APOCALIPSIS 19 - Lengua Sur (Enxet) Nuevo Testamento

¹ Ekleg'ak axta ko'o kélpeywa ekxámokma ekyennakte agko' ma'a néten natámen xa. Entahak axta kélpeywa s'e: “¡Apcheymákpoho sat cha'a kóltemésesek Wese' egegkok! Dios egagkok apagkok ma'a nelwagkásamáxche teyp nak, tén han ma'a apcheymákpoho nak, tén han ma'a apmopwána nak,

² hakte ekpéwomo agko' cha'a katnehek apyekpelchémo m'a Dios, ekmámnaksoho nahan cha'a katnehek; hakte apxénchek axta yakwánxa katnehek aplegasáseykegkoho m'a kelán'a ekyakmagkáseyak nak pók énxet ekpathetéyak ektegye selyakye, cham'a, ektawáseykencha'a axta keso náxop eñama m'a ektémakxa axta kamasexta; axta aphésásók mók Dios ma'a aptekyawa axta énxet'ák apagkok, cham'a aplegasásegkoho axta xa kelán'a nak.”

³ Tamhákxeyk axta makham kélpeywa s'e: “¡Apcheymákpoho sat cha'a kóltemésesek Wese' egegkok! Megkamassegwomek sat nahan cha'a ekmaheyak néten éten agkok xa Babilonia.”

⁴ Apkelháxahánteyk axta náxop veinticuatro apkelámha apmonye'e tén han ma'a hawók nápakha énxet apkeleñama nak néten, apkelpeykásawók axta Dios apha nak néten aptaháno ektakmalma. Aptahak axta apkelpakmeta s'e: “¡katnahagkok sat! ¡Apcheymákpoho sat cha'a kóltemésesek Wese' egegkok!”

⁵ Legáxchek axta kélpeywa eñama m'a ekyetnakxa axta taháno ektakmalma. Entahak axta amya'a s'e: “¡kólteméses apcheymákpoho Dios egagkok kélyókxoho kéxegke, apketkók tén han ma'a apkelwányam nak, tén han kéxegkáxa kéllané nak kéltamheykha eñama nak Dios, kéltaha nak han cha'a kéláyo!”

Nekkések Apketkok elyamhopma

⁶ Ekleg'ak axta nahan ko'o ekyennamáxma, máxa axta entahak ma'a apxámakxal'a énxet apyennegkesóxma, máxa axta nahan entahak extegyawa m'a ekteyeykenxal'a yegmen cham'a ektémol'a takha' appáwá ekyennakte agko'. Entahak axta apkelpakmeyesma s'e: “¡Apcheymákpoho sat cha'a kóltemésesek Wese' egegkok Dios! hakte apcheynawok kaxwo' aptamheykha Wese' egegkok, Dios egagkok ekha nak apyennakte.

⁷ Kalpayhekxa' hana egwáxok, agyáncheshok hana ekpayheykekxa egwáxok, óltemésesek hana apcheymákpoho Dios, hakte wa'ak kaxwo' ekhem yakwánxa nak kalyamhápok Nekkések Apketkok, keláneykxek ektahakxa m'a yakwayam nak etnehek aptáwa:

⁸ kel'awok axta kataxnekxak apáwa apkexyawáyo apcháxñeyo apagko'la'a, tén han ma'a apkelyenmeyakla'a, hakte cháxa apáwa apkexyawáyo nak ekyetchesamaxkoho m'a nentémakxa ekpéwomo nak, cham'a apkeltémakxa nak Dios énxet'ák apagkok.”

⁹ Aptahak axta seyáneya Dios apchásenneykha s'e: “Etaxés ektéma nak se'e: ‘Apkeleñémo sat énxet ektaha nak kéláneyeykha yakwayam epásegwók Nekkések Apketkok elyamhopma.’ ” Axta nahan aptahak seyáneya s'e: “Cháxa amya'a ektaha nak ekmámnaksoho agko' eñama Dios xa.”

¹⁰ Eltekxekkek axta ko'o etapnák náxop ekpayhókxa apkenmágkaxa Dios apchásenneykha, yakwayam alpeykesho', wánxa agkok, aptahak axta seyáneya s'e: “Ná etne aksa xa, ko'o sekteme Dios apchásenneykha, ekhawók ko'o exchep, ekhawók nahan ma'a apkelyáxeg'a ektaha nak melyenseyam apkeltenneykha Jesús apwesey. Elpeykesho m'a Dios.” Hakte, cháxa eyewáneseso énxet'ák ektaha nak apkellegaso Dios appeywa xa apkeltenneykha nak Jesús apwesey.

