Yeremia 47 - Katɔti Ɔku Kedee

Unwoti Ɔ́su Lɛla Lɛdi Na Ƒilistiƒuɔ Lɛlɔ

¹ Asa na Egyipteƒuɔ ɔga ɔdubukpo Gasa ɔma ni, Unwoti ɔ́su-mi ɔnii nsu Ƒilistiƒuɔ ɔnini,

² “Ami Unwoti mɔɔsu-mii nnii bekisine bekpone badubɔsi katɔ kakɛ na babaƒɔ bina kalɔ lɛlɔ ƒui. Na badubo bina lɛma bɔbwɛ na bakpala-mii batɔlɔku na anu ka keku ku kɔvanu kɔda.

³ Si uwi ɔni na bínu ka bapɔnkɔ ku kɛɛkɛ kɔku kɔ́bwɛ kɔdubo ni, bina ɔtɔtɔ ɔdubɔgyu-mii na bawɔne badubɔda ama alati bana bebi bewi.

⁴ Na amii baƒɔ bekeline bani nási Kreta, bina uwi údu na ndubo-mii udu bɔyila. Na bina akɔ ɔdi ɔsɔ ulébu na uteebunku Tiro ku Sidon lɛma linengudi lɛmmɔ.

⁵ Na bablani bani na baalɔ-ma Anakƒuɔ bani nébu belie ngba na Gasa ku Askelon ni, badubo bana eli bukpeyi na basɔ belie kpoo beteewulo-mii kɔnyana.

⁶ “Biiye bɛnii uwi ɛlɛ na ndubo-mii bukpo butálɛ ku mina kewii na bɛdubɔsu-mi bɛnii nsɔku-ka nkya livuo kemmo na lite-mii bɔnwuna.

⁷ Nsu dɛ na mina kewii kadubo bɔnwuna si lídie lɛdi líte-ka ka ukpo Askelonƒuɔ ku bani ƒui nli ɛpu kɔtu?”