Samuel 1 9 - Katɔti Ɔku Kedee

Samuel Úwi Saul Nnɔmii Lili Aani Ɔga

¹ Na uwi ɔmmɔ kemmo ni, ɔnana ɔlakɛne ɔdi ɔ́kya na baalɔ-nwu Kis. Na ɔnana ɔmɛni ɔ́si Aƒia kaba kemmo na Benyamin kɔdua kemmo. Na Aƒia ubidi ndi Bekorat ɔni ubi ndi Seror ɔni ubi ndi Abiel ɔni ubi ndi Kis.

² Na Kis ɔmɛni ɔ́wɔ ɔnanabi ɔdi na baalɔ-nwu Saul. Okloƒu ɔmɛni ɔ́lɛ lɛblani utulo ɔdi biala na Israel mmɔ na ɔɔdia bɔnu geen na ɔ́kuku utulo ukyuli biala.

³ Limeyi lɛdi ni, Saul ɔmɛni ɔti Kis bebuo ala betine báyii. Amu na Kis ɔ́kpali ubidi Saul, na ɔ́su-nwu ɔnini, “Kpanku kabla bablane bammɔ akɔ unwi da, na bisie na bitáwia bebuo bammɔ.”

⁴ Ɔmmɔ ɔsu básia Eƒraim abi kalɔ lɛlɔ ulu na bakɛ Salisa kalɛkɛ kemmo, nsu bátanu-ma. Na ka bási mmɔ ni, bátásia Saalim kalɛkɛ kemmo, nsu bátanu-ma na mmɔ lɛnɔ. Anwuɔsu bátásia Benyamin kalɔ kemmo, nsu bátanu-ma.

⁵ Ɔƒɛni ka bakɛ bétédu Suƒ kalɛkɛ kemmo na bátanu-ma ni, Saul ɔ́su kabla ɔblane ɔmmɔ ɔnini, “Ya na bɔ́sɔ bunwini, ɔsika búutu uwi na ɔƒɛni kalɛ mina ɔti wakali ka abu lɛnɔ bɔ́yii na wasɔ weteeti-bu lɛlɔ kasusu bun na ɔda bebuo bammɔ ɔdi ɔya.”

⁶ Nsu kabla ɔblane ɔmmɔ ɔ́su Saul ɔnini, “Nu, Katɔti Kenye Udiene ɔdi ɔkya ɔma ɔmɛni kemmo ɔni na bekyuli baabu geen. Na lɛla biala na ɔ́su ni, liibo-nwu kemmo lɛni. Anwuɔsu ya na busie na butánu-nwu. Ɔƒɛni kalɛ ɔdubɔsu-bu kesii kani na bɔdubɔvi bɔsia.”

⁷ Mmɔ ni, Saul úye nwuna kabla ɔblane ɔmmɔ ɔnini, “Bi na bɔdubo ɔnana ɔmɛni bute si búsie mmɔ? Adila ani bɔda ƒui áasa na bula kavumi kemmo. Na buuubo lɛla bamba lɛdi lɛnɔ. Bi ndi lɛla lɛni na bɔdubo Katɔti Kenye Udiene ɔmɛni bute. Bi nse-bu?”

⁸ Amu na kabla ɔblane ɔmmɔ údie kenye ɔnini, “Nu, mbo sika ɔƒualadi ebi adi. Ndubuti ɔmmɔ lite Katɔti Kenye Udiene ɔmmɔ, na ɔtina-bu kesii kani na bunwini bɔsia.”

⁹ Na kuuku uwi na Israel ni, si ukyuli ɔdi ɔ́su-ɔ ɔnii ya bisie bitéye lɛla lɛdi binu na Katɔti kudɔ ni, bɔsu na ɔɔsu ɔnii ya na bisie ukyuli ɔni mɔɔnu ala taasu kudɔ. Na bekyuli bammɔ bɔɔlɔ Katɔti kenye bediene ɔmwi limeyi.