Enxet apchánte yatnáxeg apmopé

¹¹ Ekwet'ak axta ko'o aptepa yatnáxeg apmopé ekmayhekxo m'a néten. Enxet ekmámnaksoho meyenseyam apyetlo Dios axta apwesey m'a ektaha axta apchánte, hakte ekpéwomo agko' axta m'a ektémakxa axta apyekpelchémo énxet'ák, tén han ma'a ektémakxa axta apkelané kempakhakma.

¹² Máxa axta táxa elálewe m'a apakta'ák, xámok axta nahan apkelatcheso apkátek eltakmela ekhágko m'a apkátek, yetnegkek axta nahan kéltáxeso xama kélwesey meyke ekya'áseyak, wánxa axta aksa apya'áseykegkoho apagko' ma'a ektaha axta apchánte yatnáxeg.

¹³ Éma axta apkeltexnámap aptaxno; Dios appeywa axta eyke apwesey.

¹⁴ Apkelyetlókek axta nahan sẽlpextétamo apkeleñama nak néten, apkelexyawáyo axta nahan apkelántaxno, apkelmopé apkeláxñeyo axta eyke, yatnáxeg apkelmopé axta nahan apkelchánte.

¹⁵ Sókwenakte ekmahanta axta nahan tépak apátog, yakwayam emha ellegásesagkohok ma'a apyókxoho pók aptémakxa énxet'ák nak. Wese' sat etnehek yetlo meyke apmopyósa elanok pók, etnehek sat nahan apkelyekpelchémo apyókxoho énxet ekhawo aptémakxal'a m'a ektaha nak apkelyakhapma anmen yámet ekyexna, elagkok sat nahan ma'a Dios aplo ekxegakmo nak ektémol'a agyenek vino, cham'a Dios meyke ekhémo nak.

¹⁶ Yetnegkek axta nahan kéltáxeso apchaklamap, tén han ma'a apyók ektéma nak se'e: “Wese' apwányam nepyeseksa m'a kelwese'e apkelwányam nak, apteme nahan Wese' nepyeseksa m'a kelwese'e nak.”

¹⁷ Ekwet'ak axta ko'o pók Dios apchásenneykha apkenmeyncha'a néten ekhem, apyennaktésawok axta appeywa apkelwónencha'a ekyókxoho náta ektómol'a ápetek, cham'a elchempeykencha'awol'a néten. Aptahak axta s'e: “¡Kólchempoho, kólaknekxa' kóltawagkok ekyawe ektámáxche eñama nak Dios,

¹⁸ yakwayam enxoho kóltawagkok kelwese'e apkelwányam nak aphápetek, tén han aphápetek ma'a apkelámha apmonye'e nak sẽlpextétamo, tén han aphápetek ma'a énxet megyeye nak aksok, tén han ma'a yatnáxeg aphápetek nak, tén han aphápetek ma'a énxet ektaha nak apkelchánte, tén han ma'a ekyókxoho ektémakxa nak kélhápetek; cha'a aphápetek ma'a énxet melmomap nak, tén han aphápetek ma'a énxet apkelmomap nak, tén han aphápetek ma'a énxet meyke kéláyo nak, tén han aphápetek ma'a énxet ekyawe nak kéláyo!”

¹⁹ Ekwet'ak axta ko'o aksok nawhak eklo, tén han ma'a kelwese'e apkelwányam nak keso náxop, yetlo sẽlpextétamo apagkok, apchaknákxeyk axta yakwayam elnapakpok ma'a ektaha axta apchánte yatnáxeg tén han yakwayam elnapakpok ma'a ektaha axta sẽlpextétamo apagkok.

²⁰ Máxchek axta xa aksok nawhak eklo nak, máxkók axta xamo' ma'a ektaha axta apkellegaso amya'a megkamámnaksoho nak, cham'a, apkeláneykegko axta cha'a aksok sempelakkaso nak agweta' nakto' xa aksok nawhak eklo nak. Apkelyexancháseykha axta énxet'ák xa ektaha nak apkellegaso amya'a megkamámnaksoho, eñama apkeláneyak ma'a aksok sempelakkaso nak agweta'. Axta apkelyexancháseyha m'a énxet'ák apchahayo axta keytek aksok nawhak eklo elkahaso, cham'a apkelpeykesamo axta kéleykmáseso kélheyáseykegkoho nak aksok nawhak eklo. Keñe axta kélyenyawa yetlo akta'ák neyseksa táxa xa aksok nawhak eklo nak, tén han yetlo apakta'ák ma'a ektaha axta apkellegaso amya'a megkamámnaksoho, cham'a eyálewomakxa nak táxa yetlo m'a aksok ánek eyálewomol'a.

²¹ Keñe axta m'a apyókxoho énxet nak elnapa m'a sókwenakte ekteyapma axta apátog ma'a ektaha axta apchánte yatnáxeg, kelyakkanakmek axta anhan náta aphápetek xa énxet'ák nak.