Samuel 1 26 - Katɔti Ɔku Kedee

Saul Ɔ́sɔ Úduo Dawid Enu Nsu Útadu-nwu

¹ Na uwi bamba ɔdi lɛnɔ ni, Siƒuɔ badi bésie Saul kudɔ na Gibea bátásu-nwu banini, “Dawid ɔ́sɔ ɔ́bla kabɛkɔ kadi na Hakila Kɔbi lɛlɔ kesii kani nde Yesimon.”

² Ɔmmɔ ɔsu Saul lɛnɔ ɔ́ƒuna bekpone mpim ɛtɛ na besie Siƒ kalɔ kakwiidi lɛlɔ mmɔ ka batáwia Dawid ku nwuna bekyuli.

³ Saul ɔ́da keliekɔ na Hakila Kɔbi lɛlɔ kesii kani néti anumi kátina Yesimon. Nsu Dawid anwu ɔ́bɛ ɔkya kalɔ kakwiidi kammɔ kemmo. Na ka únu ka Saul úbo ɔkya ɔɔwia-nwu ni,

⁴ ɔ́tala batu badi ɔnii batásia anu banu kaduɛ si Saul úbo ɔkya mmɔ sɔsɔ.

⁵ Ɔmmɔ kama ni, Dawid ɔ́tu Saul ku nwuna bekyuli buɛɛ na ɔ́bɛ úsie kesii kani na bakya. Na ɔ́nu ka Saul ku nwuna bekpone unengu Abner ɔni ndi Ner ubidi batɛ. Na Saul úsie ɔtɛ bekpone bammɔ kakyakɔ mmɔ, na bekpone bammɔ ntɛ na báka bámana-nwu.

⁶ Amu na Dawid úye Ahimelek ɔni ndi Hitini ku Seruia ubidi Abisai ɔni ndi Yoab ɔnwani ɔnini, “Bina akɔ ɔmani ndubɔsiaku-mi na busie Saul ku nwuna bekpone keliekɔ?” Amu na Abisai údie kenye ɔnini, “Ami ndubo na busie.”

⁷ Anwuɔsu usien ɔmmɔ kani ni, Dawid ku Abisai bákpɛ buɛɛ na bésie kesii kani na Saul ku nwuna badi batɛ baalɛɛ. Na ɔ́pima nwuna lɛtula ɔ́lɛ kalɔ na ude nwuna eli kakɛ. Na Abner ku bekpone bakladi batɛ bámana-ma na béduo lɛlɛɛ kemmo bésie ɔgyu geen.

⁸ Amu na Abisai ɔ́tɛmiku Dawid ɔnini, “Uwi ɔmɛni kemmo na Unwoti údie ƒula ukisine ɔbuli ɔ́kya-a enu kemmo. Ndubuti anwu ɔlati lɛtula na lɛkana-nwu lili lɛlɛ kalɔ kunwi kani na ɔɔɔdi kunyɔ.”

⁹ Nsu Dawid ɔ́su Abisai ɔnini, “Tadu-nwu! Ɔsika ukyuli biala madu ɔga ɔni na Unwoti ɔlati ɔ́ƒuna ni, Unwoti ɔmmɔ ɔdubo-nwu kɔtu bɔni.”

¹⁰ Na ɔ́su-nwu ɔnini, “Unwoti ɔni nli ngba mɛni ɔlati ndubo-nwu bɔdu na kekpokɔ iye anwu ɔlati ndubo bukpi nwuna kukpi.

¹¹ Nsu ami muuvele nnii Unwoti utaya na liti mina kɔnu lituku nwuna ɔga lɛbla-nwu lɛla lɛdi. Awɔ, ƒɔ lɛtula ku ntu ɔsii ɔni nde-nwu lili mmɔ na bɔtɔlɔ.”

¹² Ɔmmɔ ɔsu Dawid úti lɛtula ku ntu ɔsii ɔni nde Saul lili mmɔ na bátɔlɔ na bekpone bammɔ akɔ, na ɔdi útati lɛla lɛni nálɛ, ɔsika Unwoti ɔ́ya na béduo lɛlɛɛ kemmo bésie ɔgyu geen.

¹³ Amu na Dawid ɔ́via úténye ɔgyu na lɛbinkpo lɛdi lili na ɔ́da kuƒi geen úwi anwu ku-ma ntɛ.

¹⁴ Mmɔ asa na ɔ́kpali úmene Saul bekpone bammɔ na úye ɔnini, “Abner, ɔɔɔdi awɔ na mɔɔkpali, alakya-mi kenye?” Amu na Abner údie kenye ɔnini, “Awɔ ɔma mɔɔkpali teemene ɔga lɛni?”

