3 SAN JUAN 1 - Lengua Sur (Enxet) Nuevo Testamento

Gayo apxénamap ektakmela aptamheykha

¹ Ko'o sektaha nak sémha emonye, eyáxeg seyásekhayo Gayo ektáxesásak ko'o s'e weykcha'áhak nak, ektaha nak ekmámnaksoho seyásekhayo.

² Eyáxeg seyásekhayo, elmaxnakkek ko'o Dios seltamho katakmelhok apha exchep, tén étak ekyenneykha apyempehek, ekhawo ektémakxa nak cha'a ektakmeleykha apwáxok xép nápakto' Dios.

³ Awanhek axta ko'o ekpayheykekxa ewáxok, seltennásakto ẽlyáxeg'a meyenseykmo apkelané exchep ma'a nentémakxa ekmámnaksoho nak, cham'a apkelenyékto axta m'a.

⁴ Awanhok agko' ko'o ekpayheykekxa ewáxok sekleg'a amya'a apkelenxanakmoho apkelané amya'a ekmámnaksoho m'a sektéma nak étchek eñama sektémo xamo' may'áseyam.

⁵ Eyáxeg seyásekhayo, tásek aptémakxa exchep meyenseykmo appasmo m'a ẽlyáxeg'a nentémo xamo' nak magya'áseyam, ekyagwánxa agkok ma'a appasmoma nak cha'a énxet'ák apkelwayam nak apkeleñama mók nekha.

⁶ Apxénchek axta nápakta'awo' énxet'ák apchakneykekxexa ektémakxa apkelásekhayo exchep xa énxet'ák nak. Epásem sat xép xa énxet'ák nak, yakwayam enxoho elenxanmohok apkelxega, cham'a ekleklamókxa nak apwáxok antehek Dios.

⁷ Hakte apchénawok apkelxega yakwayam elanagkok apkeltamheykha eñama Jesucristo xa énxet'ák nak, axta anhan eltamhok epasmok ma'a énxet'ák melya'áseyak nak Dios.

⁸ Ekeso eñamakxa eyéméxko nak negko'o ampasmok xa énxet'ák nak, yakwayam enxoho ampasmok ma'a ektémakxa nak apkeltenneykha amya'a ekmámnaksoho.

Ekmaso aptémakxa Diótrefes, ektakmela aptémakxa Demetrio

⁹ Ektáxésesek axta ko'o weykcha'áhak ma'a énxet'ák apchakneykekxoho nak, melyahakxék eyke cha'a Diótrefes nentahakxa nempeywa, hakte apmenyék etnehek apkemha apmonye nepyeseksa apnámokkok.

¹⁰ Ekeso eñamakxa peya nak altennásekxohok kéxegke sekwákxo sat ma'a, hakte aptekkesekmek aksa cha'a amya'a senxéna negko'o xa énxet nak, keñe nahan aptaha apmopwána amya'a senxéna negko'o. Háwe eyke ekwánxa agkok apteme xa, melmak nahan cha'a takha' ẽlyáxeg'a ektaha apkelwayam ma'a, megya'awok nahan cha'a elmok takha' apnámokkok ma'a énxet'ák apmáheyo neykhe elmok takha' apnámokkok, apkelántekkesek cha'a kañe' kélakneykekxexa.

¹¹ Eyáxeg seyásekhayo, ná étlakxa aksa ekmaso nentémakxa nak, akke étlakxa m'a nentémakxa ektakmela nak. Negko'o ektahakxa enxoho nenlané aksok ektakmela, nentemék negko'o Dios énxet'ák apagkok, keñe m'a énxet apkelané nak aksok ekmaso, meteyk Dios ma'a.

¹² Apyókxoho énxet'ák cha'a takmelak apxeyenma Demetrio, ekmámnaksoho aptémakxa nahan keñamak ekwetamaxche aptaha ektakmela aptémakxa. Nenxénchek nahan cha'a negko'o xa aptaha ektakmela aptémakxa Demetrio. Apya'ásegkok nahan xép ekmámnaksoho cha'a nentémakxa negko'o nempeywa.

Ektemegwánxa néxa amya'a

¹³ Xámok eykhe amya'a yakwayam altennaksek xép, akke amokók atáxésesek weykcha'áhak,

¹⁴ hakte emenyék ko'o kanyehémhok ótekxak xép, tén han alpakhetchesaxkohok.

¹⁵ Emenyék ko'o keytek xép meyke ektahakxa apwáxok. Apcháphásesek nahan ekxeyenma apwáxók ma'a apkelweteykxa nak xép. Eltennés hana negáphásesa negko'o xa ekxeyenma egwáxok énxet'ák nelweteykxa nak.