Yeremia 23 - Katɔti Ɔku Kedee

Unwoti Ɔ́su Nwuna Kadi Bekyuli Lɛnunsia Kenye Kadi

¹ “Amii bani ntɔnku mina kadi bekyuli bise aani baƒonu badane bani mɔɔdú baƒonu bammɔ na beegyingya-ma.

² Amii na nka ɔlɛka bɛnu mina bekyuli lɛlɔ, nsu bunwini na bínwini bɛ́bi bɛsiaku-ma na bɛɛbɔku-ma taatɔlɔku mmomu. Anwuɔsu ami ɔlati ndubo-mii bɔda ɔƒɛni amu na mɔɔsu-mii geen ka bɛdubo bina ekpidi biala kayu bɔƒɔ!

³ “Ndubɔkpanku mina kadi bekyuli bakladi bani nébu bɔsiku kɔlɔ kɔni na lígyingya-ma lɛ́kya buboku ɔma na basɔ benwini kadi bekyuli bayikune bonwu.

⁴ Na muusé kenye ka ndubɔƒuna batɔnkune bani manu-ma lɛlɔ kaduɛ aani baƒonu badane babuni lite-ma. Na mina bekyuli bammɔ badubɔsa belie mmɔ na basɔ balayia lɛla lɛdi.

⁵ Na limeyi lɛdi ni, ndubɔƒuna ɔga ɔni mɔɔsu litemi geen lɛsiku Dawid kaduli. Na ɔdubɔbla ɔga ɔni náda anu na ɔdubɔdi bekyuli lɛlɔ na ɔtɛ litemi na ulu siin ɔmmɔ lɛlɔ.

⁶ Na uwi ɔni ƒui na ɔdubulie ɔdi lɛga lɛmmɔ ni, Israel ɔdubulie ku keyi buɛɛ. Na lɛla biala lise kpoo na Yuda kalɔ lɛlɔ. Na lɛnyi lɛni na ɔga ɔmmɔ ɔdubɔdi ndi Unwoti Uute Litemi Bɔtɛ Ulu Siin Lɛlɔ.

⁷ “Uwi ɔdubo ɔni na bɛsɔ bɛdubo-mi bɔkpa, nsu bɛsɔ bɛɛɛdubo-mi bɔlɔ bɛnii Ngba ƒui Katɔti ɔni nédie-bu ɔ́lɛku Egyipteƒuɔ kalɔ lɛlɔ.

⁸ Mmomu bɛdubɔlɔ-mi bɛnii Ngba ƒui Katɔti ɔni nédie-bu ɔ́lɛku kalɔ kani nkya katɔ kakɛ bekyuli enu kemmo ku kɔlɔ kɔni lɛlɔ na ɔ́bɔku-bu útákya enu kemmo. Na bɛdubɔsɔ bibelie amii alati kalɔ lɛlɔ.”

Yeremia Ɔ́bla Kasusu Ɔ́siku Ɔkɔ Kenye Bediene Lɛlɔ

⁹ Si lɛ́kali kenye bediene bamɛni litemi lɛ́nu ni, kayi keesé taakpulu-mi geen na anu ka lɛlɔ lɛɛtɔ́-mi aani ukyuli ɔni na úkpi ntɛ na Unwoti ku nwuna etemila ani nse kedee ɔsu.

¹⁰ Bekyuli bani nálɛ Unwoti kama na kalɔ kammɔ lɛlɔ bemomo geen na ɔkɛnku bana ngba bukpidi bɔni na belie ku kalɛ na baabla ɔyikun ɔni na bebo lɛlɔ kabla kalɛ kalɛ na kalɔ kammɔ ƒui lɛlɔ ɔsu Unwoti úwida kalɔ kammɔ na ɔ́ya na bebuo kadikɔ kammɔ kénwini kalɔ kakwiidi na kasɔ kaládia lɛla lɛla bɔbla.

Unwoti Ɔdubɔni Kenye Bediene Bani Nálɛ-nwu Kama

¹¹ Unwoti ɔnini, “Amii kenye bediene ku bakpane bɛsɔ bilábla kasusu gyɔlɔɔ kadi taasiku-mi lɛlɔ. Ɔmɛni ɔsu na bɛɛkana na bɛɛbla likpidi na mina anumi na ami ɔlati kakpakɔ kemmo muedi!

