Samuel 1 14 - Katɔti Ɔku Kedee

¹ Na limeyi lɛdi ni, Yonatan ɔ́su ukpone ɔni muuti nwuna ekpola ɔnini, “Ya na bɔvia ulu ɔmmɔ busie kesii kani na Ƒilistiƒuɔ beli.” Anwuɔsu báyu ulu, nsu Yonatan útasu ɔti ka bésela mmɔ.

² Ɔƒɛni na uwi ɔmmɔ kemmo ni, Saul ɔ́tu nwuna kevo na kɔdingyii klukui kɔdi kalɔ na Gibea na Benyamin kalɛkɛ. Na nwuna bekpone bani mabla aani eti leevu-anyɔ lɛnɔ bebunku-nwu na mmɔ.

³ Na ɔkpane ɔni baalɔ Ahiya lɛnɔ ɔ́kya mmɔ na ɔkya bakpane awu ɔni muubi-ma kayi ku kama. Ɔkpane ɔmɛni ɔdi Ahitub ubidi na Ahitub ɔdi Ikabod ɔnwani. Na Ahiya ɔdi Pinehas uwɔ, na Pinehas lɛnɔ ɔdi Unwoti ɔkpane Eli ubidi ɔni nákya Silo ɔma. Na Yonatan anwu ni, ukyuli ɔdi ɔɔɔgyi ɔnii anwu ku nwuna ukpone ɔmmɔ bátɔlɔ bana Israelƒuɔ keliekɔ mmɔ bésie kesii kadi.

⁴ Na asa na badubɔkana na bedu kesii kani na bana bekisine Ƒilistiƒuɔ bakya ni, ɔlɛka basia Mikmas abi ntɛ ulu ɔmmɔ. Na ulu ɔvi biala ni, lɛtakpɛ bonwu lɛdi lɛƒa. Na linwi baalɔ Boses, na lɛkladi baalɔ Sene.

⁵ Lɛtakpɛ linwi lɛdanku lísie katɔ kakɛ na Mikmas. Na lɛtakpɛ lɛni na ɔvi unyɔdi lɛdanku lísie kada kakɛ na Geba.

⁶ Mmɔ na Yonatan ɔ́su nwuna ekpola utine ɔnini, “Bo na bɔsia abi ntɛ ulu ɔmmɔ busie Ƒilistiƒuɔ bani nétekulo ago mmɔ keliekɔ. Ɔƒɛni kalɛ Unwoti ɔdubukpo ute-bu, ɔsika lɛla lɛdi lilétile Unwoti bɔƒɔ kuƒi si ina bumomo iye buse blii suɛ.”

⁷ Amu na nwuna ekpola utine ɔmmɔ ɔ́su-nwu ɔnini, “Tɔ na lɛsiaku-ɔ. Na lɛla biala na aayɔ́ ka abla ni, ami lɛnɔ lɛ́tunaku-ɔ ku mina kayi ku kɔyu ƒui.”

⁸ Mmɔ na Yonatan ɔ́su-nwu ɔnini, “Ɔdia, bo, bɔdubo bɔkɔ bɔvia buteesie bekyuli bammɔ kudɔ kakɛ na bɔya na banu-bu.

⁹ Na si bákyaku-bu unyeƒi na bábala-bu banii bɔsɔ bunye utédu ka ama bébo-bu kudɔ ni, bɔdubudi bunye kesii kani na bunye mmɔ na bɔsɔ bulákɔ bulésie-ma kudɔ.

¹⁰ Nsu si bébo-bu kɔnu ka buteebo-ma kudɔ mmɔ ni, bɔdubɔkɔ busie mmɔ. Na ɔmmɔ ɔdubɔbla likposela ute-bu ɔ́si Unwoti kudɔ ka ɔdubo-bu bubunku na bɔdi-ma lɛlɔ.”

