Samuel 1 5 - Katɔti Ɔku Kedee

Katɔti Ɔ́ya Na Ɔgbankpi Ɔ́siaku Ƒilistiƒuɔ

¹ Ka Ƒilistiƒuɔ béƒie Bunyimi Adaka ɔmmɔ báƒɔ ni, béti-nwu básiku Eben-Eser bésienku Asdod.

² Na ka béti-nwu béboku mmɔ ni, béti-nwu bétése bana baƒiɔ ɔtɔ na badi baƒiɔ benengudi bani na baakpá na baalɔ-ma Dagon. Béti Bunyimi Adaka ɔmmɔ bényene Dagon baƒiɔ bani na bávɔ bényene mmɔ kɔmadɔ.

³ Amu ka kadi kégye ni, Asdod ɔma bekyuli báta bébo ɔƒiɔtɔ mmɔ. Na bánu ka Dagon baƒiɔ lɛtabi lɛni na bávɔ mmɔ lɛ́lɛ líbo. Na nina anumi ebi kalɔ na Bunyimi Adaka ɔmmɔ anumi. Amu na bátala lɛtabi lɛmmɔ bényene.

⁴ Nsu ka kadi bamba kégye ni, banu ka lɛtabi lɛmmɔ lɛ́sɔ lɛ́lɛ líbo, na nina anumi ebi kalɔ na Bunyimi Adaka ɔmmɔ anumi aani kudeedi kalɛ kani. Nsu ɔƒaani ni, bánu ka nwuna lili ku enu áƒɛ álɛ-nwu lɛlɔ. Na lili ku enuku ammɔ ewi kalɔ na atabi akɔ na kayakun.

⁵ Ɔmmɔ ɔsu úti úbedu ku ɔmwi si baƒiɔ bakpane bammɔ ku bana basiakune beeduo ɔƒiɔtɔ mmɔ ni, balánya kayakun. Mmomu baadá taavia kesii kani na Dagon baƒiɔ bammɔ lili ku enuku áƒɛ ébewi na kayakun mmɔ. Na balánya mmɔ kudii.

⁶ Unwoti ɔ́ya na ɔgbankpi pii ɔ́siaku Asdod ɔma bekyuli ku ekutɛ mmɔ badi ƒui. Na ɔ́ya na alɛbi álɛ éwi-ma lɛlɔ ƒui na ɔ́yila badi udu. Ɔmɛni ɔsu bana ƒui báta bábla susuusu.

⁷ Kawɔlɔkɔ ni, ama alati básu banini, “Israel Katɔti nábla ɔmɛni. Anwu náya na ɔmɛni ɔɔlɛ́ku-bu ku bula baƒiɔ lɛlɔ. Ɔmɛni ɔsu ɔ́lɛka bɔda Bunyimi Adaka ɔmɛni budie bula ɔƒiɔtɔ mɛni kɔnakunwi.”

⁸ Amu na Asdod ɔma bekyuli bálɔ Ƒilistiƒuɔ agyina besiene ƒui básala na Asdod mmɔ na béye-ma banini, “Bi na ɔlɛka bɔblaku Israelƒuɔ Katɔti Bunyimi Adaka ɔmɛni?” Amu na batɔnkune bammɔ bédie kenye banini, “Biti-nwu bimene ɔma ɔni baalɔ Gat.” Amu na béti-nwu bétése mmɔ.

⁹ Nsu útaƒɔ uwi asa alɛbi álɛ éwi bana ɔdi biala lɛnɔ lɛlɔ na mmɔ. Na ɔmɛni úbakya Gat ɔma bekyuli liƒu geen.

¹⁰ Ɔmɛni ɔsu ama lɛnɔ béti Bunyimi Adaka ɔmmɔ bémene ɔma ɔni baalɔ Ekron. Nsu ka bétédu mmɔ ni, bátavia ɔma ɔmmɔ ɔban kenye asa Ekron ɔma bekyuli bése kalɔ beení-ma ku kɔvanu momoomo banini, “Béti Israel Katɔti Bunyimi Adaka badububoku bula ɔma. Na ɔdubo abu ku bula bebi bɔdu.”

Ƒilistiƒuɔ Básɔku Bunyimi Adaka Bátɔlɔku

¹¹ Ka bétenuku-ma kalɔ ɔsu ni, Ekron ɔma bekyuli lɛnɔ bálɔ Ƒilistiƒuɔ agyina besiene kelisa na básu-ma banini, “Bɛsɔku Bunyimi Adaka ɔmɛni bimene bekyuli bani ɔdi na ɔdi kalɛ na bulása bukpi.” Liƒu líduo ɔdi biala ɔƒɛni amu, ɔsika ɔgbankpi geen ndaku bɔlɛ kesii kani ƒui na bada Bunyimi Adaka ɔmmɔ baavínku. Na Israel Katɔti ɔdaku nwuna ɔyikun budie taatina geen.

¹² Na bani na bétekpi tɔ muedi beenú ɔlɛ geen na alɛbi ani nsia-ma lɛlɔ ɔsu. Na benye baakpali bana baƒiɔ kpakplaa ka baƒɔ bete-ma.