APOCALIPSIS 11 - Lengua Sur (Enxet) Nuevo Testamento

Apkánet ektaha apweteykegkoho

¹ Ekxakak axta ko'o yámet ekyakwaté negmeykha nelyetsáteyak, máxa axta yampa'at la'a, entahak axta amya'a seyáneyáxko s'e: “Etnamha, elyetseták ma'a Dios tegma appagkanamap apagkok nak, tén han ma'a ekwatnamáxchexa nak cha'a aksok, elyetset nahan ekwánxa apyókxoho m'a ektaha nak apkelpeykesamo m'a.

² Wánxa aksa, né elyetseták nepyáwa xa tegma appagkanamap nak, hakte énxet'ák melya'áseyak Dios axta apxakak xa, cháxa peya nak elteyammaha tegma apwányam appagkanamap ekweykmoho cuarenta y dos pelten xa énxet'ák nak.

³ Aláphaksek sat ko'o apkánet ektaha nak ekmámnaksoho apkelxeyenma amya'a ahagkok, yetlo apkelántaxno apáwa sẽlwáxakxamo nak, ellegaksek sat nahan ko'o sekpeywa ekweykmoho mil doscientos sesenta ekhem.”

⁴ Cháxa apkánet ektaha nak ekmámnaksoho apkelxeyenma amya'a ahagkok apyetchesamakpoho m'a ánet yenta'a ekwesey nak olivo, tén han apyetchesamakpoho m'a ánet chálewaso ekhágko nak nápakto' Wese' apwányam apmámnaksoho nak keso náxop.

⁵ Apkelenxanakmek agkok cha'a apmoko enaktawasha xama énxet xa apkánet nak, táxa cha'a etekkesek apatña'ák, esawhohok nahan cha'a elwatnek ma'a apyókxoho ektaha nak apkelenmexma; sat katnehek nahan apkeletsapma m'a ektaha nak apmáheyo enaktawasagkohok xa énxet'ák nak.

⁶ Cháxa énxet'ák ektaha nak ekmámnaksoho apkelxeyenma amya'a ahagkok xa, yetneyk apmopwancha'a yápekxak ma'a néten, yakwayam enxoho megkamakye' neyseksók apkellegaso amya'a eñama nak Dios, yetneyk nahan apmopwancha'a etnesásekxak yegmen éma, yetneyk nahan apmopwancha'a ellegásesagkohok apyókxoho énxet'ák keso náxop ekyókxoho ektémakxa nak nenlegeykegkoho ekmaso, cham'a apkepmenyéxa enxoho etnahagkok.

⁷ Apsawhakyek sat agkok apkeltenneykha m'a amya'a eñama nak Dios, keñe sat katyapok aksok nawhak eklo eñama nak kañók agko' máxek, kanmexek sat xa énxet'ák nak, kamalánek sat nahan nepyeseksa, kalnápok sat nahan.

⁸ Kaxnagkok sat nahan aphopák ámay nepyeseksa tegma apwányam kélya'áseykegkoho nak, cham'a kélyepetchesamakxa axta anhan aksok ektegyéso Wese' apagkok, cham'a kéltéma nak Sodoma kélyetcháseykekxoho, tén han kélyetcháseykekxoho m'a Egipto.

⁹ Antanxo ekhem náxet mók sat katnehek apweté aphopák ma'a pók aptémakxa énxet'ák nak, tén han ma'a mók ektémakxa nak apkelpakmeyesma, cham'a apkeleñama nak ekyókxoho yókxexma, megyohok sat nahan kólatawónek.

¹⁰ Kalpayhekxak sat nahan apwáxók énxet'ák apheykha nak keso náxop apkeletsapa enxoho xa. Kalpayhekxohok agko' sat nahan apwáxók, emlasakpok sat aksok apméso naksa cha'a pók, hakte cháxa apkánet énxet ektaha axta apkellegaso Dios appeywa apkellegasáseykegkoho agko' axta cha'a xa énxet'ák nak.

¹¹ Yeyk'ak axta xa antanxo ekhem náxet mók nak, apnakxetekhásekmek axta Dios xa énxet'ák nak, apchaknákxeyk axta nahan néten, apkelakak agko' axta nahan ma'a ektaha axta apkelweté.

¹² Keñe axta apkelleg'a ekyennakte kélpeywa eñama néten xa apkánet énxet ektaha axta ekmámnaksoho apkelxeyenma amya'a eñama nak Dios. Entahak axta amya'a apkeláneyákpo s'e: “¡Kólchenátwata s'e!” Apkelmahágkek axta néten xa, neyseksa yaphopé axta apkelxegak, apyókxoho apkelenmexma axta anhan apkelwet'ak.

¹³ Keñe axta ektepa ekyawheykha xóp ekyennakte agko', palchesakmek axta anhan nápakha tegma ekwokmo axta cha'a diez apyókxoho, siete mil axta anhan apyókxoho apkeletsapma énxet'ák. Keñe m'a ektaha axta meletsapma, apchekakxoho axta apkelpeykásawók Dios apha nak néten.

¹⁴ Anet entahak ekyeykhe kéláphaso aksok ekmaso agko', wánxa agkok, xegakmek eyke makham yakwayam katnehek antanxo.

Ektemegwánxa siete kélakkahaso

¹⁵ Siete axta apwokmok Dios apkelásenneykha appawaso apchakkahaso, keñe axta eklegáxko ekyennakte agko' kélpeywa eñama néten. Entahak axta amya'a s'e: “Wese' egegkok kaxwo' aptahak Wese' apwányam keso náxop, tén han ma'a Mesías apkeñama nak Dios. Etnahagkok sat Kelwese'e apkelwányam megkatnegwayam enéxa.”

¹⁶ Apkelháxahánteyk axta náxop veiticuatro énxet'ák apkelámha apmonye'e apheykencha'a axta néten aptaháno eltakmela nápakto' Dios, apkelpeykásawók axta m'a Dios.

¹⁷ Aptahak axta apkelpeywa s'e: “Negmések negko'o ekxeyenma egwáxok xép Wese' egegkok Dios ekha nak apyennakte, apheyk makham xép, aphegkek axta nahan nano' axta, hakte apmeyk axta exchep ekyawe agko' apmopwána, apcheynawok axta nahan apteme Wese' apwányam.

¹⁸ Apkellókek axta apyókxoho énxet'ák apheykha nak ekyókxoho yókxexma, wánxa agkok, wa'ak eyke exchep aplo, cham'a yakwánxa nak xép elyekpelkohok ma'a énxet'ák apkeletsapma axta; egkések sat nahan aksok apméso naksa m'a énxet'ák ektaha axta apkellegaso xép appeywa, tén han ma'a ektaha nak xép énxet'ák apagkok apkelpagkanamap tén han ma'a énxet apteme nak cha'a apcháyo exchep apwesey, apkelwányam, tén han ma'a meyke kéláyo nak, emasesók sat nahan xép ma'a énxet'ák ektaha nak aptawáseykha keso naxop.”

¹⁹ Keñe axta ekmayhekxo átog ma'a Dios tegma appagkanamap apagkok apyetna nak néten, keñe axta ekwetáxko ekyetna yántéseksek kélxátamakxa axta m'a ekhémo mók nelpakhetchásamáxkoho nak Dios kañe' xa tegma appagkanamap nak, keñe axta ektepa apkelyenmayam, kélpeywa, extegyawá, tén han ma'a xóp ekyawheykha nak, yegmen elyennakte ekxámokma axta nahan palleynta'.