Samuel 1 12 - Katɔti Ɔku Kedee

Samuel Ɔ́tɛmi Úte Israelƒuɔ Na Ɔ́kada-ma

¹ Ɔmmɔ kama ni, Samuel ɔ́su Israelƒuɔ ɔnini, “Lɛ́bla lɛla lɛni na bívele-mi líte-mii. Na lɛ́ƒuna ɔga ɔni na bɛɛwia ka utaadi-mii lɛlɔ líte-mii.

² Ɔƒaani ni, bibo ɔga ɔni mɔɔtɔnku-mii. Na ami ni, mina akwa éesie anumi na mina lili lɛ́ƒuala. Na mina bebi bakya-mii akɔ mɛni. Ami nátɔnku-mii ɔ́si mina lɛnamu uwi ƒui úti úbedu ɔƒaani.

³ Na bɛɛnu kalɛ na nnye-mii anumi ɔmwi. Na ɔni na bunye Unwoti ku bina ɔga ɔƒunadi anumi mɛni ni, ɔdi ɔdubɔkana na udie ɔtina likpidi lɛni na lɛ́bla-nwu? Bina akɔ ɔmani ɔmantɛ akɔ iye ebuo ala utine na líƒie lɛ́ƒɔ? Munuu ɔdi ɔkya-mii akɔ ɔni na lɛ́nya-nwu lɛ́kya na ulu ɔdi lɛlɔ? Iye ni, líti etila adi lɛ́sia ɔdi lɛlɔ? Iye lɛ́bɛ lɛ́ƒɔ lɛla lɛdi lɛ́siku ɔdi kudɔ lɛ́di, na lɛ́du ɔbambadi kalala kɔtɔ na líte anwu ubo? Na si ɔdi ɔ́kana na údie kenye ka ala amɛni ɔdi use lɛni ni, bɛsu bɛlɛku na lɛƒɔ kayu kammɔ na lɛla lɛmmɔ lili.”

⁴ Amu na bana ƒui bédie kenye banini, “Ala ammɔ ƒui ɔdi uuuse lɛni. Átanya bula ɔdi átakya ulu ɔdi lɛlɔ, iye etile ɔdi etila adi, iye eƒie ɔdi lɛla lɛdi aƒɔ ɔkplu kemmo.”

⁵ Mmɔ na Samuel ɔ́su-ma ɔnini, “Ɔmwi ni, Unwoti ku Ɔga Ɔƒunadi ɔmɛni ndi bekyuli bani nnye na bénu etemila ani na amii alati bɛ́su mɛni. Na ani ndi ka bítanu ɔdi lɛla lɛdi na mina enu kemmo.” Amu na bana ƒui bédie kenye ku lɛdi linwi banini, “Ɛɛn, ama ndubudie-bu etemila amɛni kenye.”

⁶ Ɔmmɔ kama Samuel ɔ́sɔ ɔ́su-ma ɔnini, “Unwoti ɔlati náƒuna Mose ku Aaron ka batɔnku bula bati kuuku. Na ama nákpanku-ma bálɛku Egyipte kalɔ lɛlɔ.

⁷ Na ɔƒaani ni, bibimi bina atu na binu kaduɛ ka bɛ́ƒiɔ Unwoti ɔni na nka anwu mɔɔtɔnku-mii na bíti bina anu ƒui bɛ́sia-nwu lɛlɔ. Na bitaakali taanu ala abuni ani na ɔ́bla úte amii ku bina bati kuuku.

⁸ “Uwi ɔni na Yakob ku nwuna kaba bekyuli bátɔlɔ bésie Egyipte kalɔ lɛlɔ kama ƒui ni, bákpali Unwoti bévele-nwu ku keku ka ubunku-ma. Amu na Unwoti ɔ́ya Mose ku Aaron bákpanku-ma bálɛku Egyipteƒuɔ kalɔ lɛlɔ béboku kalɔ kani lɛlɔ na bilie mɛni kemmo.

⁹ “Nsu ɔmɛni ƒui ni, bula bati kuuku bammɔ báyiƒala Unwoti bana Katɔti. Ɔmmɔ ɔsu na anwu lɛnɔ úte kuƒi na bana bekisine békpoku-ma. Na bekisine bammɔ akɔ ɔdi ndi Sisera, Hasor bekpone ɔtɔnkune. Ukisine ɔbambadi ɔni nádi-ma lɛlɔ lɛnɔ ndi Ƒilistiƒuɔ. Na Moabƒuɔ ku bana ɔga lɛnɔ bábadi-ma lɛlɔ.

¹⁰ Na uwi biala na bádi-ma lɛlɔ lɛni ni, beenwíni kayi na bewulo bevele Unwoti banini, ‘Bɔ́bla alaekpidi bɔ́ƒiɔ-ɔ, O Unwoti, na búnwini kama bɔ́kya-a na bɔɔkpá ala bamba, aani Baal baƒiɔ ku Astarot baƒiɔ. Nsu ɔƒaani ni, die-bu lɛku bula bekisine enu kemmo na bɔdubɔbla-a kabla.’