¹¹ Ɔmmɔ ɔsu ni, bana inyɔ ƒui bédie lɛlɔ na Ƒilistiƒuɔ bammɔ baanu-ma básiku bana keliekɔ mmɔ. Na Ƒilistiƒuɔ bammɔ básu banini, “Bɛnu! Hebriƒuɔ bamɛni bási baalɛ́ bana libu lɛni kemmo na bábɛ bakya.”

¹² Na Ƒilistiƒuɔ bekpone bani nkya bana keliekɔ mmɔ bákpali bémene Yonatan ku nwuna ekpola utine banini, “Amii bɛkɔ bibo-bu kudɔ mɛni na bɔdubɔtina-mii lɛla lɛni bɛɛwia.” Anwuɔsu Yonatan ɔ́su nwuna ekpola utine ɔnini, “Siaku-mi taakɔ kɔbi kɔmmɔ. Unwoti unye abu Israelƒuɔ kama na bɔdi Ƒilistiƒuɔ bamɛni lɛlɔ.”

¹³ Yonatan ɔ́kpɛ enu ku akɔnkɔ ɔ́kɔ útálɛ atakpɛ ammɔ eli, na nwuna ukpone ɔmmɔ lɛnɔ ɔsiaku-nwu kama. Yonatan uubó Ƒilistiƒuɔ bammɔ taaƒiɛmi kalɔ. Na nwuna ekpola utine ɔmmɔ lɛnɔ ɔsiaku-nwu kama ɔɔdú-ma.

¹⁴ Na ntɛ kunu kunu bɔni na bása kudeedi mmɔ kani ni, Yonatan ku nwuna ekpola utine bádu Ƒilistiƒuɔ bekpone aani aavlanyɔ.

¹⁵ Ɔmɛni ɔsu ni, Ƒilistiƒuɔ bekpone lisu limodi lɛmmɔ ku bani nkya bana nvo kemmo ku bani nnye muukpó ƒui béƒu. Na Katɔti ɔ́ya na kalɔ kammɔ kákunku na liƒu lɛ́da-ma líbu. Na Katɔti ɔlati náya na liƒu bonwu lɛmɛni líbo-ma lɛlɔ.

¹⁶ Uwi ɔmmɔ ni, Saul ku nwuna bekpone bakya Gibea na Benyamin kalɛkɛ. Na bekpone bani nnye mɔɔgyumana mmɔ bánu bémene ka liƒu líƒie Ƒilistiƒuɔ bekpone bammɔ na bakɛ beekeli taavi.

¹⁷ Amu na Saul ɔ́su nwuna badi bani nkya-nwu kudɔ mmɔ ɔnini, “Bɛsala bekpone bammɔ ƒui na bɛnu bani nálɛ-mii akɔ.” Na ka bábla lɛni ni, bánu báti ka Yonatan ku nwuna ekpola utine ɔmmɔ neeebo-ma akɔ.

¹⁸ Amu na Saul ɔ́su ɔkpane Ahiya ɔnini, “Ti Katɔti Bunyimi Adaka ɔmmɔ boku.” Na uwi ɔmmɔ ni, na adaka ɔmmɔ ɔ́kya Israelƒuɔ kudɔ.

¹⁹ Ɔni na Saul unye ɔɔtɛmiku Ahiya ni, owogyo ɔmmɔ ɔ́sɔ ɔ́kɔ katɔ úbu. Ɔmmɔ ɔsu Saul ɔ́su Ahiya ɔnini, “Awɔ, da ya!”

²⁰ Amu na Saul ku nwuna badi básala lɛlɔ na bésie bétékpo ku Ƒilistiƒuɔ bammɔ. Ka bédu kekpokɔ mmɔ ni, bánu ka Ƒilistiƒuɔ bammɔ ƒui béƒu útédu ka benye beekpóku ama alati lɛlɔ muedi.

²¹ Na asa kekpo kammɔ kadubɔlɛ ni, na Hebriƒuɔ badi bátábla unwi ku Ƒilistiƒuɔ bekpone na bakya-ma kudɔ na mmɔ. Nsu ɔƒaani na kekpo kammɔ kemmo ni, bénwini bábabla unwi ku bana kadi bekyuli Israelƒuɔ. Ɔmmɔ ɔsu básalaku Saul ku Yonatan.

