Yoel 3 - Katɔti Ɔku Kedee

Katɔti Ɔdubo Kadi Bamba Bekyuli Kɔtu Bɔni

¹ “Uwi ɔmmɔ ni, ami Unwoti ndubo bɔya na ala asɔ atɛnku Yuda ku Yerusalem.

² Ndubɔkpanku kadi bamba bekyuli liboku ɔkwalɛ ɔni baalɔ Yehosaƒat na nwuna kalɔ ndi litemi bɔtɛ na lɛtɛku-ma litemi. Ɔsika ama négyingya mina kadi bekyuli bákya kayawi kesi kesii. Ama néle-ma

³ na bátu akunkpa bánu bana ɔni meti mina bekyuli menwini anwu badi. Na béti bananabi bávumanaku bayalɛ na béti belekubi béye báƒɔ ntɛ báni.

⁴ “Amii Tiro ku Sidon kadi bekyuli ku Ƒilistiƒuɔ, bi ɔsu na bɛɛkɔ́ku-mi na bɛɛbla ala amɛni udu, munuu lɛla lɛdi na lɛ́bla-mii na biidie-mi kasi? Bɔdubo bɔnu ɔni muudie ɔkpanadi kasi.

⁵ Bíti mina ala ani náƒɔ-mi kuye ƒui ku sika ugyiedi ku ɔƒualadi bɛ́tɔlɔku bísienku bina aƒiodu.

⁶ Na bíƒie Yudaƒuɔ ku Yerusalemƒuɔ bíye bíte kadi bamba bekyuli bani naaadi Yudaƒuɔ na bɛ́bɔku-ma bɛ́tɔlɔku bana lɛma kakaaka ƒui.

⁷ “Bɛnu! Ndubo bɔya na benwini basi kesii kani na bíye-ma bímene mmɔ ƒui bebo bana lɛma. Na lɛla lɛni na bɛ́bla-ma mmɔ na ndubɔya na lɛlɛku-mii.

⁸ Ndubuti bina bebi buye bute Yudaƒuɔ ku Yerusalemƒuɔ na beti-ma beye bete Sebaƒuɔ kadi bekyuli bani nkya ɔlɔgyu kakaaka mmɔ. Ami Unwoti násu.”

⁹ Bɛkɔ ɔmɛni lɛsa bite kadi bekyuli ƒui. Na bɛklibi lɛlɔ bite kekpo! Bitiku bekpone benengudi bammɔ na bebo bebékpo na benye basiaku-mi!

¹⁰ Bɛla bina anwami ku asaaka bɛkywɛɛ kuwii ku atula. Na bani na beeebo ɔlɔkplu ƒui bata ku kayi na basu banii, “Bananabi ku bekpone na bɔdi.”

¹¹ Amii kadi bekyuli bɛbabla na bibo pla! Na bɛya na ami lɛnɔ litiku mina bekpone liboku.

¹² Katɔti ɔnini, “Amii kadi bekyuli, bɛta ku ogya na butása na Litemi Bɔtɛ Ɔkwalɛ. Mmɔ na ami Unwoti ndubɔtɛku kadi bani náka bámana ƒui litemi.

¹³ Bɛlɛku bina asaaka na bikulo-ma ƒui biwi kalɔ aani kamu kani négyie. Na bɛnya-ma bisusu aani kalɛ na baamana egyiibi ntu teeyile ntɛ kebulokɔ. Bana ulikplu ala bɔbla bɔ́bɔ bɔ́gya.”

¹⁴ Bekyuli mpim mpim báƒɔ Litemi Bɔtɛ Ɔkwalɛ ɔmmɔ! Na Unwoti Limeyi lɛmmɔ lɛnɔ líidu lɛ́wɔlɔ.

¹⁵ Na ɔƒɛ iye kɔbuli iye ayabi adi asɔ elekeye.

¹⁶ Na Unwoti ɔɔkwanyi taasiku Sion Kɔbi lili ku lɛdi momoomo, na katɔ ku kalɔ ƒui kaakunku. Nsu Unwoti ɔmmɔ kani ndubɔbla katamikukɔ ku kagyumanakɔ kpakplaa ute nwuna kadi bekyuli Israelƒuɔ.

Unwoti Ɔdubute Nwuna Bekyuli Kusɛ Kusɛ

¹⁷ “Ami ndi Unwoti bina Katɔti na bɛdubo bɔnu bɔti ka nli Sion Kɔbi kedee lɛlɔ. Na baƒɔ bekpone badi basɔ baaadubo Yerusalem butuku, ɔsika use kedee.

¹⁸ “Na limeyi lɛmmɔ lɛlɔ ni, adingyii ani nánwu ebi kaduɛ adubɔƒɔ kɔbi kɔmmɔ lɛlɔ ƒui. Na bina bebuo badubɔƒɔ abi ammɔ lɛlɔ na bakɛ badi na bete-mii bebuo anyi ntu pii. Na ntukpa bɔni nkya Yuda kalɔ lɛlɔ mmɔ ƒui bɔdi bɔsɔ bulakwii kudii. Na ketu kadi kadubɔlɛ kasi Unwoti kaduli mmɔ na kagba kavi Sitim Ɔkwalɛ.

¹⁹ Egyipte ku Edom kɔlɔ kɔdububie kunwini kɔlɔ kɔkwiidi kɔni nsɔ naaadubo lɛla lɛdi bɔdia na kɔsɔ kuwi ukpludi na kalala kani na bábla Yudaƒuɔ ku bekyuli bani na bádu, nsu bátabla lɛla lɛdi ɔsu.

²⁰ Nsu bekyuli badubɔƒɔ Yuda ku Yerusalem lɛma uwi ƒui ɔ́si kaba úsie kaba.

²¹ Na bekyuli bani ƒui na bádu ni, ndubo bana badune ƒui bɔdu budie kasi. Ami Unwoti nli Sion.”