Yeremia 2 - Katɔti Ɔku Kedee

Israelƒuɔ Bálɛ Unwoti Kama

¹ Unwoti ɔ́su-mi ɔnii

² nsie Yerusalem na ntákɔ lɛsa nte ukyuli biala na mmɔ ka anwu Unwoti násu ɔnini, “Uwi ɔni na adi uleku ɔni na líti ɔwɔdi ni, áyɔ-mi na ásiaku-mi kama siin, na bɔkɛ kalɔ kakwiidi kani naaadia edula mmɔ kemmo ɔni na átalɛ-mi kama.

³ Israel, ami lɛti pɛ ɔdi na ádi aani mina edula edeedi ani na lɛ́ƒɛ lɛ́siku mina kemo. Na ukyuli biala ɔni nákali ɔnii ɔɔƒɛ-ɔ ɔdi ni, ɔgbankpi ɔ́siaku-nwu.

⁴ “Yakob ɔtɔ bebi, bise atu na binu, amii Israel adua bekyuli ƒui.

⁵ Lɛni na ami Unwoti muuye-mii nnini, “Bi likpidi na bina bati kuuku bánu-mi lɛlɔ ɔsu na bénwini-mi kama na bésie basiaku ala bamba ani neeebo kɔsia ɔsu na ama alati lɛnɔ básɔ beeebo-mi kɔsia kɔdi?

⁶ Bátakana na beye banii, ‘Nte Unwoti ɔni nákpanku-bu ɔ́lɛku Egyipte kalɔ lɛlɔ, na ɔ́tɔnku-bu ɔ́siaku ketele kemmo kalɔ kakwiidi kani kemmo na libu lɛ́ƒɔ tɛɛ mmɔ, kalɔ kani kemmo na ntu buuubo na kese suu geen, na ukyuli ɔdi ulásia mmɔ taavi kudii, na ukyuli ɔdi uuulie mmɔ lɛnɔ?’

⁷ Lɛ́kpanku-mii líboku kalɔ kani na ala abuni áƒɔ-ka pii mɛni lɛlɔ, kesii kani na egyiibi abuni ku ala abuni akya na bɛkɛ bɛdi, nsu bɛ́bla na kalɔ kammɔ keesé lɛlɔ na bina ekpidi bɔbla ɔsu.

⁸ Bakpane béteye banii, ‘Nte Unwoti?’ Ama bani mɔɔtina ɔda bubo ala bátanu-mi bátati. Lɛlɔ badine aani baƒonu badane kalɛ báta bénye-mi lɛlɔ. Kenye bediene básu ala bése na Baal baƒiɔ lɛnyi kemmo, na bakɛ basiaku ala bamba aani neeebo kɔsia kama.

⁹ “Anwuɔsu nsɔ ndubo-mii kɔtɔ bɔdu. Lɛni na ami Unwoti mɔɔsu. Na ndubɔdu bina bawɔ bawɔ lɛnɔ kɔtɔ.

¹⁰ Bɛvia bisie Kitiƒuɔ ketu kɔtu na bitánu, na bɛtala bekyuli na Kedar na bátásia anu kaduɛ, na banu si lɛla lɛmɛni udu lɛ́ɛlɛ dii.

¹¹ Kadi bekyuli badi bávumana bana baƒiɔ dii ina ka baƒiɔ badi beeebo ɔyikun? Nsu mina kadi bekyuli bávumana mina bukeye ku ɔbu béte ala keeke ani neeebo kɔsia.

¹² Lɛlɔ litaatɔ kayaa ala ƒui, na liƒu bonwu litaada-mii! Lɛni na ami Unwoti mɔɔsu.

¹³ “Mina bekyuli, bɛ́ƒiɔ-mi na lilu inyɔ lɛlɔ. Bíni ami ɔni ndi libiɔ lɛni mɔɔyu ntu buni, na biidú ntu teewi abiɔ ani na bíku na bɛ́tu bɛ́kya kalɔ kemmo na ásia kɔka na ntu bulakana-nya kemmo buwi.

¹⁴ “Israel kadi bekyuli, nka bátawɔ-mii na bɛdi bekyuli bamba kabla bablane nɔɔ? Bi ɔsu na bina bekisine békpo-mii na béƒie-mii bátɔlɔku lɛni?

¹⁵ Bina bekisine baakwanyi aani bagyata, na báyila-mii udu, na bébile-mii kalɔ, na bákyula lɛma béwi ukpludi na bekyuli basɔ beeebo-ni kemmo.

¹⁶ Na ɔni na utulo ndi ka Memƒis ku Taƒanes lɛma bekyuli békpeyi-mii eli útálɛ opokuo.

¹⁷ Na amii alati kudɔ na ɔmɛni ƒui ɔ́si! Anwuɔsu na ɔdi ka bɛdu lɛlɔ kɔtɔ. Ɔsika bɛ́da ami Unwoti ɔni ndi bina Katɔti kama bɔsiaku bɛ́ya.

¹⁸ Bi na bɛ́kɛ na Egyipte ka bɛnii nwuna Nil Ketu bɛdubo bɔni? Munuu bi na bɛ́kɛ na Asiria ka bɛnii nwuna Euƒrate Ketu na bɛdubo bɔni?

¹⁹ Bina likyulikpi ndubo bunwini bina lɛtuni. Na kalɛ na bɛ́ta bínye-mi lɛlɔ na bíni-mi mɔɔdú-mii kɔtɔ. Ɔdi likpidi ku kɔtɔ bɔdu kati kati ka eni ami Unwoti Katɔti ɔsika ɔɔtina ka biláyia-mi munu munu. Ami Unwoti kadi ƒui Katɔti násu.