¹¹ Na Unwoti ɔ́tala Yerubaal ɔni basɔ baalɔ Gideon, Barak ku Yeƒta. Na kawɔlɔkɔ kamɛni ni, ɔ́tala ami Samuel. Na úkpo ɔ́ƒɔ-mii ɔ́lɛku bina bekisine bani nkya bina amadɔ ƒui enu kemmo na bɛ́kɛ bɔnwuna.

¹² “Nsu ina ka bina Unwoti Katɔti nádi bina ɔga ni, bíni-nwu uwi ɔni na Amonƒuɔ Ɔga Nahas ɔ́tɔnku nwuna bekpone ka bebekpoku-mii. Na bɛ́su bɛnini, ‘Bɔɔwia ɔga na utaadi-bu lɛlɔ.’

¹³ Bɛɛnu ɔga ɔni na bɛ́ƒuna na bívele ka bese bete-mii. Unwoti úse ɔga ɔmmɔ úte-mii, na utaadi-mii lɛlɔ.

¹⁴ Na ɔƒaani si bɛɛbu Unwoti bina Katɔti, na amii ku bina ɔga ƒui bɛɛdi nwuna etemila lɛlɔ na bítenwini kama bítakya-nwu ni, lɛla biala lɛdubɔtɛ lite-mii.

¹⁵ Nsu si bɛ́ta bínye Unwoti ɔda bubo lɛlɔ na bíni ka bɛsiaku-nwu kama ni, ɔdubo-mii kɔtu bɔni aani kalɛ na ɔ́ni bina bati kukuuku kɔtu.

¹⁶ “Bise atu na binu ala abuni ebendi ani na Unwoti ɔdubo bɔbla na bina anumi.

¹⁷ Ɔɔɔdi uwi ɔmɛni na baaƒɛ kamu yoo? Na bɛgyi lɛnɔ ka si edula ɔƒɛwi ɔmɛni údu ni, ɔnantu ɔsɔ ulána. Nsu ina ka use lɛni ni, ndubo Katɔti bɔkpali na ɔya na ɔnantu ɔna. Na kayaa kataabwɛ ogya. Na ɔmɛni ɔdubɔya na bɛti kalɛ na likpidi lɛni na bɛ́bla líbomo ɔni na bíye bɛnii bete-mii ɔga na utaadi-mii lɛlɔ ɔsu.”

¹⁸ Amu na Samuel ɔ́su Unwoti ɔnii ɔya na kayaa kataabwɛ ogya, na ɔnantu lɛnɔ utaana. Na limeyi lɛmmɔ kani ni, Unwoti ɔ́ya na ɔnantu ɔ́na, na kayaa lɛnɔ kaabwɛ ogya kalɛ kani na Samuel úvele-nwu. Mmɔ ni, bekyuli bammɔ ƒui báyia Unwoti ku Samuel.

¹⁹ Na bekyuli bammɔ ƒui bévele Samuel banini, “Vele Unwoti ƒula Katɔti te abu ƒula kabla bablane kalɛ na bulekpi. Bɔɔyia ka bɔdubo bukpi, ɔsika na alaekpidi ani ƒui na bɔ́bla kama ni, bɔ́sɔ bɔ́su-nwu ka use ɔga ute-bu.”

²⁰ Nsu Samuel úse-ma kayi ɔnini, “Bɛsɔ bitayia. Sɔsɔ na ɔdi ka bɛ́bla ala buɛ amɛni. Nsu bɛda udu ɔmmɔ bɛya na bɛsɔ bitenwini kama bitakya Unwoti. Mmomu biti bina kayi ƒui bɛbla-nwu kabla.

²¹ Biteni Unwoti na bitaakpa baƒiɔ. Ala ammɔ kama bɔsiaku buuubo kɔsia kɔdi. Na alakana-mii bubunku lɛnɔ, iye aƒɔ-mii na bina bekisine enu kemmo.

²² Nwuna lɛnyi bonwu lɛni náƒɔ kuye ɔsu ni, Unwoti ɔɔɔdubo nwuna bekyuli buni, ɔsika ɔɔyɔ́-nwu kaƒɔ ka ɔbla-mii nwuna kadi bekyuli.

²³ “Na ami geen ni, uwi ɔdi uuubo na basu banii ndubɔda Unwoti bɔkpali bɔya na bina lili, na unwini-mi likpidi. Na ndubɔtina-mii lɛla lɛni ndi lɛbuni na lɛdia ka bitaabla.

²⁴ Nsu bɛsia anu na bitaayia Unwoti, na bɛsiaku-nwu kama siin, na bitaadi nwuna litemi lɛlɔ ku bina kayi ƒui. Na biteenyimo ala ebendi ani na ɔ́ɔbla úte-mi.

²⁵ Na mmomu si bɛmu binye bɛɛbla alaekpidi ni, bekisine badubo amii ku bina ɔga ƒui lɛlɔ bɔdi na bayila-mii udu.”