¹⁰ Ɔmmɔ ɔsu ni, ka kabla ɔblane ɔmmɔ ɔ́su Saul kenye kammɔ ɔ́wɔlɔ ni, Saul ɔ́su-nwu ɔnini, “Ɔdia, si use lɛni ni, amu bo na buteesie.” Anwuɔsu báyu ulu na béti bésela ɔma ɔni kemmo na Katɔti Kenye Udiene ɔmmɔ ɔkya.

¹¹ Uwi ɔni na bákɔ abi ammɔ bésela ɔma ɔmmɔ ni, básiaku belekubi badi ka badubo bebedu ntu na abiɔ kemmo. Amu na béye-ma banini, “Ukyuli ɔni mɔɔnu ala taasu mmɔ ɔkya?”

¹² Na ama lɛnɔ bédie kenye banini, “Ɛɛn, ɔkya aanu-nwu ntɔ-mii anumi mmɔ. Bɛbabla, ɔƒaani na úbo úbavi úsela bula ɔma. Ɔsika baabla akpala adi na bula ɔma lɛkpabi lɛmmɔ lɛlɔ.

¹³ Na si bíduo ɔma ɔmmɔ kemmo kani ni, bɛdubo-nwu bɔnu asa na weti wataakɔ utádi na kesii kani na lɛkpabi lɛmmɔ linye. Na bekyuli bammɔ baaadubo bɔdi tɔ wetédu uwi ɔni na úbo, ɔsika anwu na ɔdi ka úti enu ɔ́sia adila ammɔ lɛlɔ úwi-nya kusɛ kusɛ, asa bekyuli bani na bálɔ béboku mmɔ bese kalɔ ku bɔdi. Bɛkɔ bisie mmɔ, na bɛdubɔkana na bɛnu-nwu uwi ɔmɛni lɛlɔ.”

¹⁴ Amu ka bákɔ bétéduo ɔma ɔmmɔ kemmo na kabanye mmɔ ni, bánu Samuel ka ɔdubo ubavi utaakɔ kesii kani na lɛkpabi lɛmmɔ linye.

¹⁵ Na limeyi lɛni ntɔ asa na Saul úbo úbasiaku Samuel mɛni ni, Unwoti údie ala ammɔ ƒui ɔ́tina Samuel.

¹⁶ Na ɔ́su-nwu ɔnini, “Kɔnaadi aani uwi ɔni kemmo na mɔɔtɛmiku-ɔ mɛni ni, ndubɔya na ɔnana ɔdi ubo-ɔ kudɔ. Na ɔnana ɔmmɔ ɔ́si Benyamin kalɔ kemmo. Wi-nwu lili nnɔmii na ese-nwu likpo na unwini ɔtɔnkune ute mina kadi bekyuli Israelƒuɔ. Anwu ndubo-ma bɔtɔnku na lɛƒɔ-ma na Ƒilistiƒuɔ enu kemmo. Ɔsika lɛla lɛni na bévele-mi ni, línu-ma bɔkpali.”

¹⁷ Ɔmmɔ ɔsu ka Samuel ɔ́nu Saul kani na Unwoti ɔ́su-nwu ɔnini, “Ɔnana ɔni lɛlɔ litemi na lɛ́su-ɔ ni, anwu mɛni. Na anwu ndubo mina kadi bekyuli bɔtɔnku.”

¹⁸ Amu na Saul úsie útásiaku Samuel na ɔban kenye na úye-nwu ɔnini, “Ati buvele wɛ na Katɔti kenye udiene ɔni nkya mɛni uli?”

¹⁹ Amu na Samuel údie kenye ɔnini, “Ami na ɔdi mɛni. Ɔmmɔ ɔsu tɔ na akɔ eteesie kɔbi lili kesii kani na baabla akpala mmɔ. Na ɔmwi ni, ami ku-ɔ bɔdubo bɔdi. Na si kadi kégye ɔtanta kɔnaadi ni, ndubɔsu-ɔ lɛla lɛni na adanku ɔ́si ƒula kayi kemmo asa na asɔ enwini eteesie ɔma.

