Sakaria 5 - Katɔti Ɔku Kedee

Ala Bɔnu Kɔkundi Kɔkɛnku Kakunkɛ Kani Muuveyi

¹ Ɔmmɔ kama ni, lɛ́nu ka ebuo ɔku kakunkɛ kadi kéveyi kaaví.

² Na ɔtu ɔmmɔ úye-mi ɔnini, “Bi na aanu mmɔ?” Amu na lídie kenye nnini, “Mɔɔnu ka ebuo ɔku kakunkɛ kani bune mabla aani lɛgba avlaatɛ na kana bɔbɛbɛ bɔbla aani lɛgba leevu-ɛlɔ kéveyi kaaví.”

³ Amu na ɔ́su-mi ɔnini, “Kakunkɛ kamɛni muuwida ukyuli biala ɔni muuyú iye ɔɔnyi ɔkɔ taatɔlɔ bekyuli na kalɔ kamɛni lɛlɔ. Ala ani na bénweni básia kakɛ kenwi kaatɛmi taasiku kalɛ na badubo beyune udu bɔyila lɛlɔ. Na ala ani na bénweni básia kakɛ kakladi lɛlɔ ɔɔtɛmi taasiku kalɛ na badubo bekyuli bani mɔɔnyi ɔkɔ lɛnɔ udu bɔyila lɛlɔ.

⁴ Unwoti Ɔyikune Ƒui ɔnini, ‘Líti kakunkɛ kamɛni muumene ukyuli biala na ɔdi uyune kaduli iye ɔda-mi lɛnyi na ɔkɛ ɔɔnyi ɔkɔ taavi. Na kakunkɛ kamɛni kadubɔƒɔ lɛlɔ kakya kaduli kammɔ kemmo útédu uwi ɔni na ligyiiku iye lɛtabi biala lɛ́bwɛ lɛ́yii udu.’ ”

Ala Bɔnu Maatɛdi Bɔkɛnku Uleku Ɔni Nkya Kagyigyɛ Kemmo

⁵ Na Katɔti ɔtu ɔni nnye mmɔ na uudie ala budie taatina bɔmɛni kalɔ mmɔ ɔ́ni úde-mi, na ɔ́su-mi ɔnini, “Nwini na anu kayaa, na asu-mi lɛla lɛni na aanu.”

⁶ Amu na lɛ́su-nwu nnii lɛɛɛgyi lɛla lɛni na lɛdi. Mmɔ na ɔ́su-mi ɔnini, “Kagyigyɛ bonwu kadi na kadi, na kayawi kamɛni bekyuli ƒui ekpidi ani na baabla nkya-ka kemmo.”

⁷ Bébimi kagyigyɛ kammɔ abuala libila, na uleku ɔdi nkya-ka kemmo.

⁸ Amu na ɔtu ɔmmɔ ɔ́su-mi ɔnini, “Uleku ɔmɛni unye ute likpidi lɛni nkya kayawi.” Ɔmmɔ kama ni, ɔ́sɔ údi uleku ɔmmɔ útákya kagyigyɛ kammɔ kemmo, na ɔ́sɔku abuala libila lɛmmɔ úbi kagyigyɛ kammɔ kenye kpakplaa.

⁹ Kɔnakunwi na ɔmmɔ kama ni, lɛ́nu beleku inyɔ badi ka béveyi bakɛ kayaa aani baƒiɔlɔƒiɔ na bébimi bana avwi bɛbɛɛbɛ na bakya ɔƒɛƒɛɛ kemmo. Kɔnakunwi ni, bágyu kagyigyɛ kamɛni bákɔliku kayaa.

¹⁰ Mmɔ na líye ɔtu ɔmmɔ nnini, “Wɛ na béti kagyigyɛ kammɔ béselaku?”

¹¹ Amu na ɔ́su-mi ɔnini, “Babilon. Mmɔ na bésela batátu ɔtɔ ɔdi bete-ka na beti-ka bese mmɔ.”