Yeremia 32 - Katɔti Ɔku Kedee

Yeremia Úye Kalɔ Kadi

¹ Na lɛkwa leevudi kemmo uwi ɔni na Sedekia ɔɔdi lɛga na Yuda kalɔ lɛlɔ ni, Unwoti údie lɛla lɛdi ɔ́tina-mi.

² Uwi ɔmmɔ ni, Babilonƒuɔ bekpone báka bámana Yerusalem. Na ami lɛnɔ ntɛ aban ɔtɔ na ɔga kesii kaduli bagyumane enu kemmo na Yerusalem mmɔ.

³ Sedekia údie lɛdi ɔnii bebo-mi lɛkpu bakya mmɔ, ɔsika lɛ́su ukyuli biala ka Unwoti ɔ́su ɔnini, “Ami ndi Unwoti, na ndubo bɔya na Babilon ɔga ɔdi Yerusalem lɛlɔ.

⁴ Na badubuƒie Ɔga Sedekia batɔlɔku besienku Ɔga Nebukadnesar na ɔtɛmiku-nwu anumi ku anumi.

⁵ Na bakpanku-nwu na utákya Babilon kalɔ lɛlɔ wetédu uwi ɔni na mawɔlɔ lɛla lɛni na nnii mɔɔblaku-nwu. Anwuɔsu si amii Yudaƒuɔ bɛ́kali ka binye bɛsiaku Babilonƒuɔ na kekpokɔ ni, badubo-mii lɛlɔ bɔdi. Ami Unwoti násu.”

⁶ Kama ƒui uwi ɔni na ntɛ aban ɔtɔ ni, Unwoti ɔ́su-mi ɔnini,

⁷ “Yeremia, ƒ'ɔnwani Hanamel ɔni na ɔdi ƒ'ɔti ɔnwani Salum ubidi, ɔdubo ubawia-a ɔnu. Úbebo úte ka uti nwuna kalɔ kadi na kewi kede Anatos ɔma mmɔ uye. Na kalɛ na bina kɔna kuse ɔsu ni, awɔ ebo kuƒi ka eye-ka na kataakya bina ɔtɔ kemmo.”

⁸ Hanamel úbo aani kalɛ kani na Unwoti úse kenye na úbasu ɔnini, “Buvele, ye mina kalɔ kani na kewi kede Anatos na Benyamin kalɛkɛ kemmo na kadubɔsɔ kakya bula ɔtɔ kemmo si ákana-ka buye ɔsi awɔ mbo kuƒi kɔmmɔ.” Unwoti ɔ́su-mi ɔnii nye kalɔ kammɔ

⁹ nsiku Hanamel kudɔ, anwuɔsu líye-ka. Na kalɔ kammɔ kuye ndi sika ɔƒualadi ebi leevu-maatɛ na bɔ́kɔku unu ɔmmɔ pɛpɛɛpɛ unu lɛkɔkula lɛlɔ.

^10-11 Na ɔku kakunkɛ kani mɔɔtina ka kalɔ kammɔ kadi keyedi ni, lɛ́ya na bédie-ka kunweni kɔkunkɛ inyɔ na kadi biala kadanku bunyimi bɔni nkɛnku kalɔ kammɔ buye lɛlɔ. Na ami ku bamanyene bɔ́kya ɔku kakunkɛ kedeedi kɔnu. Na bákono-ka na béti kɔma ku ogya bábala-ka kenye asa na líti sika ɔƒualadi ɔmmɔ líte Hanamel.

¹² Na uwi ɔni na anwu Hanamel ku bamanyene ku Yudaƒuɔ babambadi bani nli kasakɔ kaduli mmɔ bamu benye baanu ni, líti lɛku inyɔ bɔmmɔ lɛ́kya Baruk ɔni ndi Neria ubidi kɔnu kemmo.

^13-14 Amu na lɛ́su Baruk ka Unwoti násu ɔnini, “Ƒɔ kɔkunkɛ inyɔ bɔni ndanku kalɔ kamɛni buye bunyimi lɛlɔ. Bábala unwi kenye ku kɔma na ɔkladi use ukpludi na eti akya kavɔ ɔsii kemmo kalɛ na wetu uwi.

