Seƒania 2 - Katɔti Ɔku Kedee

Binwini Bisie Katɔti Kudɔ

¹ Amii kadi bekyuli bani na kɔƒa ala bɔbla búyi-mii akɔ ni, bibo bibasala mɛni asa na uwi ukpidi ɔmmɔ udu.

² Ɔsika Unwoti úuse uwi úse ɔni na ɔdubo ku kɔnyi kpakplaa na ubébo-mii uwi kalɔ aani ɔƒɛƒɛɛ kpakplaa na ɔkpala-mii ƒui ɔtɔlɔku.

³ Na si biiboku lɛlɔ kalɔ na biinú Unwoti litemi bɔdi ni, amu bibo na bibakya-nwu lili kalɔ. Na si bíboku lɛlɔ kalɔ na bɛɛbla ala siin ni, ɔƒɛni kalɛ bɛdubɔkɛ bɔƒɔ na limeyi lɛmmɔ lɛlɔ uwi ɔni na Unwoti ɔdubudie nwuna kɔnyi keyi.

Unwoti Ɔ́tɛku Ƒilistia Litemi

⁴ Bekyuli badubɔda Gasa ku Askelon lɛma bewi na lɛbwɛ. Na badubɔbɔku bekyuli balɛku Asdod ɔma asa na ɔƒɛ welie ntɛ. Na bagya Ekron bekyuli balɛku ɔma ɔmmɔ kemmo.

⁵ Amii Ƒilistiƒuɔ bani nli ɛpu ulu lɛlɔ ku amadɔ mmɔ bene, binu Unwoti linyesia lɛni na ubo ute-mii. Unwoti ɔnini, “Ɔƒaani línwini bina ukisine na ndubo-mii udu bɔyila budie ƒui kede kede.

⁶ Na ƒula ɛpu kalɔ ku amadɔ ƒui adubunwini bebuo kadikɔ ku bebuo ayu.

⁷ Bekyuli bani nébu bakya Yuda ni, Unwoti Katɔti útayiƒala-ma. Ɔdubɔya na nwuna bekyuli beti Askelon kalɔ kammɔ benwini bana bebuo kadikɔ. Na si useyi uwi údu ni, na beduo bana lɛtɔ kemmo batɛ banwuna.”

Unwoti Ɔ́tɛku Moab Ku Amon Litemi

^8-9 Unwoti Ɔyikune Ƒui, Israel Katɔti, ɔnini, “Línu kalɛ na Moab ku Amonƒuɔ bakya beedumi mina kadi bekyuli na baayila-ma taakya-ma liƒu ka baanu ka bebo ɔyikun ɔsu. Anwuɔsu líse kenye ka na ami, Unwoti ɔni nli ngba uwi ƒui, anumi ni, Moabƒuɔ ku Amonƒuɔ badubo udu bɔyii ƒui na basa aani kalɛ na Sodom ku Gomora báyii udu na bana kɔlɔ kúnwini liyu alakpi sɔɔn ku mma libu lɛti lɛti úsela uwi ƒui, na mina bekyuli beti-ma kɔlɔ benwini bana ɔdi.

¹⁰ Ulu ɔmɛni lɛlɔ na ndubo Moab ku Amon kɔtu bɔni na bana lɛlɔ katɔ bɔkɔliku ku kalɛ na bédumi mina kadi bekyuli bani na lɛ́ƒuna na badi ami, Unwoti Ɔyikune Ƒui, badi ɔsu.

¹¹ Ndubo-ma bukpo ku kɔnyi geen kalɛ na baƒiɔ bani ƒui nkya kalɔ lɛlɔ mɛni bayii bakya na basɔ baladi lɛla lɛdi belete bekyuli, mmomu kadi biala bekyuli ɔdi biala ɔdubɔkya lili kalɔ ute-mi na kesi kesii na belie.”

Unwoti Ɔ́tɛku Kus Litemi

¹² Unwoti kewii kadubo amii Kus bekyuli bɔdu!

Unwoti Ɔ́tɛku Asiria Litemi

¹³ Unwoti ɔdubo busie butédu kalɔ kammɔ katɔ kakɛ na utábwɛ Asiria, na unwini Niniwe ɔma unengudi ɔmmɔ ubi.

¹⁴ Na baƒonu ku alakpi akɔ bebuo pii badubɔƒɔ kalɔ kani nébie mmɔ belie. Na bekuku lidu lidu bebelie atabi ammɔ lɛlɔ, na bana bɔyoli butaabla kɔku taasia kama. Na atɔnku kɔyakun kɔdubo kalɔ, na ligyii lɛsɔ lilasia-ni lɛlɔ.

¹⁵ Ɔma ɔni néteekeye na baasu banini, “Abu kani na bɔdi” ni, ɔƒɛni amu únwini atɔnku na lɛla biala líbie na únwini bebuo keliekɔ, na bekyuli bani ƒui mɔɔví taanu bɔpii kani na baapii taakywɛ-nwu anumi.