²² Ka Israelƒuɔ bani na nka bátábɛla lɛlɔ bákya abi adi akɔ na Eƒraim kalɛkɛ bénu ka bana kadi bekyuli Israelƒuɔ baabɔku Ƒilistiƒuɔ ni, ama lɛnɔ bébo bébebunku na kekpo kammɔ kemmo na bábɔku-ma kpakplaa.

²³ Ɔmmɔ ɔsu bákana na bésusu Ƒilistiƒuɔ bammɔ geen na bábɔku-ma bésienku kama na Bet-Awen kama ƒui. Na ulu ɔmɛni lɛlɔ na Unwoti úti úbunku Israelƒuɔ na údie-ma na limeyi lɛmmɔ lɛlɔ.

²⁴ Lɛlɔ lítu Israelƒuɔ geen na bábla kpɛtɛ kpɛtɛ na kɔka ɔsu. Ɔsika asa na badubusie kekpokɔ kammɔ ni, Saul ɔ́kpali Katɔti ɔ́kya-ma úse kenye na úbo-ma ɔda ɔnini, “Ukyuli biala uuubo kuƒi na ɔkya lɛdila lɛdi kenye wetédu ka lídie bula bekisine bamɛni kasi. Na ukyuli biala ɔni náta únye ɔmɛni lɛlɔ na ɔ́bla lɛla bamba ni, Katɔti ɔdubuwida-nwu.” Ɔmmɔ ɔsu bekpone bammɔ ɔdi biala útakya lɛla lɛdi kenye.

²⁵ Ɔƒɛni ka bekpone bammɔ béduo lɛku kemmo ni, bánu ka uwɔ uwi kalɔ.

²⁶ Nsu ka baayia lɛla lɛni maalɛ ɔ́si kenye kani na Saul úse ɔsu ni, ɔdi útetuku uwɔ ɔni mɔɔyu taagba mmɔ kenye muedi útanu.

²⁷ Nsu Yonatan anwu ni, uuubo mmɔ uwi ɔni na ɔti Saul ɔkpali Katɔti ɔ́kya bekpone bammɔ úse kenye. Ɔmmɔ ɔsu anwu útenu ɔmmɔ lɛla lɛdi. Na ka ɔ́nu uwɔ ɔmmɔ ni, únene nwuna ugyii ɔdadi ɔ́kya kɔtakɛ kɔmmɔ kemmo na ɔ́di uwɔ ɔmmɔ ɔdi, na ɔmmɔ ɔ́sɔ ɔ́kya-nwu ɔyikun úbu.

²⁸ Ka ukpone ɔdi ɔ́nu-nwu ni, ɔ́su-nwu ɔnini, “Ɔɔɔdi ulu ka bula ɔdi ɔkya lɛdila lɛdi kenye ɔmwi. Ɔsika ƒ'ɔti ɔ́kpali Katɔti ɔ́kya bula ƒui ka butadi lɛla lɛdi. Na ɔ́su ɔnini, ‘Katɔti ɔdubuwida bina akɔ ɔni makya lɛla lɛdi kenye.’ Na ɔmɛni ɔsu na buse kpɛtɛ kpɛtɛ.”

²⁹ Amu ka Yonatan únu kenye kammɔ ni, ɔ́su ɔnini, “Mina ɔti ɔ́kya bula bekyuli ɔgbankpi kemmo. Awɔ ɔlati ánu áti ka ɔyikun bamba úduo-mi lɛlɔ kemmo ka lɛ́di uwɔ ɔmmɔ ɔsu.

³⁰ Si nka bɔya na ɔ́ya na bula bekyuli bádi adila ani béƒie báƒɔ bula bekisine kudɔ mmɔ adi ni, nka ɔdia geen na badubɔdu Ƒilistiƒuɔ bammɔ betulo kalɛ na bádu-ma mmɔ muedi.”

