Yesaia 28 - Katɔti Ɔku Kedee

Eƒraim Lɛbibo

¹ Bɔbuɛ beete Eƒraim ntɛ banine bani nti lɛlɔtina lɛka aani kagabwa, na lɛkɛ ku ala abuni ani na baanu ka Israel ubo ɔsu. Baasíku ala amɛni na ɔkwalɛ ɔni nélie lɛmwi na kesii kani na baabla-nya mmɔ, na baaní ntɛ bɔmmɔ teekpi. Nsu ala ammɔ aayii udu, aani kalɛ na egyii anwula aayɛyɛ kalɛ.

² Bɛnu, Unwoti ɔdanku ukyuli ɔni na úbomo, na ubo ɔyikun ku ɔlɔkplu, aani etubankɛ ku ɔnantu ku ɔƒɛƒɛɛ kpakplaa ɔni muubile ala, na ɔdubo ubetiku-ma ku kɔnyi.

³ Na lɛlɔtina lɛka kagabwa kani na beti ni, bekyuli badubɔkɔ banya-ka lɛlɔ bavi.

⁴ Na nwuna bɔdia bɔni muukeye nsu uuubo bɔyɛyɛ na ɔkwalɛ ɔni nélie lɛmwi mmɔ ni, útavumana ku kɔnwingyie ebi ani mɔɔka bugyie. Na si ukyuli ɔdi ɔ́nu-nya na ɔɔkpɔɔlɔ-nya ɔdi udie kɔnakunwi.

⁵ Si uwi ɔni na ala amɛni álɛ lɛni áwɔlɔ ni, Unwoti ɔni ndi kadi ƒui Unwoti ɔdubunwini kagabwa kani muukeye ku lɛka lɛni bédi na lɛɛdia bɔnu na nwuna nkyuli ɛlɛɛ bani mebu lili.

⁶ Na ɔdubunwini kɔyu kɔni mɔɔtɛ litemi siin ute bani mɔɔtɛ bekyuli etemila. Na anwu ɔmmɔ ndubɔbla ɔlɔkplu ku ɔyikun ute bani nnye ɔban kenye ka babɔku kekpo biala.

⁷ Na Katɔti bakpane ku Katɔti kenye bediene ƒui benye baabla ntɛ ekpila na ntɛ kpakplaa bɔni ɔsu. Na baagbánta si baanu kɔyu kemmo ala iye baadi kasusu kpakplaa kadi na lɛla lɛdi lɛlɔ. Na ntɛ bɔ́ya na béƒu bakɛ.

⁸ Bana ala kasiakɔ ƒui kɔdala sɔɔn náƒɔ-ku na kesii kadi kétebu na kɔbɔ ala ani muusé lɛlɔ átaƒɔ mmɔ.

⁹ “Na ɔma bene na ɔdubo ala bɔtina? Na ɔma bene na uudie ala kalɔ taatina? Bani mɔɔnyimi lɛnyii munuu bani na basia lɛgba?

¹⁰ Unye ɔɔká ɔda bubo bɔmmɔ taasia kama egyu egyu kɔlɛ kɔlɛ.”

¹¹ Na ka banii belénu litemi ɔsu ni, kadi bamba bekyuli na Unwoti ɔdubɔya na babatɛmi bete-ma.

¹² Ɔsika anwu ɔlati ɔ́su-ma ka bekyuli bani ƒui na lɛla lɛdi liikpóku ni, bebo-nwu kudɔ na badubɔkɛ bɔnwuna, nsu béni na belenu.

¹³ Ɔmmɔ ɔsu béti Unwoti ɔda bubo aani litemi keeke ku ala bɔka taasia kama egyu egyu banii bla lɛmɛni ku lɛni ngyie kani.

¹⁴ Anwuɔsu binu, amii bani mɔɔdi bekyuli lɛlɔ, na bɛda Katɔti litemi bɛɛƒianku na Yerusalem.

¹⁵ Bɛɛkun lɛmɛnɛ taasu bɛnini, “Abu ku kukpi bínyimi ka kɔsɔ kuládu-bu, na bɔsɔ buleduo kaƒiɔtɔ kemmo iye si lɛbibo ku kawɔlɔkɔ lɛbibo kpakplaa lɛmmɔ lídu ni, ɔdubɔvia-bu lili, ɔsika búti ɔkɔ bɔ́nyi búnwini katamikukɔ na búti katuala bɔ́bla kabɛkɔ.”

