Yesaia 13 - Katɔti Ɔku Kedee

Básu Kenye Kadi Bése Na Babel Lɛlɔ

¹ Amos ubidi Yesaia ɔ́nu budie taatina bɔdi na Babel kalɔ bɔkyula lɛlɔ.

² Unwoti ɔnini, “Tálɛ aƒlaga ɔdi na kɔbi goolo kɔdi ɔtantɛ kesii kani badubɔnu-nwaa, na akpali-ma emene momoomo na ebo-ma kɔnu anii bavi ɔma ɔban ɔmmɔ kenye na beduo bayikune bammɔ lɛlɔ na mmɔ.

³ Ami nébo ɔda líte bani na lɛ́ƒuna líse sɛsɛɛ, bekpone bani lɛ́tala ka babla mina kɔnyi kabla, ama ndi bekyuli bani mɔɔyɔ́ ka bakɔliku-mi katɔ.

⁴ “Binu kɔku kɔni nda na abi lɛlɔ aani bekyuli lisu bonwu lɛdi! Na binu kalɛ na kadi ƒui bekyuli lɛga kɔdikɔ bála lɛlɔ bébo baasála na beedie adi. Kadi bekyuli ƒui Unwoti mɔɔsála-ma ka bebo babasala babla bekpone lisu linwi.

⁵ Bási ɔgyu bun bun nsu badi Unwoti ekpola, na badanku nwuna kɔnyi kɔni na ɔdubuti ɔkyula kalɔ kana ƒui.

⁶ “Biwulo momoomo ku kɔnyana, ɔsika Unwoti Ɔyikune Ƒui limeyi lɛni na ɔdubo bekyuli bɔkyula lɛsia ulu líibo líbedu suɛlɛ suɛlɛ.

⁷ Ɔmmɔ ɔsu enu adubɔƒɛ ukyuli biala na ɔtɔtɔ buɛ ɔ́gyu bana ƒui

⁸ na liƒu bonwu lɛdubuƒie-ma. Ɔsika badubuduo kɔnyana ku ɔlɛ bunu kemmo aani uleku ɔni ntɛ kɔwɔ uukpóku lɛlɔ. Na ɔdubɔbwɛ ogya uwi-ma anumi, na bana ƒui benye bataanu lɛlɔ kalɛ kadi.

⁹ “Bɛnu! Unwoti limeyi lɛmmɔ lɛsia ulu, nwuna kɔnyi limeyi likpidi lɛmmɔ ku ɔdu kati kati ka ubakyula kayawi ku kana alaekpidi bablane bammɔ ɔni na kalɔ kammɔ kasɔ kalabla keliekɔ kabuni.

¹⁰ Na kayaa ayabi lidu ƒui asɔ elekeye. Na ɔƒɛ ɔni nátu ɔdubo lɛnɔ adubɔbla suu. Lɛni kani na kɔbuli lɛnɔ kɔsɔ kɔɔɔdubo bukeye.

¹¹ Ndubɔni bayawine kɔtu na bana likyulikpi ɔsu, na lɛni balalane kɔtu na bana ekpidi ɔsu. Na bani mɔɔnu lɛlɔ katɔ katɔ ni, ndubɔya na bana lɛla tabu kenye kekulo, na liboku bani mɔɔtalaku lɛlɔ katɔ kalɔ.

¹² Ndubɔya na bekyuli basa na kebu ɛlɛɛ geen utulo kalɛ na Oƒir sika ugyiedi ɔbuni ƒui use ɛlɛɛ.

¹³ Anwuɔsu ndubɔya na katɔ ku kalɔ ƒui kakunku geen na kana kenyekɔ, na ami Unwoti Ɔyikune Ƒui kɔnyi ɔsu.

¹⁴ “Kalɛ na akwa uukeli ɔgbini si ɔsiaku-nwu iye baƒonu bani neeebo ɔdane baagyingya ni, ukyuli biala ɔdubo bunwini na ukeli usie nwuna ɔma na nwuna badi kudɔ.

¹⁵ Na bani ƒui béƒie badubɔtu-ma baƒuaala, na batɛ kuwii kenye.

¹⁶ Bana anumi lɛlɔ na badubɔƒiɛmi bana bebi atakpɛ lɛlɔ babwɛ kpɛtɛ kpɛtɛ. Na badubɔla-ma ɔtɔ kemmo ala ƒui batɔlɔku. Na beƒie bana beleku batɛnku-ma ɔkplu kemmo.

¹⁷ “Ndubo Medes kadi bekyuli budie bɔkya-mii Na bilátɔlɔ-ma ku sika ugyiedi iye ɔƒualadi ɔni na baaadaku lɛda.

¹⁸ Na bekpone bani ndubo-mii bukpo badubo bina bakloƒu atula bubo bɔdu. Na balanu bebi bani naaagyi lɛla lɛdi muedi kɔnyana.”

¹⁹ Babel lɛgakadikɔ, lɛkɛ lɛni muukeye ƒui kesekɔ, kesii kani lɛlɔ lɛmɛnɛ baakun, Unwoti ɔdubo-nwu bunwini bubi na ɔyila-nwu udu aani Sodom ku Gomora.

²⁰ Ɔsɔ ɔɔɔdubo bekyuli keliekɔ bunwini úsela kaba kaba kemmo ƒui. Belusiene ɔdi kevo kasɔ kelenye mmɔ, na baƒonu ɔdane ɔdi ɔsɔ ulawia nwuna bebuo katɛnkɔ na mmɔ.

²¹ Bakumbuo kani ndubɔƒɔ mmɔ belie ku bekuku ku baasɛ bonwu lidu.

²² Na bebuoƒuala ndubo adi buteebo na bana ala abuni kesekɔ, na beƒukutu bataatɛ bana kuliekɔ kɔbuni kɔni baaƒɔ́ baƒɔ. Na uwi ɔmmɔ úude geen, na ɔsɔ ulésie kama lɛnɔ.