APOCALIPSIS 13 - Lengua Sur (Enxet) Nuevo Testamento

Anet aksok nawha'ák ello

¹ Ekwet'ak axta ko'o ektepa aksok nawhak eklo neyseksa wátsam ekwányam, siete axta ekyókxoho akkatkók keñe axta diez ekyókxoho m'a kepet'ák. Etcheso akkátek axta cha'a eghak ma'a ekyókxoho kepet'ák nak, yetnegkek axta nahan kéltáxeso ekwanyémo Dios ma'a akkatkók nak.

² Máxa axta yánneptána xa aksok nawhak eklo sekwet'a axta ko'o, keñe axta máxa tamayawhan amagkok ma'a amagkok, keñe axta máxa méwa átog ma'a átog. Yéwa ekwányam axta ekméso ekmowána xa, tén han ma'a ektaháno ektakmela nak, mések axta nahan ekyawe kélyaheykekxoho.

³ Máxa axta entahak ekyawa enxoho ekyensé xama akkátek xa aksok nawhak eklo nak, takmelákxeyk axta eyke ekyensé, kelyegwakkasek axta nahan apkelwet'a apyókxoho énxet'ák apheykha nak keso náxop, apkelyetlákxeyk axta nahan énxet xa aksok nawhak eklo nak.

⁴ Apkelpeykásawók axta yéwa ekwányam, hakte mések axta ekmowána m'a aksok nawhak eklo nak. Apkelpeykásawók axta nahan ma'a aksok nawhak eklo nak. Entahak axta amya'a ekxénáxko s'e: “Méko ekhawo s'e aksok nawhak eklo nak. Méko nahan kawának kanmexek.”

⁵ Kél'awók axta nahan katnehek eyeymáxkoho ekpeywa xa aksok nawhak eklo nak, tén han kél'awo kawañaha ekpeywa m'a Dios, kél'awók axta nahan keytek kélyaheykekxoho ekweykmoho cuarenta y dos pelten.

⁶ Temék axta ekpeywa aksok nawhak eklo xa, kenmexáha axta ekpeywa Dios, wanyeyha axta nahan ma'a Dios, wanyeyha axta nahan ekpeywa m'a aphamakxa nak Dios, kenmexáha axta nahan ekpeywa m'a ektaha nak apheykha néten.

⁷ kél'awók axta nahan élana kempakhakma, elenmexa m'a ektaha nak Dios énxet'ák apagkok apkelpagkanamap, ekwokmoho ekmalana, xakak axta nahan yakwayam keytek apkelyaheykekxoho m'a apyókxoho pók aptémakxa énxet nak, tén han ma'a mók ektémakxa nak apkelpakmeyesma, tén han ma'a apkeleñama nak ekyókxoho yókxexma.

⁸ Apyókxoho énxet'ák apheykha náxop sat nahan elpeykeshok xa, cham'a megkanaktáxesamaxko nak apkelwesey m'a weykcha'áhak ekyennaktésamo nak egnenyek, eyeynamókxa m'a sekxo' axta elánamáxko keso náxop, cham'a weykcha'áhak ektaha nak apagkok ma'a Nekkések Apketkok apmatñama axta.

⁹ Kélheyk'ák agkok eghak kéxegke, kóleyxho s'e:

¹⁰ “Enxet eyéméxko nak kólhésók sẽlpextétamakxa, kólhésók sat sẽlpextétamakxa; keñe m'a eyéméxko nak kólyakténchesagkok apyespa'ák sókwenakte, kólyakténchesagkok sat apyespa'ák etekyók.” Sat kataxchek ektémakxa nak apkelenmáxamákpoho Dios énxet'ák apagkok apkelpagkanamap xa, tén han ma'a ektémakxa nak melya'áseyam.

¹¹ Ekwet'ak axta makham ko'o mók aksok nawhak eklo ektepa eñama kañe' xóp. Anet axta kepet'ák, ektémol'a nekkések apketkok akkepet'ák, hawók axta eyke ekpeywa m'a yéwa ekwányam.

¹² Hawók axta ektémakxa kélyaheykekxoho m'a émha amonye aksok nawhak eklo nak, cham'a ekyepetcha'awo enxoho mók, keltemók axta nahan elpeykeshok apyókxoho énxet apheykha nak náxop xa émha amonye aksok nawhak eklo nak, cham'a ektakmelákxo axta aksa ekyensé ekyawe.

¹³ Kelanak axta nahan cha'a m'a aksok sempelakkasamo nak agweta', wokmók axta nahan ektegkesa táxa keso náxop nápakta'awo' énxet'ák.

¹⁴ Axta keñamak elyexancháseyncha'a apyókxoho énxet'ák apheykha nak keso náxop eñama m'a aksok sempelakkaso nak agweta', cham'a kélhayo axta kalának keto' ekyagkakxa m'a émha amonye aksok nawhak eklo nak, keltamhok axta nahan kalanaxchek kéleykmáseso ekhawo xa émha amonye aksok nawhak eklo nak, cham'a ekyáktama nak makham, ñekhe m'a kélyetxakxama nak sókwenakte kélyensasama.

¹⁵ Xakak axta ekmowána xa mók aksok nawhak eklo ekteyapma axta axayo', yakwayam enxoho kawátekhápok xa kéleykmáseso kélheyaseykegkoho nak émha amonye aksok nawhak eklo, yakwayam enxoho kapakmétek xa kéleykmáseso nak, tén han kának etekyók ma'a apyókxoho énxet ektaha nak melpeykesamo xa kéleykmáseso nak.

¹⁶ keltamhok axta anhan kólkahasagkok apyókxoho énxet'ák apmek ekpayhókxa nak apkelya'asamakxa esenhan ma'a ekpayhakxa nápát, cham'a meyke nak kéláyo tén han ma'a apkelwányam nak, kelwese'e, tén han ma'a meyke nak aksok apagkok, tén han ma'a melmomap nak, tén han ma'a apkelmomap nak.

¹⁷ Méko axta kawának kamok ekha ekyanmaga aksok méko enxoho kélkahaso ekwesey m'a aksok nawhak eklo nak, méko axta anhan kawának keyñekxa', esenhan ma'a megkeytna enxoho ekwánxa nak número ekwesey.

¹⁸ Sat kataxchek ektémakxa negya'ásegwayam se'e; énxet ektahakxa enxoho ekha apya'áseykegkoho, kaxén apwáxok ekwánxa nak elkahaso m'a aksok nawhak eklo nak, ektaha nak han énxet número apagkok. Keso ekwánxa nak aksok nawhak eklo elkahaso s'e: seiscientos sesenta y seis.