Samuel 1 8 - Katɔti Ɔku Kedee

Israelƒuɔ Béye Samuel Ka Use Ɔga Ute-ma

¹ Ka Samuel ɔ́nu ka ɔ́ɔbi lɛlɔ geen ɔsu ni, úti nwuna kenyekɔ úte nwuna bebi bananabi ka benye-nwu kenye na bataatina Israelƒuɔ kalɛ na bataabla ala taavinku ulu lɛlɔ.

² Na ubidi udeedi baalɔ Yoel. Na unyɔdi baalɔ Abiya. Na bana inyɔ ƒui bátaabla Unwoti kabla na Beer-Seba.

³ Nsu bebi bamɛni balabla ala siin na Unwoti ulu lɛlɔ. Mmomu bénwini kama bákya-nwu na baabla bekyuli ulikplu ala na baaƒɔ́-ma ala taadi na bɔbɛ kemmo. Na balábla lɛla lɛdi ulu lɛlɔ.

⁴ Ɔmmɔ ɔsu ni, Israelƒuɔ benengu bammɔ básala lɛlɔ na bébo Samuel kudɔ na Rama.

⁵ Na bábasu-nwu banini, “Bɔɔnu ka áabi lɛlɔ geen. Na ngba buni bɔni na élie ni, amu kani na atina ƒula bebi. Nsu bɔɔnu ka bebi bammɔ beeelie ngba bɔmmɔ udu. Ɔmmɔ ɔsu bɔɔwia ka ese ɔga ete-bu na ɔtɔnku-bu aani kalɛ kani na use na kadi bamba bekyuli akɔ.”

⁶ Nsu ka básu banini, “Te-bu ɔga ɔni matɔnku-bu” ni, lɛla lɛmɛni lítayɔ Samuel kaƒɔ. Anwuɔsu ɔ́kpali Unwoti na úti litemi lɛmmɔ ɔ́kya-nwu lɛkɔkɔ.

⁷ Amu na Unwoti údie kenye ɔnini, “Awɔ, nu lɛla lɛni na baasu-ɔ. Ɔsika ɔɔɔdi awɔ na béni. Mmomu ami na béni ka balayɔ ka lɛdi-ma ɔga.

⁸ Kalɛ na béni banii baladi mina etemila lɛlɔ na baakpá baƒiɔ ɔ́si ɔni na lɛ́kpanku-ma lɛ́lɛku Egyipte kalɔ lɛlɔ úti úbalɛku ɔmwi limeyi lɛlɔ ni, udu ɔmmɔ kani na beedie taatina-a ɔƒɛni.

⁹ Ɔƒaani ni, awɔ nu lɛla lɛni na baasu-ɔ. Mmomu tɛmiku-ma kpakplaa na aya na bati bese kalɛ na ukyuli ɔni ndubo-ma lɛlɔ bɔdi ɔdubo buse.”

¹⁰ Anwuɔsu Samuel ɔ́sɔku lɛla biala lɛni na Unwoti ɔ́su-nwu ɔ́su Israelƒuɔ benengu bani mɔɔwia ka bese ɔga bete-ma mmɔ ƒui.

¹¹ Na ɔ́su-ma ɔnini, “Ɔga ɔni na bɛɛwia ka lise lite-mii ni, binu kalɛ na ɔdubo buse. Ɔdubo bina bebi lɛlɔ bunye na benwini nwuna bekpone. Na bataabla kabla na nwuna kekpo bapɔnkɔ kɛɛkɛ kemmo. Na babambadi badubunwini bekpone bani muulie bapɔnkɔ. Na badi lɛnɔ bakɛ lɛgba na nwuna bapɔnkɔ kɛɛkɛ anumi.

¹² “Ɔdubɔya na badi benwini bekpone benengu na bekpone mpim mpim lɛlɔ. Na badi lɛnɔ badubɔdi bekpone liti liti lɛlɔ. Na badi ama ni, badubo butaatuma na nwuna kemo na bataaƒɛ edula teewi-nwu linwu. Na ɔdubɔya na badi bataabla ekpola teete nwuna bekpone bani ndanku nwuna kɛɛkɛ.

¹³ Na bina bebi belekubi ni, ɔdubɔƒɔ-ma, na ɔya na bataabla ala awɛɛdi ƒɛƒɛɛ teete-nwu. Na badi lɛnɔ bataanwi nwuna adila na beteeƒi bodobodo lɛnɔ.

¹⁴ “Bina kalɔ edula abunidi ƒui ɔdubɔƒɔ-nya unwini anwu ɔdi. Na bina adingyii mmo lidu ƒui lɛnɔ ɔdubuƒie-mu ɔƒɔ ute nwuna kabla bablane.

¹⁵ Na bina edula ani na bɛdubo bɔƒɛ ni, ɔdubɔƒɔ ana lɛkpa leevudi ɔsiku ɔdi biala kudɔ bute nwuna bekpone benengu ku lɛgadi benengu.

¹⁶ “Bina bananabi ku beleku kabla bablane ƒui ni, ɔdubɔya na benwini bataabla-nwu kabla. Na bina ɔmantɛ bakɔ bani mɔɔtuma teete-mi ku bebuo ala betine ƒui bataabla nwuna kabla.

¹⁷ Bina baƒonu ni, ɔdubɔƒɔ bana lɛkpa leevudi. Na amii alati binwini nwuna kabla bablane.

¹⁸ Ɔƒɛni limeyi lɛdubo lɛni na bɛdubo buwulo bɔkpali-mi bɛnii nƒɔ-mii nlɛku ɔga ɔni na amii alati bɛ́ƒuna bíte lɛlɔ mmɔ enu kemmo. Nsu lɛɛɛdubo-mii bɔkpete limeyi lɛmmɔ.”

¹⁹ Nsu ɔmɛni ƒui kama ni, bekyuli bammɔ béni na básu banini, “Oowo! Bɔɔwia ɔga bute lɛlɔ.

²⁰ Ɔmmɔ ɔdubɔya na abu lɛnɔ buse aani bekyuli bakladi kalɛ. Na bɔkɛ ɔga na ɔtɔnku-bu si búsela kekpokɔ biala.”

²¹ Ka Samuel únu ala ani na Israelƒuɔ bammɔ básu ni, ɔ́sɔku-nya ƒui ɔ́su Unwoti. Amu na Unwoti lɛnɔ údie kenye ɔnini, “Awɔ, nu-ma litemi na ese ɔga ete-ma.”

²² Mmɔ na Samuel lɛnɔ ɔ́su Israelƒuɔ banana bammɔ ƒui ɔnini, “Ɔdi biala unwini uteesie nwuna ɔma.”