APOCALIPSIS 12 - Lengua Sur (Enxet) Nuevo Testamento

Kelán'a tén han yéwa ekwányam

¹ Tekkek axta néten aksok sempelakkaso agko' nak agweta': xama kelán'a eyaklamaxche ekhem axta m'a ektémol'a apáwa, keñe axta apyetna pelten ma'a kóneg amagkok, keñe axta étcheso akkátek elyenma aphágko doce yaw'a.

² Lósok axta anhan xa kelán'a nak, payheykha axta átog eñama ekmáske awáxok, eñama nahan eklegeykegkoho ekteme nakláwa.

³ Keñe axta ektepékxo makham mók aksok sempelakkaso nak agweta' ma'a néten: yéwa ekwányam ekyexwasé axta m'a, siete axta akkatkók, diez axta ekyókxoho m'a kepet'ák, étcheso akkátek axta nahan eghak ekyókxoho akkátek.

⁴ Epakyek axta kelyenyawásak nápakha yaw'a m'a néten, kexeyntek axta náxop. Yakwa'ak axta yakwánxa kategkesek étche kelán'a xa yéwa ekwányam nak, kelhaxneyk axta yakwayam kanaksapok ekmanyehe agko' sakcha'a kaxwé aptéyam.

⁵ Tegkesek axta étche apkelnáwa xa kelán'a nak, cham'a peya sat etnehek apkeláneykha ekyókxoho apkelókxa yetlo meyke apmopyósa elanok apkelenmexma. Wánxa agkok, kélyementegkek axta eyke étche xa kelán'a nak, kélyentamákxeyk axta m'a nápakto' Dios, cham'a ekyetnamakxa nak aptaháno ektakmalma;

⁶ keñe axta ekmahágko enyaha yókxexma meykexa énxet xa kelán'a nak, cham'a apkelanésamakxa axta Dios yakwánxa cha'a kólmések ekto ekweykmoho mil doscientos sesenta ekhem.

⁷ Tekkek axta kempakhakma néten natámen xa: Miguel, Dios apchásenneykha apkeñama néten axta apkempakha'ak yetlo apkelxegexma'a, axta apkenmexak xa yéwa ekwányam nak, kennápeyxchek axta nahan xa yéwa ekwányam nak, yetlo nahan elxegexma'a,

⁸ wánxa agkok, axta eyke kaxnawok yéwa ekwányam ma'a, tén han ma'a elxegexma'a nak, axta anhan kól'awok kaxmakha m'a néten.

⁹ Kéltekkesek axta yéwa ekwányam ma'a néten, cham'a nano' yéwa eltamhomaxko nak kelyekhama', ekwesey nak Satanás, cham'a elyexancháseykencha'a nak cha'a apyókxoho énxet'ák keso náxop. Kélyenyenteyk axta yéwa ekwányam keso náxop yetlo elásenneykha.

¹⁰ Ekleg'ak axta ko'o kélpeywa ekyennakte agko' ma'a néten. Entahak axta amya'a s'e: “Wa'ak kaxwo' nelwagkásamáxche teyp, tén han ma'a Wese' egegkok Dios apmopwána nak, wa'ak nahan kaxwo' negyeseksa m'a aptémakxa nak Wese' apwányam Dios, tén han ma'a ektémakxa nak kélyaheykekxoho Mesías apagkok; hakte kéltekkesegkek axta m'a elsexnenagkama axta ẽlyáxeg cham'a elsexnenagkama axta cha'a ekyókxoho ekhem, tén han ekyókxoho axta'a nápakto' ma'a Dios egagkok.

¹¹ Apkelmalanchek axta ẽlyáxeg'a xa eñama m'a apyegkenma axta éma apagkok Nekkések Apketkok eñama nahan ma'a apkellegaso axta amya'a ektakmela agko' xa énxet'ák nak; axta elayeyk eletsapok apmayheykegkok axta aksa eletsapok.

¹² ¡Kalpayhekxa' kélwáxok kéxegke kélheykha nak néten! ¡Wánxa agkok, kéxegke sat laye kélheykha nak náxop tén han ma'a ekheyak nak wátsam ekwányam, hakte weywenték kelyekhama' yetlo eklómo agko' enmexa kéxegke, ya'ásegwokmek eyéméxko antawók ekhem!”

¹³ Xama axta ekwet'a kélyenyento náxop xa yéwa ekwányam nak, kelanak axta m'a kelán'a ektegkeso axta étche apkenna.

¹⁴ Náta axempenák elyawe axta eyke xakak xa kelán'a nak, yakwayam enxoho kawának kampak aksa m'a ekhamakxa nak meykexa énxet, cham'a ekxaweykxa axta cha'a ekto ekweykmoho apkántanxo apyeyam nepxet pók, kamhagkok eyátépexa ekyetnakxa m'a yéwa ekwányam nak.

¹⁵ Tekkesek axta yegmen átog xa yéwa ekwányam nak, yakwayam enxoho katnesásekxak wátsam, yakwayam enxoho nahan keynyawaksek xa kelán'a nak;

¹⁶ wánxa agkok, xapop axta eyke pasmak xa kelán'a nak, mayhak axta xóp, keñe axta eknaksapa m'a wátsam ektekkeso axta átog yéwa ekwányam.

¹⁷ Ekeso eñamakxa ektaknókoho agko' axta kelán'a m'a yéwa ekwányam nak, keñe axta elnápexko aksa m'a apkeleymomap nak atawan'ák natámen xa kelán'a nak, axta kelenmexak ma'a énxet'ák ektaha nak apkelyaheykekxoho apkeltémókxa nak antehek Dios tén han ma'a meyenseyam nak apkelxeyenma apwesey Jesús.

¹⁸ Neyáwa wátsam ekwányam axta yákwokmok xa yéwa ekwányam nak.