Samuel 1 31 - Katɔti Ɔku Kedee

Saul Ɔ́du Lɛlɔ

¹ Amu na Ƒilistiƒuɔ békpoku Israelƒuɔ na baabɔku-ma geen na bana anumi, na bádu bana akɔ pii lɛnɔ na Gilboa Kɔbi lɛlɔ.

² Ƒilistiƒuɔ béekpo na badaku Saul ku nwuna bebi bɔka taakya ɔni na bádu Yonatan ku Abinadab ku Malki-Saul.

³ Kekpo kammɔ kábabi kenye geen káka kámana Saul. Na bani nda atula mmɔ bébo bana atula bálɛ-nwu, na ɔ́ƒɔ ɔlɛ geen.

⁴ Amu na Saul ɔ́su nwuna ekpola ala utine ɔnini, “Ni ƒula kewii kpa livuo kemmo na atu-mi adu, kalɛ na kadi bamba bekyuli bani na bétekulo-ma ago mɛni balábadu-mi na bataakun lɛmɛnɛ teedumi-mi.” Nsu Saul ekpola utine ɔmmɔ ɔ́yia ka ɔbla lɛni. Anwuɔsu Saul údie anwu ɔlati nwuna kewii na úbuli útébi-ka lɛlɔ.

⁵ Amu ka nwuna ekpola ala utine ɔ́nu ka Saul úkpi ni, anwu lɛnɔ ɔ́kpa nwuna kewii na úbuli útébi-ka lɛlɔ, na úkpi ɔ́tɛ-nwu kudɔ mmɔ.

⁶ Anwuɔsu Saul ku nwuna bebi ɛtɛ ku nwuna ekpola ala utine ƒui békpi limeyi linwi lɛmmɔ kani lɛlɔ.

⁷ Uwi ɔni na Israelƒuɔ bani na belie Yesreel Kɔwɛ kɔtu ku bani na beli Yordan ɔvi unyɔdi bánu ka Israel bekpone békeli na Saul ku nwuna bebi lɛnɔ békpi ni, békeli na báda bana lɛma lɛmmɔ béwi na Ƒilistiƒuɔ bébeti lɛma lɛmmɔ bénwini bana lɛdi.

⁸ Kadi kégye ni, ka Ƒilistiƒuɔ bésie bani bétedie bekpine bammɔ adala ni, mmɔ na bánu Saul ku nwuna bebi ɛtɛ ka békpi bátɛ Gilboa Kɔbi lɛlɔ.

⁹ Békulo-nwu lili na bédie nwuna ekpola ani na ɔkya na bátala batu na bávi Ƒilistiƒuɔ lɛma ƒui básu kenye kamɛni na bana baƒiɔ kakpakɔ ku bekyuli ƒui akɔ.

¹⁰ Na béti nwuna kekpo adala bétése Astarot baƒiɔ kakpakɔ. Na ukyuli umodi ɔmmɔ ɔlati anwu béti-nwu bátáƒala Bet-San kowodu lɛlɔ.

¹¹ Ka bekyuli bani na beli Yabes na Gilead kalɛkɛ bénu lɛla lɛni na Ƒilistiƒuɔ bábla Saul ni,

¹² bana bekpone bani na bebo kayi básia kama bésie Bet-San usien ɔmmɔ. Na bátáƒami Saul ku nwuna bebi bekpine bammɔ básiku Bet-San kowodu eli mmɔ bátɔlɔku bátákyula na Yabes.

¹³ Na báva bana ekubi na kugyii blii kɔdi kalɔ na Yabes. Na béwulo-ma emeyi maatɛ ɔni na bátadi.