Yesaia 24 - Katɔti Ɔku Kedee

Unwoti Úbile Kalɔ Kammɔ

¹ Bɛnu, Katɔti ɔdubo kalɔ kammɔ ƒui bubile na kana anumi kasɔ kaladia lɛla lɛla. Na ɔdubɔbɔku bekyuli bammɔ ƒui ɔkya kalɔ kammɔ ekpo ekpo.

² Na lɛla udu unwi ndubɔlɛku Katɔti bakpane ku bekyuli bani na baatɔnku ƒui, batɔlati ku bani mɔɔbla-ma kabla, belekubi kabla bablane ku bana baduni, ukyuli ɔni nti lɛla lɛdi uuyé ku ukyuli ɔni néye-ni, ukyuli ɔni muuvó lɛla teete ukyuli ku anwu ɔni névo-ni, ukyuli ɔni bada kayu ku awɔ ɔni nda kayu kammɔ ƒui lɛla linwi kani ndubo bana ƒui bɔlɛku.

³ Kayawi kemodi kammɔ kadubo bubie ƒui kede kede na lɛla lɛla lɛsɔ lilésie siin. Lɛni na Unwoti Katɔti ɔ́su.

⁴ Kalɔ kammɔ kadubɔkwii na lɛla biala lɛyɛyɛ, na kɔnyana kuƒie lɛla biala na lɛyii udu.

⁵ Bekyuli bébile kayawi kammɔ na keesé lɛlɔ. Bátadi ɔda bubo bɔmmɔ lɛlɔ, na báta bénye litemi lɛmmɔ lɛlɔ, na bébile Katɔti bunyimi bɔni nnye nte uwi ƒui mmɔ.

⁶ Ɔkɛnku ɔmmɔ ɔsu ni, ewida ádi bekyuli ku kayawi ƒui lɛla biala lɛlɔ na ɔdi biala ɔlɛka ubo abi na nwuna likpidi lili na bekyuli bayawine bákywi ƒui na bana ɛlɛɛ kani nébu.

⁷ Kɔbuli kɔni ebi muudie ntɛ kɔ́yɛyɛ na bekyuli basɔ bebo ntɛ. Ɔmmɔ ɔsu na bani na lɛlɔ lɛɛyɔ́ ƒui béduo kɔnyana na beedumo.

⁸ Agyala kɔku kúkulo na lɛlɔyɔ kudu kɔ́ba diin.

⁹ Ntɛ kalɔ lɛnu lɛsɔ liiibo na beedie, ɔsika butudi bɔni na banine baakya lɛlɔ ogya bubo ɔdu butulo lɛla biala.

¹⁰ Na bábwɛ ɔma ɔni kemmo na ala bɔbla basa basa bɔ́ƒɔ-nwu mmɔ ƒui, na bákalɛ kaduli biala kayakun na bábala-ka bényene.

¹¹ Na kɔnyana keku ku kɔvanu kani nda na ɔma kemmo lilu lɛlɔ ƒui ka ntɛ bɔni na basɔ bani bataakɛ lɛlɔyɔ bɔsɔ buuubo ɔsu. Na kayawi ebiti biala áyii ákya kede kede.

¹² Na lɛla biala líbie lɛ́yii udu na ɔma umodi ɔmmɔ kemmo na bétu kɔyakun kɔmmɔ ƒui bégyingya na bébile ala ƒui.

¹³ Lɛni udu ndubɔƒɔ kayawi kemodi ku kadi ƒui bekyuli akɔ aani kalɛ na edula udewi ɔɔví na baƒiɛmi adingyii ammɔ ligyii kalɛ na ebi ani nábɛ akya kɔgba akɔ lɛnɔ anu ewi kalɔ na bala.

¹⁴ Na nkyuli ɛlɛɛ bani nébu mmɔ báva momoomo ku lɛlɔyɔ básiku ɔƒɛ kanukɔ na bédie Unwoti Katɔti lɛgadi ɔyikun keyi.

¹⁵ Anwuɔsu bɛkɔliku Unwoti lɛnyi katɔ, na bimwi-nwu bɛsiku ɔƒɛ katukɔ ku ɛpu ntuntɛ kɔlɔ ƒui. Bibo Israel Unwoti Katɔti kudu.

¹⁶ Binu bumwi lɛnu lɛni nda ɔ́siku kayawi kawɔlɔkɔ ekpo ekpo ƒui, úte Unwoti ɔni muukeye na use siin. Nsu bɔbuɛ muute lɛlɔ, ɔsika lɛlɔ kemmo kaanwá-mi ku kɔnyana, na bani na bátaƒɔ bátadi bana taƒɔ tadi ku ulikplu ala bɔbla ɔsu.

¹⁷ Liƒu ala adubo-mii lɛlɔ bɔda bɔlɛ, na bɛnu biduo libu kemmo na kɔkpagyuɛ lɛnɔ kudie amii kalɔ lɛlɔ bekyuli ƒui.

¹⁸ Na ukyuli ɔni menu liƒu lɛla lɛdi kɔku na ɔnii uukeli ɔdubɔnu uduo ubu kemmo. Na si ɔnii ɔɔkɔ́ ɔlɛ ubu ɔmmɔ kemmo lɛnɔ kakpagyuɛ kadubo-nwu budie. Kayaa kálɛmi kɔnakunwi ku ntu yoo aani kalɛ na baalɛmi ntu kayakun na kalɔ kammɔ ɔka ɔni nkya-nwu kalɔ ɔ́kunku.

¹⁹ Kayawi kammɔ kábwɛ na kéle ntɛ eku eku na kégyingya kéwi kalɔ na ɔni na bákunku-ka kpakplaa geen ɔsu.

²⁰ Kayawi kemodi kammɔ ƒui kágbanta késela aani ntɛ ukpine. Na use aani kabwa kani na ɔƒɛƒɛɛ ɔdanku ɔɔvínku, na nwuna atuɔkplu ku litemi lɛlɔ tadi únwini etila asia-nwu lɛlɔ, na ánya-nwu ámana na ɔsɔ ɔɔɔdubo bɔkana bɔta.

²¹ Na limeyi lɛmmɔ lɛlɔ ni, Unwoti ɔdubɔni kayaa bayikune kɔtu na katɔ mmɔ, na ɔni kalɔ lɛlɔ baga lɛnɔ kɔtu na kalɔ lɛlɔ mɛni.

²² Na badubuƒie batuɔkplune bammɔ ƒui na bakya-ma ɔtɔ na bebo-ma lɛkpu bese na ubu kemmo utédu ka bátɛku-ma litemi na bani-ma kɔtu na emeyi pii adi kama.

²³ Na kadi ƒui Unwoti ɔdubɔdi lɛga na Sion Kɔbi lɛlɔ ku Yerusalem ku bana benengu ƒui anumi na udie nwuna lɛgadi bukeye keyi. Na nwuna bukeye bɔya na kɔbuli ku ɔƒɛ bukeye bɔbla suu aani kalɛ na kɔƒa kuukpó ukyuli.