²⁰ “Na kuuku uwi ɔni návi kemmo ni, bídie-mi atu na bíni ka lɛdi-mii lɛlɔ, na bɛnii bɛsɔ bilabla-mi kabla. Na ɔƒaani ni, baƒiɔ bammɔ na bɛɛkpá na biisié lɛlɔ kudɔ ɔnana ku uleku na egyii bonwu ammɔ ɔyuli kalɔ na abi eli.

²¹ Na nka bɔƒuna na lɛ́ƒuna-mii lɛ́lɛ aani kɔdingyii kɔni na naaaƒianku nsu ɔƒɛni amu bíbulo ebi buni bɔnwu.

Israel Ekpidi Ádɔli-ma Na Aadú-ma Kɔtɔ

²² “Bina ekpidi áya na bɛ́dɔli geen na ina bi ɔkwayɛ na bíti bɛ́kpi bikuo lɛlɔ kalɛ kalɛ muedi ni, bɔdɔli bɔmmɔ bulálɛ-mii lɛlɔ na mina anumi. Lɛni na ami Unwoti Katɔti mɔɔsu.

²³ “Dɛ na bɛdubɔkana na bɛsu bɛnini, ‘Bulese lɛlɔ na bútakpa Baal baƒiɔ lɛnɔ’? Amii alati bɛnu ala ani na bɛ́bla na Hinom Kɔwɛ kemmo, kalɛ na bɛkɛ biikeli teesie taasɔ aani baƒlumu bakɔdi bani náƒɛ kɔnu.

²⁴ Bise aani bebuo ala betine beledi bani nkɛ kalɔ kakwiidi kemmo ƒaa, na bana enwu eti kayaa beenwenyi ɔƒɛƒɛɛ teenu, na bani mɔɔwia-ma bakɔ belebo abi asa baanu-ma.

²⁵ Bina lɛgbanvuo lɛni bɛkya lɛ́ɛsa lɛ́wɔlɔ, na bina ɔkwɛ kemmo kákwii ɔni na bɛkɛ bɛɛkɔ́ taayu aƒiodu. Lɛ́va lɛ́kpali-mii nnini, ‘Bɛsɔ binwini.’ Nsu bídie kenye bɛnini, ‘Oowo! Bɔɔyɔ́ baƒiɔ taagya.’

²⁶ “Kalɛ na kɔƒa kuukpó uyune si béƒie-nwu ni, lɛni na kɔƒa kɔdubo Israelƒuɔ bukpo, amii ku bina baga ku bakpane ku kenye bediene ƒui.

²⁷ Amii bani mɔɔsu egyii bɛnii, ‘Amii ndi bula bati,’ na bɛɛsu atabi bɛnii, ‘Amii náwɔ-bu.’ Ɔsika bina kama na bínwini bɛɛtina-mi na ɔɔɔdi bina anumi. Nsu ka ala eekpóku-mii ni, bɛ́kpali bɛnini, ‘Bo na ebebunku-bu!’

²⁸ Biteesie bitéwulo bɛkya baƒiɔ bani na bɛ́bla bíte lɛlɔ mmɔ si badubɔkana-mii bubunku. Bémomo aani kalɛ kani na bina lɛma limomo.

Israel Ɔ́ta Únye Unwoti Lɛlɔ

²⁹ “Bi ɔsu na bɛɛdú-mi kɔtɔ ka bina ƒui bɛ́ta bínye-mi lɛlɔ? Lɛni na ami Unwoti mɔɔsu.

³⁰ Lɛ́du bina bebi líti lɛ́ni-mii kɔtu nsu bíni na bítenwini bítebo-mii kudɔ. Bina kuwii na amii alati bíti bɛ́du bina kenye bediene aani bagyata bani néti kɔnyi.

³¹ “Bise atu na binu lɛla lɛni na mɔɔsu. Budie na lídie-mii atu na kalɔ kakwiidi kammɔ kemmo na bɛ́sɔ bɛkya lɛdisa kemmo? Mina bekyuli na bɛdi, nsu bɛ́kana na bɛ́su-mi bɛnini, ‘Lɛla lɛni na abu bɔɔyɔ́ na bɔdubo bɔbla, na bɔɔɔdubo-ɔ lili kalɔ bɔkya.’

³² Uleku utidi uláyiƒala nwuna asɛɛ bɔkya si uwi ɔni na bésela-nwu kawɛɛkɔ. Nsu amii bɛɛyiƒala-mi limeyi ndi limeyi.

³³ Bɛgyi ulu biala lɛlɔ na bɛkana na bɛsia na bɛkɛ bayɔne ɔni na bɛsɔ bɛɛtina beleku bekpidi bammɔ lɛla lɛdi.

³⁴ Bɛ́du bekyuli bani nátabla-mii lɛla lɛdi kekeeke. Na ina ka bana ubugya ɔ́ƒɔ-mii adala lɛlɔ muedi ni,

³⁵ bɛ́mu binye bɛɛsu kpakplaa ka likpidi lɛdi lɛɛɛma-mii lɛlɔ. Na bɛɛwia ka lɛda kɔnyi buti taakya-mii lɛya. Anwuɔsu ami ku-mii bɔdubo litemi katɛkɔ bulie na bɔnu ukyuli ɔni ɔdi nátɛ.

³⁶ Uwi ɔni na Asiriaƒuɔ bákya-mii kakya na bátakana-mii bubunku ni, bíkeli bísie Egyipte. Nsu bɛɛɛdubo kebunku kadi bɔkɛ na mmɔ lɛnɔ.

³⁷ Na bɛdubo lɛlɔ bɔƒɔ bɔkya kɔnyana bonwu kɔdi kemmo, ɔsika lɛɛɛdubo bɔya na bɛkɛ katamikukɔ kadi na bana kudɔ kesii kani na bina anu asia mmɔ.”