APOCALIPSIS 2 - Lengua Sur (Enxet) Nuevo Testamento

Amya'a kélápháseso énxet'ák apchakneykekxa tegma apwányam Efeso

¹ “Etáxéses Dios apchásenneykha nak ma'a apchakneykekxexa nak énxet tegma apwányam Efeso: ‘Keso ektémakxa nak appeywa aphágko nak siete yaw'a apmek ekpayhókxa apkelya'asamakxa, cham'a apweynchamencha'a nak neyseksa chálewaso ekyátekto elyenma:

² Ekya'ásegkok ko'o ekyókxoho aksok apkelané nak xép, ekya'ásegkok nahan ma'a ektémakxa nak aptamheykha ekyentaxno, ekya'ásegkok nahan ma'a ektémakxa nak apkelenxányam, ekya'ásegkok nahan megkalcha apwáxok xép ma'a énxet'ák ekmaso nak apkeltémakxa, ekya'ásegkok nahan apkelanawo apkeltémakxa exchep ma'a énxet'ák apkeltemesásamap nak seykha amya'a, wánxa agkok háwe eyke nakso', apwet'ak axta exchep aptaha apkelmopwancha'a amya'a xa énxet'ák nak.

³ Apkelenxáneykmok axta exchep, awanhek axta nahan aplegeykegkoho meyke ekleklágwayam ko'o eñamakxa.

⁴ Wánxa agkok, yetneyk eyke xama aksok sektaknawásesa exchep: hakte megkaxnawok xép apchásekhayo m'a ekwánxa axta sekxo' axta.

⁵ Kaxénwakxoho apwáxok xép aptémakxa axta sekxo' metyekemxa axta, ey'ókxa makham Dios, elána makham ma'a apkeláneya axta sekxo' agko'. Sat agkok etnahak xa, kaxwo' sat ay'óta' yakwayam ataknawagwata', tén han alyementagwatak xép ma'a chálewaso ekheykegkaxa nak, cham'a mey'aweykxo enxoho exchep Dios.

⁶ Wánxa agkok, yetneyk eyke exchep xama aksok ekleyawo nak ewáxok ko'o, cham'a aptaknawásesa nak apkeltémakxa m'a ektaha nak apkelyetlo ektémakxa apkelxekmóso Nicolaus, cham'a sektaknawásesama nak han ko'o xa apkeltémakxa.

⁷ ¡Kéxegke ekha nak kélheyk'ák, kóleyxho ektahakxa apxeyenma Espíritu kélakneykekxexa! Enxet'ák ektahakxa enxoho apkelmalanma, agkések sat ko'o yámet ekyexna yakwayam etawagkok, cham'a ekyennaktésamo nak egnenyek énma nak ma'a néten Dios yókxexma apagkok ektakmela.’

Amya'a kélápháseso énxet'ák apchakneykekxexa tegma apwányam Esmirna.

⁸ “Etáxéses nahan Dios apchásenneykha nak ma'a apchakneykekxexa nak énxet tegma apwányam Esmirna: ‘Keso ektémakxa nak appeywa aptaha nak eyeynókxa tén han ma'a ektemegwánxa néxa, cham'a apketsapma axta, cham'a apha nak makham:

⁹ Ekya'ásegkok ko'o ektémakxa nak aplegeykegkoho exchep, tén han ma'a ektémakxa nak meyke aksok apagkok, xámok eykhe exchep aksok apagkok eleñama Dios. Ekya'ásegkok nahan ektémakxa nak ekmaso apxeyenma exchep ma'a énxet'ák apkeltemesásamákpo nak judíos, háwe eyke, apchakneykekxexa apkelpeykesamo Satanás akke xa.

¹⁰ Nágyé' aksa m'a yakwánxa nak katnehek aplegeykegkoho exchep, hakte kañe' sẽlpextétamakxa sat kaxatmok kéxegke kélnápakha kelyekhama', yakwayam enxoho keykkónaxchek kéxegke m'a ektémakxa nak megkólya'áseyam; kóllegagkohok sat kéxegke ekweykmoho diez ekhem. Elenxanmoho exchep apyennaktésamo apteme mey'áseyam, nágyeyx ma'a peya enxoho emátog, agkések sat xép sekméso naksa ekyennakte apnenyek.

¹¹ ¡Kéxegke ekha nak kélheyk'ák, kóleyxho ektahakxa apxeyenma Espíritu kélakneykekxexa! Enxet'ák ektahakxa enxoho apkelmalanma, mellegagkók sat ma'a ánet netsapeykekxoho nak.’

Amya'a kélápháseso énxet'ák apchakneykekxexa tegma apwányam Pérgamo

¹² “Etáxéses nahan Dios apchásenneykha nak ma'a apchakneykekxexa nak énxet tegma apwányam Pérgamo: ‘Keso ektahakxa nak appeywa m'a ekyetna nak ánet nekha ekmahanta sókwenakte apagkok:

¹³ Ekya'ásegkok ko'o apha exchep ma'a ektémakxa nak wese' Satanás; wánxa agkok apkelenxáneykmok eyke exchep apxeyenma sekwesey. Axta anhan elwáteseykmok apteme mehey'áseyam ko'o, cham'a apmatña axta Antipas, aptaha axta meyenseyam aplegaso sekwesey. Axta payhok apmatñamakxa m'a tegma apwányam ektémakxa nak wese' Satanás.

