Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Yeremia 11 - Katɔti Ɔku Kedee


Yuda Úbile Unwoti Bunyimi Bɔmmɔ

1-3 Unwoti ɔ́su-mi ɔnii nte Yudaƒuɔ ku Yerusalemƒuɔ bɔti ɔnini, “Ami Unwoti mɔɔsu-mii kpakplaa ka ndubɔya na ewida asiaku ukyuli ɔni ndubuni na uláda mina bunyimi bɔni na línyimiku Israel. Anwuɔsu bise atu kaduɛɛ na binu lɛla lɛni na bunyimi bɔmmɔ bɔɔsu.

4 Mina ɔda bubo bútavumana kudii ɔ́si uwi ɔni na lɛ́kpanku bina bati kuuku lɛ́siku Egyipte kalɔ lɛlɔ. Kadi bani bekyuli nse aani lɛyu ogya ɔni mɔɔda bonwu na nwuna kemmo na baanwamana abuala. Ama na lɛ́su nnii si bádi mina ɔda bubo lɛlɔ ni, ndubɔbla bana Katɔti na ama babla mina kadi bekyuli.

5 Ami lɛ́di mina lɛsuse lɛlɔ, anwuɔsu na líti kalɔ kani kana egyiibi ntu bɔɔyu emini aani uwɔ na kana lɛlɔ bebuo baayu anyi ntu pii na bilie-ka lɛlɔ mɛni líte-ma.” Amu na lídie kenye nnini, “Sɔsɔ na ɔdi Unwoti.”

6 Ɔmmɔ kama ni, Unwoti ɔ́su-mi ɔnii nte ukyuli biala bɔti na Yerusalem lɛblɔnu lɛlɔ ku Yuda lɛma kemmo ɔnini, “Ɔda bubo bɔni nkya bunyimi bɔni na línyimiku-mii kemmo ni, bɛdi-mu lɛlɔ.

7 Lɛ́siku-mii bɔtɛmiku ɔ́si uwi ɔni na lɛ́kpanku bina bati kuuku lɛ́siku Egyipte kalɔ lɛlɔ nnii bɛdi mina ɔda bubo lɛlɔ. Nsu amii ku bina bati kuuku ƒui,

8 atuɔkplu kani na binye bɛɛbla uwi ndi uwi na bíni bɛnii bilenu lɛla lɛni na mɔɔsu-mii. Na lɛla lɛni na bina likyulikpi kayi kani nkya-mii ni, kana bɔlɛ ku lɛyɔla na biinú taabla ala mmomu. Bítadi lɛla lɛni na búnyimi ɔdi lɛlɔ. Anwuɔsu ndubo bɔya na ewida asiaku-mii na bibo abi biala na ámanku-mii na bina ɔbladu kenye.”

9 Unwoti ɔ́su-mi ɔnini, “Yeremia, Yudaƒuɔ ku Yerusalem kadi bekyuli bakya baabla kasusu kekpidi na mina lɛlɔ.

10 Ekpidi ani na bana bati kuuku bábla ni, ana lɛlɔ kani na ama lɛnɔ benye kpakplaa na ɔni na béni-mi na bésie baakpá baƒiɔ ɔsu. Lɛga kadikɔ kani nkya katɔ kakɛ na Israel kalɔ lɛlɔ ni, bébile bunyimi bɔni na línyimiku bina bati kuuku. Na ɔmmɔ lɛlɔ kani na Yuda lɛga kadikɔ kani na kalɔ kammɔ kada kakɛ badaku ɔƒɛni.

11 Ndubo bɔya na Yuda ku Yerusalem kadi bekyuli bebo abi geen ɔni na ɔdi ulakana na wekeli lɛbibo lɛmmɔ. Lɛla lɛni na lɛ́lɛ ugyii ɔƒɛni na lɛdi mmɔ. Na badubuvele-mi banii mbunku-ma, nsu lɛɛɛdubo bunu bute-ma.

