Yeremia 7 - Katɔti Ɔku Kedee

Yeremia Ɔ́tɛmi Na Katɔti Kakpakɔ

^1-3 Unwoti ɔ́su-mi ɔnii nsɔ nnye nwuna kakpakɔ kayakun kenye na lɛsu bekyuli bani muuduo ɔtɔ ɔmmɔ kemmo ka anwu Unwoti Ɔyikune Ƒui Israel Katɔti ɔnini, “Bise atu na binu, amii Yudaƒuɔ! Bɛvumana bina ulu ɔni lɛlɔ na bɛɛsia taabla ala. Na bise kalɔ biteelie ngba bɔbuni. Ɔmmɔ ndubɔya-mi na lɛya bɛsɔ bilie bina kalɔ kamɛni lɛlɔ biteesie.

⁴ Bitese lɛlɔ lisusu! Ina ka Yerusalem mɛni na mina ɔtɔ unye ni, ɔɔɔdi ɔmmɔ ɔsu na bitaakali bɛnii ndubo-mii bɔgyumana.

⁵ Ndubɔya na bɛkɛ bɔƒɔ si bɛvumana udu na bɛɛnu bina lɛlɔ kɔnyana na bɛɛbla ala ulu lɛlɔ siin na bɛɛtɛmi litemi geen.

⁶ Bɛda kasiakɔ bɔkɛ na baƒɔ ku bekpinebi ku bekpinele lɛlɔ bɛya. Na bɛda bekyuli bani na bátabla-mii lɛla lɛdi bɔdu bɛya. Na bɛda baƒiɔ bɔkpa bɛya.

⁷ Na ndubɔya na bilie ngba gyɔlɔɔ na kalɔ na líti líte bina bati kuuku mɛni lɛlɔ.

⁸ Nsu amii alati bɛnu lɛla lɛni mɔɔlɛ́ ɔƒɛni! Bíti bina kayi ƒui bɛ́sia ɔkɔ bɔnyi ku ala ani neeebo kɔsia kɔdi lɛlɔ.

⁹ “Biiyú ala na bɛɛdú bekyuli na bɛɛnyi ɔkɔ na litemi katɛkɔ na bɛɛlɛ́ lɛlɔ kama na bina kɔgya ku ule ngba kemmo. Bɛɛkpá Baal baƒiɔ na bɛɛkyula oloƒui teete-nwu na uwi ɔni na baƒiɔ bamɛni ɔdi útabla lɛla lɛdi útete-mii kudii.

¹⁰ Na nwuna kama na bɛsɔ bibeduo mina kakpakɔ kemmo bɛnii ami na bíbo bibakpa! Bɛɛkali ndubo-mii bɔgyumana na binye bitaabla ekpidi amɛni udu?

¹¹ Beyu na bɛdi na bíti mina kakpakɔ bínwini bina kabɛkɔ. Nsu lɛ́nu ala ani ƒui na bɛ́bla.

¹² “Bisie Silo kesii kani na mina Adi Kevo kedee kénye dii na bɛsia ala ani na lɛ́bla mmɔ anu. Mina kadi bekyuli Israelƒuɔ báƒiɔ-mi, anwuɔsu lɛ́kyula Silo ɔma ɔmmɔ ƒui!

¹³ “Uwi ɔni ƒui na bɛ́kya bitaabla ekpidi ni, mɔɔsia ulu biala lɛlɔ taatɛmiku-mii. Nsu bíni na bítenu-mi litemi.

¹⁴ Bitakali bɛnii kakpakɔ kamɛni kadubo-mii bɔgyumana. Bina bati kuuku uwi ƒui na lɛ́su-ma nnii batu-ka na bataakpa-mi na mɛni. Nsu ɔƒaani ni, lɛ́bla kasusu ka lɛbwɛ kakpakɔ kammɔ na kayii udu aani kalɔ na lɛ́yila Silo ɔma udu.

¹⁵ Na amii Yudaƒuɔ amii ni, ndubo-mii bɔbɔku bɔlɛku mina kalɔ lɛlɔ aani kalɛ na lɛ́bɔku Eƒraim kɔdua bekyuli ku adua bamba ani na akya kalɔ kammɔ katɔ kakɛ mmɔ.

Báni Israel Ku Yuda Kɔtu Na Lɛƒiɔkpa Ɔsu

¹⁶ “Yeremia, takpali-mi tevele na bekyuli bamɛni lili! Ami Unwoti lɛɛɛdubo bunu.

¹⁷ Alánu ala ani na Yudaƒuɔ baabla na bana lɛma kemmo ku Yerusalem lɛblɔnu lɛlɔ?

¹⁸ Bebi baayɔ́ ekyweni na bana bati baasala ogya na bana beni baanwu ɔlaaƒɔ ɔni na beeti teeƒi bodobodo ɔni na beeti taatákpa bana baƒiɔ beledi bani na baalɔ bani Katɔ Uleku Ɔga. Na beeti ntɛ taatákpa baƒiɔ bamba lɛnɔ kalɛ kani na beti bedumi-mi.

¹⁹ Nsu ɔɔɔdi ami lɛti na beedumi mmomu beedumi ama alati lɛlɔ lɛnɔ na kɔƒa ala ani na baabla mɛni ɔsu.