³¹ Na limeyi lɛmmɔ ni, Israelƒuɔ békpoku Ƒilistiƒuɔ ɔ́si Mikmas útédu Ayalon na bádi-ma lɛlɔ. Nsu ina ka bádi-ma lɛlɔ ni, bekpone bammɔ bábla kpɛtɛ kpɛtɛ.

³² Anwuɔsu bénwini bélie bebuo bani na béƒie básiku bana bekisine kudɔ mmɔ lɛlɔ. Na bádu-ma ogya ogya. Mmɔ kani na baaduli lɛna lɛwɔdi lɛmmɔ ku ubugya taakun.

³³ Na ukyuli ɔdi útásu Saul ɔnini, “Nu, bekyuli bamɛni baabla lɛla lɛni náta línye Unwoti lɛlɔ, ɔsika baakun lɛna lɛni kemmo na ubugya ɔmu ɔkya.” Amu na Saul ɔ́va ku lɛdi momoomo ɔnini, “Bíbile bula bɔƒɔtaadi bɔmmɔ. Ɔmmɔ ɔsu biminime lɛtabi linengudi lɛdi biboku-mi kudɔ mɛni kɔnakunwi.”

³⁴ Na ɔ́su batɔnkune bammɔ unwi ɔnini, “Sie na atásu bekyuli bammɔ na beti bana ɔmantɛ bakɔ ku baƒonu beboku na badu-ma bewi lɛtabi lɛmɛni lɛlɔ na ulu ɔbuni lɛlɔ. Na ɔmmɔ kama bakana na beti lɛna lɛmmɔ bakun. Na utalɛ ka bataaƒiɔ Unwoti na bataakun lɛna lɛni kemmo na ubugya ɔkya.” Ɔmmɔ ɔsu béti bana ɔmantɛ bakɔ béboku na bábadu-ma na kesii kammɔ.

³⁵ Na usien ɔmmɔ ni, Saul ɔ́tu lɛkpabi na bábla akpala béte Unwoti na mmɔ. Na ɔmmɔ ndi kudeedi ka Saul ɔ́bla lɛni.

³⁶ Amu na Saul ɔ́su ɔnini, “Bɛya na bɔbɔku Ƒilistiƒuɔ usien ɔmɛni. Na bɔdu-ma ƒui na buƒie bana ala ƒui bɔƒɔ.” Mmɔ na ama lɛnɔ bédie kenye banini, “Ƒula kasusu kammɔ kadia geen na bɔdubɔbla lɛni.” Nsu ɔkpane ɔni nkya mmɔ bɔ́su ɔnini, “Kudeedi ni, ɔlɛka bɔka Katɔti kasusu buye bunu asa.”

³⁷ Ɔmmɔ ɔsu Saul úye Katɔti ɔnini, “Nkpoku Ƒilistiƒuɔ bamɛni na lɛbɔku-ma? Na adubɔya na bɔdi-ma lɛlɔ?” Nsu Katɔti útakpete Saul limeyi lɛmmɔ.

³⁸ Mmɔ na Saul ɔ́su ɔnini, “Agyi anii ukyuli ɔdi náƒiɔ Katɔti ɔmwi. Anwuɔsu, mina benengu ƒui, bɛlɛ bibo na bɔwia ukyuli ɔmmɔ bɔti ku likpidi lɛni na ɔ́bla.

³⁹ Mɔɔkpali Unwoti ɔni nli ngba na uukpó taaƒɔ Israelƒuɔ na bula bekisine enu kemmo nnii ina mina ubi Yonatan ɔdi nábla lɛla lɛmɛni ni, ɔdi ka ukpi.” Nsu nwuna benengu bammɔ ƒui ɔdi útasu lɛla lɛdi.

⁴⁰ Mmɔ na Saul úbo ɔda úte Israelƒuɔ bammɔ ƒui ɔnini, “Biténye ɔvi ɔngye. Na ami ku mina ubi Yonatan bunye ɔvi ɔmɛni.” Amu na bédie kenye banini, “Bɔdubɔbla lɛla biala na ásu-bu.”

