APOCALIPSIS 10 - Lengua Sur (Enxet) Nuevo Testamento

Dios apkelásenneykha apmeykha weykcha'áhak kélpexteteykekxoho eknaktáxésamaxche axta

¹ Ekwet'ak axta ko'o pók Dios apchásenneykha ekha apyennakte, apweywentek axta apkeñama néten, neyseksa yaphopé axta apkexyekmok, pemhet axta eyke apyetnak néten apyetseksek, kelyenmawok axta m'a nápát ektémol'a ekhem elyenma, keñe axta apyay'ák ekhawo m'a táxa elakneyak la'a elálewe.

² Weykcha'áhak étkok kélmeykeso axta apmeykha, keñe axta apteyókmo wátsam ekwányam ma'a apmenek ekpayhókxa nak apkelya'asamakxa, keñe axta apmenek ekpayhókxa nak nepsagkalwa apteyókmo xóp.

³ Kayhek axta nahan appeywa apkelpáxameyncha'a, máxa axta m'a ektémol'a méwa ekyexweywe; xama axta apkelpáxameyncha'a xa, yetlókók axta apkelpáwá siete takha'.

⁴ Peyk axta eykhe ko'o ataxaksek ekmassa apkelpáwá xa siete takha' nak, wánxa agkok, ekleg'ak axta ko'o kélpeywa eñama néten. Entahak axta amya'a s'e: “Né etekkesha aksa amya'a aptahakxa nak apkelpakmeyesma xa siete takha' nak, né etaxés nahan.”

⁵ Keñe axta apya'asa néten apmek ekpayhókxa nak apkelya'asamakxa xa Dios apchásenneykha nak, cham'a sekwet'a axta apteyókmo xama apmenek wátsam ekwányam, tén han apteyókmo mók apmenek xóp.

⁶ Keñe axta aptemésesa ekmámnaksoho agko' appeywa xa, apkeltamhok axta étagkohok ma'a aptaha nak memassegwayam, cham'a ektaha axta apkelané néten, tén han keso náxop, tén han ma'a wátsam ekwányam, tén han ma'a ekyókxoho aksok ekheyak nak. Aptahak axta s'e: “Néxa peyk kammok kaxwo',

⁷ apwokmek sat agkok siete appawaso apchakkahaso m'a Dios apchásenneykha nak, keñe sat kasawhaxkohok katnehek ma'a ektémakxa nak apmopmenyého elának Dios ektaha nak ekpowásamáxkoho, ekhawo ektémakxa axta aplegaso Dios ma'a énxet'ák ektaha axta apkellegaso appeywa.”

⁸ Eklegákxek axta makham ko'o sepakhetchesa m'a kélpeywa sekleg'a axta eñama néten. Entahak axta amya'a seyáneyáxko s'e: “Exeg, ema xa weykcha'áhak étkok kélmeykeso apmeyncha'a nak Dios apchásenneykha apkeñama nak néten, cham'a apteyókmo nak xama apmenek wátsam ekwányam, keñe mók apmenek apteyókmo xóp.”

⁹ Ekyo'ókmek axta ko'o apkenmágkaxa xa Dios apchásenneykha nak, eltamhok axta hegkések xa weykcha'áhak étkok nak. Aptahak axta seyátegmowágko s'e: “Ema, etaw. Máxa sat katnehek aksok ekmátsa apátog ektémol'a yanyawhéna apyegmenek, wánxa agkok, askehek sat eyke katnekxak apwáxok.”

¹⁰ Ekmeyk axta ko'o xa weykcha'áhak étkok apmeyncha'a axta Dios apchásenneykha, ektókek axta anhan; máxa axta aksok ekmátsa entahak ahátog ektémol'a yanyawhéna apyegmenek, xama axta eyke seksawha sekto xa, askehek axta entahak ewáxok.

¹¹ Keñe axta ektaha amya'a seyáneyáxko s'e: “Eltennaha sat makham ma'a aptémakxa nak apxeyenma Dios apyókxoho énxet'ák, cham'a pók aptémakxa énxet'ák nak, tén han ma'a mók ektémakxa nak apkelpakmeyesma, tén han ma'a kelwese'e apkelwányam nak.”