¹⁵ Amu na Dawid lɛnɔ ɔ́ƒɔ na úye-nwu ɔnini, “Ami lɛ́bu ka ɔnana geen na adi na adi ukpone unengudi ƒui na Israel kalɔ lɛlɔ. Bi ɔsu na átagyumana ƒula ati ku ɔga? Anwu ɔmmɔ na ukyuli ɔdi úbo mmɔ ka nka ubadu!

¹⁶ Lɛla lɛni na bɛ́bla lítamanku-ɔ. Na mɔɔsu-ɔ na Unwoti ɔni nli ngba anumi ka nka ɔlɛka badu awɔ ku ƒula badi, ɔsika bítakana na bɛgyumana bina Ati, Unwoti Ɔga Ɔƒunadi. Bɛsia anumi na bɛnu si bɛdubɔnu ɔga lɛtula ku ntu ɔsii ɔni nlɛ nde-nwu lili?”

¹⁷ Saul únu Dawid lɛdi ɔ́ti na úye-nwu ɔnini, “Mina ubi Dawid, ƒula lɛdi na lɛdi mmɔ?” Amu na Dawid údie kenye ɔnini, “Ɔga Ɔbune, ami na ɔdi.

¹⁸ Bi ɔsu na awɔ mina ati asiaku ami ƒula kabla ɔblane lɛni? Líbile lɛla lɛdi, munuu likpidi linengudi lɛmani na lɛ́bla?

¹⁹ Buvele kemmo, nu lɛla lɛni ndubo-ɔ bɔsu. Si Unwoti náya na asiaku-mi eekpóku-mi lɛni ni, ndubuvele-nwu na lɛbla akpala lite-nwu na ɔdubunwini kasusu. Na si bekyuli muudí-ɔ taakya-mi ɔsu na asiaku-mi lɛni ni, Unwoti ɔdubuwida-ma. Ɔsika bana ablala nábɔku-mi álɛku Unwoti kalɔ kemmo na banii ntátaakpa kalɔ bamba baƒiɔ.

²⁰ Bitaya na ntékpi ɔgyu na kalɔ kani naaadi Unwoti kadi kemmo. Bi na ami ɔmɛni ndi ka ńtedu alɔlɔ muedi na Israelƒuɔ ɔga ɔkɛ ɔɔwia-mi na abi akɔ aani aasɛ ɔnii ɔɔdú?”

²¹ Mmɔ na Saul ɔ́su ɔnini, “Dawid, ákɛ kuƒi kɔni na nka adu-mi ɔmwi, nsu átadu-mi. Ami mmomu nátati bɔbla na ƒula lɛlɔ. Na ɔdi-mi bɔƒiɔ bubendi ka lɛsu nnii mɔɔdú-ɔ. Lɛ́nu ka lɛ́bla ala aani ɔdɔlɔdi. Na nsɔ naaabla kasusu nnii mɔɔbla-a likpidi lɛdi ɔ́si ɔƒɛni úsela. Buse na ese ete-mi aani mina ubi geen, anwuɔsu sɔ nwini bo-mi kudɔ.”

²² Amu na Dawid ɔnini, “Ɔga Ɔbune, aanu ƒula lɛtula na nda mɛni. Su ƒula ukpone unwi ɔdi na ubo ubaƒɔ uboku-ɔ.

²³ Unwoti úti-ɔ ɔ́kya-mi enu kemmo ɔmwi na nka lɛdu-ɔ, nsu nwuna ɔga ɔƒunadi na adi. Anwuɔsu ami lɛɛɛdubo-ɔ lɛla lɛdi bɔbla. Unwoti ɔlati mɔɔƒɔ kayu buni teete bekyuli bani mɔɔdi nwuna litemi lɛlɔ ulu lɛlɔ na baasiaku-nwu kama siin.

²⁴ Ka lɛ́tina kalɛ na ƒula ngba bɔ́ƒɔ-mi kuye ɔmwi ni, lɛni kani na muuvele Unwoti nnii mina ngba bɔƒɔ-nwu kuye na udie-mi na ɔgbankpi biala kemmo.”

²⁵ Saul lɛnɔ ɔ́su Dawid ɔnini, “Mina ubi Dawid, muuvele Unwoti nnii ute-ɔ kusɛ kusɛ, na ɔya na ƒula lɛla biala lɛtɛ lite-ɔ.” Ɔmmɔ kama Dawid ɔ́tɔlɔ, na Saul lɛnɔ únwini úsie ɔma.