¹² Na ɔƒaani ni, ndubo-mii kɔtu bɔni ku ɔgbankpi ɔdi. Na bɛdubo bugyiile na bibuli na kasuudikɔ. Ami Unwoti násu.

¹³ “Samariaƒuɔ kenye bediene beesé-mi lɛlɔ, ɔsika Baal baƒiɔ etemila kenye na beedie. Na bátɔnku mina kadi bekyuli na báya na báyii ulu.

¹⁴ Na amii kenye bediene bani nkya Yerusalem ɔdi ɔsɔ utulo bana ɔdi ƒui. Bɛɛlɛ́-mi kama taatásiaku ala bamba kama na bilásu litemi geen lɛdi. Na bɛɛtɔnku bekyuli bamba muedi na baabla likpidi na uwi ɔni na nka bibunku-ma na benwini na bana ekpidi kama na bebo-mi kudɔ. Amii ku Yerusalemƒuɔ ƒui bɛdi bekyuli bekpidi aani Sodom ku Gomora kadi bekyuli.

¹⁵ “Amii kenye bediene bani nkya Yerusalem bɛ́ɛgyingya likpidi bɛ́kya kesi kesii. Anwuɔsu na ami Unwoti líse kenye ka ndubute-mii likpila na bɛdi na bɛni.”

Unwoti Ɔ́lɛ Bekyuli Bammɔ Kpakplaa

¹⁶ Unwoti ɔ́su bekyuli bammɔ ɔnini, “Amii Yudaƒuɔ! Bitenu ɔkɔ kenye bediene bamɛni ɔkɔ etemila ani na baasu. Ɔsika ama alati bana kasusu kani na belie beeti etemila na adi na ɔɔɔdi ami Unwoti Ɔyikune Ƒui kudɔ na ási.

¹⁷ Kenye bediene bamɛni beesié batuɔkplune bani néni banii balabla-mi kabla na benye baabla ala ani na baayɔ́ kudɔ. Na beesié taatásu-ma banini, ‘Unwoti ɔ́su úse ka lɛla biala lɛdubo bɔtɛ ɔsu lɛla lɛdi liiibo.’

¹⁸ Nsu ami Unwoti mɔɔyá na bɛti ka ami ku kenye bediene bamɛni akɔ ɔdi bútelie bútadi kasusu na ami ku mina kɔtɔ kabla bablane badi kelisa kadi kemmo kudii iye benu ka bɔɔsu lɛla lɛdi kudii.

¹⁹ Bekyuli bekpidi na badi! Na ndubo-ma bubo bɔƒiɛmi kalɔ aani kalɛ na ɔƒɛƒɛɛ uubó ala teewi kalɔ.

²⁰ “Na mina kɔnyi kɔɔɔdubo-mi bɔyɔ wetédu uwi ɔni na lɛ́bla lɛla lɛni na lɛ́lɛ ugyii ka mabla lɛ́wɔlɔ. Na limeyi lɛdubo lɛni na bɛdubunu lɛla lɛni geen na mɔɔsu mɛni kalɔ.

²¹ Ńtatala kenye bediene bamɛni na ńtasu-ma lɛla lɛdi lɛnɔ, nsu bakɛ usi bébo-mii kudɔ bébo baakɔ́ ama alati bana etemila lɛsa teete-mii.

²² Si bɔkya na bákya katɔ mmɔ na mina kelisa kasusu betine akɔ ni, nka badubɔsu amii Yudaƒuɔ na binwini kama bɛkya bina ekpidi na binwini bibo-mi kudɔ.

²³ Ami nkya kesi kesii na kagyudikɔ ku kani nátagyu ƒui.

²⁴ Na abɛla iye kabɛkɔ kadi keeebo katɔ ku kalɔ kesii kadi na bina lɛla lɛdi lɛdubɔbɛ-mi.

²⁵ “Kenye bediene bani nálɛ-mii kama mɛni baasu taatina ka ami náya na bégye ana iye ami nédie lɛla lɛdi lɛ́tina-ma na kɔyu kemmo na benye-mi lɛnyi lɛlɔ baanyi ɔkɔ.

