyke entemék apmatñama enxoho. Siete axta apkepet'ák, siete axta anhan apakta'ák. Cháxa siete espíritu apkeleñama Dios kéláphaso cha'a náxop xa.

⁷ Apxegkek axta xa Nekkések Apketkok nak, keñe axta apwokmo m'a weykcha'áhak kélpexteteykekxoho apmeykencha'a axta ekpayhókxa apkelya'asamakxa m'a ektaha axta apha néten aptaháno ektakmalma.

⁸ Xama axta apma weykcha'áhak kélpexteteykxoho xa Nekkések Apketkok nak, apkeltekxeyágkek axta aptapnák ma'a hawók nápakha énxet apkeleñama nak néten nápakto' ma'a Nekkések Apketkok. Axta anhan apkeltekxeyágkok aptapnák xa veiticuatro apkelámha apmonye'e nak. Apyókxoho axta apkelmeykha yát'axpog apyawe xa énxet'ák nak, egheykok ekyátekto elyenma axta nahan apkelmeykha yetlo ekláneyo aksok ekmátsa ekpakneyam éten agkok ma'a kañe'. Cháxa nempeywa nelmaxnagko aptamheyak nak cha'a m'a ektaha nak Dios énxet'ák apagkok.

⁹ Axta anhan apkelmeneykmásak negmeneykmaso axnagkok ektéma nak se'e: “Xép payhawók emok xa weykcha'áhak kélpexteteykekxoho nak, xép nahan payhawók elkok ma'a yampápa kélapma nak, hakte apmatñegkek axta exchep ekyanmaga mólya'asáxma, yegkenamaxchek axta nahan éma apagkok apkelmoma m'a apyókxoho pók aptémakxa énxet'ák nak yakwayam etnésesek Dios énxet'ák apagkok, cham'a mók ektémakxa nak apyempe'ék, tén han ma'a mók ektémakxa nak apkelpakmeyesma.

¹⁰ Aptemésesek axta exchep énxet'ák apagkok xa énxet'ák nak, aptemésesek axta anhan appasmo apkelmaxnéseso Dios énxet'ák apagkok. Etnahagkok sat nahan ekha kélyaheykekxoho keso náxop, ekhawo aptamheykegkaxal'a kelwese'e.”

¹¹ Keñe axta senmexawo ko'o m'a, ekleg'ak axta ko'o apkelpakmeyesma Dios apkelásenneykha apxámokma apchakneykha axta neyáwa Dios aptaháno, cham'a apchaknágkaxa axta anhan aphó énxet'ák apkeleñama nak néten, tén han ma'a énxet'ák apkelámha apmonye'e nak. Apxámok apagko' axta xa.

¹² Axta aptahak apkelyennaktésawo apkelpeywa s'e: “¡Payhawók exkak apmopwána Nekkések Apketkok apmatñama axta, payhawók nahan exkak ekxámokma aksok apagkok, payhawók nahan exkak apya'áseykegkoho, payhawók nahan exkak apyennakte, payhawók nahan kóltehek kéláyo, payhawók nahan kóltemésesek apcheymákpoho payhawók nahan kólpeykesho'!”

¹³ Ekleg'ak axta anhan ko'o elpakmeyesma ekyókxoho aksok ektaha nak Dios apkelané m'a néten, tén han keso náxop, tén han ma'a kóneg xóp nak, tén han ma'a wátsam ekwányam. Entahak axta elpakmeyesma s'e: “¡Kóltehek sat cha'a kéláyo m'a ektaha nak apha néten aptaháno ektakmalma, tén han ma'a Nekkések Apketkok, kólpeykeshok sat nahan cha'a, kóltemésesek sat nahan cha'a apcheymákpoho, exkak sat nahan apmopwána megkatnegwayam enéxa!”

¹⁴ Apkelátegmowágkek axta m'a hawók nápakha énxet apkeleñama nak néten, aptahak axta s'e: “¡Katnahagkok sat!” Keñe axta apkeltekxeyágko aptapnák ma'a veinticuatro apkelámha apmonye'e nak, apkelpeykásawók axta Dios.