12-13 Na bakana na beti bana akpala bete bana baƒiɔ bani na baakpali na bebunku-ma. Ɔsika ɔkɔ ɔdi uuubo-nwu kemmo ka Yudaƒuɔ bebo bɔƒiɔ na bemomo betulo lɛma lɛni na lɛkya Yuda kalɔ kemodi kammɔ lɛlɔ. Na bátu akpabi béte Baal baƒiɔ na emomo etulo lɛblɔnu lɛni nkya Yerusalem ɔma kemmo, nsu bana ƒui baaadubo bɔkana na bedie-ma na ɔgbankpi ɔdi kemmo.

14 “Yeremia, takpali tevele na bekyuli bamɛni lili iye asu-mi anii ndie-ma. Ɔsika lɛɛɛdubo bunu ina ákpali-mi na lɛɛɛdubo bana buvele lɛnɔ bunu!”

15 Unwoti ɔ́sɔ ɔ́su-mi ɔnii nte Yudaƒuɔ bɔti ɔnini, “Amii ndi mina kadi bekyuli, nsu biiibo kuƒi ka biduo mina kakpakɔ bitaabla ala ani muukpóku-mi kayi mɛni udu. Na akpala ani na bɛɛbla teete-mi mɛni aaadubo-mii bɔgyumana bɔsiku ɔgbankpi ɔdi kemmo. Anwuɔsu bɛda lɛlɔyɔ lɛmmɔ bɛya.

16 “Uwi ɔdi kemmo ni, nka bise aani kɔdingyii kɔni na egyiibi áƒɔ-ku kemmo kaduɛ. Nsu ni, uwi ɔsɔ uletu asa ndubo bɔya na bekyuli lisu bonwu badi ku lɛsɛ bebo babaƒɛ ƒula kɔgba kɔmmɔ ƒui na batu ogya bakya-a.

17 Ami ndi Unwoti Ɔyikune Ƒui. Na amii Yudaƒuɔ bise aani kugyii kɔni na ami ɔlati lɛ́lɛ. Nsu bɛ́kya-mi kɔnyi na akpala ani na bɛɛbla teete Baal baƒiɔ aani kalɛ na lɛga kadikɔ kani nkya katɔ kakɛ baabla ɔsu. Na ɔƒaani ni, ndubo-mii bɔgyu budie bina kenyekɔ ku ligyiitu.”


Bása Lili Ka Badu Yeremia

18 Bekyuli badi bása lili ka badu-mi. Na aani kalɛ na baakpanku koƒonu teesienku kadukɔ ni, lɛni na badanku-mi na lɛɛɛgyi bana kasusu.

19 Nsu Unwoti údie bana kasusu ɔ́tina-mi ka lɛni na baawia badu-mi aani kalɛ na baadá kugyii taakyula ku ligyiitu ku ebi ƒui kalɛ na ukyuli ɔdi ɔsɔ ulenyimo-mi kudii lɛnɔ.

20 Lɛ́kpali Unwoti na lívele-nwu nnini, “Unwoti Ɔyikune Ƒui, lɛla lɛni na ndia na aabla uwi ndi uwi na agyi ukyuli biala kasusu lɛnɔ. Anwuɔsu bunku-mi na edie bekyuli bamɛni kasi.”

21 Unwoti ɔnini, “Yeremia, bekyuli badi bási ƒula ɔma Anatos bani násu ka badubo-ɔ bɔdu si amu enye eedie-mi kenye.

22 Nsu ndubo-ma kɔtu bɔni na lɛya na bana bakloƒu bekpi na kekpokɔ. Na kɔka kɔdubo bana bebi bɔdu na bekpi.

23 Na si uwi ɔni na lɛ́wɔlɔ lɛla lɛni na mɔɔbla ni, ukyuli ɔdi ɔsɔ ulébu ulelie ngba na bana atɔƒi kemmo.”

© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc. 

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