²⁶ Nsu ala ani ƒui na baasu ási bana kasusu kani néƒu na bénwini ala bálɛ kemmo. Na uwi ɛlɛ na badubunye bataabla lɛla lɛmɛni udu?

²⁷ Baasu lɛlɔ ana ani na bégye na baada bekyuli kasusu teedie-mi lɛlɔ kalɛ na beni-mi aani kalɛ kani na bana bati kuuku béni-mi na bésie baakpá Baal baƒiɔ.

²⁸ Kavumana bonwu kakya bana ana ani na bégye ku mina litemi geen ntɛ aani kamu ku keti. Anwuɔsu si kenye udiene ɔdi úsie utásu mina kenye bɔdi ni, ɔlɛka ɔsu litemi geen lɛni na lɛ́su mmɔ kani.

²⁹ Mina etemila ebo ɔyikun aani ogya. Na ese aani lɛbuala bonwu lɛni na beeti teebo atakpɛ teegyingya.

^30-32 “Kenye bediene bani nálɛ-mi kama mɛni baasu taatina ka ami náya na bégye ana, nsu ɔmmɔ ɔɔɔdi litemi geen. Ɔsika ami ńtaƒuna-ma nnii babla mina kenye bediene, nsu bakɛ baaká ala taavi na mina lɛnyi kemmo taasia kama na beeyú bana bakpana etemila taasɔku taasu bekyuli. Na si mina bekyuli bénu ɔkɔ etemila amɛni lɛnɔ ni, elébunku-ma ulu biala lɛlɔ mmomu bɔda na aada-ma kasusu teedie-mi lɛlɔ mmomu na baayii ulu. Anwuɔsu mɔɔsu-mii kpakplaa ɔƒɛni ka línwini kenye bediene bamɛni ukisine. Ami Unwoti násu.”

Linyesia Na Ala Ani Muukpóku Unwoti Lɛla

³³ Unwoti ɔnini, “Yeremia, si kenye udiene ɔdi iye ɔkpane ɔdi iye ukyuli bamba ɔdi biala úbo na úbeye-ɔ ɔnini, ‘Bi kenye na Unwoti ubo ute-bu ni?’ na asu-ma anini, ‘Bɛdi bekyuli bani lɛlɔ mɔɔdá Unwoti ɔƒɛ geen na, anwuɔsu na ɔdubo-mii udu bɔyila.’

³⁴ “Na si bina akɔ ɔdi ɔsɔku litemi lɛmɛni utásu ukyuli ɔdi ɔnii ami Unwoti násu-nwu nnii ɔkɔ lɛsa ute ukyuli ɔdi ni, ndubo ukyuli ɔmmɔ ku nwuna kaduli bekyuli ƒui bɔdu ina kenye udiene na ɔnii ɔdi iye ɔkpane na ɔdi.

³⁵ Mmomu buye na ɔdi ka biye lɛlɔ ku bina bakpana binu bɛnini, ‘Bi kenye na Unwoti údie? Iye dɛ na ɔ́su?’

³⁶ Use aani ka bina akɔ ɔdi biala ubo lɛla lɛni na ɔsu! Anwuɔsu si bɛsɔ bɛɛlɔ-mi lɛnyi taasu lɛla lɛdi bɛnii lɛni na ami Unwoti mɔɔsu ni, na bɛɛtu-mi etemila teenwini ɔkɔ. Na binyimo ka ami ndi bina Unwoti Katɔti Ɔyikune Ƒui.

³⁷ “Si ɔdi ése kenye udiene kudɔ ni, ɔdia si éye-nwu anini, ‘Bi kenye na Unwoti údie iye bi na ɔ́su ɔ́siku litemi lɛni na búye-nwu lɛlɔ?’

³⁸ Nsu si bítenu ɔmɛni na ɔdi ɔ́ta ɔnii lɛsa na utátaakɔ ka ami nátala-nwu ni,

³⁹ ndubo ukyuli ɔmmɔ bɔbɔku budie mina anumi ƒui kede kede busienku ɔgyu kakaaka. Na lini Yerusalem ɔma unengudi ɔni na líti líte bina bati kuuku mɛni ƒui.

⁴⁰ Na bina anumi adubuwi kalɔ na kɔƒa kɔmmɔ kulálɛ-mii lɛlɔ kudii.”