1 CORINTIOS 3 - Lengua Sur (Enxet) Nuevo Testamento

Nelxegexma'a nentamheykha nenláneya m'a nentamheykha eñama nak Dios

¹ Elyáxeg, mowanchek axta ko'o selpakhetchesa kéxegke ektémol'a ólpakhetchesek énxet appeykesáseyak nak Espíritu apkeñama Dios, wánxa axta aksa sektaha selpakhetchesa kéxegke m'a nentémakxal'a ólpakhetchesek énxet keso náxop, ekhawo ektémakxal'a sakcha'a ekmasextoho ekya'áseyak aksok eleñama nak Cristo.

² Ekmések axta ko'o kéxegke nelxekmowásamáxche meyke ekmáske ektémol'a sakcha'a kaxwé ekteyam kólagkok ma'a neme, megkaxkeyk ma'a ekto ekyennakte nak, hakte megkólwanchek axta makham kólnaksapok kéxegke kélto ekyennakte nak. Megkólwanchek eyke makham kólnaksapok se'e kaxwo' nak,

³ hakte makhemek makham kélweyheneykekxoho kéxegke apkeltémakxa nak énxet keso náxop. Yetneyk makham kélnepyeseksa kéxegke kélnatha kélmók nak, tén han ma'a kélenmexamaxche nak, hakte kélyetlákxeyk makham kéxegke m'a apkeltémakxa nak énxet'ák keso náxop, kéltemegkek nahan cha'a m'a apkeltémakxa nak énxet.

⁴ Aptemék agkok appeywa kélxama s'e: “ko'o sekteme Pablo apkelxekmóso”, keñe pók etnehek appeywa s'e: “ko'o eyke sekteme Apolos apkelxekmóso”, kéltemek agkok kélpeywa xa, makhamók makham kélyetleykekxa kéxegke apkeltémakxa nak énxet keso náxop.

⁵ ¿Yaksak énxet Pablo?, ¿yaksak nahan énxet ma'a Apolos? Wánxa eyke aksa negko'o nenláneya m'a nentamheykha eñama nak Dios. Negko'o nahan keñamak kéltéma kéxegke megkólya'áseyam Wese' egegkok. Enxama cha'a negko'o apkelanak ma'a aptamheykha apméso axta Wese' egegkok.

⁶ Ko'o axta seneykekxa, keñe axta Apolos aptaha apkexpakhéyak yegmen, Dios axta eyke aptaha apwánegkeso xa negkeneykekxa nak.

⁷ Háwe eyke kélayókxa m'a énxet ektaha nak apkeneykekxa, háwe nahan ma'a énxet ektaha nak apkexpakhéyak yegmen, akke apwánxa apagkok kélayókxa m'a Dios, hakte cham'a ektaha apwánegkeso aksok kélcheneykekxa m'a.

⁸ Aphawók eyke pók ma'a énxet ektaha nak apkeneykekxa, tén han ma'a ektaha nak apkexpakhéyak yegmen aksok kélcheneykekxa. Dios sat egkések ekyanmaga xa ektémakxa nak apkeltamheykha.

⁹ Negko'o nenteme nelpasmomáxkoho nenláneya nentamheykha eñama nak Dios, kéxegke eyke kélteme kélhawo m'a namyep aptamhágkaxa nak Dios, kélhawók nahan kéxegke m'a tegma apkelana nak Dios.

¹⁰ Ko'o eyke sekteme sémha emonye tegma apkelánamap, ektaha axta apkeltémo Dios alának tegma apówhak ekyennaktésamakxa nak, pók énxet akke ektaha apkelané xa tegma nak. Wánxa agkok, negyókxoho eyke kéméxchek antakmelcheshok nenlané xa tegma nak.

¹¹ Hakte méko kawának kalánekxak makham pók tegma apówhak ektaha axta Dios appekkenma apmonye, cham'a Jesucristo.

¹² Cháxa apkelánamap nak tegma apówhak, apwanchek emha énxet sawo ekyátekto elyenma elának tegma néten xa tegma apówhak nak, esenhan ma'a sawo ekmopé elyenma nak, esenhan ma'a meteymog eltakmalma nak, esenhan ma'a yántéseksek nak, aw'ák, esenhan ma'a tappo.

¹³ Wánxa agkok, tásek sat eyke katnehek ekwetamaxche ekhem nelyekpelchamáxchexa sat xa, ektémakxa nak cha'a nentamheykha, hakte yetlo táxa sat katnehek ekwa'a enxoho xa ekhem nak, táxa sat nahan keykkónek ma'a ektémakxa nak cha'a nenlané nentamheykha.

¹⁴ Apkelanak agkok enxama tegma megkamopwána nak emyetek, exkak sat ekyanmaga.

¹⁵ Wánxa agkok, apmetchek agkok ma'a tegma apkelané nak, ewagkasakpok sat eykhe teyp ma'a énxet ektaha axta apkelané, kasawhaxkohok sat eyke kalmassegwók ma'a ekyókxoho aksok apkelané axta, máxa sat etnehek ma'a énxet apkegketamakpohol'a neyseksa táxa.

¹⁶ ¿Yagkólya'ásegkok kéxegke kéltaha Dios tegma appagkanamap apagkok, tén han Espíritu apkeñama nak Dios apha kélwáxok kéxegke?

¹⁷ Aptawáseyha agkok xama énxet Dios tegma appagkanamap apagkok, Dios sat emasésók xa énxet nak, hakte Dios tegma appagkanamap apagkok apteme appagkanamap, kéxegke kélagko' kélteme xa tegma appagkanamap nak.

¹⁸ Nágkólteméses aksa ekmámnaksoho m'a aksok kélanagkamakxa nak katnék: apkeneykek agkok keytnak apya'áseyak kélxama kéxegke ekhawo ektémakxa nak apkelya'áseyak énxet keso náxop, kéméxchek etnésesakpok máxa meyke apya'áseyak aksok, yakwayam enxoho etnehek ekmámnaksoho apya'áseykegkoho, aptaha enxoho xa.

¹⁹ Ekyéháxma cha'a etnéseshok Dios negya'ásegwayam eñama nak keso náxop, hakte temegkek eknaktáxésamaxche weykcha'áhak se'e: “Apmáha cha'a Dios ma'a ektémakxa nak apkelya'áseykegkoho apancha'awók énxet ekha nak apkelya'áseyak, yakwayam enxoho elmok”.

²⁰ Temegkek nahan eknaktáxésamaxche s'e: “Apya'ásegkok Wese' egegkok ektaha ekyéháxma m'a ektémakxa nak apkelya'áseyak énxet ekha nak apkelya'áseykegkoho.”

²¹ Ekeso eñamakxa méko kawának keyxkohok awáxok eñama ekyetleykekxa aptémakxa xama énxet; hakte ekyókxoho aksok ekteme kélagkok kéxegke.

²² Pablo, tén han ma'a Apolos, Pedro, tén han keso náxop, tén han ma'a ektémakxa nak negyennakte, tén han ma'a nétsapma nak, tén han se'e kaxwo' nak, tén han ma'a egmonye sat: ekyókxoho ekteme kélagkok kéxegke,

²³ kéxegke eyke kélteme Cristo énxet'ák apagkok, keñe Cristo aptaha apkeñama Dios.