¹⁵ Ami ndi Unwoti Ɔyikune Ƒui, Israel Katɔti, na muusé-mii kenye ka bekyuli badubo lɛtɔ ku edula mmo ku adingyii mmo bɔsɔ buye na kalɔ kamɛni lɛlɔ.”

Yeremia Úye Unwoti Kenye Kadi Únu

¹⁶ Mmɔ na lɛ́kpali Katɔti lívele nnini,

¹⁷ “Unwoti Katɔti, awɔ nédie ƒula kɔnu kɔni na eeti taabla ɔyiku ala na édie katɔ ku kalɔ. Na aakana na aabla lɛla biala.

¹⁸ Aanu kaba bekyuli mpim mpim kɔnyana. Na lɛni kani na aaní bekyuli kɔtu na bana bawɔne ekpidi ani na bábla ɔsu. Awɔ ndi Unwoti Ɔyikune Ƒui.

¹⁹ Aata ala ani na aayɔ́ abla kɔkwɛ teese ɔkɛnku ƒula lɛnunda bonwu lɛlɔ. Na lɛla bula lɛla biala lɛni na bɔɔbla lɛdi lítabɛ-ɔ.

²⁰ “Áƒɔ lɛnyi na akɔla budie taatina ani na ábla na Egyipte ɔsu. Amu enye aabla akɔla budie taatina ammɔ na Israelƒuɔ akɔ ku kayawi ekpo ƒui lɛnɔ.

²¹ Na ábla akɔla budie taatina amɛni éti ákya Egyipteƒuɔ liƒu geen. Na awɔ ɔlati édie ƒula kɔnu na ábla ɔyikun ala na édie ƒula kadi bekyuli Israelƒuɔ na Egyipteƒuɔ enu kemmo.

²² Na éti kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii mɛni éte bula bati kuuku aani kalɛ kani na ése-ma kenye ése.

²³ “Nsu ka kalɔ kamɛni kétuku bula bati kuuku lɛkɔkɔ ni, bétenu ƒula litemi na badi-ni lɛlɔ. Na ɔƒaani ni, áni Israel kalɔ kemodi kammɔ kɔtu ku ɔgbankpi lidu.

²⁴ Na bekisine báta beekpóku Yerusalem na kɔka kɔɔdú-bu na buuƒi lɛlɛ lidu lidu.

²⁵ “Na bi ɔsu na aasu-mi anii nti mina sika ɔƒualadi na liye kalɔ na lɛkɛ bamanyene ka Yerusalem ɔmmɔ na Babilonƒuɔ baayɔ́ beeƒie baƒɔ?”

Unwoti Údie Kalɔ Keyedi Kammɔ Litemi Kalɔ

²⁶ Unwoti údie kalɔ ɔnini,

²⁷ “Yeremia, ami ndi Unwoti Katɔti. Na ami mɔɔdi kayawi ƒui lɛlɔ na lɛkana na lɛbla lɛla biala na mɔɔyɔ́!

²⁸ “Sɔsɔ geen na ɔdi ka ndubɔya na Babilonƒuɔ Ɔga Nebukadnesar uƒie Yerusalem ɔƒɔ.

²⁹ Na Babilonƒuɔ bekpone báata kekpo sɔsɔ na badubo ɔma ɔmmɔ bɔbwɛ na batu ogya bakya-nwu. Yerusalemƒuɔ bákya-mi kɔnyi geen na uwi ɔni na bákɔ bésie bana asa eli bátakyula oloƒui béte Baal baƒiɔ na beewi ntɛ kalɔ teete baƒiɔ bamba. Ndubo bɔya na bakyula lɛtɔ lɛmmɔ bewi kalɔ ɔƒaani!

^30-33 “Baga ku bana bakutine ku bakpane ku kenye bediene ku bekyuli bammɔ ƒui bénwini kama bákya-mi bésie baakpá baƒiɔ na bákya-mi kɔnyi. Lɛ́ɛtina-ma kɔlɛ kɔlɛ, nsu bébulo banii ntenwini-ma na benu-mi litemi na bataadi-ni lɛlɔ. “Ndubo Yerusalem udu bɔyila ƒui, ɔsika bekyuli bammɔ balabla lɛbuni lɛdi teetulo likyulikpi ala bɔbla.

