Yesaia 35 - Katɔti Ɔku Kedee

¹ Lɛlɔ lɛdubɔyɔ kalɔ kakwiidi kani mɔɔwia ntu na kaládia lɛla lɛdi, ɔsika egyiibi lidu lɛdubɔlɛ linye-ka lɛlɔ ƒui na alɛ anwula ku ebiti.

² Kalɔ kakwiidi kammɔ ala ƒui adubɔlɛ anwula ani mɔɔtina ka lɛlɔ lɛɛyɔ́-ka, na beteebo kudu ku lɛlɔyɔ kɔvanu. Na kalɔ kammɔ ala ƒui adubɔlɛ enye ataanwami aani Lebanon abi akumiɔ. Na eteekeye aani Karmel Kɔbi iye Saron Ɔkwalɛ. Na banu kalɛ na Unwoti Katɔti lɛgadi liikeye.

³ Bɛkya bekyuli bani na enu áƒɛ-ma na bábla kpɛtɛ kpɛtɛ ogya, na bani na bana akɔnkɔ áyɔ na aatɔ́ ayu ɔkplu.

⁴ Na bɛsu bani na ɔtɔtɔ ɔɔgyú-ma bɛnini, “Bise kayi na bɛda bɔyia bɛya, ɔsika bina Katɔti ɔdubo na ubedie-mii na udie bina bekisine kasi ute-mii.”

⁵ Na mmɔ ni, banumbwɛne badubɔnu na batutine benu.

⁶ Na bani na báƒɛ bewi kalɔ badubɔta na baƒulu ku lɛlɔyɔ aani bakwa. Na bamumu linyemi kɔbuli kɔƒɛnimi na bebo kudu ku lɛlɔyɔ. Na ntukpa bɔlɛ bɔsia bɔvi kalɔ kakwiidi kammɔ kemmo.

⁷ Kɔnwinimi kɔni náƒɔ ogya mmɔ kɔdubunwini lɛba na abiɔ alɛ kalɔ kakwiidi kammɔ kemmo ekpo ekpo. Na kesii kani na beƒukutu bátaatɛ kadubunwini kesii kani na livo ku ketudɔ alakpi lidu lɛdubɔkwɛ.

⁸ Ulu unengudi ɔdubɔsia kalɔ kammɔ kemmo, na badubɔlɔ-nwu banii Ulu Kedee. Na bekyuli bani neeese sɛɛn baaadubo ulu ɔmmɔ lɛlɔ basia. Na badɔlɔdi ku belikplune balasia-nwu lɛlɔ.

⁹ Gyata ɔdi ɔɔɔdubo mmɔ bɔkya na eƒiebuo ɔdi lɛnɔ ulasia mmɔ. Mmomu bekyuli bani kani na Unwoti ɔ́ya na bákɛ bɔƒɔ kani ndubɔsia mmɔ betéduo ɔma.

¹⁰ Na bani na Unwoti ɔ́ƒɔ mmɔ kani ndubɔsia mmɔ na beteedie lɛnu na betéduo Yerusalem. Na lɛlɔyɔ ebiti ndubɔbla bana kagabwa kani na badububi lili. Na badubɔdi limeyi na bakɛ lɛlɔyɔ, ɔsika ala ani muukpóku-ma ku ɔlɛ bunu biala kenye kadubukulo.