¹⁴ Mók xama aksok akke ektaknawasásak xép: cham'a megkólámenyého nak kólyenyekxak kélnapakha kéxegke m'a nelxekmowásamáxche eñama nak Balaam, cham'a apkeltennasama axta Balac apkeltémo elanaksek melya'asáxma énxet'ák Israel, cham'a apkelyáteyeykegkoho axta apkeltémo etawagkok nento kélméso axta kéleykmáseso, tén han apkeltémo elanagkok ma'a ekmaso nak nentémakxa mansexta.

¹⁵ Apyetneyk nahan kélnapakha kéxegke megkamopmenyého nak ényók nelxekmowásamáxche eñama nak Nicolaus énxet'ák apagkok.

¹⁶ Ey'ókxa makham Dios. Sat agkok etnahak xa, kaxwo' sat ay'óta' xép yakwayam ataknawagwata', sókwenakte ekteyapmol'a ahátog sat amha yakwayam annapaxchek xa énxet'ák nak.

¹⁷ ¡Kéxegke ekha nak kélheyk'ák, kóleyxho aptahakxa appeywa Espíritu kélakneykekxexa! Enxet'ák ektaha nak apkelmalanma agkések sat yakwayam etawagkok maná, cham'a kélpósamo nak; agkések sat nahan meteymog ekmopé, cham'a ektáxésamaxko nak kaxwé kélwesey meyke ekya'áseyak, wánxa aksa ey'asagkohok ma'a ektahakxa enxoho apxawé.’

Amya'a kélápháseso énxet'ák apchakneykekxexa tegma apwányam Tiatira

¹⁸ “Etáxéses nahan Dios apchásenneykha nak ma'a apchakneykekxexa nak énxet tegma apwányam Tiatira: ‘Keso apxeyenma nak Dios Apketche s'e, cham'a ekhó nak táxa eyálewe apakta'ák, keñe m'a apmagkok ekhó sawo ekyentaxno kélyamasmol'a neyseksa táxa amonye kélyenmaso;

¹⁹ Ekya'ásegkok ko'o ekyókxoho aksok apkelané nak xép; ekya'ásegkok ma'a ektémakxa nak apchásekhayo, tén han ma'a ektémakxa nak mey'áseyam, tén han ma'a ektémakxa nak aptamheykha, tén han ma'a ektémakxa nak apkelenxáneykmoho, ekya'ásegkok nahan ekxáma aksok apkelané kaxwo' nak, megkaxnawok ma'a sekxo' axta.

²⁰ Wánxa agkok, yetneyk eyke xama aksok sektaknawásesa exchep; cham'a apcha'awo nak ektahakxa kelán'a ekwesey nak Jezabel, ekxeyenma nak cha'a m'a eltenneykha nak ektaha eñama Dios, kelyexancháseyha eyke selásenneykha eñama m'a ektémakxa nak elxekmóso, kelánésegkek nahan ekmaso nentémakxa mansexta, keltémok nahan etawagkok ma'a nento kélméso nak kéleykmáseso.

²¹ Elháxanmeyk axta aksa ko'o katnehek megkay'áseyam Dios xa kelán'a nak, yámenyék axta eyke kayakmagkasek awáxok, yámenyék axta anhan kalwataksek elané ekmaso nentémakxa mansexta.

^22-23 Cháxa keñamak sekmoko nak ko'o agkések ekháxamáxche xa kelán'a nak, annahakkasek sat nahan étchek; Allegásesagkohok agko' sat ko'o m'a énxet'ák apnaktawáseykencha'a nak elyamhápeyak apkeláneykegko xa kelán'a nak, cham'a melwáteságko enxoho apkeláneyak ektémakxa nak xa kelán'a nak. Sat kañék apkelya'ásegwayam énxet ekyókxoho apchakneykekxexa sekya'áseykegkoho ko'o ekweykmoho kañók agko' apwáxok énxet, ayakmagkásekxak sat ekyókxoho ektémakxa nak kéllané kéxegke megkólya'asáxma.

²⁴ Kéxegke kélheykha nak tegma apwányam Tiatira megkólyetleykekxa nak xa nelxekmowásamáxche nak, megkaltámeyeykegko nak han ma'a apkeltamhomol'a cha'a nápakha énxet aksok ekyexamaxche eñama Satanás, eltennásek ko'o mamoko agkeyásekxak makham kéxegke kéltamheykha ekyentaxno.

²⁵ Kóltakmelches ma'a kéltémakxa nak cha'a kéxegke ekwokmoho sekwakto ko'o.

²⁶ Enxet'ák ektahakxa enxoho apkelmalanma, cham'a apkelwagkasamo nak néxa apkeláneyak ma'a ektémakxa nak sekmámenyého, atnésesek sat ko'o ekha kélyaheykekxoho nepyeseksa apyókxoho pók aptémakxa énxet'ák nak,

²⁷ ekhawo setnésesamakxa axta anhan ko'o xa Táta segkésama yakwayam keytek selyaheykekxoho;

²⁸ kelwese'e sat nahan etnahagkok nepyeseksa apyókxoho pók aptémakxa énxet'ák nak yetlo meyke apmopyósa elano', nápakha'a apketkók sat nahan etnésesek ektémol'a ampaxkátek yátegwáxwa apkelánamapla'a yelpa'. Agkések sat nahan kéxegke yaw'a apwányam apteyapmol'a axto'o agko'.

²⁹ ¡Kéxegke ekha nak kélheyk'ák, kóleyxho aptahakxa appeywa Espíritu kélakneykekxexa!’