Samuel 1 27 - Katɔti Ɔku Kedee

Dawid Ɔ́tɔlɔ Úsie Ƒilistiƒuɔ Kalɔ Lɛlɔ

¹ Ɔmmɔ kama ni, Dawid ɔ́bla kasusu laa na ɔ́su ɔnini, “Ngyi ka emeyi amɛni kemmo kani ni, Saul ɔdubɔwia-mi kama ulu na ɔdu-mi. Anwuɔsu lɛla lɛbuni lɛni na ɔlɛka lɛbla ndi ka likeli lisie Ƒilistiƒuɔ kalɔ lɛlɔ. Na Saul ɔdubunwini kasusu na ɔda-mi bɔwia taavi ɔya na Israel kalɔ ƒui lɛlɔ, na lɛlɛ-nwu enu kemmo.”

² Anwuɔsu Dawid ku nwuna bekpone nkyuli eti leevu-anyɔ bammɔ bátɔlɔ bésie Gat ɔma kemmo, na ɔnana ɔni baalɔ Maok ubidi ɔni ndi Ɔga Akis kudɔ.

³ Na bekpone bammɔ ƒui badanku bana beleku ku bebi ƒui. Na Dawid lɛnɔ ɔdanku nwuna beleku inyɔ bani ndi Ahinoam ɔni nási Yesreel ku Abigail, Nabal ukpinele ɔni nási Karmel. Na bana ƒui bétélie Gat mmɔ na Akis kudɔ.

⁴ Uwi ɔni na Saul únu ka banii Dawid úkeli úsie Gat ni, ɔ́da Dawid kama ulu bɔwia ɔ́ya.

⁵ Ɔmmɔ kama Dawid ɔ́su Ɔga Akis ɔnini, “Si mina lɛlɔ lɛ́da-a kubiti ka lɛkya-a kudɔ ni, na awia kesii kadi ete-mi, na kalɔ kammɔ lɛma libliidi lɛdi kemmo. Ɔsika útamanku ka ami ƒula kabla ɔblane ku awɔ, Ɔga Ɔbune, bulie ƒula lɛga kadikɔ ɔma unwi kemmo.”

⁶ Anwuɔsu limeyi lɛmmɔ kani ni, Ɔga Akis úti Siklag ɔma úte-nwu ɔnii utélie. Na ɔ́si uwi ɔmmɔ kemmo ni, Siklag mmɔ nénwini Yudaƒuɔ baga ɔma uwi ƒui.

⁷ Dawid úlie Ƒilistiƒuɔ kalɔ lɛlɔ na kalɛkɛ kammɔ kemmo lɛkwa linwi ku abuli ene.

⁸ Na Gesurƒuɔ ku Gersiƒuɔ ku Amalekƒuɔ bákya kalɔ kani na kewi ɔ́si Telaim úsie Sur na ɔkɛ útádanku Egyipte kalɔ. Kadi kamɛni bekyuli na Dawid úkpoku.

⁹ Na uwi biala na Dawid úsie útékpoku lɛma lɛmɛni ni, ɔɔdú bekyuli bani nli mmɔ ƒui na uƒie bana baƒonu ku ɔmantɛ bakɔ ku bebuo ala betine ku baƒlumu ku bana adala taaƒɔ asa na ɔsɔ unwini usie Akis kudɔ.

¹⁰ Si ɔga ɔmmɔ lɛnɔ úye-nwu ɔnini, “Kadi kamani bekyuli na ésie étékpoku ɔmwi?” ni, na Dawid ɔsu ɔnini, “Búsie bútékpoku lɛma lɛni nkya kalɔ kakwiidi kemmo kesii kani na Keniƒuɔ iye Yudaƒuɔ iye Yerameelƒuɔ belie.”

¹¹ Na Dawid ɔɔdú banana ku beleku bammɔ ƒui, ɔsika ɔ́su lɛlɔ ɔnini, “Bana ɔdi ɔdububo Gat ɔma kemmo ubasu ɔnini, ‘Aanu lɛni ku lɛni na Dawid ɔ́bla’ si lɛ́ya na ɔdi ulie ngba.” Na lɛni kani na útaabla uwi ɔni ƒui na úti ɔ́kya Ƒilistiƒuɔ kalɔ kemmo na mmɔ.

¹² Na Ɔga Akis ɔ́ƒɔ Dawid ɔ́di na ɔ́su ɔnini, “Dawid únwini ukisine úte Israelƒuɔ ɔsu ɔdubunwini mina kabla ɔblane uwi ƒui.”