Yeremia 21 - Katɔti Ɔku Kedee

Unwoti Ɔdubukpo Yerusalemƒuɔ

¹ Ɔga Sedekia, Yudaƒuɔ Ɔga, ɔ́tala ɔnii batálɔ Malkia ubidi ɔnanabi ɔni baalɔ banii Pasur ku ɔkpane ɔni baalɔ banii Seƒania na ɔdi Maseya ubidi beboku. Mmɔ na ɔ́su-ma ɔnini, “Bɛtɛmiku Yeremia bite-mi.” Amu na bébo-mi kudɔ na bábasu-mi banini,

² “Babilonƒuɔ ɔga ɔni baalɔ banii Nebukadnesar úbo uukpóku Yuda, anwuɔsu vele Unwoti na ɔbla akɔla budie taatina adi ute bula bekyuli aani kalɛ na ɔ́bla úte-bu kuuku uwi ɔni návi kemmo na Nebukadnesar ɔda-bu ɔnyonu.”

^3-7 Mmɔ na lɛ́su bekyuli bammɔ ka Unwoti Israel Katɔti ɔ́su-mi ɔnii nya na Ɔga Sedekia ɔti ɔnini, “Babilonƒuɔ báka bámana Yerusalem ɔma ɔmmɔ na baawia ka badu-ɔ ku ƒula kadi bekyuli ƒui. Na ɔƒaani eevele-mi anii nƒɔ-mii, nsu bɛ́kya-mi kɔnyi geen. Anwuɔsu ami ɔlati ndubo-mii bukpo. Ƒula bekpone bada atula ku kuwii beekpó Babilonƒuɔ, nsu ndubɔya na amii alati bina ekpola enwini ekpo-mii. Na lɛya na lɛlɛ likpidi libo-mii lɛlɔ na amii ku bina bebuo pii bekpi na Yerusalem. Na lɛdila biala lɛdi lɛsɔ lilébu-mii. Na kawɔlɔkɔ ni, ndubɔya na Ɔga Nebukadnesar ku nwuna bekpone bekpo-mii batálɛ Yerusalem ɔma ntɛntɛ na beƒie awɔ ku ƒula lɛku batine ku bani ƒui nébu na bétekpi batɔlɔku. Nsu Nebukadnesar ɔɔɔdubo-ɔ kɔnyana bɔnu iye kɔƒɔ muedi kakywi-nwu mmomu ɔdubo-ɔ bɔdu. Ami Unwoti násu.”

⁸ Ɔmmɔ kama ni, lɛ́su-ma ka Unwoti ɔ́su ɔnini, “Amii Yerusalem bekyuli, ami Unwoti líti kukpi ku ngba lɛ́va-mii anumi nnii bɛƒuna ɔni na bɛɛyɔ́.

⁹ Babilonƒuɔ bekpone báka bámana Yerusalem ɔma ɔmmɔ. Anwuɔsu si bɛɛyɔ́ ka bilie ngba bɔdi ni, ɔlɛka bɛlɛ bisie na bitákya-ma lili kalɔ. Na mmomu si bɛɛyɔ́ ka bikpi bɔdi na kɔka ku ɔlɛ ku kekpo ɔsu bɔdi ni, na bɛsɔ bilie ɔma ɔmmɔ kemmo.

¹⁰ Lɛ́ɛbla mina kasusu ka lɛɛɛdubo Israelƒuɔ kebunku kadi bute nnii muudie-ma, mmomu ndubɔya Babilonƒuɔ ɔga ɔkyula ɔma ɔmmɔ ƒui uwi kalɔ kede kede. Ami Unwoti násu.”

Unwoti Úte Yudaƒuɔ Bɔti Kpakplaa

¹¹ Ɔmmɔ kama ni, lɛ́su bekyuli bani nási Ɔga Dawid ɔtɔ kemmo na belie ɔga kesii ka Unwoti ɔ́su ɔnini,

¹² “Bɛnu ka kadi kawɔdi biala négye ni, bɛ́tɛ etemila siin bɛ́siaku ulu geen ɔmmɔ lɛlɔ na bɛ́ƒɔ bani ƒui na bekyuli beeyú-ma. Na si ɔɔɔdi lɛni ni, ndubo kɔnyi kpakplaa bɔkɛ bɔkya-mii na libile ala aani ogya ɔni mɔɔda na uléni.

¹³ Yerusalem, eenye ƒula kɔbi eli taanu teemene ɔkwalɛ na aanu lɛlɔ aani si lɛla lɛdi lilakana awɔ bukpoku. Nsu ami Unwoti líti kɔnyi lɛ́kaya-a geen.

¹⁴ Na ndubo-ɔ kɔtu bɔni kaduɛ kalɛ na ámanku éte. Na lɛtu ogya lɛkya ƒula ɔga lɛgbanya kesii kani baalɔ lɛku mmɔ na uyɔ ɔmmɔ ɔkɔ usie katɔ.”