⁴¹ Amu na Saul ɔ́kpali Unwoti ɔnini, “Bula Unwoti, Israel Katɔti, bi ɔsu na bɔ́kpali-ɔ na étedie lɛla lɛni na búye-ɔ kenye étete-bu? Die ukyuli ɔni náƒiɔ tina-bu si ami ku mina ubi Yonatan na ɔdi iye bekpone bammɔ akɔ ɔdi na ɔdi.” Mmɔ na kenye budie bɔmmɔ búbo ka ɔga ku Yonatan akɔ ɔdi na ɔdi, na útasi bekyuli bammɔ.

⁴² Anwuɔsu Saul ɔ́su Ahiya ɔnini, “Amu die tina ami ku Yonatan ntɛ bula akɔ ɔni geen na ɔdi.” Na úbalɛ Yonatan lɛlɔ ka anwu nábla likpidi.

⁴³ Amu na Saul úye Yonatan momoomo ɔnini, “Su-mi lɛla lɛni na ábla!” Mmɔ na Yonatan údie kenye ɔnini, “Mina ugyii ɔdadi na líti lɛ́tu uwɔ lɛ́yalɛ. Anwuɔsu bukpi na ɔlɛka likpi?”

⁴⁴ Amu na Ɔga Saul údie kenye ɔnini, “Katɔti ɔbla-mi lɛla biala na ɔɔyɔ́ si ńtaya na badu awɔ, Yonatan.”

⁴⁵ Mmɔ na bekpone bammɔ básu banini, “Bulénu kalɔ bɔnii ukpi, ɔsika Yonatan na Katɔti úbunku asa na bɔ́di kekpo kamɛni lɛlɔ. Anwuɔsu ɔkɛnku Unwoti ɔni nli ngba lɛlɔ ni, bɔɔɔdubo bɔtuna na ina nwuna lili linwini linwi pɛ muedi lɛtimi-nwu lili.” Ɔmmɔ ɔsu bekpone bammɔ békpo báƒɔ Yonatan na bátadu-nwu.

⁴⁶ Amu na Saul ɔ́da Ƒilistiƒuɔ kama bɔsia ɔ́ya na bátɔlɔ bésie bana kalɔ.

⁴⁷ Kama ka Saul ɔ́sɔ únwini úbo ɔɔdi Israelƒuɔ ƒui lɛlɔ ni, únye na úkpoku nwuna bekisine bani náka bámana-nwu. Na badi Moabƒuɔ ku Amonƒuɔ ku Edomƒuɔ ku Soba baga ku Ƒilistiƒuɔ lɛlɔ.

⁴⁸ Úkpo lɛnanabi kemmo na ɔ́di Amalekƒuɔ lɛlɔ na údie Israel na bekisine bani ƒui nnye muukpóku-nwu na beeƒie-ma ala taaƒɔ ƒui enu kemmo.

Saul Ku Nwuna Kaduli Bekyuli

⁴⁹ Na Saul bebi bananabi ndi Yonatan ku Iswi ku Malki-Saul. Na ubidi ulekubi unengudi ndi Merab na ɔnamudi ndi Mikal.

⁵⁰ Na Ahimaas ubidi ulekubi ɔni baalɔ Ahinoam ndi ulekudi. Na nwuna bekpone ɔtɔnkune baalɔ Abner. Na Saul ɔti ɔnwani ɔnanabi ɔni baalɔ Ner náwɔ Abner ɔni ndi nwuna bekpone ɔtɔnkune ɔmmɔ.

⁵¹ Abiel náwɔ Saul ɔti ɔni baalɔ Kis ku Abner ɔti ɔni baalɔ Ner.

⁵² Na Ɔga Saul ngba bulie uwi ƒui ni, kekpo kpakplaa kákya ama ku Ƒilistiƒuɔ ntɛ geen. Anwuɔsu uwi biala na Saul ɔ́nu ukyuli ɔni na ubo kayi ni, na ɔɔwia ka ɔni-nwu ɔkya lɛlɔ na utaabla-nwu kabla.