²⁰ “Na ɔƒaani ni, ami Unwoti Ɔyikune Ƒui ndubɔya na mina kɔnyi kubo-ma lɛlɔ aani kalɛ na ketu keeyi teedie ukyuli útédu uwi ɔni na bekyuli o-o, bebuo o-o, egyii o-o, edula o-o ni, lɛla biala lɛsɔ lilébu lilakya kalɔ kammɔ lɛlɔ.”

Kɔsia Kuuubo Akpala Bɔbla Kemmo

²¹ Unwoti ɔ́su-mi ɔnii ntásu Yudaƒuɔ ɔnini, “Ami ndi Unwoti Ɔyikune Ƒui, Israel Katɔti, nsu lɛɛɛdubo akpala adi bɔƒɔ bɔsiku-mii kudɔ. Anwuɔsu bitekpoku lɛlɔ muedi bɛnii biiti adi biboku-mi. Amii alati biƒulo bina lɛna bɛkun.

²² “Uwi ɔni na lɛ́kpanku bina bati kuuku lɛ́lɛku Egyipte kalɔ lɛlɔ ni, ńtebo-ma ɔda ɔdi nnii babla akpala adi bete-mi lɛti.

²³ Mmomu bɔsu na lɛ́su-ma lɛnɔ ndi, ‘Si bínu-mi litemi na bɛ́bla bɛ́siaku ala ani na lɛ́su-mii lɛlɔ ni, ndubɔbla bina Katɔti na amii bɛbla mina bekyuli, na lɛla biala lɛdubɔtɛ lite-mii.’

²⁴ Nsu bina bati kuuku béni na bétenu-mi litemi. Bábla atuɔkplu. Na si ami líti-ma mɔɔsiaku ulu ɔdi ni, na ama beti ɔbambadi.

²⁵ Ɔ́si uwi ɔni ƒui na bina bati kuuku bátɔlɔ Egyipte ni, uwi ɔmmɔ kani lɛlɔ na mɔɔtala mina kabla bablane kenye bediene taakya-ma nnii babatɛmiku-ma.

²⁶ Nsu béni-mi na bébenwini batuɔkplune ku ekpidi bablane bétulo bana bati kuuku bammɔ muedi!”

Bekyuli Badubo Bukpi Buwi Kɔwɛ Kemmo

²⁷ Unwoti ɔnini, “Yeremia, ina bi na ábla ni, bekyuli bammɔ baaadubo litemi bunu.

²⁸ Anwuɔsu su-ma anini, ‘Yuda kadi bekyuli, ami ndi Unwoti bina Katɔti, nsu bíni na bítadi mina litemi lɛlɔ. Na ɔni na lɛ́ni-mii kɔtu muedi bíbulo na bítavumana udu. Na bilábla taatina na anumi kemmo muedi ka bɛsiaku-mi kama siin.

²⁹ Bikpeyi bina eli ƒui na bibo linwini lɛmmɔ biwiakun. Na bɛkɔ bisie abi ani nwi ukpludi mmɔ eli ɔtantɛ ƒui na biteedie lɛkwanu. Ɔsika bɛ́kya-mi kɔnyi na líni-mii ƒui.

³⁰ “ ‘Bítadi mina litemi lɛlɔ na uwi ɔni na bíti bina baƒiɔ bani muusé lɛlɔ mmɔ bíbese-mi kakpakɔ na bɛ́ya na kakpakɔ kemodi kammɔ keesé-mi lɛlɔ.

³¹ Bɛ́tu akpabi bɛ́lɛ Toƒet na Hinom Kɔwɛ kemmo kesii kani na bɛɛdú bina bebi taakyula taabla akpala teete baƒiɔ. Na ami lɛɛɛdubo kasusu bɔbla nnii mɔɔsu-mii na bɛbla lɛla lɛmɛni udu.

³² Anwuɔsu binye kagyumana na bitaanu ulu ka Limeyi lɛdi lɛdubo ɔni na bɛsɔ bɛɛɛdubo mmɔ bɔlɔ bɛnii Toƒet iye Ben-Hinom Kɔwɛ mmomu Bekpine Kɔwɛ. Ɔsika bɛdubo bina bekpine bɔva mmɔ laa butédu ka kesii kani na bɛkɛ bɛva bekyuli bakladi muedi bɛsɔ bilákɛ.

³³ Na buwi kani na bekpine badubo buwi kalɔkplu bɔka bɔmana. Na baasɛ ku beƒiebuo badubo babakun bana lɛna lɛmmɔ na ukyuli biala ulenye mmɔ na ɔbɔku-ma ɔtɔlɔku.

³⁴ Na si uwi ɔni na lɛ́wɔlɔku bina kalɔ lɛni lɛ́wɔlɔ ni, mmɔ kadubo bɔba mana mana aani kekpine na kesii kani na líbile lɛla biala na Yerusalem mmɔ ku Yuda lɛma lɛmmɔ ƒui kemmo. Na lɛlɔyɔ kɔku kɔdi kɔsɔ kulakya mmɔ iye limeyi bɔdi ku beleku buti ablala adi lɛnɔ asɔ alakya mmɔ.’ ”