²⁰ Na bebuo ala betine bani náyii emeyi atɛ ani návi mmɔ lɛlɔ ni, sɔ tekpoku lɛlɔ na bana lɛlɔ, ɔsika báanu-ma. Na ɔƒɛni ni, ɔma lɛlɔ na aabu anii Israelƒuɔ benye baawia kpakplaa si ɔɔɔdi awɔ ku ƒ'ɔti kaduli bekyuli?”

²¹ Mmɔ ni, Saul údie kenye na ɔ́su Samuel ɔnini, “Kɔdua kubliidi ƒui ndi Benyamin kɔdua na Israelƒuɔ akɔ, na mmɔ lɛ́si. Na mina ɔtɔ bekyuli ndi bani neeebo kenyekɔ geen kadi na Benyamin kɔdua kɔmmɔ kemmo. Bi ɔsu na aasu-mi lɛmɛni udu?”

²² Ɔmmɔ kama ni, bétédu kɔbi lili kesii kani na baabla akpala ammɔ. Na Samuel ɔ́ya na anwu ku Saul ku nwuna kabla ɔblane bétéduo ɔtɔ bonwu ɔdi kemmo. Na ɔ́ya na bétélie kalɔ na keliekɔ kenengudi kani náƒɔ lɛnyi geen na bana kadikɔ mmɔ. Na benengu bani na bálɔ béboku mmɔ lɛnɔ bewi, na badubɔbla aani nkyuli avlaatɛ bani nli kalɔ báka bámana.

²³ Samuel ɔ́lɔ adila ɔnwane ɔmmɔ na ɔ́su-nwu ɔnini, “Ti lɛna lɛni na lídie líse sɛsɛɛ mmɔ boku.”

²⁴ Na adila ɔnwane ɔmmɔ lɛnɔ úti ebuo libuli lɛni na lɛmwi lɛkya-ni lɛlɔ mmɔ úboku úbasia Samuel anumi. Mmɔ na Samuel ɔ́su Saul ɔnini, “Aanu lɛna lɛni na lídie líse-ɔ sɛsɛɛ, ti-ni kun. Ɔsika uwi ɔni na lɛ́lɔ mina benengu ka bebo na babadiku-mi ni, uwi ɔmmɔ kani na lídie lɛna lɛmɛni líse-ɔ ka abakun-ni si uwi ɔni na bula ƒui bɔɔdi.” Mmɔ ni, Saul ku Samuel básala bádi.

²⁵ Ka bádi na báni báwɔlɔ ni, báyu bási kɔbi lɛlɔ mmɔ bésie ɔma kemmo. Amu na Samuel ɔ́ya na bákɔ bésie ɔtɔ katɔ na lɛsa kesii kani bábla na beelie, na anwu ku-nwu bátɛmi na mmɔ.

²⁶ Kadi kégye ni, Samuel ɔ́su Saul ɔnii ɔklibi lɛlɔ na use-nwu ulu. Ka Saul ɔ́klibi lɛlɔ ni, anwu ku Samuel básia bálɛ ɔtɔ ɔmmɔ kemmo.

²⁷ Bésie bétédu ɔma kabanye. Na mmɔ ni, Samuel ɔ́su Saul ɔnini, “Su ƒula kabla ɔblane na ɔgyu utaatɔ-bu anumi blii.” Saul lɛnɔ ɔ́ya na nwuna kabla ɔblane ɔ́ti na ɔ́gyu ɔ́tɔ sɔsɔ. Amu na Samuel ɔ́su Saul ɔnini, “Kywɛ-mi blii na lɛsu-ɔ lɛla lɛni na Katɔti ɔ́su-mi ɔ́siku-ɔ lɛlɔ.”