Samuel 1 24 - Katɔti Ɔku Kedee

Saul Úduo Dawid Kɔnu Nsu Útabla-nwu Lɛla Lɛdi

¹ Uwi ɔni na Saul úsie útábɔku Ƒilistiƒuɔ ɔ́wɔlɔ ni, únu ka banii Dawid ku nwuna bekyuli bésie bakya En-Gedi kalɔ kakwiidi kemmo.

² Anwuɔsu Saul útiku bekpone mpim ɛtɛ bani na ɔ́ƒuna ɔ́siku Yuda kalɔ lɛlɔ ƒui na bésie batáwia Dawid ku nwuna bekyuli na kesii kani baalɔ banii Beƒiebuo Atakpɛ akɔ.

³ Saul úbo úbedu kesii kani na baƒonu ayu adi enye na ulu kɔtu na lɛtakpɛ ubu ɔdi ɔkya mmɔ. Amu na úduo mmɔ ɔnii utése kuvodɔ. Na ubu ɔmmɔ kani kemmo na Dawid ku nwuna bekyuli bakya na kama kama ƒui.

⁴ Amu na Dawid bekyuli bammɔ básu-nwu buɛɛ banini, “Limeyi lɛmɛni geen ndi limeyi lɛni lɛlɔ na Unwoti ɔ́su lɛla lɛdi úse, ɔni na ɔ́su-ɔ ɔnini, ‘Ndubuti ƒula ukisine lɛkya-a enu kemmo na esusu-nwu kalɛ na aayɔ́.’ ” Amu na Dawid ɔ́kpɛ buɛɛ na útékulo Saul awu gyɔlɔɔ ɔni na ɔkya kɔtu, na Saul útati.

⁵ Kama ƒui ni, Dawid kayi kékpoku-nwu na kalɛ na úkulo-nwu awu kɔtu ɔsu.

⁶ Amu na ɔ́su nwuna bekpone ɔnini, “Unwoti utaya na ubo-nwu kemmo lɛni munu munu ka lɛbla lɛla lɛni na lise lɛni udu ku mina ɔga ɔni na Unwoti uwi-nwu lili nnɔmii iye ɔya na liti mina kɔnu lituku-nwu, ɔsika ɔdi Unwoti ukyuli ɔni na úwi nnɔmii lili.”

⁷ Lɛni na Dawid ɔ́dɔnku nwuna bekpone, na bátabla Saul lɛla lɛdi. Ka Saul ɔ́wɔlɔ ni, ɔ́ta ɔ́lɛ lɛtakpɛ ubu ɔmmɔ kemmo ka ɔtɔlɔ.

⁸ Amu na Dawid lɛnɔ ɔ́lɛ lɛtabi ubu ɔmmɔ kemmo na ɔ́kpali úmene ɔnini, “Ati, mina Ɔga Ɔbune!” Kɔnakunwi Saul únwini ɔ́nu kama na ɔ́nu ka Dawid úboku lili kalɔ úte-nwu.

⁹ Mmɔ na ɔ́su Saul ɔnini, “Bi ɔsu na si bekyuli baatɔ́lɔ-ɔ banii mɔɔwia-a lɛdu ni, na aaƒɔ́-ma taadi?

¹⁰ Ɔmwi limeyi lɛmɛni lɛlɔ ni, awɔ ɔlati ánu ku ƒula anumi nwaa ka nka Unwoti úti-ɔ ɔ́kya-mi enu kemmo na lɛtabi ubu ɔmmɔ kemmo. Na mina bekpone badi bénye-mi lɛlɔ banii ndu-ɔ, nsu líni na lɛ́su-ma nnii lɛɛɛdubo mina kɔnu bɔtala bɔbla awɔ mina ati lɛla lɛdi, ɔsika Unwoti ukyuli ɔni na úse likpo na adi.

¹¹ Ati, aanu ƒula awu gyɔlɔɔ ɔni na akya kɔtu na líkulo nda mɛni. Ami ɔlati nékulo awu ɔmmɔ kɔtu, nsu ńtadu-ɔ. Ɔƒaani ni, mɔɔwia ka awɔ ɔlati anu ati nwaa ka ńtabla lɛla lɛdi ńtaƒiɔ-ɔ, na ńtata ńtenye-ɔ lɛlɔ lɛnɔ, nsu awɔ asiaku-mi aatú-mi uwi biala ka adu-mi.

¹² Muuvele Unwoti ka ɔtɛ litemi lɛmɛni na ami ku-ɔ ntɛ, na anwu ndubo-ɔ kayu bɔƒɔ na ala ani na aabla-mi kenye. Ɔɔɔdi ami ndubo mina kɔnu budie butuku-ɔ.

¹³ Lɛni na benengu bébo lɛgba banini, ‘Alaekpidi bablane alati ndanku bana likpidi bakɛ,’ anwuɔsu mina kɔnu kɔɔɔdubo-ɔ butuku.

¹⁴ “Bi ɔsu na Israelƒuɔ ƒui ɔga ɔ́ta na ɔkɛ ɔɔtú ami ɔni naaadi lɛla lɛdi? Nse aani akpewe ukpine iye alɔlɔ. Bi na adubɔkɛ si ádu-mi?

¹⁵ Unwoti kani ndi bula litemi ɔtɛne, na anwu ndubo litemi lɛmmɔ bukulo na ami ku-ɔ ntɛ. Anwu mɔɔnu mina lɛbibo na ɔdubute-mi ubo na udie-mi na ƒula enu kemmo.”

¹⁶ Ka Dawid ɔ́su Saul ala amɛni ɔ́wɔlɔ ni, Saul úye-nwu ɔnini, “Dawid mina ubi, ƒula lɛdi na lɛdi mmɔ?” Mmɔ kani na ɔ́da lɛdi údie na úwulo momoomo.

¹⁷ Na ɔ́su Dawid ɔnini, “Adi ukyuli ɔni na ƒula ablala ese siin etulo ami adi. Awɔ ábla lɛla biala kaduɛ éte-mi na ami mmomu nábla-a likpidi.

¹⁸ Ɔmwi ni, ásu-mi lɛbuni lɛni na ábla-mi. Unwoti úti-mi ɔ́kya-a enu kemmo, nsu átadu-mi.

¹⁹ Ɔsika ńtenu dii ka ukyuli ɔkɛ nwuna ukisine na ulu ɔmɛni lɛlɔ na ɔnyonu-nwu na ɔtɔlɔ kudii. Unwoti ute-ɔ kusɛ kusɛ na lɛla lɛni na ábla éte-mi ɔmwi mɛni ɔsu.

²⁰ Ngyi nwaa ka awɔ ndubo abadi lɛga. Na ɔkɛnku ƒula lɛlɔ na Israel lɛga kadikɔ kammɔ kadubunye kpakplaa.

²¹ Na ɔƒaani ni, mɔɔwia ka ese-mi kenye kadi na Unwoti lɛnyi kemmo ka alayila mina bebi ku bawɔ udu kalɛ na mina lɛnyi lilayii na Israel bekyuli akɔ.”

²² Anwuɔsu Dawid úse kenye kammɔ úte Saul. Ɔmmɔ kama Saul únwini úsie ɔma, nsu Dawid ku nwuna bekyuli bátɔlɔ bésie bana kabɛkɔ kpakplaa kammɔ.