³⁴ Bávɔ baƒiɔ lidu lɛni muusé lɛlɔ bálɛ-mi kakpakɔ na mmɔ kásɔ kátamanku ka babla lɛkpa lɛdi bete-mi.

³⁵ Na báya na Yuda lɛnɔ únwini alaekpidi ɔblane, ɔsika bátu ekpo ekpo bálɛ Ben-Hinom Kɔwɛ kemmo ka bataakpa Baal baƒiɔ. Na béti mmɔ bénwini kesii kani na baadú bana bebi bananabi ku belekubi taakyula taakpa Molek baƒiɔ. Na ami ńtabla kasusu kamɛni udu kudii muedi ka babla ɔmɛni udu bete-mi.

³⁶ “Yeremia, lɛla lɛni na ásu mɛni ndi litemi geen. Yerusalem bekyuli bebo abi ku ɔlɛ bunu. Na kɔka kɔɔda-ma. Ulu ɔdi use ute Babilon Ɔga ka ubeƒie-ma.

³⁷ “Líti kɔnyi geen lɛ́kya Yerusalemƒuɔ na ndubɔya na begyingya-ma bakya kaƒɔ kɔlɔ lɛlɔ. Nsu ndubo-ma bɔsɔku buboku mɛni limeyi lɛdi na belie ku keyi buɛɛ na lɛla lɛdi lɛsɔ lilékpoku-ma.

³⁸ Badubɔbla mina bekyuli na ami lɛbla bana Katɔti.

^39-41 Na ndubo bɔbla na bana kayi ayɔla ku bana kasusu kemmo kabla sɛɛn. Na badubo bɔnu bɔti ka na bana bɔdia ku bana bebi bɔdia ɔsu ni, ami lɛti pɛ kani na ɔlɛka bakpa. Na liƒu muedi lɛdubo-ma bɔda ka basɔ benwini kama bakya-mi. Na ndubo bunyimi bɔdi bunyimiku-ma na buuubo kawɔlɔkɔ kadi kudii. Na lɛɛɛdubo lɛbuni lɛnɔ bɔda bɔbla bute-ma bɔya kudii. Na muusé kenye ku mina kayi ƒui ka ndubo bɔya na basɔ benwini bebelie kalɔ kamɛni lɛlɔ kpi.

⁴² “Ina ka lɛ́ya na ɔgbankpi ɔ́siaku-ma ni, limeyi lɛdi lɛdubo lɛni na ndubo ala abuni amɛni ƒui bɔbla bute-ma.

⁴³ “Yeremia, uwi ɔni na éye kalɔ kammɔ ni, ɔ́tina ka limeyi lɛdi lɛdubo ɔni na basɔ badubɔkana na beye kɔlɔ bete lɛlɔ. Aasu anii bádi kalɔ kamɛni lɛlɔ na bekyuli ku bebuo ƒui bása-ka lɛlɔ na kenwini ketele kalɔ kakwiidi.

⁴⁴ Nsu limeyi lɛdi ni, bekyuli badubo bana sika ɔƒualadi buti buboku bubeye kɔlɔ na mɛni kesii biala na Benyamin kalɛkɛ ku Yerusalem kalɔ ku Yuda lɛma kemmo ƒui ku abi ammɔ lɛlɔ. Na beye abi kɔƒɔna mmɔ bene úti úsie ɔƒɛ kanukɔ ku kalɔ kakwiidi kani na kada kakɛ. Na kalɔ balati ku beyene ƒui badubɔbla lɛku basia kɔlɔ kuyedi kɔmmɔ lɛlɔ na bamanyene bakya kɔnu na lɛla lɛni na bényi na kɔlɔ kɔmmɔ buye lɛlɔ na benyimi lɛku lɛmmɔ kenye ku ekposela. Na ɔdubo bɔlɛ lɛni, ɔsika ndubɔsɔ kalɔ kamɛni lite mina bekyuli. Ami Unwoti násu.”