¹⁶ Unwoti ɔnini, “Binu! Lɛ́ƒuna lɛtabi lɛni náƒɔ kuye na Sion, na ɔdi lɛtabi kpakplaa lɛni mabala kowodu likpo. Na ukyuli biala ɔni maƒɔ madi ni, enu alaƒɛ-nwu kudii.

¹⁷ Na aani ɔtune kalɛ ni, litemi bɔtɛ ulu lɛlɔ ndubɔdi mina kabuli kani na ndubuti lɛkɔku kowodu kɔmmɔ bunye. Na ugyii ɔni mɔɔtina kowodu kavikɔ ligeen ndubɔtina kalɛ na mɔɔbla ala siin. Na ɔƒɛƒɛɛ ku ɔnantu ku etubankɛ na ndubɔya na ana na agbala bina ɔkɔ ala bɔbla ƒui bɔni ndi bina katamikukɔ ku kabɛkɔ mmɔ na ɔyila lɛla biala.

¹⁸ Na lɛla lɛni na bínyimi ku kukpi ku kaƒiɔtɔ mmɔ ƒui ɔbla kekeeke. Na si kawɔlɔkɔ lɛbibo kpakplaa lɛmmɔ lídu ni, lɛdubo-mii bubo bɔva kalɔ.

¹⁹ Na kɔlɛ kɔlɛ kɔni na lɛbibo lɛmɛni lɛdububo ni, lɛni kani na lɛdubo-mii buteetiku lɛdigye ku ɔƒiiwi ku usien lɛnɔ.” Na si uwi ɔni na bɛdubunu kenye kamɛni kalɔ ni, ɔdubɔya na liƒu libendi lɛda-mii geen.

²⁰ Na bina kɔtɛnkɔ kɔsɔ kuléduku-mii na binene lɛlɔ bɛtɛ. Na bina kɔyɔ adi asɔ alábɛbɛ na bɛni bibi lɛlɔ.

²¹ Ɔsika Unwoti ɔdubɔta kɔnakunwi ku kɔnyi aani kalɛ na ɔ́bla dii na Persim Kɔbi lɛlɔ ɔni na úsie Gibeon Kɔwɛ kemmo. Na ɔdububo ubabla nwuna kabla, na bɛgyi ka kaaatɛ kalɔ! Na bɛgyi lɛnɔ ka nwuna ablala udu bamba uuubo.

²² Anwuɔsu bɛda bina edumi ku lɛma bɛya si ɔɔɔdi lɛni ni, bina lɛbuli lɛni nényimi-mii lɛdubo bɔbi bubu, ɔsika línu kadi ƒui Unwoti Katɔti lɛla lɛni na únyimi úse ɔ́si kalɛ na ɔdubɔkyula kalɔ kana ƒui lɛlɔ.

²³ Bise atu na binu lɛla lɛni na mɔɔsu-mii, na bɛƒɔ mina etemila ani ndanku nte-mii.

²⁴ Edula ɔkyane ɔni nnye uugúlu kalɔ ka ɔkya edula ni, bunye kani na uunye teegulu kalɔ kammɔ na ulakya edula ammɔ? Munuu si unye ɔɔtu kalɔ kammɔ teenwini kani na ɔ́sa?

²⁵ Si ɔ́klibi kalɔ ɔ́wɔlɔ ni, ɔɔɔdi edula lidu lidu ku kutu akyala edula lidu na ɔɔkya adi biala ku ana kakyakɔ?

²⁶ Unwoti nátina umonsene ulu ɔbuni ɔni lɛlɔ na ɔkya edula.

²⁷ Na edula biala ku ulu ɔni lɛlɔ na baasia teedie-nya. Kutu akyala ƒɛƒɛɛ ebi ni, belebo-nya kedenkɛ lɛlɔ teedie-nya ebi. Na kɛɛkɛ bonwu ulavi-nya lɛlɔ teewiile-nya. Mmomu ugyii iye lɛbuala na beebó-nya teedie ebi ammɔ.

²⁸ Bɔkɔ na baakɔ́ edula ebi ɔlaaƒɔ taabla bodobodo Anwuɔsu belebo-nya kedenkɛ lɛlɔ taabwɛ na ɔbla ɔlaaƒɔ na kewiilekɔ mmɔ.

²⁹ Ala ɔtinane unengudi geen na Unwoti Ɔyikune Ƒui ɔdi na úti lɛnunda bonwu úte umonsene.